မိတ်ဆွေစစ်တွေကို ယုံကြည်စိတ်ချလို့ရတယ်၊ အားကိုးလို့ရတယ်။ အထူးသဖြင့် ဒုက္ခရောက်တဲ့အချိန်မှာ ကိုယ့်အပေါ် သစ္စာရှိတယ်၊ ဖေးမကြင်နာတယ်။ သိပ်ကောင်းတဲ့ မောင်နှမအရင်းအချာတစ်ယောက်လိုပါပဲ။

 “မိတ်ဆွေစစ်ဆိုတာ အချိန်အခါမရွေး မေတ္တာပြတတ်တယ်။” “မိတ်ဆွေသူငယ်ချင်းတွေက အမြဲမေတ္တာပြတယ်” လို့လည်း အဓိပ္ပာယ်ရတယ်။ ဒီမှာဖော်ပြထားတဲ့ “မေတ္တာ” ဆိုတဲ့ ဟီဘရူးစကားလုံးက ခံစားချက်သက်သက်ပဲ မဟုတ်ဘူး။ မိတ်ဆွေရဲ့အကျိုးအတွက် အနစ်နာခံပေးတာ၊ လုပ်ရပ်နဲ့ မေတ္တာကို ပြသတာဖြစ်တယ်။ (၁ ကောရိန္သု ၁၃:၄-၇) ဒီလိုမေတ္တာနဲ့နှောင်ဖွဲ့ထားတဲ့ မိတ်ဆွေသူငယ်ချင်းတွေက တစ်ယောက်နဲ့တစ်ယောက် နားလည်မှုလွဲတဲ့အခါ၊ ဘဝပြဿနာတွေ ရင်ဆိုင်ရတဲ့အခါ၊ ဆက်ဆံရေးအေးစက်သွားစေနိုင်တဲ့ အခြေအနေတွေ ကြုံရတဲ့အခါမှာလည်း လက်တွဲမဖြုတ်ကြဘူး။ တစ်ဦးကိုတစ်ဦး ကြည်ကြည်ဖြူဖြူ ခွင့်လွှတ်ကြတယ်။ (ပညာအလိမ္မာ ၁၀:၁၂) ကိုယ့်သူငယ်ချင်း ကောင်းစားသွားတဲ့အခါလည်း မနာလိုမဖြစ်ဘူး၊ ဝမ်းတောင်သာပေးတယ်။—ရောမ ၁၂:၁၅။

 “မိတ်ဆွေစစ်ဆိုတာ . . . ဒုက္ခရောက်ချိန်မှာ အားကိုးရတဲ့ ညီအစ်ကိုပဲ။” ကိုယ့်မိတ်ဆွေတစ်ယောက် ဒုက္ခရောက်ပြီဆိုရင် ကိုယ့်မောင်နှမတစ်ယောက် ဒုက္ခရောက်နေသလို သဘောထားပြီး အတတ်နိုင်ဆုံး ကူညီပေးမယ်ဆိုတဲ့ အဓိပ္ပာယ်ပါ။ အခက်ကြုံလို့ စိမ်းကားသွားမယ့် ဆက်ဆံရေးမျိုးမဟုတ်ဘူး။ တစ်ယောက်ကိုတစ်ယောက် မေတ္တာထား၊ လေးစားလို့ တစ်စထက်တစ်စ ခိုင်မြဲသွားမယ့်ဆက်ဆံရေးမျိုးပါ။

 ပညာအလိမ္မာကျမ်းထဲမှာ ပညာရှိစကားတွေ အများကြီးပါတယ်။ စာဖတ်သူ တစိမ့်စိမ့်တွေးနိုင်အောင် ထိထိရောက်ရောက် တိုတိုနဲ့လိုရင်း ရေးထားတာ။ ကျမ်းအပိုင်းအများစုကို ဘုရင်ရှောလမုန် ရေးသားခဲ့တယ်။ ဟီဘရူးကဗျာ ရေးပုံရေးနည်းနဲ့ပါ။ ကာရန်ညီအောင် ရေးစပ်ထားတာမဟုတ်ဘဲ လိုက်ဖက်ညီတဲ့ ဒါမှမဟုတ် ဆန့်ကျင်ကွဲလွဲတဲ့ အယူအဆတွေကို ပူးတွဲရေးစပ်ထားတာ။ ပညာအလိမ္မာ ၁၇:၁၇ ဟာ လိုက်ဖက်ညီတဲ့ အယူအဆချင်း ပေါင်းစပ်သီကုံးထားတဲ့ နမူနာတစ်ခုပါ။ ဒုတိယပိုင်းက ပထမပိုင်းကို အားဖြည့်ပေးတယ်။ ပညာအလိမ္မာ ၁၈:၂၄ ကတော့ ဆန့်ကျင်ဘက် အယူအဆကို ယှဉ်တွဲဖော်ပြတဲ့ စပ်ဆိုနည်းပါ။ “အချင်းချင်းကို နင်းခြေဖို့ အသင့်ဖြစ်နေတဲ့ အပေါင်းအသင်းတွေ ရှိတယ်။ ညီအစ်ကိုထက် တွယ်တာတဲ့ မိတ်ဆွေလည်း ရှိတယ်။”

 ဖခင်ဖြစ်သူဒါဝိဒ်နဲ့ ဘုရင်ရှောလုရဲ့သား ယောနသန်တို့ကြားက မိတ်ဆွေနှောင်ကြိုးအကြောင်း ပညာအလိမ္မာ ၁၇:၁၇ ကိုရေးရင်း ရှောလမုန် တွေးနေခဲ့မှာပဲ။ (၁ ရှမွေလ ၁၃:၁၆။ ၁၈:၁။ ၁၉:၁-၃။ ၂၀:၃၀-၃၄၊ ၄၁၊ ၄၂။ ၂၃:၁၆-၁၈) အမျိုးမတော်ပေမဲ့ ညီအစ်ကိုအရင်းတွေထက်တောင် ပိုချစ်ခင်ကြတာ။ ယောနသန်ဆို မိမိထက် အသက်ပိုငယ်တဲ့ မိတ်ဆွေလေးအတွက် အသက်ကိုရင်းဖို့တောင် အသင့်ပဲ။ a

 “အဆွေခင်ပွန်းသည် အခါခပ်သိမ်းချစ်တတ်၏။ ညီအစ်ကိုသည် ဒုက္ခကာလအဖို့ မွေးဖွားလျက်ရှိ၏။”—ယုဒသန်ကျမ်း။

 “အဆွေခင်ပွန်းတို့သည် အခါခပ်သိမ်း ချစ်တတ်ကြ၏။ ဒုက္ခရောက်ချိန်၌ အချင်းချင်း ရိုင်းပင်းကူညီမှု မပြုတတ်သည့် ညီအစ်ကိုတို့သည် အဘယ်သို့ အသုံးဝင်ပါတော့အံ့နည်း။”—ခေတ်သုံးမြန်မာသမ္မာကျမ်း။

 ပညာအလိမ္မာကျမ်း ခြုံငုံသုံးသပ်ချက်ကို သိနိုင်ဖို့ ဗီဒီယိုကို ကြည့်ပါ။