“ဘုရားသခင်က ‘ငါတို့ရဲ့ ပုံသဏ္ဌာန်အတိုင်း၊ ငါတို့နဲ့ တူတဲ့ လူကို ဖန်ဆင်းကြစို့။ သူက ပင်လယ်ငါးတွေ၊ မိုးကောင်းကင်မှာ ပျံတဲ့ ငှက်တွေ၊ သားယဉ်တွေ၊ တွားသွားသတ္တဝါတွေနဲ့ မြေတစ်ပြင်လုံးကို အုပ်စိုးစေ’ လို့ ပြောတယ်။”—ကမ္ဘာဦး ၁:၂၆၊ ကမ္ဘာသစ်ဘာသာပြန်ကျမ်း။

 “ဘုရားသခင်က ‘ငါတို့ပုံသဏ္ဌာန်နှင့် တညီတသဏ္ဌာန်တည်း လူကို ဖန်ဆင်းကြစို့။ သူသည် ပင်လယ်ငါးတို့ကိုလည်းကောင်း၊ မိုးကောင်းကင်ငှက်တို့ကိုလည်းကောင်း၊ သားယဉ်တို့ကိုလည်းကောင်း၊ မြေတစ်ပြင်လုံးနှင့်တကွ၊ မြေပေါ်မှာ တွားတတ်သော တိရစ္ဆာန်အပေါင်းတို့ကိုလည်းကောင်း အုပ်စိုးစေ’ ဟု အမိန့်တော် ရှိ၏။”—ကမ္ဘာဦး ၁:၂၆၊ ယုဒသန်ကျမ်း။

 ဘုရားသခင်ရဲ့ ပုံသဏ္ဌာန်အတိုင်း လူကို ဖန်ဆင်းထားတဲ့အတွက် လူတွေဟာ ဘုရားသခင်မှာ ရှိတဲ့ ချစ်ခြင်းမေတ္တာ၊ ကိုယ်ချင်းစာနာမှု၊ တရားမျှတမှုစတဲ့ အရည်အသွေးတွေကို မွေးမြူပြီး တင်ပြနိုင်ကြခြင်း ဖြစ်တယ်။

 ‘ဘုရားသခင်က “ငါတို့ရဲ့ ပုံသဏ္ဌာန်အတိုင်း လူကို ဖန်ဆင်းကြစို့” လို့ ပြောတယ်။’ ယေဟောဝါဘုရားက a ပုဂ္ဂိုလ်တစ်ဦးဦး၊ အရာတစ်ခုခုကို မဖန်ဆင်းခင် တန်ခိုးကြီးတဲ့၊ နောက်ပိုင်းမှာ ယေရှုလို့ ခေါ်တဲ့ ကောင်းကင်တမန်တစ်ပါးကို ဖန်ဆင်းတယ်။ “ကောင်းကင်နဲ့ ကမ္ဘာမြေပေါ်မှာ ရှိရှိသမျှ” ကို ယေရှုအားဖြင့် ဖန်ဆင်းတယ်။ (ကောလောသဲ ၁:၁၆) ယေရှုဟာ ယေဟောဝါရဲ့ အရည်အသွေးတွေကို အတုယူတယ်။ “သူဟာ မျက်စိနဲ့ မမြင်နိုင်တဲ့ ဘုရားသခင်ရဲ့ ပုံသဏ္ဌာန် ဖြစ်တယ်။” (ကောလောသဲ ၁:၁၅) ဒါကြောင့် ဘုရားသခင်က ယေရှုကို “ငါတို့ရဲ့ ပုံသဏ္ဌာန်အတိုင်း ငါတို့နဲ့ တူတဲ့ လူကို ဖန်ဆင်းကြစို့” လို့ ပြောနိုင်ခဲ့ခြင်း ဖြစ်တယ်။

 “သားယဉ်တွေ၊ တွားသွားသတ္တဝါတွေနဲ့ မြေတစ်ပြင်လုံးကို အုပ်စိုးစေ။” တိရစ္ဆာန်တွေကို ဘုရားသခင့် ပုံသဏ္ဌာန်နဲ့အညီ ဖန်ဆင်းထားတာ မဟုတ်ဘူး။ ချစ်ခြင်းမေတ္တာလိုမျိုး လူတွေမှာ ရှိတဲ့ ထူးခြားတဲ့ အရည်အသွေးတွေ ထည့်သွင်းဖန်ဆင်းထားတာ မဟုတ်ဘူး။ တိရစ္ဆာန်တွေမှာ အမှားအမှန်သိစိတ်ဆိုတာ မရှိဘူး။ ဒါပေမဲ့ ဘုရားက တိရစ္ဆာန်တွေကို ဂရုစိုက်တယ်။ ဒါကြောင့် တိရစ္ဆာန်တွေကို “အုပ်စိုး” ပါဆိုပြီး လူတွေကို မိန့်မှာရခြင်း ဖြစ်တယ်။ တိရစ္ဆာန်တွေကို ဂရုစိုက်စောင့်ရှောက်ရမယ့်တာဝန် ပေးတယ်။ (ဆာလံ ၈:၆-၈။ ပညာအလိမ္မာ ၁၂:၁၀) လူတွေအနေနဲ့ ကမ္ဘာမြေနဲ့ သက်ရှိအားလုံးကို ဂရုစိုက်စောင့်ရှောက်ဖို့ ယေဟောဝါ အလိုတော် ရှိတယ်။

 ကမ္ဘာဦးကျမ်း ပထမ အခန်းကြီး နှစ်ခုက စကြဝဠာ၊ ကမ္ဘာဂြိုဟ်နဲ့ သက်ရှိအားလုံးကို ဖန်ဆင်းတဲ့အကြောင်း ခြုံငုံဖော်ပြတယ်။ ယေဟောဝါဘုရား ဖန်ဆင်းသမျှဟာ အလွန် လက်ရာမြောက်တယ်။ အားလုံးထဲမှာ လူဟာ အထူးခြားဆုံးပါ။ ဖန်ဆင်းခြင်း ပြီးစီးသွားတဲ့အခါ “ဘုရားသခင်က ဖန်ဆင်းထားရာအားလုံး သိပ်ကောင်းတယ်ဆိုတာကို မြင်တယ်။”—ကမ္ဘာဦး ၁:၃၁။

 ကမ္ဘာဦးကျမ်းပါ ဖန်ဆင်းခြင်းမှတ်တမ်းကို ပိုသိနိုင်ဖို့ ဒီဗီဒီယိုတိုကို ကြည့်ပါ။

 ယူဆချက်အမှား။ ကမ္ဘာဦး ၁:၂၆ အရ ယေရှုဟာ ဘုရား ဖြစ်တယ်။

 အမှန်။ ဘုရားသခင်နဲ့ ယေရှုဟာ သားအဖလို ရင်းနှီးတဲ့ ဆက်ဆံရေး ရှိပေမဲ့ ပုဂ္ဂိုလ်တစ်ဦးတည်း မဟုတ်ဘူး။ ဘုရားဟာ မိမိထက် ကြီးမြတ်တယ်လို့ ယေရှု သွန်သင်တယ်။ (ယောဟန် ၁၄:၂၈) ပိုသိနိုင်ဖို့ ယေရှုဟာ ဘုရားလား ဗီဒီယိုကို ကြည့်ပါ။ “ယေရှုကို ဘုရားသခင်ရဲ့ သားလို့ ဘာကြောင့် ခေါ်သလဲ” ဆောင်းပါးကိုလည်း ဖတ်ပါ။

 ကမ္ဘာဦးကျမ်း ခြုံငုံသုံးသပ်ချက်ကို သိနိုင်ဖို့ ဒီဗီဒီယိုတိုကို ကြည့်ပါ။