1. ǃGâsab C. T. Russelli tsî ǁîb sîsenǁare-aona mâ ǀgaub ai Elobmîsa gere ǁkhāǁkhāsen tsî nē ǀgauba tae-i ǃaroma ǃgâise gere sîsen?

HONDERD kuriga ǃkharu hâseb ge ǃgâsab C. T. Russelli tsî ǂkhari ǃgôab Elobmîs ôaǃnâ-aon tsîna ǀguiba Elobmîsa ge ôaǃnâ tsoatsoa. ǁÎn ge Elobmîs amabes ǃnâ tae-e Jehova Elob, Jesub Xristub, ǁōhân di mâsib tsî xoremarib xa ra ǁkhāǁkhā ǃkhaisa gere ǂân ǂgao. ǁÎn ǁkhāǁkhāsen ǀgaub ge ge supu-i. ǀGui-i ge dîsa gere dî tsîn ge hoana nē dîsa ôaǃnâ tsî hoa xoadi nēs xa hâde gere ǀhaoǀhao. Tsîn ge hōn gere ǃereamde gere xoamâi. Jehovab huib ǀkhan ge nē ǂhauǃnâ Elobmîs ôaǃnâ-aona amaba ge hō, nēsis kōse da ra ǃgôaǃgâba.

2. Tae-i ǃaroma da ǂhanu tama ǁnâuǃā ǀgauba Elobmîs kēbodi xa a ūhâ ǁkhā?

² Xawen ge nē Elobmîs ôaǃnâ-aona ǃhaese ge mûǂan hoaǃnâ-aixa amaba ǁnâuǃâs xa di kēbode ǁnâuǃâsa a ǃgom ǃkhaisa. Tae-i ǃaromasa nēsa? Kēbode da ge dīǀoaǀoahe di ra ǁaeb tamas ka io dīǀoaǀoahe toa di hâ ǁaeb ai ǀgui ǃgâise ra ǁnâuǃā. ǀNî hâ ǃaromas tsîn ge hâ. Kēbosa ǁnâuǃās ǃaroma da ge ǃuru ǂâibasens nē kēbos disa ǃamkuse nî ǁnâuǃā. ǀGui ǃâb kēbos dib ai ǀgui da ga ǂâisa ǂnûi o, o da ge nau ǃâba a ǂoaǃnâ ǁkhā tsî ǂhanu tamase kēbosa a ǁnâuǃā ǁkhā. Nē ǀgaub ais ge Joeli ǂkhanis ǃnâ hâ kēbos tsîna ge ǁnâuǃāsa-e. Hā re i da kēbosa ǃhoaǃgao tsî mû tae-i ǃaroma da nē kēbosa da ra ǁnâuǃā ǀgauba nî ǀkharaǀkharasa.

3-4. Nēsis kōse da Joeli 2:7-9 ǃnâ hâ kēbosa mati goro ǁnâuǃā?

³ Khomai re Joeli 2:7-9. Joeli ge ra kēbo ǂhoms Israeli ǃhūba nî ǁnāǂam ǃkhaisa. ǁÎgu ǃnânigu tsî ǁgûgu  ge xami digu khami ī tsî mû gu ra hain hoan Israeli dina nî hābu. (Joe. 1:4, 6) Nē kēbosa da ge Jehovab khoen hîna aoǁnâ sîsenna ǂhoms hîna ǁkhaehe ǁoase ra aoǁnâna ra ǁgauǁgaun ase ra ǁnâuǃā. Nē mâsib “ǃhūb” tsî ǂgomdi ǂgaeǂgui-aon ǃgâga hâ khoen tsîna ǃgâi tama ǀgaub ǃnâ gere tsâǀkhā di da ge gere ǁnâuǃā. *

⁴ Joeli 2:7-9 ǀguisa da ga khomai o, os ge nēsa ǂnanu ǁguiǃās nē kēbos dis ase ra ǁgausen. Xawe da ga ǃuru ǂâibasens nē kēbos disa ôaǃnâ o, o da ge nēsa da ǀnîhâ ǀgaub ǃnâ nî ǁnâuǃā ǃkhaisa nî mû. Hā re i da haka ǃaromadi nēs tae-i amsi nēti ī ǃkhaisa ǃoa kō.

5-6. Mâ dîsa (a) Joeli 2:20 xa ra dîhe? (b) Tsî Joeli 2:25 xa ra dîhe?

⁵ ǂGurose, Jehovab ge nē ǂhoms xa hâ kēbos xa ge mîmâi: “Tita ge ǁnāb ǀapas diba ǃnūse sado xu nîra bē kai.” (Joe. 2:20) ǂHoms ga Jehovab di ǀHûǀguitimî-aon hîna Jesub mîmâis aoǁnâ tsî ǁkhāǁkhāsabedīs sîsen-e ra dīna a ǂnûǁkhaeba o, tae-i ǃaromab Jehovaba ǁîna nî ǃhaebē? (Ese. 33:7-9; Mat. 28:19, 20) Amaseb ge Jehovaba ǁîb di ǂgomǂgomsa ǃoaba aona a ǃhaebē ǁoa tsî ǀnî hâ xū-i tamas ga io khoen hîna ǁîb khoena ǃgâi tamase ra hā-ūna nî ǃhaebē.

⁶ ǀGamǁî ǃaromas amsi Joeli 2:25 ǃnâ xoasa mîde ǃoa kō re. Nēbab ge Jehovaba ra mî: “Nēti ta ge tita sado ǁnā kuriga nîra mādawa-am, ǂhoms tsî ǃnoms tsî ǁnāǁnanab tsî ǃhontsiǃhoneb xa ge hapuhega; ti kai ǂnubis tita ge sadu ǃnâ sîsa.” Mû re Jehovab ra mîsa ǂhoms dī hâ tsūb amsib “mādawa-amsa” nî mā di. ǂHoms ga Gaosib aoǁnâ-aona ǂnûǁkhaeba o, o i ge ra ǂâibasen ǁîn aoǁnâ sîsenni tsūba ra ǃaromasa. Xawes ge nē haisi ams hîna ûiga a sâu ǁkhāsa khoe-e a ǁgari ǁkhā i i ǃhobasen. (Ese. 33:8, 19) Nēs ge ǁîna ǀkhaeba nî hā-ūba.

7. Joeli 2:28, 29 ǃnâ hâ mîdi “ǁnās khaoǃgâ” di hâde tae-i amsi a ǂhâǂhâsa?

⁷ Khomai re Joeli 2:28, 29. ǃNonaǁî ǃaromsa ǃoa kō re—nē kēbos ǃnâ ra ǃhoaǃgao-e xūn nî īse i ǀgaub. Mû du go Jehovab ra mîsa: “ǁNās khaoǃgâ” ta ge “tita ti Gagab xa . . . nîra ǁhōǂui”, nēs ge ǂhoms ǁîs sîsenna dītoa hâs khaoǃgâsa? ǂHoms ga Elob Gaosib di aoǁnâ-ao o, ob Jehovaba tae-i ǃaroma ǁîb ǃanu gagaba sîsen-en dītoa hâs khaoǃgâ ǀgui nî mā nî? Amaba da ga mî o, on ge ǁîna nē sîsenna Elob ǃanu gagab huib ǀkha a dīhō ǁoa tsîn ge nētikō ǂgui kurin tsîna ga aoǁnâ tama hâ mâǃoadi hînan da hōǃâ di ǀkha.

8. ǂHaiǂhais 9:1-11 ǃnâ ra ǃhoaǃgaohe ǂhomsa hamna ra ǂnûǁkhaeba? (Tsoatsoas ai hâ ai-īsiba mû re.)

⁸ Khomai re ǂHaiǂhais 9:1-11. Hā re i da hakaǁî ǃaromasa ǃhoaǃǂgao. Joeli ǃnâ ra ǃhoaǃgaohe ǂhomsa da ge aoǁnâ sîsenni ǀkha go ǃgaeǀhao, kēbos hîna ǂHaiǂhais ǃnâ ra hō-es ǀkha i ra ǃgûǀhao amaga. Nē kēbos ge ǂhoms hîna khoen aide ūhâs xa ra ǃhoa tsî ‘danadi ân ain kronde ūhâna, ǃhuniǀurise īde.’ (J.ǂHa. 9:7) Tsîn ge ‘ǁnā khoen ǀguin, Elob di saoǂnûisa ǁîn di ǃūdi ai ūhâ tamanan nî ǂkhôase’ ra ǂoa koro ǁkhâgu  kōsen nî ǁîna tsûtsûga. (J.ǂHa. 9:4, 5) Nēs ge amabes ǃnâ Jehovab ǂkhauhesa ǃoaba-aona ǃoa ra ǁnaeǁgau. ǁÎn ge Elob di ǀgoraǃgâs haisi amsa nē ǃhūbaib ǂama nî hāse īsa ra aoǁnâ tsî nēsa ǂkhâǃnâ tama hâna ra ǁaiǁai.

9. Tae ǃkharagagusina Joeli tsî Johaneb tsîkha di kēbodi ǃnâ hâ?

⁹ ǂHaiǂhais kēbos tsî Joeli kēbos tsîra ǁaegun ge ǀgaura xūna hâ. Xawen ge mâǂoa ra ǃkharagagusina hâ. Joeli kēbosa ǃoa kō re: ǂHoms ge ǃhanaga ge hābu. (Joe. 1:4, 6, 7) Johaneb kēbos ǃnâgu ge nē ǂhomga ra mîba-e i gu ‘ǃhūbaib di ǀgâna tā ǂkhôa.’ (J.ǂHa. 9:4) Joeli ge mû ǂhomgu ge ǀapasa xu ge hā. (Joe. 2:20) Tsî Johaneb ge mû ǂhomgu ge abisuǂgâba xu ge hā. (J.ǂHa. 9:2, 3) Joeli ra ǁguiǃā ǂhomgu ge ra ǃhaebēhe. ǂHaiǂhais ǃnâ gu ge nē ǂhomga ǃhaebēhe tama hâ xawe ra xu-e igu sîsenna dītoa. Nēs ǃaroma gu ge Jehovab xa ǃhaebē-esa ǂhâ tama hâ.—‘ Kēbodi ǂhomgu xa hâdi—ǃkharagagusib tsî ǃgûǀhaora xūn’ di hâ boksisa mû re.

10. Aiǁgau-e Elobmîsa xu mā re hîna ra ǁgau-e Joeli ǂkhanis kēbos tsî Johaneb kēbos tsîra ra ǃkharagagu ǃkhaisa.

¹⁰ ǃKharagagusigu hîna nē ǀgam kēbora ǃnâ hâgu ge ra ǁgau nē kēbora ǃgaeǀhao-e ūhâ tama hâsa. Mî da ra  Joeli ǂkhanis ǃnâ ra ǃhoaǃgao-e ǂhomgu tsî ǂHaiǂhais ǂkhanis ǂhomgu tsîn ǀgui tama hâ di? Î, Elobmîs ǃnâ di ge kēbode ǃkharagagu ǂâibasende ūhâ ǃkharagagu xūn ǃgaon ga sîsen-ūhe o. Aiǁgause, ǂHaiǂhais 5:5 ǃnâb ge Jesuba “Judab ǃhaos di Xammi” di ra ǂgaihe, 1 Petrub 5:8 ǁGâuaba “ǃguru ra xammi” ase ra ǁguiǃā hîna. Dîdi hîna da sada nēsa ǂguro goro ǁnâuǃā ǀgaub xa ǃaroma-e hâse goro dîde da ge ǀnîhâ ǃereamde nî hōba. Nē ǃereamde nî tae-i?

11. Joeli 1:6; 2:1, 8, 11 sa mati ra hui da nē ǂhomgu tae-e ra ǂnûǁkhaebasa ǂanǂûis ǃnâ?

¹¹ ǃGâi ôaǃnâs Joeli ǂkhanis kēbos dis ge ra ǁgau nēs toroǃkham-aoga ǃoara ǁnaeǁgausa. (Joe. 1:6; 2:1, 8, 11) Jehovab ge ge mî ǁîb di “kai ǂnubis” (Babilonǁî toroǃkham-aogab) nî sîsen-ūsa ǁnâuǀnâmoǃnâ Israelǁaesa ǁkharas ǃaroma. (Joe. 2:25) ǁNāǂam ra ǃkham-aogu ge ‘ǀapas dib’ di ra ǂgâihe Babilonǁîn Israela ǀapas ǀkhaba xu ge ǁnāǂam amaga. (Joe. 2:20) Nē toroǃkham-aogu ge ǂhoms ǀkha ra ǀgōpeǀnōhe. Nēs xas ge Joeli ǂkhanisa ra mî: “mâ-i hoa-e daob â-i ǃnâ ǃgû . . . ǃās ǃnâ ǃkhoema, ǁîn ra ǂnubiǂgoagu ai ǃkhoe, ǁîn ra omgu ai ǃapa, ǁîn ra mûǂuidaode-ū sī ǂgâ ǃnari-aon khami.” (Joe. 2:8, 9) Nēsa du a mûman ai ǁkhā? Toroǃkham-aogu ge hoaǀkhāgu ai hâ. Gau-e nî ǃkhai-i ge a ǀkhai. Khoe-i ge Babilonǁîn ǃomǁaeba xu ge sâusen ǁoa-i.

12. Joeli kēbos hîna ǂhomgu xa hâsa mati ge dīǀoaǀoahe?

¹² ǂHomgu khamin ge Babilonǁîn (tamas ka io Xaldeaǁîna) Jerusalemsa 607ǁî kurib ǃnâ ge ǁnāǂam. Elobmîs ge ra mî: ‘Ob ge Xaldeaǁîn di gao-aoba ǁîn . . . ǂkhamkhoegu âna gôab ǀkha ge ǃgam, tsî ǂkham khoegu kas, ǂkham khoedi kas, kain kas, kaira, ǀkhama hân kas hoasa sâu tamaba. Tsîn ge Elob omma ge khauǃkhū, tsîn ge ǂnubiǂgoab Jerusalems diba ge khôaǁnâ, tsî ǁîs di î-omgu hoagan ge ǀaes ǀkha ge khauǃkhū, ǃgomǀgausa soan âba ra hîǀhuruse.’ (2Kro. 36:17, 19) Babilonǁîn ge ǃāsa hîgaga toas khaoǃgân ge mû gere khoena ge mî: “ǁÎb a ǃū-aisa, khoe-i xare-i tsî ǀgoa-i xare-i ǁîb ǃnâ a ǀkhais kōse ti mîb ǃnâ; ǁîb ge Xaldeaǁîn ǃomǁae ge māǁnâhe.”—Jer. 32:43.

13. Jeremiab 16:16, 18 ǃnâ hâ mîde ǁguiǃā re?

¹³ 200 Kuriga Joeli kēbos khaoǃgâb ge Jehovaba Jeremiaba ge sîsen-ū nē ǁnāǂams xa ǀnîhâ xū-e mîs ǃaroma. ǁÎb ge ge mî ǃgâi ôaǃnâs ǁnā ǁnâuǀnamoǃnâ Israelǁaes xa nî dīhesa—ôaǃnâs hîna ǁîn ǃkhōsisa ǃoa ra sî nîsa. “‘Mû, tita ge ǂgui ǁauǃkhō-aoga nîra sî, tib ra ǃKhūba mî, ǁîgu ge ǁîna nîra ǃkhō, tsî ǁnās khaoǃgâ ta ge tita ǂgui ǃau-aoga nîra sî, ǁîgu ge ǁîna nîra ǃau mâ ǃhommi hoaba xu, mâ ǃnoms hoasa xu tsî ǁhāgu ǃhaogu diga xu. Tsî da ge ǁîn ǁōren ǃaroma nî ra mādawa-am nî.’” Hurib tamas ga io ǃgarob ge nē Israelǁaesa Babilonǁîna xu ge sâu ǁoa i.​—Jer. 16:16, 18.

14. Joeli 2:28, 29 ǃnâ hâ kēbosa mâ ǁae ge dīǀoaǀoahe?

¹⁴ Joeli ge ǃgâiǂhôa-e ūhâ. ǃHūb ge ǁkhawa nî ǂûtani. (Joe. 2:23-26) Tsî hānîǁaeb ǃnâ-i ge gagasi ǂû-e ǃnāǂamsase nî hō-e. “Tita ti Gagab xa ǁgans hoas  ai nîra ǁhōǂui ǃkhaisa, on ge sadu ôagu tsî sadu ôadi tsîna nîra kēbo . . . Ā, ǃgāgu on ǂama tsî ǃgādi on ǂama ta ge tita ǁnā tsēdi ǃnâ ti Gagaba nîra ǁhōǂui.” (Joe. 2:28, 29) Elob gagab ǁhōǂuis ge Israelǁaes ge Babilonǁîn ǃkhōsisa xu a ǃnora tsî ǁîn ǁanǃkhaisa ǃoa a oa ǁaeb ǃnâ ge ī tama hâ i. Xawes ge nēsa ǁaeba ge ū tsî pinkstertsēs 33ǁî kurib ǃnâ ge ī. Mati da nēsa a ǂan?

15. ǃNaeǃkhaidi 2:16, 17 ǃoagub Petruba tae ǀkharaǀkharana Joeli 2:28 ǃnâ hâ mîdi ai ge dī tsî nēsa tae-e ra ǁgau?

¹⁵ Elob gagab xa ǂkhâǃnâhe hâseb ge Petruba Joeli 2:28, 29 ǃnâ hâ mîdi xa kaise ǂoaǂamsa xū-i hîna ge pinkstertsēs ai ī i ase ra ǁnaeǁgau. Khoeseǁî khama ǁnā ǁgoa i ge ǀō-aisa xū-e ge ī. ǃAnu gagab ge ǁnāba ge hâ-i khoen ai ge ǁhōǂui-e tsîn ge ǃkharagagu gowagu ǃnâ ‘Elob di kai dīgu’ xa gere ǃhoa. (ǃNǃkh. 2:11) Joeli di kēbos xab gere ǃhoa o, ob ge Petruba ǀnîhâ ǀgaub ǃnâ ǀgui nē ǂâisa ge mî. Tae ǀkharaǀkharanab dī hâsa da ra mû? (Khomai re ǃNaeǃkhaidi 2:16, 17.) “ǁNās khaoǃgâ” di hâ mîdi ǀkha tsoatsoas xab ge Petruba: “Tsî i ge ǀuni tsēdi ǃnâ” di hâ mîdi hîna Jodeǁîn ǀkha gere ī xūn ǀams ǃoa ra ǁnaeǁgause ge mî​—Elob ǃanu gagab ge “ǁgans hoas ai” nî ra ǁhōǂuihe. Nēs ge ra ǁgau ǁaeb ge Joeli kēbos nî dīǀoaǀoahes aiǃâ ǃkharusa.

16. Elob ǃanu gagaba mâ sîsenǂuiba aoǁnâ sîsenni ai ge ūhâ i ǃkharu ge ǁaeb tsî nētsēs tsîn ǃnâ?

¹⁶ Elob ge ǁîb di ǃanu gagaba ǃkharu ge ǁaeb Xristeǁîn ai ǁhōǂuis khaoǃgân ge aoǁnâ sîsenni ǀkha ge tsoatsoa hîna ǂhanu ǁaeb ai hoaraga ǃhūbaiba nî  ǀoaba. Apostel Paulub ge ǁîb sîǂkhanisa Koloseǁîna ǃoa 61ǁî kurib ǃnâ xoa-o, ob ge ǃgâiǂhôas hîna ra aoǁnâhes xa ǁguiǃā tsî ge mî nēs “kurusaben ǀhommi ǃnaga hân hoana” ra aoǁnâbahe di. (Kol. 1:23) Paulub tsēdi ǃnân ge ‘kurusaben hoana’ ǃhūbaiba ǃoa gere ǁnaeǁgau. Jehovab ǀgaisa ǃanu gagab huib ǀkhab ge aoǁnâ sîsenna sada tsēdi ǃnâs tsîna ra dīhe​—“ǃhūbaib di ǀams kōse.”​—ǃNǃkh. 13:47; “ Ti ǃanu gagaba da ge nî ǁhōǂui” di hâ boksisa mû re.

17. Joeli kēbos ǂhomgu xa hâs xa da go ūhâ i ǁnâuǃā ǀgauba mati go ǀkharaǀkharasen?

¹⁷ Tae-e ge ǀkharaǀkharasen? Joeli 2:7-9 ǃnâ hâ kēbosa da ge nēsisa ǃgāsase ra ǁnâuǃā. Supuse da ga ǁguiǃā o, o di ge nē hû xoaǀgorade sada ôasa aoǁnâ sîsenna ǃoa ǁnaeǁgau tama hâ xawe Babilonǁî toroǃkham-aogu hîna Jerusalemsa 607ǁî kurib ǃnâ ge ǁnāǂamga ǃoa ra ǁnaeǁgau.

18. Tae-e Jehovab khoen xa ǀkharaǀkharasen tama hâ?

¹⁸ Tae-e ǀkharaǀkharasen tama hâ? Jehovab khoen ge aoǁnâ sîsenna hoaǃkhaigu ai aoǁnâs ǀkha ra aiǃgû hoa ǀgauga ra sîsen-ūse. (Mat. 24:14) ǂHanugu ge a ǁkhae da ǁoa nē mîmāsa daniǂuis ǃnâ. Tsî da ge Jehovab huib ǀkha ǂguros xa ǃnāsase ra dī Gaosib ǃgâiǂhôasa aoǁnâs ǃnâ. Jehovaba ǃoa da ge ra kō îb Elobmîs kēbode ǁnâuǃās ǀkha hui da tsî da ge ra ǂgom ǂhanu ǁaeb aib “hoaraga amaba” nî ǂhaiǂhai ǃkhaisa.​—Jhn. 16:13.