ǂGOMS ge kai ǀgaiba ūhâ. Aiǁgauseb ge ǁGâuaba gagasise ra ǃgam da ǂgao xawes ge ǂgomsa “ǀaexa ǂāgu ǂkhabab digu hoaga a ǀari” ǁkhā. (Efe. 6:16) ǂGomsa da ga ūhâ o, o da ge ǃhomgu khami kai ǃgomsin tsîna a mâǃoa ǁkhā. Jesub ge ǁîb di ǁkhāǁkhāsabegu ǃoa ge mî: ‘ǂGoms mostardǃkhomro-i khami īsa go ga ūhâo, o go ge nē ǃhommi ǃoa nî mî: Nēpa xu ǁnāǀî ǂgō! Ob ge nî ǂgō.’ (Mat. 17:20) ǂGoms sada ǀhōsagusis Jehovab ǀkha da ūhâsa ra ǀgaiǀgai ǃkhaisa da ǂan amaga da ge sao ra dîde nî dîsen: ǂGomsa a tae? Sada ǂgaob mâsiba mati sada ǂgomsa ra tsâǀkhā? Mati da sada ǂgomsa a ǀgaiǀgai ǁkhā? Tsî ham-i ǃnâ da ǂgomsa nî ǁgau?—Rom. 4:3.

ǂGoms ge Elobmîs ǃnâ mâ xūna ǂgoms ai ǀgui ǃgaoǃgaosa tama hâ, ‘ǁGâuagu on tsîn ra ǂgom [Elob a ûitsamasa] tsî ra ǀkhū’ amaga. (Jak. 2:19) ǂGomsa ǁnâi a tae?

Elobmîs ge ǂgoms xa ǀgam xūna ra mî. ǂGurose, “ǂgoms ge khoe-i ra ǃâubasen xūn di ǁaposa.” (Heb. 11:1) ǂGomsa da ga ūhâ o, o da ge ra ǂgom Jehovab ra mî xūn hoan a ama tsî nî īsa. Aiǁgauseb ge Jehovaba Israelǁaesa ge mîba: “Sadu ga ti ǃgaeǀhaos tsēs dis tsî ti ǃgaeǀhaos tsuxub disa ǁauǁau ǁkhā io tsēs tsî tsuxub tsîra ǁaeb âra ai hâ tidega, ǁnās ǁkhās xases ge ti ǃgaeǀhaos, Davib ǀkha ta ūhâsa nî ǁauǁauhe ǁkhā.” (Jer. 33:20, 21) ǃAo du ra sores nî ǂoaxa ǀûsa tsîb tsēs tsî tsuxub tsîna nî ǀkhaisa? ǃHūbaiba ǃkhōmâi hâ ǀgaib tsî soresa ǃhūbaib ǂnamipe ra ǃgû kai ǀgaib tsîn ǃnâ da ga ǂgom o, o da Kuru-aob mîdi ǃnâs tsîna a ǂgom ǁkhā? Î, ǂgom ǁkhā da a.—Jes. 55:10, 11; Mat. 5:18.

ǀGamǁîse, ǂgoms ge “khoe-i mû tama xūn di ǂanǁaposisa.” ǂGoms ge ǃâubasen tama da hâ xūna ǃoa ‘mûǂuisa’ tamas ka io mû tama da hâ xūn ǃnâ “ǂanǁaposisa.” (Heb. 11:1) Mâ ǀgaub ǃnâ? Nēs xa ǂâi re, ǀgôa-i ga dî du o, ‘mati da a ǂan ǂoab hâsa?’ ǀGôa-i ǀkha ǂoab hâ ǃkhaisa ra ǁgau xūn xa ǃhoa re, aiǁgause, ǀomǂgā da ra ǂoab tsî ǀnî hâ xūn ǂoab ra ǃaroman tsîn xa. ǀGôa-i ga nē xūna ǁnâuǃā o, o i ge mû taman hâ xūn ǃnâs tsîna nî ǂgom. ǁKhā ǀgaub ǃnâs ge ǂgomsa amab ai a ǃgaoǃgaosa.​—Rom. 1:20.

ǂGoms ge amab ai a ǃgaoǃgaosa, ǁnā-amaga i ge khoe-e ǂgomsa i ga ǂhâba o, ‘amab di ǂansa’ nî hō. (1Tim. 2:4) Xawe da ge amab ǂans ǀguisa ǂhâ tama hâ. Apostel Paulub ge ge xoa: “ǂGaob ǀkhats ra ǂhanu-aisib ǃoa ǂgom” di. (Rom. 10:10) Khoe-i ge amab ǃnâ tā ǂgoms ǀguisa nî hî xawe amaba nî ǃgôaǃgâ. Nēsa i ga dī o, o i ge nî ǁgari-e Elob ǂhâba hâ ǀgaub ǃnâ ûisa. (Jak. 2:20) Khoe-i hîna ǃgôaǃgâsiba amaba ūhâba tama hâ i ge ǁgauǁgaude ūhâ xū-i ǃnâs tsîna ǂgom tide, ǁî-i di sorosi ǂhâsiga dīǀoaǀoas ǃaroma.  (2Pet. 3:3, 4; Jud. 18) Nēs ǃaroman ge ǂguin hîna Elobmîs ǁaeb ǃnâ ge ûi hâ ina ǂgomsa ge omkhâi tama hâ i, buruxa dīgan ge mû xawes tsîna. (Num. 14:11; Jhn. 12:37) Elob gagab ge khoen hîna amaba ǀnam tsî ra ǃgôaǃgân ǂgaogu ǃnâ ǂgomsa ra omkhâi.​—Gal. 5:22; 2Tes. 2:10, 11.

Gao-aob Davib ge ǁnān hîna ǀgaisa ǂgomsa ūhân ǁaegu ge hâ i. (Heb. 11:32, 33) Xawen ge ǀnîn hîna Davib omaris ǃnâ ge hâ îna nēti ī ǀgaisa ǂgomsa ge ūhâ tama hâ i. Aiǁgauseb ge Davib kai ǃgâb Eliaba, Daviba ge mîba ǂhanu tamaseb Goliab ǃoa-ai ra ǁaixa di. (1Sam. 17:26-28) Khoe-i ge ǂgoms ǀkha ǃnae tama hâ tamas ka io nēsa ǁîn ǁgûna xu hō tama hâ, ǁnās ǀkhas ge Davib ǂgoms hînab ge ūhâ īsa Elob ǀkhab ge ūhâ ī ǀhōsagusisa xu ra hā.

Psalmdi 27 ǃnâb ge Daviba ra ǁgau matib ge nē ǀgaisa ǂgomsa a omkhâisa. (Psa. 27:1) Davib ge ǁîb ǂans tsî Jehovab ǁîb khākhoen ǃoa-ai ge hui bi ǀgaus tsîn xa gere ǂâiǃgâ. (Psa. 27:2, 3) ǁÎb ge Jehovab di ǁgaumâis ǁîba ǃoabas disa kaise gere ǃgôaǃgâ. (Psa. 27:4) Davib ge Eloba nau ǃoaba-aon ǀkha tabernakeli tawa gere ǃoaba. (Psa. 27:6) ǁÎb ge Jehovaba ǀgores ǃnâ-ū gere ǀkhomma. (Psa. 27:7, 8) Davib ge Elob ǀgaugu ǃnâs tsîna gere ǁkhāǁkhā-e ǂgao. (Psa. 27:11) ǂGoms ge kaise Daviba ge ǂhâǂhâsaba i tsîb ge ge mî: “ǂGom tama ta ka io . .  . o ta ge kā hâ.”—Psa. 27:13.

Davib ǂgoms khami ī ǂgomsa du ge a ūhâ ǁkhā, Psalmdi 27 ǃnâ xoamâisa xūna du ga ûiǂui o. ǂGoms amab ai ǃgaoǃgaosa ǃkhais ǃaroma da ge Elobmîs tsî Elobmîs ai a ǃgaoǃgaosa ǂkhanina ra khomai ǂgao nēs nî huida amaga nē ǂûb Elob gagab tiba omkhâis ǃnâ. (Psa. 1:2, 3) ǁKhāǁkhāsents ga o ǁaeba ū tsî ǁnā xūn xa ǂâiǃgâ re. ǂÂiǃgâs ge ǃgôaǃgâsiba omkhâis ǀkha nî huida. ǃGôaǃgâsiba da Jehovaba ra omkhâiba khami da ge ǀhaode ǃoa īs tsî ǃgâiǂhôasa aoǁnâs ǃnâ-ū nēsa nî ǁgau bi. (Heb. 10:23-25) ǂGomsa da ūhâ ǃkhais tsîna da ge ra ǁgau ‘ǀgore tsî da ga ǂkhabuǂâi’ tama io. (Luk. 18:1-8) Nēs ǃaroma “ǀûs ose ǀgore” tsî Jehovab ai ǂgomaiǂnûi “ǁîb sado ra ǂhansenba xuige.” (1Tes. 5:17; 1Pet. 5:7) ǂGoms ge ǂhanu xūna ra dī kai da tsî ǂhanu xūna da ga dī, o da ge sida ǂgomsa ra ǀgaiǀgai.—Jak. 2:22.

ǁŌb nî ǃuis aiǃâb ge Jesuba ǁîb ǁkhāǁkhāsabega ge mîba: “Elob ǃnâ ǂgom, î go ǁkhāti tita ǃnâ ǂgom.” (Jhn. 14:1) Nēs ǃaroma da ge Jehovab ǃnâ ǀgui ǂgom tide  xawe Jesub ǃnâs tsîna. Mati da Jesub ǃnâ da ra ǂgom ǃkhaisa a ǁgau ǁkhā? Hā re i da ǃnona ǀgauga ǃhoaǃgao.

ǂGurose, ǂgom re Elob ge xoremariba ǀkhaeb ase a mā du sa. Apostel Paulub ge ge mî: “Tita ge ǂgoms Elob Ôab dis ǃnâ ra ûi, tita ge ǀnam hâ ib, tsî ǁî-aitsama tita ǃaroma ge māsenna.” (Gal. 2:20) Jesub ǃnâ da ga ǂgomsa ūhâ, o da ge xoremarib ge sida ǃaroma a mā-e ǃkhaisa ra ǂgom tsî da nēs ǃnâ-ū sida ǁorena nî ǀûba-e tsî ǀamo ûiba a hōǁkhās tsîna. Nēs ge kai ǀnammi hînab Eloba ūba da hâba ra ǁgau. (Rom. 8:32, 38, 39; Efe. 1:7) Xoremarib ge sida ǃaroma a mā-e ǃkhais ǃnâ da ga ǂgom, os ge nēsa nî huida i da tā tsūse sida xa tsâ.—2Tes. 2:16, 17.

ǀGamǁîse, Jehovaba ǃoa ǀgores ǃnâ ǀgū re, nēs ge xoremarib xa ra īǁkhā kai-e. Xoremarib xa i īǁkhā kaihe hâ amaga da ge Jehovaba ǃoa a ǀgore ǁkhā “ǀkhommxaǂgaosiba ǃkhōǃoa tsî da nî ǀkhomma hōse, î da ǂhanu ǁaeb ǃnâ huihe.” (Heb. 4:15, 16; 10:19-22) ǀGores ge ra huida ǁorena mâǃoas ǃnâ.—Luk. 22:40.

ǃNonaǁîse, Jesuba ǁnâuǀnam re. Apostel Johaneb ge ge xoa: “ǀGôab ǃnâ ra ǂgom-i ge ǀamo ûiba ūhâ-e, xawe ǀgôaba ǁnâuǀnam tama-i ge ûiba mû tide-e, tsîb ge Elob ǁaiba ǁî-i ai ra hâhâ.” (Jhn. 3:36) Johaneb ge ǂgomsa ǁnâuǀnamoǃnâsib ǀkha ge ǀgopeǀnō. Nēs ǃaroma da ge Jesuba da ga ǁnâuǀnam o, o ǁîb ǃnâ ǂgomǃgâsiba ra ǁgau. Jesuba da ge ra ǁnâuǀnam “Xristub di ǂhanuba” da ga sao o, nēs ge ǁkhāǁkhā tsîb ge mîmā xūna da ga dī o. (Gal. 6:2) “ǂGomǂgomsa tsî gā-ai ǃgāb” ra mā ǁgaraga da ga sao, os tsîna da ge Jesuba ra ǁnâuǀnam. (Mat. 24:45) Jesuba da ga ǁnâuǀnam, o da ge kai ǃgomsin tsîna a mâǃoa ǁkhā.—Luk. 6:47, 48.

ǀGui ǃnās aib ge aoba Jesuba ǃoa ge mî: “ǂGom ta ra ti ǂgomoǃnâsiba hui re.” (Mrk. 9:24) ǁÎb ge ǂgomsa ge ūhâ i xawe ge a mûǂan ǃnāsa ǂgomsab ǂhâ hâ ǃkhaisa. Nē khoeb khami da ge sada tsîna ǁaen ai ǃnāsa ǂgomsa nî ǂhâ. Nēs ǃaroma da ge sida ǂgomsa nēsi nî ǀgaiǀgai. Mû da go khami da ge sida ǂgomsa Elobmîsa khomai tsî khomai da ra xūna ǂâiǃgâs ǃnâ-ū a ǀgaiǀgai ǁkhā tsîs ge nēsa Jehovaba da ūba hâ ǃgôaǃgâsiba nî ǀgaiǀgai. Sada ǂgoms ge noxoba nî ǀgai sada ǃgâsan ǀkha da ga Jehovaba ǃoaba tsî nau khoena sada ǂgoms xa aoǁnâba tsî ǀgores ǃnâ mâǀgai o. Sada ǂgomsa da ga ǀgaiǀgai, o da ge kai ǀkhaeba ra ǃkhōǃoa. Elobmîs ge ra ǂkhâǃnâ da: “ǀNamsabedo, hoan xa ǃanu ǂgoms âdu ai ǂnubikhâisen î du ǁî-aitsama sâusen Elob di ǀnammi ǃnâ.”—Jud. 20, 21.