‘ǂHauǃnâb ge ǃKhūb ǃnâ nî ǃgâiaǂgao’
DIANAS ge a 80 kurixa. ǁÎs kaikhoeb ge xūna ǀurus ǁōba ge ūhâ i tsî ǂgui kuriga ǀaeǃkhō ǃkhais ǃnâ ge hâ i ǁōb nîs aiǃâ. ǁÎs ǀgam ǀgôakha ǁōb ǃoab tsînas ge gere hōǃâ tsî samdi kankers tsîna ge ūhâ i. Xawen ga Dianas ǀhaohâb ǃgâsana ǀhaodi tamas ka io aoǁnâ sîsenni ǃnâ mûsi o ,os ge hoaǁae ge ǂkhî-i.
Johaneb ge 43 kuriga ge sarimâra mûǂam-ao i. ǁÎb ge nē sîsena ge ǀnam-i—ǁîb ûi ge ib ge. Xaweb ge nē sisenni ǀkha ge ǀû. ǁÎb ǀaesen hâ ǀaokhoe-eb nî kōǃgâ ga tsî nēsi ǁnā ǃās ǀhaohâb ǃnâ ra ǃoaba. Khoen hîna ge Johaneba ǂan în ǂkharis kai ǀhaodi tamas ka io ǀhaohâb ǀhaodi tawa ra ǀhao-ū bi o ,ob ge noxoba ǁnāb ge ī-i khami ǀgui ī. ǂKhîb xab ge noxoba ǀoa hâ.
Tae-e Dianas tsî Johaneb tsîna ge hui i ra ǁîra ǂkhîba ūhâ ǀgara? Matin ǁnān hîna emotioneel tsî sorosi ǃgomsina ūhâna noxoba ǁîn ǂkhîba a ūhâ ǀgara ǁkhā? Tsî ǁnān hîna ge ǁîn ǁgaumâide xū a ūǁnâhen tsîna mati ǁîn ǂkhîba a ūhâ ǀgara ǁkhā? Elobmîs ge nēs ǃnâ ra hui da tsî ra mî: ‘ǂhauǃnâb ge ǃKhūb ǃnâ nî ǃgâiaǂgao.’ (Psa. 64:10) Nēsa da ge ǀoasase a ǁnâuǃā ǁkhā, mûǂan da ga o tae-i nē ǂkhîba ra ǃaromas tsî nē ǂkhîba a ūbē ǁkhāsa.
ǂKHÎB HÎNA A ǁAEROB DIB
ǂAn da ge a mâ xūn ǂkhîba ra hausa. ǀNamgu khoe ra xa ǂâi re hîna ra ǃgamera. Tamas ka io ǀgôaro-i tsî ǁgaumâi-i tsîna hōs? Nē ǃnoa xūn ge ǂkhîba ra hauba da nēs ge ǃgâi, kuru-aob Jehovaba xu i ra hā amaga. ǁÎb ge ǃgameba ge ǂnûiǂgā, ǀgôana hōsa ge īǁkhā kai tsî ǀhaohâb ǃnâ-ū ǁgaumâide ra mā.—Gen. 2:18, 22; Psa. 127:3; 1Tim. 3:1.
Xawe ǀnî xūn ǂkhîba ra mān ge ǁaerob ǀguiba a hâ ǁkhā. Tsûaǂgaoxase, i ge sadu ǃgame hâ khoe-e ǃgameba a khôa ǁkhā tamas ka io a ǁō ǁkhā. (Ese. 24:18; Hos. 3:1) ǀNî ǀgôan ge ǁîn ǁgûn tsî Elob ǃoa-ai a ǁnâuǀnamoǃnâ ǁkhā, tamas ka io a ǂnûiǂuihe ǁkhā. Samueli ôab ge Jehovab ǃoa-ai ge ǁnâuǀnamoǃnâ. Davib mîǁguigu ge ǁîb oms ǂganagaba xū ǃgomsiga gere mābi. (1Sam. 8:1-3; 2Sam. 12:11) Nē ǃnoa xūn ge tsûaǂgaob tsî ǃgomsib tsîna ra ǃaroma. Nēs ge amabes ǃnâ ǂkhîba hauba da tama hâ.
ǁNās ǁkhās khami di ge Elob khoen ǁgaumâide ǀams kōse a ǀkhī ǁkhā. Sao ra ǃaromadi ǃgao, ǀaeb, omaris ǃgomsin tamas ka io ǀkharaǀkharan ǁgaumâidi ǃnâ. ǂGuin hîna nē ǃnoa ǃgomsina ra ǃkharu ǃnân ge ra mî ǂkhîb hînan ge ūhâ i ban ra ǁkhore di.
Supuse da ge a mû ǁkhā nē ǃnoa ǂkhîb ǁaerob dis ǀguisa isa. ǀNî ǃnoa ǂkhîba hâ, mâsigu ga ǀkhara xawe ra hâhâba? Hâ-a, Samueli, Davib tsî ǀnî hân tsîn ge nē ǃnoa hâhâ ra ǂkhîba ge ūhâ i ǃgomsin ge hâ-i xawe.
ǂKHÎB HÎNA RA HÂHÂB
Jesub ge ama ǂkhîba ge ǂan i. ǁÎb di ǀhomsi ûib ǃnâ ǃhūbaib ǃoab nî ǀkhīs aiǃâb ge Jehovab aiǃâ gere ‘ǃgâiǃgâisen.’ (ǂKhm. 8:30) ǃHūbaib aib ge hâ-i o ,ob ge ǃgomsina gere hōǃâ. Xaweb ge ǁîb îb ǂâisa dis xa gere ǂkhî kaihe. (Johaneb 4:34) ǁÎb di ǀuniga ǁaeba mati ge tsâ i? Khomai da ra: “ǁÎb ǁgui-aiǃâbaheb ge hâ i ǃgâiaǂgaob di amǃnâs ǃnâ ǃgâuhaiba ge tsâb.” (Heb. 12:2) ǁNā-amaga da ge ǀgam ǀgaukha ama ǂkhîba ūhâs dikha a ǃhoaǃgao ǁkha.
70 ǁKhāǁkhāsaben ge aoǁnâ sîsenni khaoǃgâ Jesuba ǃoa ge oa. ǁÎn ge ge ǂkhî-i kai sîsenga dī tsîn demongu tsîna gere ǁgariǂui amaga. Jesub ge ǁîna ǃoa ge mî: “Xawe gagagu sago ra ǁnâuǀnam ǃkhais xa tā ǃgâiaǂgao, î go ǁnās ǃgâ-ai ǃgâiaǂgao, sago ǀondi ǀhommi ǃnâ xoahe hâ ǃkhais xa.” (Lukab 10:1-9, 17, 20) Î ǀnîhâ aiǂhanuba ūhâs xa i ge Jehovab xa ǃkhōǃoahesa a ǂhâǂhâsa. ǁÎb ge ǂgomǂgomsa ǁkhāǁkhāsabena nî ǂâihō—nēs ge kai ǂkhîba nî ǃaroma.
ǀNî ǁaeb aib ge Jesuba ǂgui khoen ǀkha gere ǃhoa. Jodeǁî khoes ge ǁîs tsâsiba gere ǁgâiǂui tsî ge mî, ǃgâi ǁkhāǁkhā-aob Jesub di îs ge kaise nî ǂkhî-i. Jesub ge ǁîsa hui tsî ge mî: “Ā, ǃgâiǃōn ge hâ, Elob mîsa ǁnâu tsî ra sâubasena.” (Lukab 11:27, 28) ǃGâi ǁgûse is ge ǂkhîba a hau ǁkhā. Xawe Jehovaba ǁnâuǀnam tsî ǁîb ǀkhā ǀhōsagusisa ūhâs ge kai ǂkhîba ra hau.
Jehovab xa ǃkhōǃoahes ǂans ge kai ǂkhîba ra hau. ǃGomsigu ge ǂkhîba hau tama xawe i ge nē ǂkhîba a ūbē ǁoa. Xawe nē ǃgomsiga mâǀgaibes ge ǃgâi ǂurusiba ra hauba da. (Rom. 5:3-5) Jehovab ge ǁnān ǁîb ǃnâ ra ǂgomna ǁîb ǃanu gagab ǀkhā ra ǀkhae tsî ǂkhîb ge ǁnā ǀkhaeb di ǃâ. (Gal. 5:22) Nēs ge ra hui da Psalmdi 64:10 mîde ǁnâuǃāsa mîra de: ‘ǂHauǃnâb ge ǃKhūb ǃnâ nî ǃgâiaǂgao.’
Tae-e Johaneba ge hui ib aiǃgû ǂkhîba ūhâsa?
Nēs ge ra ǁgau Dianas tsî Johaneb hîna tsoatsoas ǃnâ ra ǂgaihe ra ge tae-i ǃaroma hâhâ ra ǂkhîba ūhâ isa ǃgomsin ǁaegu. Dianas ge ra mî: “Tita ge Jehovab ǃnâ gere ǂgomǃgâ ǀgôa-i ǁî-i ǁgû-e ra ǂgomǃgâ khami.” Matis ǁîsa Elob ra ǃkhōǃoasisa ra hōǃâ? “Hōǃâ ta ge ra ǁîb tita ra huisa i ta aiǃgû aoǁnâ sîenni ǀkhā ǂkhîb ǃnâ.” Johaneb hîna ǁîb aoǁnâ sîsenni ǀkha noxoba ra aiǃgûb ǁîb aiǂhanuba xūb ge ǁgôa xaweb ge ra mî tae-i ge ǁîba a huisa: “1998ǁÎ kurib ǃnâ ta ge ge ǁgaumâihe ǀhaohâb hui-aoga ǁkhāǁkhās ǃnâ. Nē ǁaeb ǃnâ ta ge noxoba ta ge dī tama hâ-i khami Elobmîsa ge ôaǃnâ.” ǁÎb tsî ǁîb taras tsîra ra ǃhoabaseb ge ra mî: “Sim mûǂuib ge ge ǀkhara Jehovaba ǃoabas ǃnâ kurigu ge i khami tae-i ǀgui-i ga mâsi xawem ge nēsa ga ūǃoa hâ. ǃHausen-e ūhâ tamasem ge nēsa ge dī.”
ǂGuin tsîn ge Psalmdi 64:10 ǃnâ hâ mîdi amaba ǁîn ûigu ǃnâ ge hōǃâ. Nē khoe-aogura di aiǁgaus xa ǂâi re 30 kuriga Amerikab Betels ǃnâ ge sîsen ra. ǁÎra ge nē kurigu khaoǃgâ ǀō-aisa aimâba-ao ra ase ge ǁgaumâihe. ǁîra ge nēsa ge ūǃoa: “ǃOab ge hoaǃnâ-aixa ǀnamts a xū-ets ga ǂoaǃnâ o” xawe ra ge ǀaro tsî ra mî: “Hoaǁaets ge ǃoab ǃnâ hâ ǁoa di.” ǃHaese ra ge ǀhaohâb ǀkha aoǁnâ sîsenni ǃnâ ge ǁhao. ǁÎra ge noxoba ra mî: ǂHâǂhâsa xūn ǃaromam ge gere ǀgore. “ǁÎra ǀgoredi ra ǃereamhe ǃkhais ge ǂkhâǃnâ tsî ǂkhîba gere mā ra. Sim ge ǀkhī o ,on ge ǀnî ǃgâsana aimâba-aon ase ge sîsen tsoatsoa tsîm ge ǀgam ǃgâi khoera hînam Elobmîsa ra ǁkhāǁkhā ra ge hō.”
“ǃGÂIAǂGAO . . . ǀAMOSIB KŌSE”
ǂKhîba hoaǁae ūhâs ge supu tama hâ tsî ǃgomsin ge nî hâ. Xaweb ge Jehovaba nē ǂkhâǃnâ ra mîdi Psalmdi 64:10 ǃnâ hâde ra mā. ǂKhabu ǂâi da ra ǁaeb ǃnâ da ge ǁnān hîna “ǂhanu-ain” ǃgomsigan ra hōǃâ xawen xa nî ǂâi tsî ‘ǃKhūb ǃnâ ra dâna.’ Jehovab mîǁguigu “ǀasa ǀhommi tsî ǀasa ǃhūbaib” digu ǃoas tsîna da ge a mûǂui ǁkhā. Nē ǁaeb ǃnâs ge ǀoasa kurusa ūhâ tama isa nî ūbēhe. Elob ǃoaba-aon hoan ge nî mî “ǃgâiaǂgao î du dâ ǀamosib kōse”. ǁÎb kurus tsî ǀkhaegu hoagu ǃnâ.—Jes. 65:17, 18.
ǂÂi re nēs tae-e nî ǂâibasensa: ǀoasa ûib tsî ǁgoas hoasa kai ǀgaib ǀkhā khâis. Tae-i ǀgui-i ga ǃgomsi hîna da ge ǃkharu ǃnâ-i di ǂâide da ge ūhâ tide. Mîba-e da ge ra “tsî aibekam xūn xa i ge ǃaruǀî ǂâihe tide, tsîn ge ǂgaob ǃnâ khâi tide.” Khâis di ǃgâiaǂgaob ge omaride nî ǀhaoǀhao. ǂGuin ge 12 kurixa ǀgôas hînab ge Jesuba ǁōba xu a khâi kais ǁgûra khami nî tsâ: ǁÎra ge “kai ǃhurib xa ge ǃkhōhe.” (Markub 5:42) Hoa khoen ǃhūbaib ai nî hân ge nî “ǂhanu-ai-i” hoaragase tsî ǀamosib kōse “ǃKhūb ǃnâ” nî ǃgâiaǂgao.
