3ǁÎ ǃÂB
Tsûtsûsa tsâsigu—“ǀAuxū-e” da ga ūhâo
“ǀGui ǃgâsas ti ǀhaohâb ǃnâ hâs ge ǂhanu tamase ge a ǀhapiǂgā-am te, ǁîs ge ge mî ǁîs marisa ta ge ǃnari ti. ǀNî ǃgâsan ǀhaohâb din ge nēs xa a ǂan o, on ge ǁîs ǀkhāba ge a ū. ǀAms ais ge nē ǃgâsasa ge mîba te tita ǁîs marisa ǃnari tama hâ ǃkhaisa. ǁÎs ge ǀûbaba ge ǂgan, xawe ta ge ti ǂgaob ǃnâ ge tsâ tātsēs tsîna ta ǁîsa ǀûba tidesa, ǁîs ge ǂgā ǃnâ te xūn ǃaroma.”—Lindas.
SATSA Lindas khami tsâ îts ta hîna ge kaise ǃgamse tsûtsûhesa ǀnî hâ ǃgâsa-i di dīb xa? Tsûtsûsa as ge ǀnîn ge nau ǃgâsan di dīb xa ǃaromahe hâse gagasi a ǀûsensa. Sats tsîna di ra tsâ?
Khoe-e ‘Sada Elob ǀnamma’ xu ǀgora ǁkhā i a?
Ama as ge sada ge kaise a ǃgombahe ǁkhā ǂgomsabe-e ǀûbasa ǁî-i ga sada tsûtsû o. Xūn hoan ǂamain ge Xristeǁîna nî ǀnamgu. (Johaneb 13:34, 35) ǂGomsabe-i ga tsūdī da o, o da ge ra ǂkhîoǃnâ tsî ǁnā tsâsib ge kaise a tsûtsûsa.—Psalmdi 55:12.
Elobmîs tsîn ge ra ǂanǃgâ Xristeǁîn ǁaeba xu ǁaeb ǀkha ra “ǀauxū-e” mîgusa. (Koloseǁîn 3:13) ǁNās ga sada ǀkha khoese ī tama io, o da ge a ǃgombahe ǁkhā ǁnāsa sîsenǂamsa. Huida ǁkhā a xū-e hâ-e? ǃNona Xoadi tsoatsoade da ge nî ǃhoaǃgao:
Sida di ǀhomsi ǁGûb ge hoa xūna a ǂan. Jehovab ge hoa xūna ra mû īra na, ǂhanuoǃnâsigu sada ra hōǃâgu tsîna ǃkhōǂgā hâse tsî ǃgomsigu tsîna. (Hebreǁîn 4:13) ǁNās ǂamaib ge Jehovaba sada ra tsâba ǃgomma da ga ra tsâ o. (Jesajab 63:9) ǁÎb ge tātsēs tsîna mā-am tide îb ‘ǁgâiǀāb’ tsî ‘ǂōǂōsib’ tsî tae-i gui i kas—ǀnî hâ ǃgâsa i kas hoasa—“sada Elob” ǀnamma “xu a ǀgora ǁoa ǃkhaisa.” (Romeǁîn 8:35, 38, 39) Sada ǁkhā ǀgaub ai ǁgarihe tama da hâ î da tā mā-am, i i khoe-i xare-e sada tsî Jehovab ǁaegu hā?
ǀÛbas ge tsūdīhe go xū-e ǀariǂui tama. Sida ǃoa-ai go tsūse dī khoe-e da ga ǀûba o, o da ge dī i go xū-e ǂkhariǂkhari tama, ǂhanu-ai kai tama, ǀhapio kai tama, tamas ka io ǁî-i di dība ǀariǂui tama hâ. ǂÂis ǃnâ ūhâ re Jehovab ge ǁoreba mā-am tama hâ, xaweb ge ra ǀûba ǃgaoǃgao-i ga ra hâ o. (Psalmdi 103:12, 13; Habakuki 1:13) Jehovab ga ǂkhâǃnâ da o khoena ǀûbasa, ob ge ǀnî mîdi ǃnâ ra ǂgan î da ǁîba ǁgae. ǁÎb ge “ǀamose ǁaixahâhâ tide.”—Psalmdi 103:9; Mateub 6:14.
ǁAiba da ga ǁnāxū o, o da ge ǃgâiba ra ǀama. Mâ ǀgaub ai? ǂÂi re saora i xa. Sats ge ǀuiba go ūkhâi ǀnîsi ǂkharirose a ǃgomroba tsî sa ǁôab kōse a gaxuba. ǀNîsits ge kai ǃgomsi-e ūhâ tide nē ǀuiba ǃnubu ǁaeroba ǃkhōǀgarasa. Xawe tae-e nî ī nēsats ga gaxuǁaeba dī o? Matikō gaxusets nî ǃkhōǀgara bi—hairoga? Kamaba? Tamas ka io ǁnās xa gaxuse? Mâ hâ ǃkhais ge sa ǃommi ge nî tsau! ǁNā ǀuib ge supu tide. Xawe ǀhapesets ga ǃkhōǀgara o, o i ge ǃgommi ra khami nî tsâ. ǁNās tsîn ge ama ǁaib xa. Gaxuse da ga khoe-e xū-e taniba o—ǂkhariro-i kas tsîna— o i ge a tsûtsû da ǁkhā. ǁNā-amaga i ge buruxa tama hâ Jehovab da ǂkhā dasa î da ǁaiba ǁnāxū. Amabes ǃnâ da ga ǁaiba ǁnāxū o, o i ge sada ǃgâib kōse ǀgui hâ.—ǂKhoamîdi 11:17.
ǁAiba da ga ǁnāxū o, o da ge ǃgâiba ra ǀama
“Tita ge ra hōǃâ Jehovab ta tita ǀkha ǃhoa ǃkhaisa”
Lindasa tae-i xa ge hui-e ǁîs di ǁaib ǀkha, ǂgomsabe-i xas ge sîsenūhe ǀgaub xa? ǀNî xūn ǂamas ge ǁîsa Xoadi xa gere ǂâiǂâisen îs ǀûba ǁkhā. (Psalmdi 130:3, 4) Lindas ge ǀō-aisase ge a tsâǀkhāhe ǂanǃgâs ta sa ǀûbats ga ra o, ob ge Jehovab tsîna nî ǀûba tsi. (Efeseǁîn 4:32–5:2) Matikōses ge tsâǀkhāhe xawes ge ge mî: “Tita ge ra hōǃâ Jehovab ta tita ǀkha ǃhoa ǃkhaisa.”
ǁAeb ǀkhas ge Lindasa ǁaiba ge ǁnāxū. ǁÎs ge ǂgaob hoaba xu ǃgâsasa ge a ǀûba, tsî ǁnā ǃgâsas ge nēsi a ǁîs di ǃgâi ǀhōsa. Lindas ge ge aiǃgû Jehovaba ǃoabas ǀkha. ǂGomǁapo re Jehovab tsîn ge ra huitsi ǂgao îts sats tsîna ǁnās ǁkhāsa dī.
