1, 2. Matin ǂgui khoena ǁōhâ khoen xa ra ǂgom?

MILIUNS xa ǃnāsa khoen Afrikab ǃnân ge ra ǂgom khoe-i ûib ǁōb tawa ǀam tama, xawe ra ǀkharaǀkharahe tsî ûi ǃkharusa gāgāsi hâ ǃkhaib ǃoa di. ǂGuin ge ra ǂâi ǁîn di ǁōǂoa ge kaiǁgûn mûhe ǁkhā ǃhūbaiba xu mûhe ǁoa ǃhūbaiba ǃoa ra ī di, khoesi ûiba xu gāgāsi ûib ǃoa.

² Nē ǁōǂoa ge kaiǁgûn, tamas ka io aboxa gāgādi ge ra ǂgomhe ǁîn di omariti ǃhūbaib ai hân di aiǃgûsan ra mûǂam di. Mîhe ras ge nē aboxa gāgādi ge kaise a ǀgaisa ǀhōsa kai ǁkhā, tsî ǃgâi ûiba mā tsi ǁkhā, tsî tsūkēǃgâba xu sâu tsi ǁkhā. ǃKhaǃkhahe tamas ka io ǁaiǁaihen ga o, o ī ge sats ǀkha tsū xū-e a ī ǁkhā di i ge ra mîhe—ǀaesen ǁkhā, ǀgâsib xa hā ǂamhe ǁkhā tsî tsūkēǃgâb ǃnâ ǂgâ ǁkhā.

3. Matin ǀnî khoena ǁōǂoa ge kaiǁgûna ǃgôasiba ra ǁgau?

³ Ûitsama khoen ge ǂgui xūna ra dī aboxa gāgāde ǂkhîǂkhîs ǃaroma in ǃgâi ǃgaeǁaresa ūhâ ǁkhā. Nēs ge kaise ǃgāsase ra mûhe khoen ǁō tsî ra ǁkhōhe ǁaeb ai. Aiǁgause, soros tawa ǂnûǂkhais khami. ǁŌǂoa ge kaiǁgûn ge ǀnîhâ ǀgaub ais tsîna ǃgôasiba ra ǁgauhe. Aiǁgause khoen ge hâ ǃkhari-e ā tsî khoen ǀhobas ai ra ǁhōna ǁōǂoa ge kaiǁgûn ǃaroma. ǀNîn ge ǁkhapa sâi toan ga o ǂûna sūs ǃnâ ra ǁnāxū ǁōǂoa ge kaiǁgûn hān ga o ǂû xū-e nî hōse.

4. Tae-en ǂgui khoena ǀoms xa ra ǂgom?

⁴ ǀNî khoen ge hâ ǂgom ra na ǁōts ga o, os soros ǀguisa ra ǁō xawes ǀomsa ra ûiǃkharu di. Khoe-i ga ǃgâise ûi o, os ge ǀomsa ǀhommi ǃoa tamas ka io paradais ǃoa ra ī xawe ǁgai ûibats ga ûi o, ots ge ǀamoǀaeb ǃnâ nî ǂhubi. Khoen ge ǃnāsase nē ǂgom ǀgauba ǃhaoǃnâbe ǀgaub ǀkha ra ǃkhōǁae. Aiǁgause, ǂhôaǂkhanigu ǃnâ i ǁō ǃkharu ge khoen xa ra xoahe o, oi ge ra mîhe “ǁaerob di ûiba” ǁnāxū tsî go “ǀamo ûib” ǃoa ǃgû di tamas ka io ǁōǂoa ge kaiǁgûna ǃoa ī di. Nē ǂgomǀgaugu hoagu ge ǀoms tamas ka io gāgās ta ûiǃkharu tsîs sorosa ra ǁō ǁkhāǁkhās ai ǃgaoǃgaosa. Matis Elobmîsa nēs xa ra mî?

5, 6. Elobmîs ta mîs ǃoagu, ǀomsa a tae?

⁵ Elobmîs ge ra ǁgau ǀoms ge sa ǂganaga hâ xū tama; khoe-i ge a ǀom. Aiǁgause, Elob ge Adama a kuru o, ob ge “khoeba ge ûitsama ǀom kai.” (Genesis 2:7) Adami ge ǀomsa māhe tama, ǁîb ge ge ǀom kai ǀoasa khoe kaib ge ge.

⁶ Khomai da ge ra ǀoms go ǃnae di. (Genesis  46:18) ǀOms ge ǂû ǁkhā tamas ka io ǂû ǁoa. (Levitikus 7:20; Psalmti 35:13) ǀOms ge a ā ǁkhā tsî ǂkhawuǂâi ǁkhā. (Jeremiab 13:17, Jonab 2:7) ǀOms ge ǃnari-e ǁkhā, ǃgôaǃgon tsî haiǃnao-i ǃnâs tsîna a ǂgāhe ǁkhā. (Deuteronomium 24:7; Psalmti 7:6; 105:18) ǀNî Baibeldi ge tsoatoas ǃnâ ge hâ-i gowab di mîsa ra sîsenū “ǀomsa” ǁnā ǁaraǃāti ǃnâ, xawe ǀnîn ta “ûitsama xū-i,” “kurusabe-i” tamas ka io “khoe-i” ǃoa ra ǁnaeǁgau. Hoa di ge ǀgui ǂâibasens ǀguisa ūhâ.

7. Mâ Elobmîs ǁaraǃāsa ra ǁgau ǀoms a ǁōǁkhā ǃkhaisa?

⁷ Khoe-i ge a ǀom, ǁnās ge ra ǂâibasen khoe-i ga ǁō, os ǀomsa ra ǁō di. Hesekieli 18:4 ge ra mî: “ǁNā ǀoms ia ra ǁores—ǁîs ge nîra ǁō.” Tsî, Ap. ǃNaeǃkhaidi 3:23 ge ra mî: “Mâ ǀoms [khoe-i] hoas ǁnā kēbō-aoba ga ǁnâu tama is nî ǁaesa xu ǃhū-ǃnomaǂuihe ǃkhai-e.” Nēs ge ra ǁgau ǀoms ge ûiǃkharu tama ǁōb khaoǃgâ.

8. Gāgāba a tae khoen ǃnâ hâba?

⁸ Gāgās tsî ǀoms tsîn ge ǀgui xu tama. Khoe-i ǃnâ hâ gāgāb ge ǁkhāsiba ra mā, xūna dī ǁkhās diba. Gāgāb ge elektrib ǁkhāb khami ī. Elektrib ge tanimâhe ra ǁâǁapab tamas ka io ai-īsiǂhâoǂgaresa a sîsen kai ǁkhā xawe ǁî-i aib ai ai-īsiga ǁgau ǁoa tsî khoe-e a ǁkhami ǁoa, ǁnās ǁkhās khamib ge gāgāba ra huida i da mû, ǁnâu, ǃhoa tsî ǂâi ǁkhā. Xawe gāgāb ge ǀguri xū-e dī ǁoa ǂgaes, mûs tsî ǂkhûs ose. ǁNā-amagas ge Elobmîsa ra mî: “Tsî tsarab ta ǃhūb ǃoa oas aiǃâ, ib ge ī khami tsî gāgās ta Elob, ǁÎsa ge māb ǃoa ra oas aiǃâ.”—Aoǁnâ-aob 12:7.

9. Tae-eb gāgāb tsî ǀoms tsîna dī tama?

⁹ Elobmîs ta mîs ǃoagus ge ǀomsa tamas ka io gāgāsa sorosa xu ǂoa tsî ǁōb khoaǃgâ gāgāsi hâ ǃkhaib ǃoa ī tsî ûiǃkharu tama hâ.

10. Elobmîsa mati ra mî ǁōhân di mâsib xa?

¹⁰ Mâ mâsib ǃnân ǁōhâna hâ? Jehovab ge sada ge kuru, tsî ǁÎb ge a ǂan tae-i sada ǀkha ra ī ǃkhaisa ǁō da ga o. ǁÎb mîs ge ra ǁkhāǁkhā da ǁōhân ge ûi-e ūhâ tama hâ, ǁnâu ǁoa, mû ǁoa, ǃhoa ǁoa tamas ka io ǂâi ǁoa. Tis ge Elobmîsa ra mî:

• “ǁŌhân ge . . . Xū-i xare-e ǂan tama hâ.”—Aoǁnâ-aob 9:5.

• “ǀNami ân tsî ǁkhani ân tsî surib ân tsîna ge gā.”—Aoǁnâ-aob 9:6.

• “Sîseni xareb, tsî ǃereams xares, tsî ǂans xares, tsî gā-aisib xareb ge ǀhobas ǁîs ǃoats gaus ǃnâ hâ tama hâ.”—Aoǁnâ-aob 9:10.

11. Adami ge ǁore toas khaoǃgâ Jehovaba mati ǁîb ǃoa ge mî?

¹¹ ǂÂi re Elobmîs mati ra mîsa sada di ǁōǂoa ge kaiǁgûb, Adami xa. Jehovab ge Adama “tsaraba xu ge ǂnuwi.” (Genesis 2:7) Adami ga Jehovaba ǁnâuǀnam hâ o, ob ge ǀamose ǂkhîb ǃnâ ǃhūbaib ai ga ûi hâ. Xawe Adami ge Jehovab ǂhanuba ǁnâuǀnam-oǃnâ o, ob ge ǁkharaba ge ǁō-i. Adama ǁōb ge o mapa ge ī? Elob ge ǁîb ǃoa ge mî: “Tsarats khom satsa o tsîts khom ǁkhapa nîra tsara kai o.”—Genesis 3:19.

12. Tae-e Adami ǀkha ge ī ǁōb ges khaoǃgâ?

¹² Adama Jehovab nî tsaraba xu kurubis aiǃâ mapa ge hâ-i? ǃKhai-i aib ge ge hâ tama hâ-i. ǀKhaib ge ge i. Jehovab ge mî o Adami ge “nî tsara kai” ti ob ge gere ǂâibasen ûiheb ūhâ tite tsarab khami. Adami ge gāgāsi ǃkhai-i tawa si ge ûi tama hâ-i. ǁÎb ge ‘ǃkharu tama’ ge hâ-i aboxan gāgāsi ǁan ǃkhai-i ǃoa. ǁÎb ge ǀhommi tamas ka io ǀamoǀaeb ǃoas tsîna ge i tama hâ-i. ǁÎb ge ûi-osi mâsib ǃoa ge oa; ûi ǀûb ge ge.

13. ǁŌb tawa, tae-e ra ī hoa khoen tsî ǀgurun tsîn ǀkha?

¹³ ǁKhā xū-e khoen ǀkha ra ī hoaǃnâ-aixase? Î, īra. Elobmîs ge ra mîǃgāǃgā: “[Khoen tsî ǀgurun] hoan ge ǀgui ǃkhais ǃoa ra ī. Hoan ge tsaraba xu ge kuruhe tsî hoan ge tsarab ǃoa ra oa.”—Aoǁnâ-aob 3:19, 20.

14. Tae ǃâubasensan ǁōhâna ūhâ?

 ¹⁴ Elomîs ge ra mîmâi Elob ge ǁōhâna nîra ǂkhaiǂkhai paradais ǃnân nî ûise. (Johaneb 5:28, 29; Ap. !Nae!khaidi 24:14) Xawe nēs ge hānîǁaeb ǃnâ nî ī. Nēsin ge ǁōb ǃnâ ǁom hâ. (Johaneb 11:11-14) Tā da ge ǁîna ǃao tamas ka io nî ǀgoreǀî, ǁîn huida ǁoa tsî tsûtsû da ǁoa xui-ao.

15, 16. Matib ǁGâuaba khoena ra ǂgom kai ǁōhân amabes ǃnâ ǁō tama ǃkhaisa?

¹⁵ Nē ǂâis ǁō da ga xawe da ra ûiǃkharus ge ǁGâuab di kai ǂhomiba. Khoena ǁîb ǂhomiba ǂgom kais ǃaromab ge, ǁîb tsî ǁîb ǁgâuaga khoena ra ǂâi kai ǀaen tsî ǃgomsigu ge ǁōhân di gāgāb xa ra ǃaromahe. Ama as ge ǀnî ǃgomsin ǁgâuagu xa ra ǃaromahesa. Tsî ama as ge ǀnî ǃgomsigu ǁgai gāgān xa ǃaromahe tamasa. Xawe ama tama ǃkhais ge sada ǃgomsin ǁōhâ khoena xu ra hāsa.

¹⁶ ǀNî ǀgaub ge hâ ǁgâuagu ra sîsenūba khoena ǂâi kaisa Elobmîs ǁōhân xa ra mîs ama tama ǃkhai-e. ǁÎgu ge khoena ra ǂgom kai ǁōhâna mû tsits ǁîn ǀkha ǃhoa ǁkhā ǃkhai-e. ǁGâuagu ge nēsa ra sîsenū aimûǀgarus, ǁhapodi, kēra khoen, tsî ǀnîhâ xūn ǃnâ-ū. Khoen ge ǁōhâ khoenan ta ǃhoa-ū di ra ǂâi, xawe nē gu ge ǁgâuagu hîna ǁō ge khoe-i khami ra dīsen ga. ǁNā-amagab ge Jehovaba ǀgaisase nē kēra khoen tsî ǁōhân ai ra ǀawe ôana ra ǃkhâikhom.—Deuteronomium 18:10-12; Saxarjab 10:2.