ပထမ လူယောက်ျားနဲ့ မိန်းမကို ဖန်ဆင်းပြီးနောက် ဘုရားသခင်က သူတို့ကို အိမ်ထောင်ချပေးလိုက်တယ်။ အိမ်ထောင်ရေးဆိုတာ တည်မြဲတဲ့ မိသားစုတစ်ခု တည်ဆောက်နိုင်ဖို့ ယောက်ျားနဲ့ မိန်းမအကြားမှာ ရှိတဲ့ အထူးနှောင်ကြိုးတစ်ခု ဖြစ်တယ်။—ကမ္ဘာဦး ၁:၂၇၊ ၂၈။ ၂:၁၈။

 ဘုရားသခင်က ဇနီးမောင်နှံတွေကို ပျော်ရွှင်စေချင်တယ်။ (ပညာအလိမ္မာ ၅:၁၈) သမ္မာကျမ်းစာမှာ အိမ်ထောင်ကို အောင်မြင်စေတဲ့ စံနှုန်းတွေ၊ အခြေခံမူတွေ ပါတယ်။

ဒီဆောင်းပါးမှာ

•  အိမ်ထောင်ရေးအတွက် ဘုရားသခင့် စံနှုန်းတွေက ဘာလဲ

•  ခွဲနေခြင်းနဲ့ ကွာရှင်းခြင်းအကြောင်း ဘာပြောသလဲ

•  ဘုရားရဲ့ နှစ်သက်မှု ရအောင် တရားဝင် လက်ထပ်ဖို့ လိုသလား

•  ခင်ပွန်းနဲ့ ဇနီးကို ဘုရားသခင် ဘာတာဝန်တွေ ပေးထားသလဲ

•  မောင်နှံစုံတွေ ကလေးယူဖို့ ဘုရားသခင် တောင်းဆိုသလား

•  ငါ့ရဲ့ အိမ်ထောင်ကို ကျမ်းစာ ဘယ်လို ကူညီပေးနိုင်သလဲ

•  အိမ်ထောင်ရေးနဲ့ပတ်သက်တဲ့ ကျမ်းချက်များ

 အစကတည်းက ဘုရားသခင်ဟာ အမျိုးသား တစ်ယောက်နဲ့ အမျိုးသမီး တစ်ယောက်ကို ပေါင်းဖက်စေပြီး အိမ်ထောင်ကို အစပြုပေးခဲ့တယ်။ (ကမ္ဘာဦး ၂:၂၄) မယားအများယူတာ၊ လိင်တူချင်း ဆက်ဆံတာ၊ လက်မထပ်ဘဲ အတူနေတာကို ဘုရားသခင် မနှစ်သက်ဘူး။ (၁ ကောရိန္သု ၆:၉။ ၁ သက်သာလောနိတ် ၄:၃) အိမ်ထောင်ရေးအတွက် ဘုရားရဲ့ မူလစံနှုန်းကို လိုက်နာဖို့ ယေရှု သင်ပေးခဲ့တယ်။—မာကု ၁၀:၆-၈။

 အိမ်ထောင်မင်္ဂလာကို တည်မြဲတဲ့ နှောင်ကြိုးအဖြစ် ဘုရား ရှုမြင်တယ်။ လက်ထပ်တဲ့အချိန်မှာ သေတစ်ပန် သက်တစ်ဆုံး အတူနေပါမယ်လို့ အချင်းချင်း သစ္စာကတိပြုခဲ့ကြတယ်။ အဲဒီကတိကို စောင့်ထိန်းဖို့ ဘုရား တောင်းဆိုတယ်။—မာကု ၁၀:၉။

 မိသားစု အရေးပေါ်ကိစ္စကြောင့် ခရီးသွားတဲ့အခါ လင်မယား နှစ်ယောက် ခဏ ခွဲနေရတဲ့အချိန် ရှိနိုင်ပါတယ်။ အိမ်ထောင်ရေး ပြဿနာတွေကြောင့် ခွဲနေတာကိုတော့ ကျမ်းစာက အားမပေးဘူး။ အဲဒီအစား အိမ်ထောင်သည် မောင်နှံဟာ ပြန်သင့်မြတ်ဖို့ ကြိုးစားသင့်တယ်။—၁ ကောရိန္သု ၇:၁၀။

 ကွာရှင်းနိုင်တဲ့ တစ်ခုတည်းသော ကျမ်းစာ အခြေခံ အကြောင်းရင်းက အိမ်ထောင်ရေး ဖောက်ပြန်တာ ဖြစ်တယ်။ (မဿဲ ၁၉:၉) အိမ်ထောင်ရေး ဖောက်ပြန်မှုကြောင့် မဟုတ်ဘဲ အိမ်ထောင်ဖက်နဲ့ ခွဲနေသူ၊ ကွာရှင်းထားသူတွေဟာ တခြားတစ်ယောက်နဲ့ ချိန်းတွေ့လို့ မရဘူး၊ အိမ်ထောင်ပြုလို့ မရဘူး။—မဿဲ ၅:၃၂။ ၁ ကောရိန္သု ၇:၁၁။

 ဘုရားသခင်က ခရစ်ယာန်တွေကို လောကအာဏာပိုင်တွေရဲ့ အိမ်ထောင်နဲ့ပတ်သက်တဲ့ ဥပဒေကို လိုက်နာစေချင်တယ်။ (တိတု ၃:၁) မောင်နှံစုံတွေဟာ တရားဝင် လက်ထပ်ထားတယ်ဆိုရင် ဥပဒေ လိုက်နာရာ ရောက်တယ်။ အိမ်ထောင်ဟာ ရာသက်ပန် ဖြစ်ရမယ်ဆိုတဲ့ ဘုရားရဲ့ စံနှုန်းကို လေးစားရာ ရောက်တယ်။ a

•   တာဝန်တွေကို ပူးပေါင်းလုပ်ဆောင်ရ။ ဇနီးမောင်နှံဟာ အချင်းချင်း မေတ္တာရှိရမယ်၊ လေးလေးစားစား ဆက်ဆံရမယ်။ (ဧဖက် ၅:၃၃) အချင်းချင်း ဆက်ဆံခြင်းဝတ်ကို မေတ္တာနဲ့ ဖြည့်ဆည်းပေးရမယ်၊ သစ္စာမဲ့တဲ့ ဘယ်လုပ်ရပ်ကိုမဆို ရှောင်ရမယ်။ (၁ ကောရိန္သု ၇:၃။ ဟီဘရူး ၁၃:၄) သားသမီးရှိမယ်ဆိုရင် အတူ ပြုစုပျိုးထောင်ရမယ်။—ပညာအလိမ္မာ ၆:၂၀။

   အိမ်ထောင်သည်တွေဟာ အလုပ်အကိုင်နဲ့ အိမ်မှုကိစ္စတွေကို ဘယ်လို ခွဲဝေလုပ်ဆောင်ရမယ်ဆိုတာ ကျမ်းစာမှာ အသေးစိတ်တော့ မဖော်ပြထားဘူး။ မိသားစုအတွက် အကောင်းဆုံး ဖြစ်မယ့်အရာကို အတူ ဆုံးဖြတ်နိုင်ပါတယ်။

•   လင်ယောက်ျားရဲ့ တာဝန်။ ‘ခင်ပွန်းက ဇနီးရဲ့ ဦးခေါင်း’ ဖြစ်တယ်လို့ ကျမ်းစာက ဆိုတယ်။ (ဧဖက် ၅:၂၃) လင်ယောက်ျားဟာ ဦးခေါင်း ဖြစ်လို့ မိသားစုကို ဦးဆောင်ရတယ်၊ ဇနီးနဲ့ သားသမီးတွေ အကျိုးအတွက် ဆုံးဖြတ်ချက်တွေ ချရတယ်။

   မိသားစုရဲ့ ကာယရေး၊ ဝတ်ပြုရေးနဲ့ စိတ်ပိုင်းဆိုင်ရာ လိုအပ်ရာတွေကို ဖြည့်ဆည်းပေးရတယ်။ (၁ တိမောသေ ၅:၈) ဆုံးဖြတ်ချက် ချတဲ့အခါ ဇနီးသည်ရဲ့ အမြင်၊ ခံစားချက်တွေကို ထည့်စဉ်းစားခြင်းအားဖြင့် ဇနီးရဲ့ အရည်အသွေးတွေ၊ စွမ်းရည်တွေကို တန်ဖိုးထားကြောင်း ပြတယ်။ (ပညာအလိမ္မာ ၃၁:၁၁၊ ၂၈) မိမိရဲ့ တာဝန်တွေကို မေတ္တာရှိရှိ ထမ်းဆောင်ဖို့ ကျမ်းစာက ခင်ပွန်းသည်တွေကို မှာကြားတယ်။—ကောလောသဲ ၃:၁၉။

•   ဇနီးသည်ရဲ့ တာဝန်။ “ဇနီးကလည်း ခင်ပွန်းကို အလွန် ရိုသေရမယ်” လို့ ကျမ်းစာက ဆိုတယ်။ (ဧဖက် ၅:၃၃) ခင်ပွန်းသည်ကို လေးစားတဲ့ ဇနီးကို ဘုရား နှစ်သက်တယ်။

   ဇနီးဟာ ခင်ပွန်းသည် ဆုံးဖြတ်ချက်ကောင်းတွေ ချနိုင်အောင် ကူညီပေးတယ်။ ဦးစီးမှုကို လက်အောက်ခံတယ်။ (ကမ္ဘာဦး ၂:၁၈) တာဝန်ကျေပွန်တဲ့ ဇနီးကောင်းကို ကျမ်းစာမှာ ချီးမွမ်းထားတယ်။—ပညာအလိမ္မာ ၃၁:၁၀။

 မတောင်းဆိုပါဘူး။ ရှေးတုန်းကတော့ မိမိကို ဝတ်ပြုသူတချို့ကို သားသမီးတွေ မွေးဖွားဖို့ ဘုရား မိန့်မှာခဲ့တယ်။ (ကမ္ဘာဦး ၁:၂၈။ ၉:၁) အဲဒီအမိန့်က ခရစ်ယာန်တွေနဲ့ မသက်ဆိုင်တော့ပါဘူး။ ယေရှုက နောက်လိုက်တွေကို သားသမီးမွေးဖို့ တစ်ခါမှ မမိန့်မှာခဲ့ဘူး။ အစောပိုင်း တပည့်တွေလည်း အိမ်ထောင်သည်တွေ သားသမီး ယူရမယ်လို့ မပြောခဲ့ဘူး။ သားသမီး ယူမယူဆိုတာ အိမ်ထောင်သည်တွေ ကိုယ်တိုင် ဆုံးဖြတ်ရမယ်။

 အိမ်ထောင်ကို အစကောင်းစေတဲ့ အခြေခံမူတွေ ကျမ်းစာမှာ ပါတယ်။ ကျမ်းစာ အခြေခံမူတွေက ပြဿနာတွေကို ရှောင်ဖို့၊ ဖြေရှင်းဖို့ အိမ်ထောင်သည်တွေကို ကူညီပေးနိုင်တယ်။

 ကျမ်းစာ အခြေခံမူတွေက အိမ်ထောင်သည်တွေကို

•   မေတ္တာစစ်ပြဖို့။—၁ ကောရိန္သု ၁၃:၄-၇။ ကောလောသဲ ၃:၁၄။

•   သဘောထား ကွဲလွဲမှုတွေကို ဖြေရှင်းဖို့။—၁ ကောရိန္သု ၁၀:၂၄။

•   နားထောင်တတ်သူတွေ ဖြစ်ဖို့။—ယာကုပ် ၁:၁၉။

•   လေးစားတတ်ဖို့။—ရောမ ၁၂:၁၀။

•   ခွင့်လွှတ်တတ်ဖို့။—၁ ပေတရု ၄:၈။

•   သစ္စာရှိဖို့။—မာကု ၁၀:၉။

•   စိတ်ရှည်ဖို့။—ဧဖက် ၄:၂၊ ၃။

•   ပူးပေါင်းလုပ်ဆောင်ဖို့။—ဒေသနာ ၄:၉။

•   အိမ်ထောင် သစ္စာကတိကို ခိုင်မြဲစေဖို့ ကူညီပေးတယ်။—ရှောလမုန်သီချင်း ၈:၇။