“ဘုရားက အပြည့်အဝ မှီခိုတဲ့သူတွေကို ကာကွယ်စောင့်ရှောက်ပေးမယ်။ ယုံကြည်ကိုးစားတဲ့သူတွေကို တည်မြဲတဲ့ ငြိမ်သက်မှု ပေးလိမ့်မယ်။”—ဟေရှာယ ၂၆:၃၊ ကမ္ဘာသစ်ဘာသာပြန်ကျမ်း။

 “သစ္စာစောင့်၍ ဖြောင့်မတ်သောလူမျိုး ဝင်ပါစေ။ စိတ်နှလုံး တည်ကြည်သောသူသည် ကိုယ်တော်၌ ခိုလှုံသောကြောင့် ငြိမ်သက်ခြင်းသက်သက် ရှိမည်အကြောင်း စောင့်ရှောက်တော်မူလိမ့်မည်။”—ဟေရှာယ ၂၆:၃၊ ယုဒသန်ကျမ်း။

 ဘုရားအပေါ် အပြည့်အဝ မှီခိုအားကိုးသူတွေကို ဘုရား ကာကွယ်စောင့်ရှောက်ပေးတယ် ဆိုတဲ့အကြောင်း ပရောဖက် ဟေရှာယ ပြောနေတာပါ။ ဘုရားက သူတို့ကို စိတ်လုံခြုံမှု၊ ငြိမ်သက်မှု ပေးခြင်းအားဖြင့် ကာကွယ်စောင့်ရှောက်တယ်။

 “ဘုရားက အပြည့်အဝ မှီခိုတဲ့သူတွေကို ကာကွယ်စောင့်ရှောက်ပေးမယ်။” ဒီကျမ်းစကားက ယေဟောဝါ aဘုရားကို ဘယ်အခြေအနေမှာမဆို အပြည့်အဝ ယုံကြည်သွားဖို့ စိတ်ပိုင်းဖြတ်ထားသူတွေအကြောင်း ပြောနေတာပါ။ ဘုရားကို ယုံကြည်သူတွေဟာ ဘုရားကို အားကိုးဖို့ လိုမှန်း သိကြတယ်။ ဥပမာ၊ အရေးကြီး ဆုံးဖြတ်ချက် ချတဲ့အခါ ကိုယ့်ဉာဏ်ပညာကို အားမကိုးကြဘူး။ ဘာပဲလုပ်လုပ် ဘုရားအမြင်ကို ထည့်စဉ်းစားကြတယ်။ (ပညာအလိမ္မာ ၃:၅၊ ၆) ဘုရားအမြင်ကို သိချင်လို့ နှုတ်တော်ထွက် ကျမ်းစာကို အသေအချာ ဖတ်ရှုတွေးတောကြတယ်။ (ဆာလံ ၁:၂။ ၁၁၉:၁၅) အခက်အခဲ ကြုံတဲ့အခါ ယေဟောဝါဆီ ဆုတောင်းပြီး အကူအညီ တောင်းကြတယ်။ (ဆာလံ ၃၇:၅။ ၅၅:၂၂) ဒီနည်းတွေအားဖြင့် ယေဟောဝါကို မှီခိုအားထားကြောင်း ပြကြတယ်။ ဒီလို မှီခိုအားထားတဲ့အတွက် သူတို့ကို ဘုရားက ငြိမ်သက်ခြင်း ပေးတယ်။

 “ယုံကြည်ကိုးစားတဲ့သူတွေကို တည်မြဲတဲ့ ငြိမ်သက်မှု ပေးလိမ့်မယ်။” မူရင်း ဟီဘရူးကျမ်းစောင်မှာ ပိုလေးနက်စေဖို့ ရည်ရွယ်ချက်နဲ့ “ငြိမ်သက်မှု” ဆိုတာကို နှစ်ခါ သုံးထားတယ်။ “တည်မြဲတဲ့ ငြိမ်သက်မှု၊” “စုံလင်ပြည့်ဝတဲ့ ငြိမ်သက်မှု” ဒါမှမဟုတ် “ပြီးပြည့်စုံတဲ့ ငြိမ်သက်မှု” လို့ ပြန်ဆိုနိုင်တယ်။ ယေဟောဝါကို အပြည့်အဝ ယုံကြည်ကိုးစားသူတွေဟာ ဘယ်လိုအခြေအနေနဲ့ ကြုံရပါစေ ရင်ထဲမှာ အေးချမ်းငြိမ်သက်နေတယ်။ (ဆာလံ ၁၁၂:၇။ ၁၁၉:၁၆၅) ယေဟောဝါနဲ့ ရင်းနှီးလို့၊ ဘုရားအမြင်မှာ မှန်ရာ လုပ်ဖို့ ကြိုးစားလို့ ရလာတဲ့ စိတ်ငြိမ်သက်မှုပါ။—ပညာအလိမ္မာ ၃:၃၂။ ဟေရှာယ ၄၈:၁၈။

 “တည်မြဲတဲ့ ငြိမ်သက်မှု” ပေးမယ်ဆိုတာ ဝတ်ပြုသူတွေ အပူအပင် ကင်းကင်း နေရအောင် ဒုက္ခမှန်သမျှ ဘုရား လိုက်ဖယ်ရှားပေးမှာကို မဆိုလိုဘူး။ (၁ ရှမွေလ ၁:၆၊ ၇။ ယောဘ ၆:၁၊ ၂။ ဆာလံ ၃၁:၉) အဲဒီအစား ဒုက္ခပြဿနာတွေ ခံရပ်နိုင်အောင် ဘုရား ကူညီပေးတယ်။ (ဟေရှာယ ၄၁:၁၀၊ ၁၃) ဉာဏ်ပညာ၊ ခွန်အား၊ နှစ်သိမ့်မှု ပေးခြင်းအားဖြင့် ဆုတောင်းချက်ကို ဖြေကြားပေးတယ်။ (ဆာလံ ၉၄:၁၉။ ပညာအလိမ္မာ ၂:၆။ ဟေရှာယ ၄၀:၂၉) ရလဒ်အနေနဲ့ ခက်ခဲတဲ့ အခြေအနေအောက်မှာတောင် သူတို့ ဆက်တည်ငြိမ်နေနိုင်ကြတယ်။—ဖိလိပ္ပိ ၄:၆၊ ၇။

 ဘီစီ ရှစ်ရာစုအတွင်း ပရောဖက် ဟေရှာယ အသက်ရှင်ခဲ့တယ်။ အဲဒီနှစ်တွေမှာကော နောက်ပိုင်းနှစ်တွေမှာပါ ယေဟောဝါဘုရားကို ယုဒပြည်သားတွေ သစ္စာရှိရှိ ဝတ်မပြုကြဘူး။ ဒါကြောင့် ဘီစီ ၆၀၇ မှာ မြို့တော် ဂျေရုဆလင် ဖျက်ဆီးခံရဖို့ ယေဟောဝါ ခွင့်ပြုလိုက်တယ်။

 မြို့ ဖျက်ဆီးမခံရခင် အနှစ် တစ်ရာကျော်ကတည်းက အခန်းကြီး ၂၆ မှာပါတဲ့ ယေဟောဝါကို ချီးမွမ်းသီကျူးတဲ့ ပရောဖက်ပြု သီချင်းကို ဟေရှာယ ရေးသားစပ်ဆိုခဲ့တာ။ (ဟေရှာယ ၂၆:၁-၆) အနာဂတ် တစ်ချိန်ချိန်မှာ ယုဒပြည်က မြို့တစ်မြို့ ပြန်တည်ထောင်ခံရမယ်ဆိုတာ သီချင်းစာသားတွေက ဖော်ပြနေတယ်။ ဂျေရုဆလင်မြို့အကြောင်း ပြောနေပုံရပါတယ်။

 ဘီစီ ၅၃၇ ကစပြီး ဂျေရုဆလင်မြို့ ပြန်တည်ထောင်ခံရတယ်။ အဲဒီအခါကျမှ သစ္စာရှိ ပြည်တော်ပြန် ဂျူးတွေ လုံခြုံမှု ခံစားရပြီး “ငါတို့ရဲ့ မြို့ဟာ ခိုင်ခံ့တယ်” လို့ ပြောနိုင်တော့တယ်။ (ဟေရှာယ ၂၆:၁) ဒါပေမဲ့ မြို့ရိုးတွေကြောင့် မြို့ ခိုင်ခံ့နေတာ မဟုတ်ဘူး။ ယေဟောဝါ ကောင်းချီးပေးလို့၊ စောင့်ရှောက်လို့သာ မြို့ လုံခြုံခိုင်ခံ့နေတာ။—ဟေရှာယ ၂၆:၂။

 ဒီနေ့လည်း ယေဟောဝါဘုရားကို အပြည့်အဝ ယုံကြည်ကိုးစားသူတွေဟာ ဘုရားကို ခိုလှုံရာ “ကျောက်ဆောင်” လို့ သဘောထားတဲ့အတွက် စိတ်လုံခြုံမှု ခံစားကြရတယ်။—ဟေရှာယ ၂၆:၄။

 ဟေရှာယကျမ်း ခြုံငုံသုံးသပ်ချက်ကို သိနိုင်ဖို့ ဒီဗီဒီယိုမှာ ကြည့်ပါ။