ǃNomsa ǂgaob ǀkhas ge Danielsa di ǂgaes ǃnâ ge mî “ǀnai go hā ǀapaǃnamgu ge tā bel re.” Sim ǃgâb-ais ge audosa ge mâ, hoteli aisǀkhāb ai. ǁAeroba ǃkharu hâsem ge ǃkhōsis ǃnâ ge ūhē toro ǃkham-aogu xa. Xawe ta ge Danielsa ra gangan ǃkhâikhom tes ge ǃkhais ǃaroma tsî nēs ge ǁaeba ge mā te ǀnî ǂkhanina ǀnî hâ ǃgâsaba māsa.

ǀApaǃnamgu berosa ǃoam ra ī-ūhē hîna ta ge matikōse ǁkhoaǂgaoxa tsî gagasi tarasa ta ūhâ ǃkhais xa gere ǂâi. Nēs ge ge ǂgui ǃnādi ǀgui-i hînam ge tita tsî Danièls tsîna a sîsenǀhaosa. Hā re i ta ǁguiǃā tae-i ǃaromam ge sida sîsenni ge mā-amhe tama hâ i ǃhūgu ǃnâ sī gere sarisa.

Tita ge Katolik omaris ǃnâ 1930ǁî kurib ǃnâ ge ǃnae, Croix di ǀon hâ ǃās Fransi ǀapas (noordes) ǃnâ hâs ai. Ti omaris ge mâ wekheb hoaba kerkeba ǃoa gere ī tsî ti ǁgûb ge ǃnāsase kerkeb xūn ǃnâ gere ǁhao. Xawe 14 kurixa ta a hîna î ge xū-e ge ī ti mûde ge kerkeb ǃoa-ai a ǁkhowa-am-e.

Frans ǃhūb ge ǀgamǁî toro ǃkhams ǃnâ Duitsǃhūb toro ǃkham-aogu xa ge ǀoa hâ-i. ǁÎb aoǁnâs ǃnâb ge sida ǁkhāǁkhā-aoba ge ǂkhâǂǃnâ da î da pro-Nazi ǂhanub Vichis diba ǂkhâǃnâ. Nē ǃhoadi ge gere ǃao kai da. ǂGuin ge Fransi ǃnâ gere dī khami da ge BBC radiosa gere ǃgâ, hîna ge Allied torob xa gere ǃhoasa. ǁNās khaoǃgâb ge ǁkhāǁkhā-aoba ǁîb ra ǂkhâǃnâ ǃnansa ge dawa tsî Allies di dansa Septemberi 1944ǁî kurib ǃnâ gere tsēdī. Nēs ge ge buru kai te. Nēs ge di ǂgomǃgâba ǁkhāǁkhā-aob ǃnâ ge khôa.

Nē torob khaoǃgâb ge di ǁgûba ge ǁō. Ti ǀgam ausi ra ge ǀnai ge ǃgame hâ i tsî Belgiumi ǃnâ gere hâ, ǁnās ǀkha ta ge ti ǁgûsa gere kōǃgâ. ǃGâise ra matare-e sîsen-e ta ge ge hō. Ti ǀhûkhoeb tsî ǁîb ǀgôakha tsîn ge Katolik kerkeb ǃnâ ge hâ i. ǃGâi mûǂuiba ta ge nē sîsen ǃkhaib tawa ūhâ i, xawe ta ge ǀgūǁae ge ǃâitsâhe tsoatsoa.

 Ti ǃgâs Simones hîna ge a Jehovab di ǀHûǀguitimî-aon di ǀgui kais ge 1953ǁî kurib ǃnâ ge sari da. ǁÎs Elobmîsa ra sîsen ūses ge Katolik kerkeb ǂhumi ǁkhāǁkhāna ge ǁguiǃāba da. ǃNonaǀguira elob, tsî ǁōb khaoǃgâ ra ûi gagas tsîn xa. ǂGuro ta ge ge ǂgom ǂgao tama hâ-i Elobmîsas ra sîsen-ūsa. Xawe ta ge ǁaero i khaoǃgâ ge mû amabas ra ǃhoasa. ǁÎs ge ǃKhe xū ǂgō-ommi di ǂkhaniba ge mā te ǁnā ǃuia ta ge khomai toaba. Amaba ta ge ǃhaese ge mûǂan xawe gere ǃao Jehovab ǀkhāb ai mâsa, nēs ti sîsen-e nî ǂoaǃnâ kai te amaga.

ǁKhâga ta ge Elobmîs tsî ǃKhē xu ǂgō-ommi ǁkhāǁkhāǃâdi tsîna aitsama gere ôaǃnâ. Tsî ta ge Gaosib ǀHû-omma ǃoa īsa ge mîǁgui. ǀHaohâb khoen khoexaǃnâsib ge kaise ge tsâǀkhā te. ǃNani ǁkhâga Elobmîsa ǁkhāǁkhāsen tsî ta ge Septemberi 1954ǁî kurib ǃnâ ge ǁāǁnâhe. Tsî ta ge ǁnāpaxū kaise ge ǃgâiaǂgao ti ǁgûs tsî ǃgâsas tsîn ge ǀHûǀguitimî-ao kai o.

Ti ǁgûs ge 1958ǁî kurib ǃnâ ge ǁō, New Yorki ǃnâ ge hâ-i ǀō-aisa ǀkharib kai ǀhaos aiǃâ, tita ge nē ǀhaosa hâǃnâs di aiǂhanuba ge ūhâ i. Oa ǀkhī ta ge o, o ta ge kōǃgâ ta nî omarisa ge ūhâ tama hâ i tsî sîsen-e ge ǁnāxū tsî ge aimâba-ao kai. ǁNā ǁaeb ǃnâ ta ge Danièle Delie di ǀon hâ ǁkhoaǂgao aimâba-ao ǃgâsas ǀkha ge ǀhao, sim ge Meib 1959ǁî kurib ǃnâ ge ǃgame.

Daniels ge Brittanib ǃnâ ǁîs aimâba-ao sîsen-e ge tsoatsoa, ǁîs omsa xu ǃgūse. ǁÎs ge ǁkhoaǂgaosiba ge ǂhâ hâ i nē ǃās ǃnâ aoǁnâsa tsî ǃgaroǃāde ǃoa ǁîs ǀurihāb ǀkha īsa. ǁÎs ge ǀams di ǂhâǂhâsasib xa tita khami ge ǁgarihe, ǀunis mâ ǁae nî hā ǃkhaisa da ge ǀū i amaga. (Mat. 25:13) ǁÎs tanisen ǀgaub ge ge huimi îm ǀoasase Jehovaba ǃoabas ǃnâ mâǀgai.

Tsēdem ǃgame hâ hîna ta ge ǃnarimâra mûǂam-aob ase ge ǁgaumâi-e. Supu ûiba ūhâsam ge ge mîǁgui. ǂGuro ǀhaohâb hînam ge sarib ge 14 aoǁnâ-aona ge ūhâ i tsî ǃgâsan omdi ǃnâ hâs ge ge īǁkhā tama hâ i. ǁNā-amagam ge ǃhūb ai gere ǁgoe Gaosib ǀHû-ommi ǃnâ. Nēs ge ǃgâi tama hâ i xawem ge ge ǃgae tama hâ i.

ǂGui ǁaebam ge ǀhape i xawes ge Danielsa ǃnarimâ sîsen-e ge ǁnaedī. ǁÎs ge ǀnî ǁaega audos ǃnâ gere ǃâu te ǀhaohâb ǃûi-aogu ǀhaos gere hâ o xawes ge ge ǃgae tama hâ i. ǀGam kurikha ǀguikham ge ǃnarimâ sîsen-e ge dī, nēs ge ge ǁkhāǁkhā mi mati-i ǃgame hâ khoena ǂhauǃnâse nî ǃhoasa tsî ǀguiba nî sîsen ǀhaosa.—Aoǁn. 4:9.

1962ǁÎ kurib ǃnâm ge 37ǁî klas Gilead Skoli Brooklyn, New Yorki ǃnâ hâba ǃoa ge ǁkhauhe. 100 Studena xu î ge 13 na ge ǃgame hâ i, ǀguiba nē skola ǃoa īs ge ge kai aiǂhanu i sim ǃgao. Noxoba ta ge ǁkhoaxa ǁaeb hîna ta ge ǃgâsab Frederick Franzi, Ulysses Glassi tsî Alexander H. Macmillani tsîn ǀkha ūhâ îb xa ra ǂâi-oa.

 ǁNā skoli tawa da ge ge ǁkhāǁkhāhe î da sida ôaǃnâs ǀgauba ǃgâiǃgâi. ǀNî Satertaxtsēdi ai skoli khaoǃgâ da ge New Yorki ǃnâ sī gere kō mâ kaihe, nēs ge ge sida ǁkhāǁkhās ǃâ-i. Mantaxtsēs ai da ge mû da go xūn xa sī klas ǃnâ gere xoa. Satertaxtsēs ǃuis ai da ge kaise ge tsau hâ i, xaweb ge Betels tawa gere hui ǃgâsab hîna gere ǁgaumâ daba dîna gere dî, nēs ge kaise gere hui da. ǀNî Satertaxtsēs ai da ge hoa tsēsa ǃās ǃnâ ge ǃgû. Ôaǃnâ ǃkhaisa da ge ǀnî tsēs ai ge sari, nēpa da ge ǀhommi ǃnâ hâ ǀgamirodi tsî ǃhūbaib-ai ǁnā hâ ǀgamirodi tsîn xa ge ǁkhāǁkhāsen. Amerikab di museums ǃkharu ge ǁaeb xūna ra ǁgaus tawa da ge ǀgam ǃkharagaǃnâgu krokodil kha xa ge ǁkhāǁkhāsen. Betelsa ǃoa da ra oa hînab ge ǃgâsaba ge dî, “ǀhommi ǃnâ hâ ǀgamirodi tsî ǃhūbaib-ai ǁnā hâ ǀgamirodi tsîn ǁaegu-i tae-i ǃkharagagusiba hâ?” Daniels ge ge tsau hâ i tsî ǃeream tsî ge mî “ǃhūbaib-ai ǁnā hâ ǀgamirodi ge gaxu ǁgûga ūhâ.”

Frans ǃhūb ǁnâub berosa ǃoam ge ge ǁgaumâihe, ǁnāpam ge 53 kuriga ge ǃoaba. 1976ǁÎ kurib ǃnâ ta ge ǁnâub kommitees kōǃgâ-aob ase ge ǁgaumâihe tsî Afrikab tsî aiǂoas ǀkhāb tsîna ge sari, nē ǃhūgu ǃnâ i ge sida sîsen-e ge mā-amhe tama hâ i. Nēs xa ǃaroma-e hasem ge Gabons ǃoa ge ǃnari ǀgapisem go mî khamim ǀapaǃnam gu xa ge ǃkhōheba. Amaba ta ga mî o ,o ta ge tita ge ǃâubasen tama hâ i nē ǃereamde tanisa. Xawe ti taras huib ǀkha ta ge nē ǁgaumâide ge dīǁkhā i.

Tsoatsoasa xum ge Betels ûiba ge ǀnam i. Daniels ge Gileada ǃoam nî īs aiǃâ ǀapaǃaogowaba ge ǁkhāǁkhāsen tsî nēs ǀkha sida ǂkhanina gere ǂnûiǃkhuni. Kai ǃgâiaǂgaobam ge Betels tawa gere hōǃâ xaweb ge ǃgâiaǂgaoba ǀhaohâb xa gere ǀarohe. ǂÂihō ta ge ra treinsa ta ge ǃuia tsau hâse Daniels ǀkha a ū o, xawem ge kaise ge ǂkhî hâ i khoenam ge Elobmîsa ǀguiba sī gere ǁkhāǁkhāsa. Daniels ge ge ǀaesen tsî nēs ge ge mā-amsi tama hâ-i is kaise ǃnarimâ.

1993ǁÎ kurib ǃnâs ge samdi ǃnâ hâ kankersa ge hōǃnâ-e. Nēs ge kaise ge ǁkhōǁkhōsa i, ǃhôas tsî kemotherapi-i tsîna î ge ǃkhōǂgā hâ i amaga. 15 Kuriga ǃkharu tsîs ge ǁkhawa kankersa ge hōǃnâ-e, xawe nēs ge kaise ge ǁkhōǁkhōsa i. ǁÎs ge ǁîs ǁgaumâis ǂnûiǃkhunis disa kaise gere ǃgôaǃgâ tsî ǁnās ǀkha ǃgâises gere tsâ o, o sîsen-e ǃoa gere oa.

Daniels ǃgâi tama mâsib ǂam-aim ge Betelsa xu īsa ge mûnan-ai tama hâ i. Betels tawa ǀaesens ge ǃgomsina ūhâ, nau khoen ra ǂan io matikōsets ǀaesen hâsa. (ǂKhm. 14:13) Daniels ge 70 kurin ǃnâ hâ i xawes ge ǀgaisase ǀaesen hâ khoe-i khami ge mûsen tama hâ i. ǁÎs ge ge ǀkhomsen tama hâ i. Xawe nau khoena gere hui. ǁÎs ge ge ǂan i ǃgâra ǂgaes ge ǃgomsigu ǃnâ hâ khoe-e a hui ǁkhā di. (ǂKhm. 17:17) Daniels  ge ge khoen ǃgâ-ao-i, ǁîs aiǁgausas ge gere sîsen-ū nau ǃgâsade kankersa tā ǃao kaisa.

ǀAsa ǃgomsin tsînam ge ge mâǃoa tsoatsoa. Daniels ge ǀoasases ge sîsen hō tama hâ io tita ge ǂkhâǃnâ tsoatsoa ǂgui ǀgaugu ǃnâ. ǁÎs ge ǂgui xūn hîna ge ti ûiba gere supusupuna gere dī, ǁnās ǀkha ta ge 37 kuriga ǁnâub kommitees kōǃgâ-aose ge sîsen. Aiǁgause, ǁîs ge hoa xūna gere dī toa im ǀguiba sim kamers ǃnâ ǂû tsî sâ tsēs hoasa.—ǂKhm. 18:22.

Daniels ge hoaǁae ûib ǃnâ ǃgâi mûǂuiba ge ūhâ i. Xawes ge ǃnonaǁî ǃnāsa ǁkhawa kankersa ge hō. ǀGaiosem ge gere tsâ. Kemotherapi-i tsî radiotherapi-i tsîn ge ǁîs ǀgaib hoaba gere ū, ǀnî ǁaegas ge ǃgû hō tama hâ is kōse. Kaise ta ge ǁgaise gere tsâ ti taras hîna ge ǂnûiǃkhuni-ao is ge xū-e ǃhoa hō tama hâ io.

ǀGaiosem gere tsâ xawem ge gere ǀgore, Jehovab tani hōm tide ǃâitsâde mā mi tidesam ge ge ǂan i. (1Kor. 10:13) Jehovab ge ǁîb mîs, Betels ǀaeǃkhō-aon tsî gagasi omaris ǃnâ-ū gere mā huibam ge gere ǃgôaǃgâ.

Jehovabam ge hoaǁae gere ǂgan îb daoǁgau mi mā sōǀoanam nî ǃkhōǃoasa. ǀNî ǁaegu aim ge ge huihe hō tama hâ i. ǀAeǃkhō-aob ge Danielsa 23 kuriga ge ǀaeǃkhō xawe ge ǁguiǃā hō tama hâ i tae-i ǃaromas kemotherapi-i khaoǃgâ ǀgaiba ūhâ tama hâsa. ǁÎb ge mâ sōǀoa-eb nî māsa ge ǀū-i. ǀGurim hâ khamim ge gere tsâ tsî xūn mâ ǀamǂoasa nî ūhâsa gere ǂhâ. Xaweb ge ǀnî hâ ǀaeǃkhō-aob kankers diba Danielsab ge nî kōǃgâ di ge mî. Nēs ge Jehovab ge daoba a ǁkhowa-am îb huim mi ǁkhā khami gere tsâ.

Sim ǃgomsinam ge mâ tsēs hoasa mâǃoasa ge ǁkhāǁkhāsen. Jesub ge ge mî, “mâ tsēs hoas ǁîs tsūba ūhâsa.” (Mat. 6:34) ǃGâi mûǂuiba ūhâs tsî ǃgâi tanisen ǀgaub tsîn ge ge hui mi. Aiǁgause, Daniels ge kemotherapi-i ose ǀgam ǁkhâkha hâ io, os ge ge mîba te “nēti ta ge noxoba ge tsâ tama hâ i.” (ǂKhm. 17:22) ǃGomsinas gere tsâ xawes ge Gaosib ǁnaetsanade ǁnaes xa kaise ge ǃgâibahe i.

ǁÎs ǃgâi mûǂuib ge tita ge hui ǃnubusiga dansa. Amaba ta ga ra mî o, 57 kurigu hînam ge ǃgame hâ îgu ǃnâs ge di ǂhâsiga ge dīǀoaǀoa. ǁÎs ge ǃupun ra dīhe ǀgaus tsîna ge ǁgau te tama hâ i. ǁÎs ge ǀgaisase a ǀaesen o, o ta ge mati ta xaban tsî saran tsîna nî ǁā ǀgausa ge ǁkhāǁkhāsen tsî mati ta supu ǂûna nî sâi ǀgaus tsîna. Xabana ta ge gere khôa xawe ta ge ǁîsa ǂkhîǂkhîs ǃgao nē xūn hoana gere dī. *

Kō-oa ta ra o, o ta ge sim ǀaeb tsî kairasis tsîn ge hau ǃgomsina xu ǂguina ra ǁkhāǁkhāsen. ǂGurose da ge tā hoaǁae nî ǀhape-i sida ǀnamsabena da ǁaeba ūhâba tidese. ǂKham da noxoba a hîna da ge ǃgâi xūna sida ǀnamsaben ǃoagu nî dī. (Aoǁn. 9:9) Tā da ge ǂkhari xūn xa hoaǁae nî ǁaeǁaesen, nēsa da ga dī o, o da ge hō da ra ǀkhaega ǃgôaǃgâ tide.—ǂKhm. 15:15.

Sim sîsenni ǀoasase ǃoabas di-e ǃoa ta ra kō-oa o, o ta ge ra mû Jehovab ge ǂâi tamam hâ ǀgaugu ǃnâ ge ǀkhae mi. Psalmdi xoa-aob gere tsâ khami ta ge tita tsîna ra tsâ, mîb ge o: “ǃKhūb ge go ǃgâidī si xuige.”—Psa. 116:7.