ကျမ်းစာမှာပါတဲ့ ကိန်းဂဏန်းတွေကို အများအားဖြင့် တိုက်ရိုက်အဓိပ္ပာယ်ကောက်နိုင်ပေမဲ့ တစ်ခါတလေတော့ ပုံဆောင်သဘောမျိုးနဲ့ သုံးထားတယ်။ ကိန်းဂဏန်းတစ်ခုကို ပုံဆောင်သဘောနဲ့ သုံးထားတာ ဟုတ်မဟုတ်ဆိုတာ ရှေ့နောက်အကြောင်းအရာကနေ သိရှိနိုင်ပါတယ်။ ကျမ်းစာမှာ ကိန်းဂဏန်းတွေကို ပုံဆောင်အဓိပ္ပာယ်နဲ့သုံးထားတဲ့ ဒီဥပမာတွေကို သုံးသပ်ကြည့်ပါ–

•   ၁– ဒီဂဏန်းက စည်းလုံးခြင်းကို ဖော်ပြတယ်။ ဥပမာ၊ ယေရှုက တပည့်တွေနဲ့ပတ်သက်ပြီး “ထိုသူအပေါင်းတို့သည် တစ်လုံးတစ်ဝတည်းဖြစ်ကြစေရန် တောင်းလျှောက်ပါ၏။ အို၊ အဖ၊ ကိုယ်တော်သည် ကျွန်ုပ်နှင့် တစည်းတလုံးတည်းရှိတော်မူ၍ ကျွန်ုပ်သည်လည်း ကိုယ်တော်နှင့် တစည်းတလုံးတည်းရှိသကဲ့သို့ ထိုသူအပေါင်းတို့ကို ကျွန်ုပ်တို့နှင့် တစည်းတလုံးတည်းရှိစေတော်မူပါ” လို့ ဘုရားသခင်ဆီ ဆုတောင်းခဲ့တယ်။—ယောဟန် ၁၇:၂၁; မဿဲ ၁၉:၆။

•   ၂– တရားရေးကိစ္စမှာ သက်သေနှစ်ယောက်ရှိရင် ကိစ္စတစ်ခုကို မှန်ကန်ကြောင်း အတည်ပြုနိုင်တယ်။ (တရားဟောရာ ၁၇:၆) ရူပါရုံတစ်ခုကို နှစ်ခါမြင်ရတာ၊ အကြောင်းအရာတစ်ခုကို နှစ်ခါဖော်ပြတာက ကိစ္စရပ်တစ်ခု မှန်ကန်တယ်၊ ခိုင်လုံတယ်ဆိုတာ အတည်ပြုခြင်းဖြစ်တယ်။ ဥပမာ၊ အီဂျစ်ဘုရင် ဖာရောရဲ့အိပ်မက်ကို ယောသပ်အနက်ပြန်တဲ့အခါ “ဖာရောဘုရင်သည် ထပ်၍ [နှစ်ကြိမ်] အိပ်မက်မြင်ရသည်အရာမှာ ထိုအမှုကို ဘုရားသခင် မြဲမြံခိုင်ခံ့စေ၍ အလျင်အမြန် စီရင်တော်မူလိမ့်မည်။” (ကမ္ဘာဦး ၄၁:၃၂) ကြိုဟောချက်တွေမှာ “ချိုနှစ်ချောင်း” က ပူးတွဲအုပ်ချုပ်မှုကို ကိုယ်စားပြုတယ်။ ဥပမာ၊ မီဒို–ပါးရှားအင်ပါယာနဲ့ပတ်သက်ပြီး ဒံယေလရဲ့ ကြိုဟောချက်မှာ အဲဒီဖော်ပြချက်ကို တွေ့နိုင်တယ်။—ဒံယေလ ၈:၂၀၊ ၂၁; ဗျာဒိတ် ၁၃:၁၁။

•   ၃– ကိစ္စတစ်ခုမှာ သက်သေသုံးယောက်ရှိရင် အဲဒီကိစ္စမှန်တယ်ဆိုတာ ပိုခိုင်မာသလို သုံးကြိမ်ပြောခြင်းက အဲဒီကိစ္စကို မှန်ကြောင်း အခိုင်အမာပြောတာ၊ အလေးပေးပြောတာဖြစ်ပုံရတယ်။—ယေဇကျေလ ၂၁:၂၇; တမန်တော် ၁၀:၉–၁၆; ဗျာဒိတ် ၄:၈; ၈:၁၃။

•   ၄– ဒီဂဏန်းက ပြည့်စုံတဲ့ ပုံသဏ္ဌာန် ဒါမှမဟုတ် ပြည့်စုံတဲ့ လုပ်ဆောင်မှုကို ကိုယ်စားပြုနိုင်တယ်။ ဥပမာ၊ “မြေကြီးစွန်းလေးထောင့်” ဆိုတဲ့ ဖော်ပြချက်ဖြစ်တယ်။—ဗျာဒိတ် ၇:၁; ၂၁:၁၆; ဟေရှာယ ၁၁:၁၂။

•   ၆– ပြည့်စုံခြင်းကို ကိုယ်စားပြုတဲ့ ၇ အောက် တစ်လျော့တဲ့ ဒီဂဏန်းဟာ မပြည့်စုံမှု၊ မစုံလင်မှု၊ ဒါမှမဟုတ် ဘုရားသခင့်ရန်သူတွေနဲ့ပတ်သက်တဲ့ အရာတစ်ခုခုကို ကိုယ်စားပြုနိုင်တယ်။—၁ ရာဇဝင်ချုပ် ၂၀:၆; ဒံယေလ ၃:၁; ဗျာဒိတ် ၁၃:၁၈။

•   ၇– ပြည့်စုံခြင်းကိုဖော်ပြတဲ့အခါ ဒီဂဏန်းကို သုံးလေ့ရှိတယ်။ ဥပမာ၊ ဂျေရိခိုမြို့ကို ခုနစ်ရက်ဆက်တိုက်ပတ်ဖို့နဲ့ ခုနစ်ရက်မြောက်နေ့မှာ ခုနစ်ခါပတ်ဖို့ ဘုရားသခင်က အစ္စရေးလူမျိုးကို အမိန့်ပေးခဲ့တယ်။ (ယောရှု ၆:၁၅) ခုနစ်ကို အဲဒီလိုအဓိပ္ပာယ်မျိုးနဲ့ သုံးထားတဲ့ တခြားဥပမာတွေ ကျမ်းစာမှာ ရှိပါသေးတယ်။ (ဝတ်ပြုရာ ၄:၆; ၂၅:၈; ၂၆:၁၈; ဆာလံ ၁၁၉:၁၆၄; ဗျာဒိတ် ၁:၂၀; ၁၃:၁; ၁၇:၁၀) “ခုနစ်ကြိမ်တိုင်အောင် မဟုတ်။ ခုနစ်ဆယ့်ခုနစ်ကြိမ်တိုင်အောင်” အချင်းချင်း ခွင့်လွှတ်ရမယ်လို့ ပေတရုကို ယေရှု ပြောတဲ့အခါ အကန့်အသတ်မရှိ ခွင့်လွှတ်ရမှာကို ဆိုလိုနေတာဖြစ်တယ်။—မဿဲ ၁၈:၂၁၊ ၂၂။

•   ၁၀– ဒီဂဏန်းက တစ်စုံတစ်ခုရဲ့ အပြည့်အစုံ ဒါမှမဟုတ် အားလုံးဆိုတဲ့ အဓိပ္ပာယ်ဖြစ်နိုင်တယ်။—ထွက်မြောက်ရာ ၃၄:၂၈; လုကာ ၁၉:၁၃; ဗျာဒိတ် ၂:၁၀။

•   ၁၂– ဒီဂဏန်းက ဘုရားသခင်ရဲ့ ပြီးပြည့်စုံတဲ့ အစီအစဉ်ကို ကိုယ်စားပြုပုံရတယ်။ ဥပမာ၊ တမန်တော်ယောဟန်က သူမြင်ခဲ့ရတဲ့ ကောင်းကင်ဆိုင်ရာ ရူပါရုံထဲက မြို့အကြောင်း ခုလိုဖော်ပြတယ်– “အုတ်မြစ်ကျောက် တစ်ဆယ့်နှစ်ချပ်ရှိ၏။ ထိုကျောက်များပေါ်တွင် သိုးသငယ်၏တမန်တော် တစ်ဆယ့်နှစ်ပါးတို့၏ အမည်တစ်ဆယ့်နှစ်ခုရှိ၏။” (ဗျာဒိတ် ၂၁:၁၄; ကမ္ဘာဦး ၄၉:၂၈) ၁၂ ရဲ့ဆတိုးကိန်းတွေမှာလည်း အဲဒီအဓိပ္ပာယ်ရှိပါတယ်။—ဗျာဒိတ် ၄:၄; ၇:၄–၈။

•   ၄၀– တချို့သော တရားစီရင်တဲ့ ဒါမှမဟုတ် အပြစ်ပေးတဲ့ အချိန်ကာလတွေကို ဒီဂဏန်းနဲ့ ဆက်စပ်ဖော်ပြထားတယ်။—ကမ္ဘာဦး ၇:၄; ယေဇကျေလ ၂၉:၁၁၊ ၁၂။

ဂဏန်းဗေဒင်

 ကိန်းဂဏန်းတွေကို ကျမ်းစာမှာ ပုံဆောင်အသုံးပြုပုံနဲ့ ဂဏန်းဗေဒင်တို့ဟာ လုံးဝမတူပါဘူး။ ဂဏန်းဗေဒင်ဆိုတာ ကိန်းဂဏန်းတစ်လုံးစီ၊ ပေါင်းစပ်ဖွဲ့စည်းထားတဲ့ဂဏန်းတွေနဲ့ စုစုပေါင်းရလဒ် ဂဏန်းတွေရဲ့ လျှို့ဝှက်ဆန်းကြယ်တဲ့အဓိပ္ပာယ်ကို ရှာဖွေလေ့လာတဲ့ပညာရပ်ဖြစ်တယ်။ ဥပမာ၊ ဂျူးဂမ္ဘီရပညာရှင်တွေဟာ စာလုံးတွေနဲ့ညီတဲ့ ဂဏန်းတွေရဲ့ လျှို့ဝှက်သင်္ကေတတွေကို ရှာဖွေတဲ့နည်းနဲ့ ဟီဘရူးကျမ်းစောင်တွေကို လေ့လာခဲ့ကြတယ်။ ဂဏန်းဗေဒင်ဆိုတာ ဘုရား ရွံမုန်းတဲ့ နတ်ဆိုးပညာတစ်မျိုးဖြစ်တယ်။—တရားဟောရာ ၁၈:၁၀–၁၂။