1. Ham-e Filipeǁî ǀhaohâba omkhâis ǀkha ge hui?

APOSTEL Paulub, Silab, Lukab tsî Timoteub tsîn ge Filipis ǃnâ sī o, on ge ǂgui khoena Gaosib ǃgâiǂhôas ǃnâ ǃgâiǃgâibasensa ge ūhâ i. Nē haka ǃgâsagu ge ǀhaohâba ge omkhâi tsîn ge hoa ǁkhāǁkhāsabena Lydia di ǀon hâ ǃhaokhoe ǃkhōǃoaxa khoes oms tawa ge ǀhao tsoatsoa.—ǃNǃkh. 16:40.

2. ǀHaohâba ǀgūǁae mâ ǃgomsina ge hōǃâ tsoatsoa?

² Nē ǀhaohâb ge ǀgūǁae ǃgomsina ge hōǃâ tsoatsoa. ǁGâuab ge ge dī în amaba ǃhui hâ khoena nē Xristeǁîn aoǁnâ sîsen i ǃoa ai ǃkham. Paulub tsî Silab tsîkha ge ǂnau-e tsî ǃkhōsis ǃnâ ge ūhe. ǃKhōsisa xu kha ge ǃnora kaihe o, okha ge nē ǀasa ǁkhāǁkhāsabena sari tsî gere ǂkhâǃnâ. ǁNās khaoǃgâ gu ge Paulub, Silab tsî Timoteub tsîna ǃāsa xu ge ī tsîb ge Lukaba ǁnāba ǀnîsi ge hâ. Nē ǀasa ǃgâsana tae-e ge dī? Jehovab huib ǀkhan ge ge aiǃgû ǁîba ǁkhoaǂgaosib ǀkha ǃoabasa. (Fil. 2:12) Paulub ge ǃaroma-e ge ūhâ i ǁîn xa ǃgâise tsâsa.

3. Filipeǁîn 1:9-11 tawa i ra ǁguiǃā-e khamib Pauluba tae-e gere ǀgoreba?

³ Disi kuriga ǃkharu tsîb ge Pauluba Filipeǁî ǀhaohâba ǃoa sîǂkhanisa ge xoa. Nē sîǂkhanisa da ra khomai hîna da ge Paulub ǀnammi nē ǃgâsan ǃoa-aib ge ūhâ ī ba ra mû. Mîb ge o “matikōse ta sadu hoado ra ǁkhoresa  ǃgam ǀnammi Xristub Jesub dib ǀkha.” (Fil. 1:8) ǁÎb ge ǁîna ǃoa ge xoa ǁînab gere ǀgoreba di. ǁÎb ge Jehovaba ǃoa ge ǀgore în ǃnāǂamsase ǀnamgu, ǂhâǂhâsa xūna ǂgurose mâi, ǂnao-oǃnâ, nau khoena tā ǃnôakai tsî ǃgai ǂūga ūhâ ǀgara. Nētsē da ge sida tsîna Paulub ǀnamxaǃnâ mîde xu ǂgui xūna a ǁkhāǁkhāsen ǁkhā. ǁNās ǀkha hā re i da khomai Paulub ge tae-e Filipeǁîna ǃoa a xoasa. (Khomai re Filipeǁîn 1:9-11.) ǁNāpaxū da ge ǁîb ge xoa xūna ǃhoaǃgao tsî nî kō mati da nē xūna nî sîsen-ūsa.

4. (a) 1 Johaneb 4:9, 10 ǃoagub Jehovaba mati ǀnamma ge ǁgau da? (b) Mâs kōse da Eloba nî ǀnam?

⁴ Jehovab ge ǁîb ǀgôaba sida ǁoren ǃgao ǁōs ǃnâ-ū sida ǀnamma ge ǁgau. (Khomai re 1 Johaneb 4:9, 10.) Jehovab māsenxa ǀnammi ge ra ǁgari da i da ǁîba ǀnam. (Rom. 5:8) Eloba da mâs kōse nî ǀnam? Jesub ge nē dîsa ge ǃeream Farisebab ge mîba o: “ǃKhūb sa Elobats ge nî ǀnam sa ǂgaob hoab ǀkha, tsî sa ǀoms hoas ǀkha, tsî sa ǂâis hoas ǀkha.” (Mat. 22:36, 37) Eloba da ge sida ǂgaob hoab ǀkha ra ǀnam ǂgao. Nē ǀnamma da ge tsēs hoasa ra ǀgaiǀgai ǂgao. Paulub ge Filipeǁîna ge mîba ǁîn ǀnammi ge nî ǃnāǂamsa di. Tae-e da nî dī sida ǀnamma Elob ǃoa-ai ǀgaiǀgaisa?

5. Sida ǀnamma mati nî ǀgai?

⁵ Eloba da ge nî ǂan ǁîba da ga ǀnam ǂgao o. Elobmîs ge ra mî: “ǀNam tama-i ge Eloba ǂan tama-e, Elob a ǀnam xui-ao.” (1Jhn. 4:8) Apostel Paulub ge ge ǁgau sida ǀnammi Elob ǃoa-ai da ūhâb ge nî ǀgai “ǂans tsî hōǃâs hoas ǃnâ” da ga kai o. (Fil. 1:9) ǂGurose da ge Elobmîsa ǁkhāǁkhāsen tsoatsoa o, o da ge Jehovaba ge ǀnam ǁîb xa da ge ǃnāsase ǀū i xawe. Tsî i ge ǁîb xa da ra ǁkhāǁkhāsen khami ǁîba da ūba hâ ǀnamma ge ǀgai. ǁNā-amaga da ge Elobmîsa ôaǃnâ tsî ǂâiǃgâsa ǂhâǂhâsase sida ûib ǃnâ ra mû.—Fil. 2:16.

6. 1 Johaneb 4:11, 20, 21 ǃoagu da mati ǃnāǂāmsa ǀnamma nî ǁgaugu?

⁶ Elob sida ūba hâ ǀnammi ge nî ǁgari da i da sida ǃgâsana ǀnam. (Khomai re 1 Johaneb 4:11, 20, 21.) ǀNîsi da ge ra ǂâi kaise i a supu di sida ǃgâsana ǀnamsa nēs ge hoa da Jehovaba ra ǃoaba amaga tsî ra dītsâsa ǁîb di ǃgâi ǀgauga ǁgaesa. Jesub aiǁgausa da ge ra ǁgae hîna ge kai ǀnamma a ǁgauba ǁîb ûiba sida ǃgao mās ǃnâ-ū. Xawe ǀnî ǁaegu ai i ge ǃgom ǀnammi xa hâ mîmâisa ǁnâuǀnamsa. Filipeǁîn ǀhaohâb aiǁgaus xa ǂâi re.

7. Paulub ge Euodias tsî Sintixes tsîna a mā ǁnamasa xu da tae-e ra ǁkhāǁkhāsen?

⁷ Euodias tsî Sintixes tsîra ge ǁkhoaǂgaoxa ǃgâsara hîna ge apostel Paulub ǀkha gere sîsen ra. Xawe ra ge ǀnîsi ǁîra ǁaegu ǃgomsina ge hōǃâ tsoatsoa tsî ge ǀhōsagu tama hâ i. ǁÎb sîǂkhanis hînab ge nē ǃgâsara ge hâ i ǀhaohâba ǃoa a xoas ǃnâb ge Pauluba Euodias tsî Sintixes tsîra ǀonde ǂgai tsî ǁîra ge ǃkhâikhom “î ra.  . . ǀguiǂâixa.” (Fil. 4:2, 3) Paulub ge hoa ǀhaohâba ǃoa ge xoa mî rase: “Hoa xūna ǀaras tsî ǃhoaǃoas ose dī re.” (Fil. 2:14) Paulub di ǃkhâikhoms ge nē ǀgam  ǂgomǂgomsa ǃgâsara ǀguira ge hui tama hâ i xawe hoa ǀhaohâba ge hui în ǃnāǂamsase ǀnamgu.

8. Tae-e nî ǃgom kai sida ǃgâsana ǀnamsa tsî tae-e a huida ǁkhā?

⁸ ǀNî ǁaegu ai i ge kaise ǃgom sida ǃgâsana ǀnamsa Euodias tsî Sintixes tsîn khami da ǁîn ge dī ǁgai xūn ai ra kō amaga. Hoa da ge tsēs hoasa ra tsūdī ǁnā amaga i ge nau ǃgâsan ra dī tsū xūn ai da ga kō, o ǁîna da ūba hâ ǀnamma nî ǃkhai. Aiǁgause ǃgâsa i ga Gaosib ǀhû-omma ǃanu huida tama io, o da ge ǁî-i ǀkha ǁaixa ǁkhā. ǁÎn ge dī ǁgai xūn hoana da ga ǃgôa khâi o, o da ge ǁî-i ǀkha kaise ǁaixa ǁkhā tsî i ge ǁîna da ūba hâ ǀnamma nî bē. Nēti i ǃgomsiba da ga ǀhaohâb ǃnâ hōǃâ o, o da ge ǂâis ǃnâ nî ūhâ Jehovab ge sida ra dīsā xūn tsî sida ǃgâsan din tsîna ra mûǂan. Nēn hoan ǂamaib ge Jehovab noxoba hoa da ǀnam. ǁNā-amaga da ge Jehovab ǀnamma ǁgae tsî sida ǃgâsan ra dī ǃgâi xūn ai ǂâisa nî ǂnûi. Sida ǃgâsana da ūba hâ ǀnamma da ga ǀgaiǀgai o, o da ge ra ǀguiǃnâxa.—Fil. 2:1, 2.

9. Mâna a ‘ǂhâǂhâsa xū’ hînab ge Pauluba Xristeǁîn hîna Filipes ǃnâ hân ǀkha a ǃhoana?

⁹ ǃAnu gagab ge Pauluba ge ǂkhâǃnâ îb Filipes ǃnâ hâ khoen tsî hoa Xristeǁîn tsîna ǁnama în ‘ǂhâǂhâsa xūna ǃâitsâ ǁkhā’. (Fil. 1:10) Nē ǂhâǂhâsa xūn ge Jehovab ǀonsa ǃanuǃanus ǁîb ǂâisa dīǀoaǀoas tsî ǀhaohâb ǃnâ hâ ǂkhîb tsî ǀguiǃnâxasib tsîna ǃkhōǂgā hâ. (Mat. 6:9, 10; Jhn. 13:35) Nē xūna da ga ǂhâǂhâsase sada ûib ǃnâ ūhâ o, o da ge ra ǁgau Jehovaba da a ǀnam ǃkhaisa.

10. Tae-e da nî dī i da ǂnao-ose mû-e?

¹⁰ Paulub tsîn ge ge mî i da ‘ǂnao-o.’ Nēs ge ǂâibasen tama i da ǀoasa kurusa ūhâ. Jehovab khami da ge tātsēs tsîna ǂnao-o hō tide. Xawe Jehovab ge ǂnao-ose nî mû da ǁgūtsâ da ga ra o ǀnamma omkhâi tsî ǂhâǂhâsa xūna ǂgurose mâisa. Sida ǀnamma da ge ra ǁgau nau khoena da ga ǃnôakai tama io.

11. Tae-i ǃaroma da nau khoena ǃnôakaisa xu nî ǂgōsen?

¹¹ Nau khoena ǃnôakaisa xu ǂgōsen di hâ ǁgarab ge kaise a ǂhâǂhâsa. Mati da khoe-e a ǃnôakai ǁkhā? Nēsa da ge ǃgâi ǁaeba da ra ūhâ ǀgaub, ana da ra ǀgaub tsî sîsen i hîna da ra dī i ǃnâ-ūs tsîna a dī ǁkhā. Dī da ra xū-i ge ǀnîsi tsū tama hâ. Xawe i ga sida ra dī xū-e nau khoe-i ǃgâiǂâisa tsâǀkhā tsî ǁî-e ǃnôakai o, os ge nēsa a ǁkhōǁkhōsa. Sida ǃgâsana ǃnôakais ge ǀuis ǀkha ǃaob ai ǃgae-e tsî hurib ǃnâ aoǂgā-es xa kaise a tsū.—Mat. 18:6.

12. ǀNî aimâba-ao khoe-aogura aiǁgausa xu da tae-e ra ǁkhāǁkhāsen?

¹² Aimâba-ao khoe-aogura mati Jesub ge mî xū-e ge sîsenǂui? ǁÎra ge ǀasase ge ǁāǁnâsa i khoe-aogura ǀkha ǀgui ǀhaohâb ǃnâ ge hâ i hîna ge ǂgui xūna dīsa ge mā-amsa tama hâ i omarisa xu gere hā ra. Nē khoe-ao gura ge gere ǂgom Xristeǁîn ase da ge tā muvina nî kō ǃanun ga i xawes tsîna. ǁÎra ge kaise ge buru ǁnâu ra ge o aimâba-ao khoe-aogura ge muvisa sī goro kō ti. Nau khoe-aogura ge muvina kōsa xu ge ǂgōsen ǀasa khoe-aogura tae-i  a ǃgâis tsî tae-i a tsūs tsîn ǁaegu nî mûǂans kōse. (Heb. 5:14) Nē ǀgaub ǃnâ ra ge nē khoe-aogura ge ǁgau ǁîra ǀasa ǃgâsara ra mîs ǃnâ ǀgui ǀnam tamasa xawe dīb ǃnâs tsîna.—Rom. 14:19-21; 1Jhn. 3:18.

13. Mati da khoe-e a ǁore kai ǁkhā?

¹³ ǀNî hâ ǀgaub khoe-e da ǃnôa kai ǁkhāb ge ǁî-e ǁore kais ǃnâ. Nēsa mati a ī ǁkhā? Sao ra aiǁgaus xa ǂâi re. Kaise i ǃgarise ǁgūtsâ hâ hîna i ge Elobmîsa ra ǁkhāǁkhāsen khoe-e ǁî-i ā ǀgauba ǀnōsase ra ūhâ. ǁÎb ge ra ǁnâuǃā xûi-e āsa xūb hoase nî ūbēsensa. Tsî ǁnāpaxū ǂgui ǀkharaǀkharana ǁîb ûib ǃnâ dī tsî ra ǁāǁnâhe. ǁĀǁnâs khaoǃgâb ge ǃgâsaba ǂûǀhaosa ǃoa ǃgâsa i omsa ǃoa ra ǁkhauhe tsî xûi-e ra māhe tsî ra mîbahe: “Nēsits ge a Xristeǁî tsî Jehovab gagabats ge ūhâ. ǀGui ǂûb ǃanu gagab dib ge ǃkhō-oasensa. ǃKhō-oasensats ga ūhâ o, ots ge xûi-e ǀnōsa ǀgaub ǃnâ nî ā.” ǀAmǂoas ge kaise ga tsū hâ nē ǀasa ǃgâsab ga nē tsū ǀapemāsa ǃgâ tsî ǁkhawa xûi-e ā tsoatsoa hâ o.

14. Xristeǁî ǀhaode mati Filipeǁîn 1:10 tawa hâ ǀapemāde ûiǂûis ǀkha ra huida?

¹⁴ Sida Xristeǁî ǀhaodi ge Filipeǁîn 1:10 tawa hâ ǀapemāde ǂgui ǀgaugu ǃnâ ûiǂûis ǀkha ra huida. ǂGurose ǀhaodi tawa da ra ǃhoaǃgao xūn ge ra ǁgau Jehovab tae-e ǂhâǂhâsase ra mûsa. ǀGamǁîse da ge mati da ǁkhāǁkhāsen da go xūna nî ûiǂûisa ra ǁkhāǁkhāsen  i da ǂnao-o. Tsî ǃnonaǁîse da ge ra ǂkhâǃnâ-e i da “ǀnammi tsî ǃgâi sîsengu” tsîn ǃnâ ǃgû. (Heb. 10:24, 25) Sida ǃgâsan ga ǂkhâǃnâ da o, o i ge ǁîn tsî Elob tsîna da ūba hâ ǀnamma nî ǀgai. Sida ǃgâsan tsî Elob tsîna da ga ǂgaoba xu ǀnam o, o da ge nau ǃgâsana ǃnôakaisa xū nî ǂgōsen.

15. “ǂHanu-aisib di ǂûn ǀkha ǀoaǀoahesa” tae-e ra ǂâibasen?

¹⁵ Paulub ge ge ǀgore în Filipeǁîna “ǂhanu-aisib di ǂûn ǀkha ǀoaǀoahe.” (Fil. 1:11) Nē ‘ǂhanu-aisib ǂûn’ ge Jehovab tsî khoen tsînan ūba hâ ǀnamma ǃkhōǂgā hâ. Nēs ge ra ǂâibasen ǁîn nau khoen ǀkha ǁîn ǂgoms Jesub ǃnân ūhâs tsî hāniǁaeb ǀkhaegu xa nî ǃhoasa. Filipeǁîn 2:15 ge ǀnî hâ ǂkhōsa ra sîsen-ū mî rase ǁîn ge ‘ǃhūbaib di ǃnân ase ra ǃnâ.’ Nēs ge a ǂhanu Jesub ǁîb ǁkhāǁkhāsabena ǃoa sadu ge ‘ǃhūbaib di ǃnâdo’ di a mî amaga. (Mat. 5:14-16) ǁÎb saosabenab ge ge mîmā în “ǁkhāǁkhāsabedī” tsî ǁîna ǃoa ge mî ǁîn ge a “ǃkhō-amao.  . . ǃhūbaib di ǀams kōse” di. (Mat. 28:18-20; ǃNǃkh. 1:8) ‘ǂHanu-aisib di ǂûna’ da ge ra tani ǁkhoaǂgaosib ǀkha da ga aoǁnâ sîsenni ǃnâ ǁhao o.

16. Filipeǁîn 1:12-14 ǃoagu da mati ǃnâb ase nē ǃhūbaib ǃnâ a ǃnâ ǁkhā ǃgomsin ǂam-ai? (Tsoatsoa-ai hâ ai-īsiba mû re.)

¹⁶ Mâ mâsib hoab ǃnâ da ge ǃnâb ase a ǃnâ ǁkhā. ǀNî mâsigu ǃnâ i ge aoǁnâ sîsen-e ra ǃgom kai xūna a ǃē ǁkhā aoǁnâs diba. Aiǁgause Apostel Paulub ge ǃkhōsis ǃnâ Romes ǃnâ ge hâ i ǁîb sîǂkhanisab ge Filipeǁîna ǃoa xoa o. Xaweb ge ge ǀû tama hâ i ǁîb ǃûi-aogu  tsî sari bi ra khoen tsîna aoǁnâbasa. Paulub ge ǁkhoaǂgaosib ǀkha nē mâsigu ǃnâ gere aoǁnâ tsîs ge nēsa ǃgâsana ǂgomǃgâsiba ge mā în ‘ǁkhoaǂgaosib ǀkha mîsa ǃaob ose ǃhoa.’—Khomai re Filipeǁîn 1:12-14; 4:22.

17. ǃGâsana mati nî aoǁnâ ǀgara ǃgom ǁaegu ǃnân ga hâ xawe?

¹⁷ ǂGui ǃgâsan ge Paulub khami ǁkhoaǂgaosiba ra ǁgau. ǁÎn ge ǃnorasasen a aoǁnâ ǁoa ǃhūgu ǃnâ ra hâ ǁnā-amaga ǀnî hâ ǀgauga ra ôa aoǁnâs diga. (Mat. 10:16-20) ǀNî ǃhūb ǃnâb ge ǃnarimâ ra mûǂam-aoba ge mî, i i mâ aoǁnâ-ao i hoa-e ǁî-i ǀaokhoen, ǁî-i ǁan ǁare-aon, skol ǀhōsan, sîsenǀhao-aon tsî ǂan an a khoen tsîna aoǁnâba. ǀGam kurikha ǃnâ i ge ǀhaohâga ǁnā ǂharis ǃnâ ge ǀarosen. ǀNîsi i ge sida ǃhūb ǃnâ ǃnorasase aoǁnâsa mā-amsa. Xawe da ge nau ǃgâsan hîna aoǁnâsa mā-amsa tama ǃhūgu ǃnâ ra hâna xu ǂûǂûsa xū-e a ǁkhāǁkhāsen ǁkhā: Hoase da ga aoǁnâ sîsenni ǃnâ dī o, ob ge Jehovaba ǁkhāsiba nî mā da aoǁnâs diba ǃgomsina da ga hōǃâ xawe.—Fil. 2:13.

18. Tae-e da nî mîǁgui dīsa?

¹⁸ Nēsi da ge ǁgariǁgarisase Paulub ge Filipeǁîna ǃoa a xoa sîǂkhanis ǃnâ hâ ǁnamasa nî sao. Tsî da ge ǂhâǂhâsa xūna ǂgurose mâi, ǂnao-o, nau khoena ǃnôakaisa xu ǂgōsen tsî ǂhanu-aisib ǂûna nî tani. Nēsa da ga dī o, o da ge ǀnammi ǃnâ nî ǃnāǂam tsî ǂkhaisiba Jehova Eloba nî mā.