1RO ǃÂB
“Kā hâ-e ta ge tita nîra ôa”
Gū-i ge kā hâ ǃgarob ǃnâ i ǀgâna ra ǂû hîna. ǁÎ-i ge ge ǀgora nau gūna xu. ǁÎ-i ge nau gūn tsî ǃûi-aob tsîna mû tama hâ. ǃUis ge go ǀgū. ǁÎ-i ge ǃgarob ǃnâ hâ ǃaoǃaosa ǀgurun ta hâpa tsî nē gū-i ge a ǁkhaubasen ǁoa. ǀAms ai i ge ǂanǂansa dom-e ra ǁnâu—ǃûi-aob diba, ǁîb ge gūs ǃoa ra ǃgû, ǁîsa ūkhâi, tsî ǁîb di sarab ǃnâ ra ǃkhōǂgāsi tsî oms ǃoa ra oa-ūsi.
JEHOVAB ge ǁnāti ī ǃûi-aob ǀkha ra ǀgopeǀnōsen. Nē mîdi ǀkhab ge sada ǂgomǃgâsa ra ǁapoǁapo: “Tita ge ti gūna nîra dîǃgâ tsî ǁîna nîra ôa.”—Esegieli 34:11, 12.
“Tita ge ti gūna nîra dîǃgâ”
Hamna Jehovab gūna? Jehovab gūn ge khoen hîna ǁîba a ǀnam tsî ǁîba ra ǀgoreǀîna. Elobmîs ge ra mî: “Î da ǁnāǁgoe, î da ǃhonǁgoa ǃKhūb sada ge kurub aiǃâ; ǁÎb ge a sada di Elo, tsî sada ge a ǁîb ǃû-ais di ǁae, tsî ǃommi âb di gū xuige.” (Psalmdi 95:6, 7) Gūn hîna ǁîn ǃûi-aoba ra saon khamin ge Jehovab di ǀgoreǀî-aona ra tura ǁîba saosa ǃÛi-aob ase. ǁÎna dīǀoaǀoasa kurusan ūhâ? Hî-î. Elob di ǃoaba-aon ge ǀnî ǁaegu ai “ǀgaruǀgaruhe hâ gūn,” “kā hâ gūn” tsî “ǁhapuma ra gūse” ī. (Esegieli 34:12; Mateub 15:24; 1 Petrub 2:25) Khoe-i ga hâbē xaweb ge Jehovaba ǁî-e hoase ǁnāxū tama hâ ǃâubasen-e i ūhâ tama hâse.
ǂÂi îts ta Jehovab noxoba sa ǃÛi-ao di? Jehovaba mati ra ǁgau ǁîb nētsē noxoba a ǃÛi-aosa? Saora ǃnona ǀgaugu xa ǂâi re:
ǁÎb ge gagasise ra ǂûmā da. “ǃGâi ǃû-ais ai ta ge tita ǁîna nîra ǃûsi,” dib ge Jehovaba ra mî. “ǁNāpan ge ǃgâi ǃhara-i ǃnâ nî ǁgoe, tsîn ge kausa ǃû-ai-i ai nîra ǃû.” (Esegieli 34:14) Jehovab ge tātsēs tsîna ǁnāxūǃgâ tama hâ khoakhoa da ra gagasi ǂû-e ǁaeb ai mā dasa. ǂÂi ǁkhā îts a ǁkhāǁkhāǃâ-i, ǃhoa-i tamas ka io vidio-i ǃnâ-ūs ge sa ǀgoresa ǃereamhe ǀgausa? ǁNāsa ǂgomǁapo kai tsi tama hâ Jehovab satsa khoese ra ǂhansenbasa?
ǁÎb ge sâu da tsî ra ǂkhâǃnâ da. Jehovab ge ra mîmâi: “Tsî doeǁgabēhe hâ-e ta ge tita ǁkhawa nîra ūhā, tsî khôa hâ-e ta ge tita nîra ǀgoe, tsî ǀaesen hâ-e ta ge tita nîra ǀgaiǀgai.” (Esegieli 34:16) Jehovab ge ǂkhabu hâna ra ǀgaiǀgai tsî ǂhansendi xa ǃkhōǃnamihe hân tsîna. ǁÎb ge ǁîb gūna ra ǃgae-ai tsûtsûhen ga o tsî ra hui—ǃgâsa-i ǃnâ-ūs tsîna. Tsî ǁîb ge ǁnān kā hâna ra oaǀkhī-ū tsî ǃgâi tama ǂâi ǀgaugu xa ra ǂhanihe na ra hui.
ǁÎb ge sada ra tsâba. “Tsî tita ge ǁîna nîra ore, ǁîn ge ǀgaruǀgaruhe hâ i ǃkhaidi hoade xu,” dib ge Jehovaba ra mî. “Kā hâ-e ta ge tita nîra ôa.” (Esegieli 34:12, 16) Jehovab tawa i ge kā hâ gū-e noxoba a ǀkharaǀkharahe ǁkhā. ǁÎb ge a ǂan gū-i ga ǀkhai o, ǁîb ge ǁnā gū-e ra ôa tsî ǁîb ge ra ǃgâiaǂgao ǁî-eb ga hō o. (Mateub 18:12-14) ǁNās ǂamaib ge ǁîb di ama ǀgoreǀî-aona “sadu ti gūdo, ti ǃû-ais di gūdo” ti ra ǂgai. (Esegieli 34:31) Sats ge ǁnā gūn di ǀguitsa.
Jehovab tawa i ge kā hâ gū-e noxoba a ǀkharaǀkharahe ǁkhā. ǁÎb ge ra ǃgâiaǂgao ǁî-eb ga hō oa o
“ǀAsa kai re sida tsēde hugas khami”
Jehovaba tae-i ǃaroma satsa ra ôa tsî ra ǁkhau tsi îts ǁîb ǃoa oaǀkhī? ǁÎb ge ra ǂhâba îts ǂkhîba ūhâ. ǁÎb ge ra mîmâi “tūǀnanub ǀkhaeb dib ge nîra hâ” ǁîb gūn ai. (Esegieli 34:26) ǁNās ge ǀkhaiǃnâ tama hâ mîmâisa. Sats ge ǁnā ǁgauǁgausa ǀnai ge mû.
ǂÂi-oa re ǂgurots ge Jehovaba ǂan tsoatsoa o. Aiǁgause, matits ge ǂguro tsâ Elob ǀons xats ge ǁkhāǁkhāsen o tsî ǁîb ǂâibasendi khoedab ūba hâdi tsîna? ǂÂihō îts ta matits gere khoakhoahe ǀgausa Xristeǁî ǃgâsan ǀkha, ǂharis kai ǀhaodi tsî ǀkharib kai ǀhaodi tawa ǀguiǃnâxasa? ǃGâiǂhôasats gere khoe-i ǀkha ǀgoragu o, ǃgâiǃgâibasen-e ge ūhâ i i ǀkha, ots ge ǃgâiaǂgaob ǀkha oms ǃoa gere oa tsî ǃgamse ǂgaob ǃnâ ǂkhîse gere tsâ?
Sats ge ǁnā ǃgâiaǂgaoba ǁkhapa a hō oa ǁkhā. “ǃKhūtse [Jehovatse NW], sa ǃoa ǃhobasen kai da,” Elob di ǃoaba-aon ǀorokamǁaeb din ge nēti ge ǀgore, “o da ge nî ǃhobasen; ǀasa kai re sida tsēde hugas khami.” (ǃGae-amdi 5:21) Jehovab ge ǁnā ǀgoresa ge ǃeream tsî ǁîb khoen ge ge oaǀkhī tsî ǁîba ǃgâiaǂgaob ǀkha ǁkhapa ge ǃoaba. (Nehemiab 8:17) Jehovab ge ǁkhā xū-e satsa nî dība.
Xawe, Jehovab ǃoa oaǀkhīs ge supu tama hâ. ǂÂi re ǀnî ǃgomsigu oaǀkhīsa ra ǃgomǃgomgu xa tsî matits ǁîga a dan ǁkhā ǀgaus tsîna.
