“သတ်မှတ်ထားချိန် ရောက်ပြီ။ ဘုရားသခင်ရဲ့ နိုင်ငံတော် နီးနေပြီ။ နောင်တရကြပါ။ သတင်းကောင်းကို ယုံကြည်ကြပါ။”—မာကု ၁:၁၅၊ ကမ္ဘာသစ်ဘာသာပြန်ကျမ်း။

 “အချိန်ပြည့်စုံပြီ၊ ဘုရားသခင်၏ နိုင်ငံတော်သည် တည်လုနီးပြီ၊ နောင်တရကြလော့။ ဧဝံဂေလိတရားကို ယုံကြည်ကြလော့။”—မာကု ၁:၁၅၊ ယုဒသန်ကျမ်း။

 ဘုရားသခင်ရဲ့ နိုင်ငံတော် a “တည်လုနီးပြီ၊” “နီးနေပြီ” လို့ ယေရှုခရစ် ပြောခဲ့တယ်။ အကြောင်းကတော့ ဘုရားသခင့် နိုင်ငံတော်ရဲ့ အနာဂတ် ဘုရင်ဖြစ်သူ ယေရှု သူတို့နဲ့အတူ ရှိနေလို့ပဲ။

 နိုင်ငံတော် စပြီးအုပ်ချုပ်နေပြီလို့ ယေရှု ဆိုလိုတာ မဟုတ်ဘူး။ နောက်ပိုင်း တပည့်တွေနဲ့ စကားပြောချိန်မှာ ဘုရားနိုင်ငံတော်က အနာဂတ်မှာ တည်ထောင်မှာ ဖြစ်ကြောင်း ဖော်ပြခဲ့တယ်။ (တမန်တော် ၁:၆၊ ၇) ဒါပေမဲ့ ယေရှုဟာ အနာဂတ် ဘုရင်အနေနဲ့ ကျမ်းစာမှာ ကြိုဟောထားတဲ့ နှစ်မှာ ပေါ်ထွန်းခဲ့တယ်။ b ဒါကြောင့် “သတ်မှတ်ထားချိန် ရောက်ပြီ” လို့ ယေရှု ပြောနိုင်ခဲ့တယ်။ နိုင်ငံတော်နဲ့ပတ်သက်တဲ့ ဧဝံဂေလိသတင်း၊ သတင်းကောင်းကို စဟောပြောရမယ့် အချိန် ရောက်ပြီ ဖြစ်လို့ပဲ။—လုကာ ၄:၁၆-၂၁၊ ၄၃။

 နိုင်ငံတော် သတင်းကောင်းကနေ အကျိုးရဖို့အတွက် လူသားတွေဟာ နောင်တရဖို့ လိုတယ်။ ဆိုလိုတာက အရင်က လုပ်ခဲ့တဲ့ အပြစ်တွေအတွက် စိတ်မကောင်းဖြစ်ပြီး ဘုရားစံနှုန်းနဲ့အညီ ပြန်နေထိုင်ခြင်း ဖြစ်တယ်။ နောင်တရသူတွေဟာ အနာဂတ် နိုင်ငံတော်နဲ့ပတ်သက်တဲ့ သတင်းကောင်းကို ယုံကြည်ကြောင်း တင်ပြကြတယ်။

 ယေရှုက ဒီစကားတွေကို ဂါလိလဲနယ်မှာ အမှုဆောင်လုပ်ငန်း စတင်တဲ့ အချိန်မှာ ပြောခဲ့တာ ဖြစ်တယ်။ ကျမ်းပြိုင်မှတ်တမ်း ဖြစ်တဲ့ မဿဲ ၄:၁၇ မှာ “အဲဒီအချိန်ကစပြီး” ယေရှုက ဘုရားသခင့် နိုင်ငံတော်အကြောင်း ဟောပြောတယ်လို့ ဖော်ပြထားတယ်။ ဘုရားနိုင်ငံတော်က ယေရှု အမှုဆောင်လုပ်ငန်းရဲ့ အဓိက အကြောင်းအရာ ဖြစ်တယ်။ ခရစ်ဝင်ကျမ်း c လေးကျမ်းမှာ ဘုရားနိုင်ငံတော်ဆိုတာ အကြိမ် ၁၀၀ ကျော် ပါတယ်။ အများစုက ယေရှု ပြောတဲ့ စကားထဲမှာ ပါတာ ဖြစ်တယ်။ ကျမ်းစာမှတ်တမ်းအရ တခြားအကြောင်းအရာတွေထက် ဘုရားနိုင်ငံတော်အကြောင်းကို ယေရှု ပိုပြောခဲ့တယ်။