ယေဟောဝါသက်သေများရဲ့ အုပ်ချုပ်ရေးအဖွဲ့ဝင် လို​င်​မဲ​န် စွင်ဂယ်က ၁၉၈၇ ခုနှစ်မှာ ဗင်နီဇွဲလား​နိုင်ငံ၊ ဗလ​န်​စီ​ယာ​မြို့ ပ​လာ​ဇာ မိုနူ​မ​န်​တယ်​ကွင်း​မှာ စုဝေး​သူ ၆၃,၅၈၀ ကို ဟောပြောချက် ပေးခဲ့တယ်။ ဟောပြောချက်ကို နားထောင်ဖို့ အများစုက တစ်ညလုံး ဘတ်စကား စီး​ပြီး လာ​ခဲ့​ကြ​တာ။ လူအုပ်စုကြီး​ကို ညီအစ်ကို စွင်ဂယ်က “ဌာနခွဲ​လေး မဟုတ်တော့ဘူး။ ဌာနခွဲ အ​လတ်​စား ဖြစ်နေပြီ။ ကြည့်​ရတာ သိပ်​မကြာခင် ‘ကြေညာသူ ၁၀၀,၀၀၀’ ပြည့်​တော့​မယ်” လို့​ပြောခဲ့တယ်။

၁၉၈၇ ခုနှစ်​တုန်း​က ဗင်နီဇွဲလား​မှာ ဘုရား​နိုင်ငံတော် သတင်းကောင်းကို တက်တက်ကြွကြွ ကြွေးကြော်သူ ၃၈,၀၀၀ ကျော် ရှိတယ်။ အဲဒီတုန်းက ကြေညာသူ ၁၀၀,၀၀၀ ကျော်​တဲ့ နိုင်ငံ ရှစ်​နိုင်ငံ​ပဲ ရှိတယ်။

ယေဟောဝါသက်သေများရဲ့ ကမ္ဘာ​တစ်ဝန်း တိုးတက်မှု​က စွဲမှတ်စရာ​ကောင်းတယ်။ ပထမ​ကမ္ဘာစစ်​ပြီးတော့ ယေဟောဝါ​နိုင်ငံတော်အကြောင်း ကြေညာသူ သောင်း​ဂဏန်း​လောက်​ပဲ ရှိသေးတယ်။ အပြောင်းအလဲ ဖြစ်ခဲ့​ပါတယ်။ ယေဟောဝါသက်သေများရဲ့ ၁၉၄၃ နှစ်ချုပ်​စာအုပ်မှာ ဒီလို​ဖော်ပြ​ထားတယ်– “အဆက်အသွယ် မရလို့ မ​စုံ​ပေမဲ့ ၁၉၄၂ ခုနှစ် မှတ်တမ်း ချုပ်​လိုက်တဲ့အခါ ကောင်းချီး​တစ်ခု တွေ့ရတယ် . . .။ အခု ကမ္ဘာ​တစ်ဝန်း [သတင်းကောင်း ဟောပြောခြင်း] လုပ်ငန်းမှာ ပါဝင်​မှတ်တမ်းသွင်း​နေတဲ့ ကြေညာသူ ၁၀၆,၀၀၀ ယောက် ရှိနေပြီ။” ဒုတိယ ကမ္ဘာစစ်​အတွင်းမှာ​တောင် ကျမ်းစာ​အမှန်တရားကို လူများစွာ လက်ခံ​တုံ့ပြန်​ခဲ့​ကြတယ်။ ၁၉၅၀ ပြည့်နှစ်မှာ အမေရိကန်​ပြည်ထောင်စု တစ်နိုင်ငံ​တည်း​ပဲ ကြေညာသူ ၁၀၀,၀၀၀ ကျော်​တဲ့ နိုင်ငံ ဖြစ်တယ်။

ဒုတိယ​လိုက်တဲ့ နိုင်ငံက နိုင်ဂျီးရီးယား ဖြစ်ပြီး ၁၉၇၄ ခုနှစ်မှာ ကြေညာသူ ၁၀၀,၀၀၀ ကျော်သွား​တယ်။

နောက်​နှစ်မှာ ဘရာဇီး​နဲ့ ဂျာမနီ​လည်း ကြေညာသူ ၁၀၀,၀၀၀ ကျော်သွား​တယ်။ တိုက်ကြီး​လေး​တိုက်​မှာ ဒီလို​တိုးတက်မှု​က ကျမ်းစာ​အမှန်တရားကို တစ်​ကမ္ဘာလုံး နှစ်သက်​လက်ခံ​ကြ​ကြောင်း သက်သေထူ​တယ်။

ကမ္ဘာတစ်ဝန်းမှာ သတင်းကောင်းကို လက်ခံသူ အရေအတွက် ဆက်​တိုးတက်​လာတယ်။ ကျမ်းစာပါ ဒီ​ကြိုဟောချက်​အတိုင်း ဖြစ်ခဲ့တယ်– “လူနည်းစု​လေး​ဟာ လူ​တစ်ထောင် ဖြစ်လာမယ်။ အရေးမပါတဲ့​သူဟာ အားကြီးတဲ့​လူမျိုး ဖြစ်လာမယ်။ အချိန်တန်​တဲ့အခါ ဒီလို​ဖြစ်လာအောင် ငါ​ယေဟောဝါ​ကိုယ်တိုင် အရှိန်အဟုန် မြှင့်​မယ်။”​—ဟေရှာယ ၆၀:၂၂။

၂၀၁၄ လုပ်ငန်းတော်နှစ် မှတ်တမ်းအရ ယေဟောဝါ​သက်သေ ၁၀၀,၀၀၀ ကျော်​တဲ့​နိုင်ငံ ၂၄ နိုင်ငံ ရှိတယ်။ အဲဒီ​ထဲမှာ ဗင်နီဇွဲလား​လည်း ပါပြီး ၂၀၀၇ ခုနှစ်မှာ သမိုင်း​မှတ်တိုင် ထူခဲ့​တာ​ပါ။ ကမ္ဘာတစ်ဝန်းမှာ ယေဟောဝါ​သက်သေ အသင်းတော်​ပေါင်း ၁၁၅,၄၁၆ ခု​ရှိပြီး ကြေညာသူ ၈,၂၀၁,၅၄၅ ယောက် ရှိတယ်။