“မွန်မြတ်တဲ့အရာတွေကို လက်မလျှော့ဘဲ ဆက်လုပ်ကြစို့။ လက်မလျှော့ဘူးဆိုရင် အချိန်တန်တဲ့အခါ အသီးအပွင့်တွေကို ရိတ်သိမ်းရလိမ့်မယ်။”—ဂလာတိ ၆:၉၊ ကမ္ဘာသစ်ဘာသာပြန်ကျမ်း။

 “ငါတို့သည် အားမလျော့၊ စိတ်မပျက်ဘဲ ကောင်းသောအကျင့်ကို ကျင့်ကြကုန်အံ့။ ထိုသို့ တည်ကြည်၍ကျင့်လျှင် အချိန်တန်သောကာလ၌ အသီးအနှံကို ရိတ်ရကြလိမ့်မည်။”—ဂလာတိ ၆:၉၊ ယုဒသန်ကျမ်း။

 ဘုရားအမြင်မှာ မွန်မြတ်တဲ့၊ ကောင်းမွန်တဲ့အရာတွေကို တစိုက်မတ်မတ် ဆက်လုပ်နေဖို့ ခရစ်ယာန်တွေကို တမန်တော်ပေါလု အားပေးနေတာ။ အဲဒီလိုလုပ်နေရင် ဘုရား ဆုချမယ်ဆိုတာ ယုံကြည်စိတ်ချနိုင်တယ်။

 “လက်မလျှော့ဘဲ။” ဒီစကားလုံးကို “အားမလျော့၊ စိတ်မပျက်ဘဲ” လို့လည်း ပြန်ဆိုနိုင်တယ်။ မူရင်းဘာသာစကားရဲ့အဓိပ္ပာယ်က စိတ်ဓာတ်ကျမသွားတာ၊ စိတ်ထက်သန်မှု ပျောက်ဆုံးမသွားတာကို ဆိုလိုချင်ပုံရတယ်။ တမန်တော်ပေါလု ကိုယ်တိုင်လည်း တစ်ခါတလေ စိတ်ဓာတ်ကျခဲ့လို့ “ဆက်လုပ်ကြစို့” ဆိုပြီး ကိုယ်တိုင်နဲ့ တခြားသူတွေကို အားပေးတိုက်တွန်းခဲ့တာ။—ရောမ ၇:၂၁-၂၄။

 “မွန်မြတ်တဲ့အရာ၊” ကောင်းမွန်တဲ့အရာတွေထဲမှာ ဝတ်ပြုရေးအတွက် ခရစ်ယာန်တစ်ဦး လုပ်ဆောင်သင့်တဲ့အရာအားလုံး ပါဝင်တယ်။ ယုံကြည်သူချင်းနဲ့ တခြားသူတွေကို ကူညီပေးဖို့ လုပ်ဆောင်တဲ့အရာတွေလည်း ပါဝင်တယ်။—ဂလာတိ ၆:၁၀။

 “လက်မလျှော့ဘူးဆိုရင် အချိန်တန်တဲ့အခါ အသီးအပွင့်တွေကို ရိတ်သိမ်းရလိမ့်မယ်။” ကောက်နှံတွေ ကြီးထွားလာဖို့ အချိန်လိုသလို ကောင်းတဲ့လုပ်ရပ်တွေရဲ့ အကျိုးကျေးဇူးကို မြင်တွေ့ရဖို့ အချိန်လိုပုံအကြောင်း ပေါလု ပြောပြနေတာ။ ရိတ်သိမ်းခြင်းအကြောင်းပြောပြီး အခန်းငယ် ၇ မှာပါတဲ့ “လူဟာ မျိုးစေ့ကြဲတဲ့အတိုင်း ရိတ်သိမ်းရလိမ့်မယ်” ဆိုတဲ့ အခြေခံအမှန်တရားနဲ့ ချိတ်ဆက်လိုက်တယ်။ ပြောချင်တာက ခရစ်ယာန်တစ်ယောက်ဟာ ဘုရားအမြင်မှာ ကောင်းမွန်ရာကို လုပ်ရင် ထာဝရအသက်အပါအဝင် ကောင်းချီးများစွာ ရိတ်သိမ်းရပါလိမ့်မယ်။—ရောမ ၂:၆၊ ၇။ ဂလာတိ ၆:၈။

 ဒီစာကို ဂလာတိမြို့က ခရစ်ယာန်တွေဆီ အေဒီ ၅၀-၅၂ လောက်မှာ တမန်တော်ပေါလု ရေးခဲ့တယ်။ ခရစ်ယာန်လို့ ပြောပြီး ယေရှုရဲ့သွန်သင်ချက်ကို ကပြောင်းကပြန်ဖြစ်အောင် လုပ်နေသူတွေရဲ့ ဩဇာကနေ ယုံကြည်သူချင်းတွေကို ကာကွယ်ဖို့ ဂလာတိကျမ်းကို ရေးခဲ့တာ။ (ဂလာတိ ၁:၆၊ ၇) မောရှေကတစ်ဆင့် ရှေးခေတ်အစ္စရေးလူမျိုးကို ဘုရားပေးခဲ့တဲ့ ပညတ်ကို ခရစ်ယာန်တွေ လိုက်နာရမယ်လို့ အဲဒီ ဆရာတွေ တလွဲသွန်သင်နေကြတယ်။ (ဂလာတိ ၂:၁၅၊ ၁၆) ပညတ်တရားကို ပေးရတဲ့ရည်ရွယ်ချက် အထမြောက်သွားပြီဖြစ်လို့ ဘုရားကို ဝတ်ပြုသူတွေအနေနဲ့ ပညတ်တရားကို လိုက်နာစရာ မလိုတော့ဘူးဆိုပြီး ပေါလု ရှင်းပြခဲ့တယ်။—ရောမ ၁၀:၄။ ဂလာတိ ၃:၂၃-၂၅။

 “မွန်မြတ်တဲ့အရာတွေ” ဆက်လုပ်ကြဖို့ ခရစ်ယာန်တွေကို ပေါလု တိုက်တွန်းတာက မောရှေပညတ်ကို လိုက်နာခိုင်းနေတာ မဟုတ်ပါဘူး။ တခြားသူတွေကို ကောင်းမှုပြုဖို့ ယေရှုသွန်သင်ခဲ့တဲ့ “ခရစ်တော်ရဲ့တရားကို လိုက်နာ” ဖို့ အားပေးနေတာပါ။—ဂလာတိ ၆:၂။ မဿဲ ၇:၁၂။ ယောဟန် ၁၃:၃၄။

 ဂလာတိကျမ်း ခြုံငုံသုံးသပ်ချက်ကို သိနိုင်ဖို့ ဗီဒီယိုကို ကြည့်ပါ။