1. ǃGammes nî ǃgâsab xas ga ǂâi os ǃgâsasa mâ dîde nî dîsen?

HOA Xristeǁîn ge Jesuba ǃnāka nî hâba. ǁÎb ge ǀoasa kurusa ūhâ tsî a dana. Xawes ga Xristeǁî tarekhoesa a ǃgamme o. Os ge ǀoasa kurusa ūhâ tama danaba ǃnāka nî hâba. ǁNāsa dīs ge hoaǁae supu tide. ǁNā-amagas ge ǃgamme ǂgaos ra ǃgâsab xas ga ǂâi o. Saora dîde nî dîsen: ‘Mati ta a ǂan nē ǃgâsab nî ǃgâi oms dana kai ǃkhaisa? Jehovaba ǀgoreǀîsab ǂgurose ǁîb ûib ǃnâ ra mâi? Ti i ga ī tama io, mati io ta ra ǂâi ǁîb ǃgamme toam ga ra o Jehovab ǀgūse nî ūhâ mi di?’ Tsîs ge nox nî dîsen: ‘Mâ ǂūga da ūhâ sim ǃgammeba nî omkhâiga? ǃNūǃnâxa ta a? Tsî ta ǂgaoba xu khoena xūna ra mā? Jehovab ǀkha ta ama ǀgū ǀhōsagusa ūhâ?’ (Aoǁn. 4:9, 12) ǃGammes nîs aisis ga ǃgâsasa ǃgâi mîǁguiga dī o. Os ge ǂkhî tsî ǁkhoaxa ǃgamme ûiba nî ūhâ.

2. Tae-e da nē ǁkhāǁkhāǃâs ǃnâ nî ǃhoaǃgao?

² Miliundi Xristeǁî ǃgâsadi ge ǃgâi aiǁgausa ra mā da. ǁÎdi aoga di ga ǃnāka hâba o. ǁÎdi ge koahesa anu hâ. Nē ǂgomǂgomsa taradi ǀkha Jehovaba ǃoabasa da ge kaise ra ǃgôaǃgâ. Nē ǁkhāǁkhāǃâs ǃnâ da ge nē ǃnona dîdi di ǃereamde nî hō. (1) Mâ ǃgomsiga di ǃgamme tarade ra hō? (2) Tae-i ǃaromas tarasa aitsamaba xu aosaba ǃnāka ra hâba? (3) Jesub, ǁîb mas Marias tsî Abigails di aiǁgausa xun. Xristeǁî aogu tsî taradi tsîna tae-e danaga ǃnâka hâbas xa a ǁkhāǁkhāsen ǁkhā?

3. Tae-i ǃaroma i ǃgomsi-e ūhâ tama hâ ǃgamme om-e a ǀkhai?

³ ǃGammeb ge ǀoasa ǀkhaeba Jehovaba xu. Xawen ge khoena ǀoasa kurusa ūhâ tama hâ. (1Jhn. 1:8) ǁNā-amagas ge Elobmîsa ǃgamme hâ khoena ra mîba ǁîn ǃgomsiga nî ūhâ ti. ǁNā ǃgomsigu ge “ǁgans ǃnâ ǁgâiǀā-e” ūhâs ǀkha nî ǀgui. (1Kor. 7:28) ǀNî ǃgomsin hînas ǃgamme tarasa ǀnîsi nî hōǃân xa da ge nēsisa nî ǃhoa.

4. Tae-i ǃaromas tarasa nî tsâ aoba ǃnāka hâbas nî ǃgomsa?

⁴ Kaikaihes ge ǀgaub ǃaromas ge ǃgamme tarasa ǀnîsi nî ǃgombahe ǁîs aoba ǃnāka hâbasa. Marisols hîna Amerikab ǃnâ ra hâs ge ra mî. “Tita ge kai ǀkhab ai di ge tarekhoede gere mîbahe. ǁÎdi aorekhoegu ǀkha a ǀgui ǃkhaisa. Tsî hoa xūn ǃnâ ǁîgu ǀkha nî ǀguisa. ǂAn ta ge a Jehovab ge danaga ǁgaumâisa. Tsîb taradi ǁîga ǃnāka nî hâbasa ra ǂhâbasa. Tsî di taradi tsîna ǃgôasiba ǂhâba hâsa. Xawe i ge ǀnî ǁaegu ai kaise a ǃgom ti aoba ǃnāka hâbasa. ǃHūbaib ra mî ǁnās ǂhâbasa tama amaga.”

5. Mâ ǃgâi tama ǂâiǀgauga gu aorekhoega ūhâ, tarekhoedi ǃoagu?

⁵ Xawe ǀnîsis ge ǃgâsasa tarekhoede ǃgôaǁnâ hâ aoba ǃgamme hâ. Ivon di ǀon hâ ǃgâsas hîna Suid Amerikab ǃnâ ra hâs ge ra mî. “Sida ǀkhab ai gu ge aore khoega ǂguro ra ǂû. ǁNapaxu di ge tarekhoede ra ǂû. Tare ǀgôadi ge nî sâi tsî ǃanu. Xawe gu ge aore axaga mamasadi tsî ǃgâsadi xa ra horabahe. Tsî ǁîgu a ‘oms di gao’ di ra mîbahe. Yingling di ǀon hâ ǃgâsas hîna Asiab ǃnâ ra hâs ge ra mî. “Ti gowab ǃnâ i ge mîsa hâ. Nēti ra mîsa, tarekhoes ge ǂhâbasa tama hâ gā-aisa tamas ka io ǂansa ūhâsa. ǁÎdi ge omde nî kōǃgâ. Xawe di ge ǁîdi aogu ǀkha ǂâide a ǀgoragu ǁoa.” Aob hîna ǀnamxaǃnâ tamab tsî Elobmîs ǀgaub ǃnâ tanisen tamab ge ǁîb taras di ûiba ra ǃgomǃgom. Tsî ǁnās ǀkha Jehovab tsî Jesub tsîna ǂkhîǂkhî tama.—Efe. 5:28, 29; 1Pet. 3:7.

6. Tarade tae-e nî dī î di ǀgū ǀhōsagusa Jehovab ǀkha omkhâi?

⁶ ǃKharugo ǁkhāǁkhāǃâs ǃnâ go ro ǂoaxaseb ge Jehovaba ra ǂgaoǀkha îgu aoga ǁîgu omarisa gagasise kōǃgâ. Tsî ǁîn di ǂûs tsî ās tsîna kōǃgâ. Tsî ǁîn ra tsâ ǀgaub xas tsîna ǂâi. (1Tim. 5:8) Xawe di ge ǃgamme hâ taradi tsîna ǁaeba nî ǁamaǂui. Î di tsēs hoasa Elobmîsa khomai tsî ǂâiǃgâ. Tsî ǂgaoba xu Jehovaba ǃoa ǀgore. Nēsa dīs ge kaise a ǃgom ǁkhā. Taradi ge kaise ǂgui xūna ra dī. Tsî ǁae-i tsî ǀgaib tsîna ūhâ tama nē xūna dīs ti-e. Xawe di ge ǁaeba nî ǁamaǂui nē xūna dīsa. Tae-i ǃaroma? Jehovab ge ra ǂhâba i i mâ khoe-i hoa-e ǀgū ǀhōsagusa ǁîb ǀkha omkhâi.—ǃNǃkh. 17:27.

7. Tae-es ga dī os taras di ǁgaumâisa nî supu?

⁷ Taras ge kaise ǃgarise nî sîsen is ǁîs aob hîna ǀoasa kurusa ūhâ tamaba ǃnāka hâba. Xawes ga Elobmîs ǃnâ māsa ǃaromade ga ra ǁnâuǃā o. Os ge ǁîs aoba ǃgôa tsî nî ǁnâuǀnam. Os ge ǁîs di ǁgaumâisa nî supu.

8. Efeseǁîn 5:22-24 ǃoagus Xristeǁî tarasa tae-i ǃaroma ǁîs di aoba ǃnāka nî hâba?

⁸ Xristeǁî taras ge ǁîs di aoba ǃnāka ra hâba. Jehovab ǁnāsa ǁîsa xu ra ǂgaoǀkhā amaga. (Khomai re Efeseǁîn 5:22-24 sa.) ǁÎs ǀhomsi ǁGûbas ge ra ǂgomǃgâ.  Tsîs ge a ǂan ǁîb di ǀgaugu ǀnamma ǃkhōǂgā hâsa. Tsîb ǃgâib ǀguiba ǁîsa ra ǁkhoreba amaga.—Deu. 6:24; 1Jhn. 5:3.

9. Tae-e ra ī Xristeǁî ǃgâsas ga ǁîs di aoba ǃnāka ga ra hâba o?

⁹ ǃHūbaib ge tarekhoede ra ǂkhâǃnâ î di tā Jehovab ra mî ǀgauga sao. Tsî aoga ǃnāka hâbasa ǃgâi tama ǀgaub ǃnâ mû. Xawe ǁnati ra mîn ge sida ǁGûba ǂan tama hâ. Jehovab ge tātsēs tsîna ǁîb di ǀnamǀnamsa ǀgôade, ǁîde a ǃgomba xū-e dī kai tide. ǃGâsas hîna Jehovab mâi hâ ǁgaraga ra ǁnâuǀnam tsî aoba ǃnāka ra hâbas ge ǂkhîba ra ǀkhī-ū. (Psa. 119:165) Tsî ǁnās ǀkhas ge hoa omarisa ra ǀama.

10. Tae-e da Carol di ǀon hâ ǃgâsas ge mî xū-e xu a ǁkhāǁkhāsen ǁkhā?

¹⁰ ǃGâsas hîna ǁîs di aoba ǃnāka ra hâbas ge ra ǁgau ǁîs Jehovaba ǀnam tsî ǃgôa hâsa. ǁÎb hîna ge danasisa a ǂnûiǂgāba. “ǂAn ta ge a ti aob nî dīsāsa,” tis ge Carol di ǀon hâ ǃgâsas hîna Suid Amerikab ǃnâ ra hâsa ra mî. “Tsî ta ge a ǂan xū-eb ga dīsā o. O ta ra tanisen ǀgaub matikōse ta Jehovab ǀkha ta ūhâ ǀhōsagusa ra ǃgôaǃgâ sa ra ǁgausa. ǁNā-amaga ta ge ǁîba ǃnāka ra hâba. Ti ǀhomsi ǁGûba ta ra ǃgâiaǂgao kai ǂgao amaga.”

11. Tae-e Aneese ti ǀon hâ ǃgâsasa ge hui is ǀūba tsî tae-e da ǁîs ge mî-e xu a ǁkhāǁhāsen ǁkhā?

¹¹ Taras ra tsâ ǀgaus xab ga ǁîs aoba ǁae tama io. O i ge ǃgom ǁkhā ǁîsa aoba ǃnāka hâbasa. Xawe kō re ǃgamme hâ ǃgâsas Aneese di ǀon hâs ǁnā xū-i ra ī o mati ra mîsa. ǁÎs ge ra mî: “Dītsâ ta ge ra i ta tā ǁaixa. ǂÂihō ta ge ra hoada ra dīsā ǃkhaisa. Dītsâ ta ge ra î ta Jehovab sida ra ǀūba khami ǀūba. Tsî ta ga ǀūba o, o ta ge ǂkhîba ra hōǃgâ.” (Psa. 86:5) Taras hîna ǀūbaxas ge supuse aoba ǃnāka a hâba ǁkhā.

12. Elobmîsa tae aiǁgauna ūhâ?

¹² ǀNîn ge nî ǂâi khoe-i hîna nau khoe-e ǃnāka ra hâba i a ǂkhabusasa. Xawe ǁnās ge ama tama hâ. Elobmîs ǃnâ i ge ǂgui aiǁgauna hâ. Khoen hîna ge ǃnāka gere hâbana xawe ge ǁkhoaǂgaoxa ī na. Kō re  tae-e da Jesub, Abigails tsî Mariasa xu ra ǁkhāǁkhāsensa.

13. Tae-i ǃaromab Jesuba Jehovaba ǃnāka ra hâba? ǁGuiǃā re.

¹³ Jesub ge Jehovab di ǂhanuga ǃgôa hâ. ǂKhabusab a amagas ose. Tamas ka io gâre tsîb ǂansa ūhâ tama amagas ose. ǁÎb ge ǃgāsase gere ǁkhāǁkhā ǀgaub ge ra ǁgauda ǁîb a kaise gā-ai ǃkhaisa. (Jhn. 7:45, 46) Jehovab ge ge ǂan i Jesub a kaise gā-aisa. ǁNā-amagab ge ge mā-am bi îb ǁîb xōǀkhā sîsen. Hoaraga xūna kha gere kuru ǁaeb ǃnâ. (ǂKhm. 8:30; Heb. 1:2-4) Tsî Jesub ge khâis khaoǃgâba xub ge Jehovaba, Jesuba hoaraga xūna mā-am hâ ‘ǃhūbaib tsî ǀhommi’ ǃnâs tsîna. (Mat. 28:18) Jesub ǂansa ūhâ xawes tsînab ge Jehovaba ǃoa daoǁgausa ra ôa. Tae-i ǃaroma? ǁÎb di ǁGûbab a ǀnam amaga.—Jhn. 14:31.

14. (a) Tae-e gu aoga Jehovab tarekhoede ra hâ-ū ǀgauba xu a ǁkhāǁkhāsen ǁkhā, (b) tsî ǂKhoamîdi 31 sa xu ra ǂoaxa ǂâide xu?

¹⁴ Aogu a ǁkhāǁkhāsen ǁkhā xūn. Jehovab ge tarekhoede ǃgôaǁnâ tama hâ. Aoga di ǃnāka nî hâba tib ra mî o. Jehovab ge nēsa ra ǁgau. Tarekhoedi tsî aogu tsînab ra ǁhûi o, în Jesub ǀkha ǀguiba ǂgaeǂgui. (Gal. 3:26-29) Jehovab ge ge ǁgau ǁîb ǀgôabab ra ǂgomǃgâsa. ǁÎbab ge ǂgaeǂguis di aiǂhanuba a mā o. ǁNā-amagab ge gā-ai aob tsîna ǁîb di tarasa ǀnōsa aiǂhanuga nî mā. Elobmîs tsîn ge ra mî taras nî oms di xūna kōǃgâ, marisi ǁhōga kōǃgâ tsî ǂhâbasa xūn tsîna nî dīsa. (Khomai re ǂKhoamîdi 31:15, 16, 18 sa.) ǁÎs ge ǃgā-i hîna mî xū-e ūhâ tama i khami ī tama. Xaweb ge aoba ǁîsa ǃgôa hâ. Tsî ǁîs ǀapemāde ra sîsen-ū. (Khomai re ǂKhoamîdi 31:11, 26, 27 sa.) Aob ga ǁîb tarasa ǃgôasib ǃnâ hâ-ū o. Os ge ǁîsa supuse aoba ǃnāka nî hâba.

15. Tarade tae-e a ǁkhāǁkhāsen ǁkhā Jesub di aiǁgausa xu?

¹⁵ Taradi a ǁkhāǁkhāsen ǁkhā xūn. Jesub ge kaise ǂgui ǃgâi xūna ge dī. Xaweb ge Jehovaba ǃnāka hâbas xa ǃgombahe tama. (1Kor. 15:28; Fil. 2:5, 6) ǁNās khamis ge tarasa Jesub di aiǁgausas ga sao o. ǁÎs di aob ǃnāka hâs ǀkha ǃgomsi-e hō tide. ǁÎs ge ǁîs di aoba nî ǂkhâǃnâ tsî nî mâxōǀkhā ǀnambis a amagas ǀguis ose. Xawes Jehovaba ǀnam tsî ra ǃgôa amagas tsîna.

16. 1 Samueli 25:3, 23-28 ǃoagus ge Abigailsa tae-i ǃgomsiba gere hōǃâ? (Tsoatsoas ai hâ ai-īsiba kō re.)

¹⁶ Abigails ge Nabal di ǀon hâ aoba ge ǃgamme hâ i. ǁÎb ge ǂnîsa, ǀguriǂâixa tsî khoe-i xa ge ǁae tama hâ i. Xawes ge Abigailsa supu ǀgauba ge ôa tama hâ i is ǁnā ǃgammeba xu ǀgora. Abigails ge ǁîs di ǃgammeb nî ǀamsas ga ǂhâba hâ o. Daviba ga mā-am hâ îb ǁîs di aoba ǃgamhe. Xawes ge ǁîsa ǁnāsa ge dī tama hâ i. Nabali tsî ǁîs di oms ǃnâ hâ khoenas nî ǁkhauba gas ge xū-e ge dī. ǁKhoaǂgaos a amagas ge 400 khoegu tawa sī. Tsî ǃgôasib ǃnâ Daviba ǃgomsiba ge mîba. Tsîs ge ǁîs di aob ge dīsā xū-i ǃaroma aitsama ǃereamsa gere ū. (Khomai re 1 Samueli 25:3, 23-28 sa.) Davib tsîn ge aitsama ge mî Jehovab ge nē ǁkhoaǂgaoxa khoesa a sîsa. Îb tā ǁgai xū-e dī.

17. Tae-e gu aoga Abigails tsî Davib di aiǁgausa xu a ǁkhāǁkhāsen ǁkhā?

¹⁷ Aogu a ǁkhāǁkhāsen ǁkhā xūn. Abigails ge kaise ge gā-ai i tarasa. Tsîb ge Daviba ǁîs di ǀapemāsa ge ǃgâ. Tsî ǁnās ge ge ǃaroma îb tsūdī tama hâ khoena tā ǃgam. ǁNās khamib ge gā-ai aob tsîna ǁîb  di tarasa nî ǃgâ. ǂHâǂhâsa mîǁguigab da dī ǁaeb ai. Nēsab ga ǃgâ o, ob ge ǀnîsi ǃgâi tama mîǁguiba dīsa xu nî ǁkhaehe.

18. Tarade tae-e Abigails di auǁgausa xu a ǁkhāǁkhāsen ǁkhā?

¹⁸ Taradi a ǁkhāǁkhāsen ǁkhā xūn. Taras hîna Jehovaba ǀnam tsî ra ǃgôas ge, ǃgâi sîsenǂuiba ǁîs di omaris ai nî ǀkhī-ū. ǁÎs di aob ga Jehovaba ǃoaba tama i. Tsî ǁîb di ǀgauga sao tama i xawes tsîna. ǁÎs ge ǀgauga ôa tide ǃgammeba xu ǀgoras diga. Xawes ge ǁîs aoba ǃnāka hâbas. Tsî ǃgôas ǃnâ-ū nî ǂkhâǃnâbi îb Jehovab xa ǁkhāǁkhāsen tsoatsoa. (1Pet. 3:1, 2) ǁÎs ga ǃgâi aiǁgausa ǁîba ǁgau xawes tsînab ga Jehovaba ǃoaba tama i. Os tsînab ge Jehovaba taras ǁnās ǀkha a ǂkhî. ǁÎs di aobas ǃnāka ra hâba ǃkhais ǃaroma.

19. Mâ mâsigu ǃnâs tarasa ǁîs aoba ǁnâuǀnam tide?

¹⁹ Xawe ǁnâuǀnamxa taras ge aob ga ǁîsa mîba is Jehovab di ǂhanuga ǃgûǂam o, o dī tide. Aiǁgauseb ga Jehovaba ǃoaba tama aoba tarasa mîba o. Îs ǂhumi, ǃnari tsî Elobmîs ǂkhā hâ xūna dī. Hoa ǃgâsadi, ǃgamme hâ di tsîna ǃkhōǂgā hâse. Di ge ǂgurose Jehovaba ra ǁnâuǀnam. ǃGâsas ga mîbahe o îs Jehovab di ǁgaraga tā ǁnâuǀnam. Os ge ǂkhā tsî ǃnomsa tsî ǃgôasiba ūhâ ǀgaub ǃnâ nî ǁguiǃā. Tae-i ǃaromas mîb ra xū-e dī tidesa.—ǃNǃkh. 5:29.

20. Mati da a ǂan Marias ge ǀgū ǀhosagusisa Jehovab ǀkha ūhâ-i ǃkhaisa?

²⁰ Marias ge kaise ǃgâi tsî ǀgū ǀhōsagusisa Jehovab ǀkha ge ūhâ i. Tsîs ge xoade kaise ǃgâise ge ǂan i. Johaneb ǁāǁnâ-aob di mas ǀkhas gere ǃhoa ǁaeb ais ge Mariasa 20 xa ǃnāsa ǃnâde. Hebreǁî xoade xu mîs gere xūna gere ǂkhâǃnâ. (Luk. 1:46-55) Tsî nēs xa ǂâi re. Marias ge Josefas nî ǃgamme se hâ-i xaweb ge Jehovab di ǀhomǃgāba ǁîb tawa ǂgurose ge sī tama hâ-i. ǀHomǃgāb ge ǂgurose Marias tawa sī tsî ge mîba sī ǁîs nî Elob di ǀgôaba hō ǃkhaisa. (Luk. 1:26-33) Jehovab ge ǃamkuse Mariasa ge ǂan i. Tsî ǁnās ǀkhas tsîna ge ǂan i ǁîs nî Jesuba ǃamkuse kōǃgâ tsî nî ǀnam ǃkhaisa. Tsî da ge ǁnās ǀkha a mû ǁkhā Marias ge aiǃgûsa Jehovab ǀkha  ǀgū ǀhōsagusisa omkhâisa. Jesub ge ǁō, khâisa hō tsî ǀhomma ǃoa īs khaoǃgâs tsîna.—ǃNǃkh. 1:14.

21. Aoga Elobmîs ǃnâ i Marias xa ra mîhe xū-e xu tae-e a ǁkhāǁkhāsen ǁkha?

²¹ Aogu a ǁkhāǁkhāsen ǁkhā xūn. Gā-ai aob ge a ǂkhî ǁîb di taras ga xoade ǃamkuse ga ra ǂan o. ǁÎb ge ǁîs ǀkha ǁaixa tama hâ. Tsî ǂâis tsîna hî tama hâ ǁîs ra oms di dana kai ǂgao ǃkhaisa. ǁÎb ge ra mûǂan taras ga xoade ǃamkuse ǂan o. Os omarisa ǃgâi ǀgaub ǃnâ nî huisa. Ama as ge taras ga kaise ǃgâise Elobmîsa ǂan. Xaweb aoba omaris di ǃoabasa ūhâ tsî ǃgâi gagasi mîǁguiga nî dī ǃkhaisa.—Efe. 6:4.

22. Tarade tae-e Mariasa xu a ǁkhāǁkhāsen ǁkhā?

²² Taradi a ǁkhāǁkhāsen ǁkhā xūn. Taras ge aoba ǃnāka nî hâba. Xawes ge ǃereamsa ūhâ is aitsama gagasise ǂûmâsen. (Gal. 6:5) ǁNāsa dīs ǃaromas ge ǁaeba nî ǁamaǂui. Is Elobmîsa khomai tsî ǂâiǃgâ ǁkhā. Tsî ǁnās ge nî huisi is Jehovabas ūba hâ ǀnamma ǃgôaǃgâ. Tsî aiǃgû kai. Tsî ǁnās ǀkha ǁîs di aoba ǃnāka a hâba ǁkhā.

23. Tarade mati ǁîde ǀama kaisen, omarisa ǀama tsî ǀhaohâb tsîna ra ǀama kai?

²³ Taradi hîna Jehovaba di a ǀnam amaga ǁîdi aoga ǃnāka ra hâba di ge. Kai ǂkhîba nî hōǃâ. Tsî naudi hîna Jehovab di ǁgarab danasis diba sao tama di ge ǂkhîba hō tide. Nē ǁnâuǀnamxa ǃgâsadi ge ǂkhamkhoena ǃgâi aiǁgausa ra mā. Tsî ǁnās ǀkha ǀnamxaǃnâ tsî ǂkhî ǃkhaiba ra kuru. Omaris ǃnâs ǀguis ose. Xawe ǀhaohâb ǃnâs tsîna. (Tit. 2:3-5) Nētsē i ge ǃnāsa ǂgomǂgomsa ǃoaba-aon Jehovab dina a tare. (Psa. 68:11) Nēsi da ga aore tsî a tare xawe. Da ge hoada ǃâ-e ūhâ ǀhaohâb ǃnâ da ra ǀhuru-e. Saora ǁkhāǁkhāǃâs ge nî ǃhoaǃgao mati i mâ i hoa-e nēsa a dī ǁkhā ǃkhaisa.