ယူရီ ဘီလပ်စူ့ဖ်

• မွေးဖွားတဲ့နှစ်– ၁၉၆၄ (စမစ်ဒိုဗစ်ချ်၊ ဂျူးကိုယ်ပိုင် အုပ်ချုပ်ခွင့်ရ ဒေသ)

• ဘဝအတ္ထုပ္ပတ္တိ– ကျေးရွာငယ်လေးမှာ အဘွား ဖြစ်သူက စောင့်ရှောက်ခဲ့တယ်။ လျှပ်စစ် ကုမ္ပဏီတစ်ခုမှာ အင်ဂျင်နီယာအဖြစ် အလုပ်လုပ်တယ်။ စကိတ်စီးတာ၊ ငါးဖမ်းတာ ကြိုက်တယ်။

  ၁၉၈၅ ခုနှစ်မှာ ယဲလီနာနဲ့ လက်ထပ်တယ်။ မကောင်းမှုနဲ့ ဆင်းရဲဒုက္ခတွေ အဆုံးတိုင်စေမယ်ဆိုတဲ့ ဘုရား ကတိကို နှစ်ယောက်စလုံး သဘောကျတယ်။ ကျမ်းစာ ကြိုဟောချက်တွေရဲ့ ပြည့်စုံမှုကို အံ့ဩမိကြတယ်။ အဲဒီအချက်တွေကြောင့် ကျမ်းစာသင်အံမှု လက်ခံပြီး ၁၉၉၄ ခုနှစ်မှာ နှစ်ခြင်းခံတယ်။

ဆာဂေး ဆာဂီဖ်

• မွေးဖွားတဲ့နှစ်– ၁၉၅၅ (ဒူဟာနီစကိုင်၊ စရာတော့ ဒေသ)

• ဘဝအတ္ထုပ္ပတ္တိ– ပင်စင်ယူတဲ့ အချိန်အထိ ကျောက်မီးသွေးတွင်းမှာ အလုပ်လုပ်တယ်။ ၁၉၉၁ ခုနှစ်မှာ နယ်လီနဲ့ လက်ထပ်တယ်။ သမီးနှစ်ယောက်၊ သားတစ်ယောက် ရှိတယ်။ ဇနီးမောင်နှံ နှစ်ယောက်စလုံး ခွေးချစ်ကြတယ်။

  လက်ထပ်ပြီး မကြာခင် ကျမ်းစာ စလေ့လာကြတယ်။ ကျမ်းစာ ကြိုဟောချက်တွေရဲ့ တိကျမှုနဲ့ လက်တွေ့ကျ အကြံပြုချက်တွေကို သဘောကျတယ်။ ၁၉၉၆ ခုနှစ်မှာ နှစ်ခြင်းခံတယ်။

၂၀၁၉၊ မတ် ၁၇ မှာ ဖယ်ဒရယ် လုံခြုံရေးဌာန (FSB) အရာရှိတွေက လူချီဂေါစ်၊ ပရီမိုရ် ဒေသမှာရှိတဲ့ ယေဟောဝါသက်သေ အိမ်တွေကို ဝင်ရောက်စီးနင်းကြတယ်။ ညီအစ်ကို ညီအစ်မတွေ စစ်မေးခံရတယ်။ တချို့ဆို ခုနစ်နာရီလောက် စစ်မေးခံရကြတယ်။ ယူရီနဲ့ ဆာဂေး ဖမ်းဆီးထိန်းသိမ်းခံရတယ်။

နှစ်ရက်ကြာပြီးနောက် ညီအစ်ကို နှစ်ယောက်စလုံး ယာယီအချုပ်ထောင်ဆီ ပို့ခံရပြီး ခြောက်လကျော် နေရတယ်။ ၂၀၁၉၊ စက်တင်ဘာမှာ ပြန်လွတ်လာပြီးနောက် နေအိမ်အကျယ်ချုပ်နဲ့ ငါးလနီးပါး ဆက်နေရတယ်။

ထိန်းသိမ်းရေး စခန်းမှာ ကြုံရတဲ့ အခြေအနေတွေကို ရင်ဆိုင်နိုင်ဖို့ ဆုတောင်းခြင်းက ကူညီပေးတယ်လို့ နှစ်ယောက်စလုံး အသိအမှတ်ပြုတယ်။ အပြုသဘောထား ဆက်ရှိဖို့ ကျမ်းစာကလည်း ကူညီပေးတယ်လို့ ဆာဂေး ပြောတယ်။ “‘ကျွန်တော့်ကို ညှဉ်းဆဲရင် ခင်ဗျားတို့ကိုလည်း ညှဉ်းဆဲကြလိမ့်မယ်’ ဆိုတဲ့ ယေရှုရဲ့ စကားကို ပြန်သတိရမိတယ်။ (ယောဟန် ၁၅:၂၀) ‘အခု ငါကြုံရသမျှကို ယေရှုခရစ်၊ တပည့်တွေနဲ့ တမန်တော်တွေလည်း ကြုံခဲ့ရပါလား။ ငါကောင်းကောင်း သက်သေခံနိုင်မယ်ဆိုတာ ယေဟောဝါ ယုံကြည်လို့ပဲ’ ဆိုပြီး တွေးမိတယ်။ အဲဒီလို တွေးတာ၊ ဆုတောင်းချက် အဖြေ ရတာတွေက အားရှိစေပြီး တည်တည်ငြိမ်ငြိမ် ရှိဖို့ ကူညီပေးတယ်” လို့ ဆာဂေး ပြောတယ်။

အရင်ကဆို ကျမ်းစာပုံမှန်ဖတ်ဖြစ်ဖို့ နည်းနည်း ခက်တယ်လို့ ယူရီ ပြောတယ်။ ဒီကဏ္ဍမှာ တိုးတက်ဖို့ ညီအစ်ကိုတစ်ယောက် ကူညီပေးတယ်။ အချုပ်ကျချိန်မှာ အဲဒီအလေ့အထကောင်းက သူ့ကို ထောက်ကူပေးခဲ့တယ်။ “ကျမ်းစာနဲ့ အဖွဲ့အစည်းစာပေတွေထဲမှာ ဖတ်ဖူးတဲ့ ပုံနမူနာတွေကို ပြန်တွေးတယ်။ အဲဒါက အားရှိစေပြီး ဆက်ပျော်ရွှင်စေတယ်။ အစိုးရိမ် မလွန်ဖို့လည်း ကူညီပေးတယ်” လို့ ယူရီ ပြောတယ်။

ရုရှားက ညီအစ်ကို ညီအစ်မတွေ “ဒုက္ခရောက်ချိန်မှာ” ယေဟောဝါဟာ သူတို့ရဲ့ ‘ခိုလှုံရာ၊ အစွမ်းခွန်အား’ ဆက်ဖြစ်နေပါစေလို့ ကျွန်တော်တို့ ဆုတောင်းပေးပါတယ်။ ဆက်ဖြစ်နေမယ်ဆိုတာကိုလည်း ယုံကြည်စိတ်ချပါတယ်။—ဆာလံ ၄၆:၁။