1-2. Taeba a xoremarib tsî tae-i ǃaroma da ǂhâ hâ?

ǀOASA khoeb Adammi ge ǁore, ob ge ǀamo ûiba ge ǂoaǃnâ. ǁÎb ǀguib ose xawe ǁîb di hanî ǀgôan xas tsîna. ǃAroma i ge ǀgai Adammi ge dī xū-i xa. ǁÎb ge māsenxase ge ǁore. O ǁîb ǀgôan xa matis? ǁÎb di ǀgôan ge Adamma ge ǁore kai tama hâ i. Tsî ǁnās ǀkhas tsîna xū-e ge dīsa tama hâ i. Adammi ge ǁōba ge anû hâ i. (Rom. 5:12, 14) Xawe Jehovaba xū-e ge dī ǁkhā i, în Adammi ǀgôana ǀamose ûi? Îo. Adammi ge ǁore toas kaoǃgâb ge Jehovaba ge ǁgau. Matib nî Adammi di ǀgôana ǁōb tsî ǁoreba xu nî ǃnora kai ǀgausa. (Gen. 3:15) ǁÎb ǁhûiǂui hâ ǁaeb aib ge Jehovaba ǁîb di ǀgôaba ǀhomma xu nî sî. Îb ‘ǁîb ûiba māsenxase mā, ǂguin di xoremarib ase’.—Mrk. 10:45; Jhn. 6:51.

² Xoremariba a tae? Xristeǁî Greeke xoadi ǃnâ i ge xoremarib hînab ge Adamma ǂoaǃnâ. Tsîb ge Jesuba a ǁama-oasa ra ǂâibasen. (1Kor. 15:22) Tae-i ǃaroma da xoremariba ǂhâ hâ? Jehovab di ǂhanub hîna ǁîb di ǂhanugu ǃnâ hâb ge ra ǂgaoǀkha is ǀomsa, ǀoms ǀkha matare-e. (Eks. 21:23, 24) Adammi ge ǁîb di ǀoasa khoesisa ge ǂoaǃnâ. Jehovab di ǂhanu-aisiba dīǀoaǀoas ǃaromab ge Jesuba ǁîb di ǀoasa khoesi ûiba ge mā. (Rom. 5:17) Tsîb ge ǁnās ǀkha ra ‘ǀamo ǁgû’ kai ǁnān hîna xoremarib ǃnâ ǂgomsa ūhân ǃaroma.—Jes. 9:6; Rom. 3:23, 24.

3. Johaneb 14:31; 15:13 ǃoagub ge Jesuba tae-i ǃaroma, ǁîb di ǀoasa khoesi ûiba māsenxase mā?

³ Jesub ge ǁîb ûiba māsenxase ge mā ǁkhā i. ǁÎb ǁgûbab ǀnam tsî sida tsîna a ǀnam amaga. (Khomai re Johaneb 14:31; 15:13 sa) ǀNammi xa ǁgarihe hâseb ge ǁîba ǀams kōse ǁîb di ǂhauǃnâxasiba ge ǃkhōǀgara. Tsî ǁîb di ǁgûb di ǂâisa ge dīǀoaǀoa. Jesub ge ǁnāsa ge dī ǂgomǂgomsase ǁōb kōse hâs  ǃnâ. ǁNās ǃaroma i ge Jehovab ge khoen tsî ǃhūbaib ǃaroma ūhâ i. Mîmâisa a dīǀoaǀoahe ǁkhā. Nē ǁkhāǁkhāǃâs ǃnâ da ge ǃhoaǃgao tae-i ǃaromab ge Jehovaba mā-amsa. Îb Jesuba ǁnātikō ǃgomma tsâ ǁōb nîs aiǃgâ. Tsî da ge ǂkharirose Elobmîs xoa-aob hîna ge xoremariba ǃgamse gere ǃgôaǃgâba nî ǃhoaǃgao. Tsî da ge ǁnāpaxu nî ǃhoaǃgao mati da sida tsîna gangansa xoremarib ǃaroma a mā ǁkhā sa. Tsî mati da ǃgôaǃgâsiba a ǁkhau ǁkhāsa mās hînakha ge Jehovab tsî Jesub tsîna sida māsa.

4. ǁGuiǃā re matib ge Jesuba ǁōsa?

⁴ Mûnanai re Jesub di ǀuniga tsēs hînab ge ǃhūbaib ai ūhâ isa. ǁÎb ge ǂgui ǀhomǃgāgu ai huiba ga ǂgan hâ, ib ǁgaubahe xaweb ge ǁnāsa ge dī tama hâ i. Xaweb ge ǁîba ge māsen ib Romeǁî soldagu xa ǃkhōhe tsî ǂnâuhe. (Mat. 26:52-54; Jhn. 18:3; 19:1) ǁÎgu ge ǃnababa gere sîsenū hîna ge ǂnau-ūeb gere o khōba soroba xu gere ūǁnāba. Tsîgu ge ǃkhom haiba ge tani kaibi ǀaoba ra hî ǁâb ai. Tsîb ge Jesuba ǁnā haiba gere ǂgae ǃgâuheb nî sī ǃkhaisa ǃoa. Xawe ǁaeroba ǃkharu tsîgu ge Romeǁî soldaga ǀnîa khoeba ge mîba îb tani huihe. (Mat. 27:32) Tsîb ge Jesuba ǁōb nî ǃkhais ai a sī o. O gu ge soldaga spaikergu ǀkha ǁîb di ǃomman tsî ǂaidi ǃnâ ge ǃgâumâibi. Jesub di soros di ǃgomsib ge ǁnā spaikergu ǃgâumâihe hâ ǃkhaiga gere tōa. ǁîb di ǀhōn gere ǃoa tsî ǁîb di mamas ge gere ā. Xawe Jodeǁî ǂgaeǂgui-aogu ge ǁîba gere ǂoeǂoe. (Luk. 23:32-38; Jhn. 19:25) Jesub ge ǂgui īrga ǃgomma gere hōǃgâ. ǁîb di ǂgao tsî sōn aib ge ǃgomsiba gere hōǃgâ. ǁNās ǃaromas tsînab ge ǃgomse gere ǀom. ǁŌb nî aiǃgâb ge ǁîba Jehovab ǃoa ge ǀgore ǀuniga ǃnâsa. Tsîb ge ǁîb di danasa ǃgam tsî ǁîb di ûiba ge māǁnâ. (Mrk. 15:37; Luk. 23:46; Jhn. 10:17, 18; 19:30) Kaise ge ǂau, tsûtsû tsî taotaosa ǀgaub ǃnâb ge ǁîba ge ǁō.

5. Tae-e Jesuba kaise gere tsûtsû ǁōb ge ǀgaub xa?

⁵ Jesub ǃaroma i ge ǃkhamheb ge ǀgauba ǁnātikōse ge ǂkhabuǂâi kaibi tama hâ i. Tsûtsûsa ge is ge dī tamab hâ xū-i ai ǂkhari-amhe tsî ǁnās ǃaroma ǃkhamhe sa. ǁÎn ge ǂhanu tama gau ai ǂkhari-ambi tsî ge mî ǁîb Eloba ǃgôasi-e ūhâba tama hâ. Tamas ka io ǁîb di ǀon tsîna di. (Mat. 26:64-66) Khoen ge ǁîba ǂkhari-am tsî ǁîb Eloba ǃgôasi-e ūhâ tama di a mîs ge kaise ǁîba gere tsûtsû. Tsîb ge gere ǃâubasen îb ǁîb ǁgûba ta mā-am tidesa ib nēti tataohe (Mat. 26:38, 39, 42) Tae-i ǃaromab ge Jehovaba mā-am ib ǁîb di ǀgôaba ǃgomma hōǃgâ tsî ǁō? ǀKhī da ǃnona ǃaromade ǃhoaǃgao re.

6. Tae-i ǃaromab ge Jesuba ǃgâuhaib ai nî ǃgâuhesa ge i?

⁶ ǂGuroseb Jesuba ǃgâuhaib ai nî ǃgâu-es ge îb Jodeǁîna ǀâxareba xu ǃnora kai. (Gal. 3:10, 13) ǁîn ge nēti ǀâxareba ge ūhâ i Jehovab di ǂhanuban nî ǁnâuǀnam din ge mî xawen ge ǁnâuǀnam tama hâ i amaga. Adammi di ǀgôan ge amagan ge ǁōba ge anû hâ i. Xawen ge ǁîn tsîna nē ǀâxareba ge ūhâ i. (Rom. 5:12) Elob di ǂhanub hîna Israel ǁaesa ǃoa hâ ib ge gere mî. Khoeb ga ǁōba anū hâ ǀgaub ǃnâ ga ra ǁore o ob nî ǃkhamhesa. ǁNāpaxu i ge ǀnî ǁaega ǁîb di ǁō hâ sorosa haib ai gere ǃgâumâihe. * (Deu. 21:22, 23; 27:26) Jesub ge ǃgâuhaib ai ǃgâuhe amagan ge Jodeǁîna nē ǀâxareba xu ge ǃnora kaihe ǁkhā i. Tsî ǁîb di māsenxa mās ge ǁnān hîna ge ǁîba. Ūǃoa ǂgao tama hâ in tsîna ge ǃkhōǂgā hâ i.

7. Tae-e a ǀgamǁî ǃaroma Jehovab ge mā-amsa îb ǁîb di ǀgôaba ǃgomma tsâ?

 ⁷ ǀKhī da ǃhoaǃgao re tae-i ǃaromab ge Jehovaba mā-amsa îb Jesuba ǃgomsiba hōǃgâ. ǁîb ge Jesuba gere aiǂhomi hānîǁaeb nî si sida di “ǀgapi prister” kai amaga. Jesub ge ge hōǃgâ matikōse i ge ǃgom isa. Jehovaba ǁnâuǀnamsa nē ǃgom mâsigu ǃnâ. ǁîb ge kai ǁgâiǀāba ge hō tsî “ǃgari ǃaus tsî ǁgamron ǀkha”ǀgore tsî huiba ge ǂgan. Jesub nētikō ǃgom ǁaega ǃkharu ǃnâ amagab ge tae-e da ǂhâ hâsa ra ǁnâuǃā. “Tsî ǃâitsâheb gen ǃnâb ge naun ǃâitsâhe rana a hui ǁkhā xui-ao”. Kaise da ge ra gangan Jehovaba ǁîb di ǀkhomxaǂgao ǀgapi pristera sida ǂam-ai a mâi ǃkhaisa. ‘Sada ǂkhabusasigu ǀkhab ǀkhomǀkhomsi-e ūhâ’ amaga—Heb. 2:17, 18; 4:14-16; 5:7-10.

8. Tae-e a ǃnonaǁî ǃaroma Jehovab ge mā-amsa îb Jesuba ǃgomsiba hōǃgâ?

⁸ ǃNonaǁîse Jehovab ge Jesuba ge mā-am îb ǃgomma hōǃgâ îb ǁnā ǀgau ǃnâ ǂhâǂhâsa dîsa ǃeream: Khoena ǂgomǂgomsase Jehovab ǃoagu hâ ǁkhā-e ǃâitsâhe i ga xawes tsîna? ǁGâuab ge hî i di ra mî. ǁÎb ge ra mî khoen Jehovaba ra ǃoabasa xū-en ǁîba xu ra hō amaga. Tsîb ge ǁîba ra ǂgom ǁîn Jehovaba ǀnam tamasa. ǁîn di dadasab Adammi ge di khami. ǁîn di ûiban ge Jehovaba mā tama hâ. (Job. 1:9-11; 2:4, 5) ǁÎb ge Jesuba gere ǂgomǃgâ amagab ge Jehovaba ge mā-am. Jesuba khoesi ǀgaugu ǃnâ ǃâitsâhe sa. Jesub ge ǁîb di ǂhauǃnâsib ǃnâ ge māǀgai tsî ǁGâuaba ǂhomi-aob asa ge ǁgau.

9. Mā aiǁgausab ge apostel Johanneba mā da?

⁹ ǂGui Xristeǁîn di ǂgoms ge ge ǀgaiǀgaihe xoremaris di ǁkhāǁkhās ǃnâ u. ǁÎn ge māǃoa-en ra xawe ra aoǁnâ. Tsî māǀgai hâ ǃgomsin hînan ge ǃkharuǃnâna nîsin kaira hâs kōse. Apostel Johanneb di aiǁgausa kō re. ǁÎb ge ǂgomǂgomsase amaba Xristub tsî xoremarib xa hâba gere aoǁnâ 60 sa ǃnā hâ kurina. ǁÎb ge 100 kurina gere ǀgū o, on ge Romeǁî ǂhanuba ge ǂâi hâ i. ǁÎb kaise ǃaoǃaosasa di tsî ǁnās ǀkha Patmos ǃnâ ge ǂkhanam ǂgābi. ǁÎba tae-e ge dīsa? ‘Elob mîs tsî Jesub Xristub di ǀhûǀguitimîs ǃaromas’ ge ge ī. (J.ǂHa. 1:9) Johanneb ge māǂoa ra ǂgoms tsî māǀgais di aiǁgausa ge mā da.

10. Māǀgaub ǃnâs Johanneb di xoade ra ǁgau, ǁîb ge ǃgôaǃgâsiba xoremarib xa ūhâ îsa?

¹⁰ Elobmîs di ǂkhanidi ǃnâb ge Johanneba ge xoa matikōseb Jesuba ǀnamsa. Tsîb ge ǁîba ge ǃgôaǃgâ Jesub di xoremarib xa. Nēs ge 100 xūna ǃkhōǂgā hâ xoremarib ge dīǀoaǀoana. Aiǁgause Johanneb ge ge xoa: “Tsî khoe-i ga ǁore xawe da ge ǁGûb tawa aigowaba-aoba ūhâ: Jesub Xristub ǂhanu-aiba.” (1Jhn. 2:1, 2) Johanneb di xoadi ge Jesub di ǃkhō-ams ǃnâ ū aoǁnâsa ra ǂhâǃnâ. (J.ǂHa. 19:10) Johanneb ge ǃkham ǃgôasiba Jesub di xoremarib xa ge ǁgau. Sida tsîna mati ǁnāsa a dī ǁkhā?

11. Tae-e a hui da ǁkhā i da ǃâitsâga ǃkham ǃoa?

¹¹ ǁOres di ǂâisende xu ǂkhō re. Amase da ga ǃgôaǃgâ o xoremariba o da ge tā nî mî: ǂHâbasa tama i ge hâ ǁoreba xu ǁkhaesen sa ǃâitsâhe da ga ra o. Tamas ka io tita ge nî aiǃgû tsî nî ǁore tsî ta ge ǀûbaba nî ǂgan. ǃÂitsâhe ta ga ra o, î da ǁgai xū-e dī o da ge nî mî: Hî-î di. Mati ta nē ǁgai xū-e nî dī Jesub tsî Jehovab ge dība te ǃgâi xūn xōǀkhā? ǁNās ǀkha ra ǃgû ǀgaose da ge Jehovab ai ǀgaiba a ǂgan ǁkhā. Tsî ǁîba a ǀkhomma ǁkhā ‘îb tā ǃâitsâb ǃnâ ǂgaeǂgui da.’—Mat. 6:13.

12. Mati da 1 Johaneb 3:16-18 ǃnâ hâ ǀapemade nî sao?

 ¹² Sadu ǃgâsana ǀnam re. ǁNāti i ǀnamma da ga ǁgau o. O da ge ǃgôaǃgâsib tsîna xoremariba ra ǁgau. Tae-i ǃaroma? Jesub ge ǁîb di ûiba sida ǃaroma ǀgui ge mā tama hâ i. Xawe sida ǃgâsan ǃgaos tsîna. Jesub ge māsenxase ǁîna ge ǁōba. Tsî da ge ǁnās ǃnâ-ū a mû ǁkhā ǁîb ǁîna kaise a ǀnamsa. (Khomai re 1 Johaneb 3:16-18 sa) Sida ǃgâsana da ra hâ ū ǀgaub ǃnâ da ge ra ǁgau ǁîna da a ǀnamsa. (Efe. 4:29, 31–5:2) Aiǁgause ǀaesenan ga o da ge ǁîna ra hui. Tamas ka ion ga ǀgaisa ǃgomsiba ga ra hōǃâ o. Tsûgeǃgâgu tsîna ǃkhōǂgā hâse. Xawe tae-e da nî dī sida ǃgâsan ga ǃgâi tama mîna mî da o. Tamas ka io sida ǃoagu ǃgâi tama xūna dī o?

13. Tae-i ǃaromada nî ǀûbaxa?

¹³ ǀNî ǁaega i a ǃgomba du sadu ǃgâsana ǀûbasa? (Lev. 19:18) ǁNāti i ga io nē ǀapemasa sao re: “Î du tanibagu, î du ǀûbagu, nē-i ga nau-i ǃoagu ǀauxū-e ūhâo; Xristub ge sado ǀûbas ǁkhās xase sado ǁkhāti dī.” (Kol. 3:13) ǁNā ǁaeb hoab hîna da sida ǃgâsana ra ǀûbab ai da ge ra ǁgau xoremariba da kaise ra ǃgôaǃgâ ǃkhaisa. Mati da nē mās hîna da ge Eloba xu a hōsa nî aiǃgû ǃgôaǃgâsa?

14. Mapa a ǀgui ǀgau hîna da xoremarib ǃaroma ǃgôaǃgâsiba a ǁgau ǁkhāba?

¹⁴ Jehovaba ǃgôaǃgâsiba ǁgau re xoremarib ǃaroma. “ǂÂi ta ge ra kaise-i a ǂhâǂhâsasa ti ǀgore di ǃnâ. Xoremariba ǂgaisa tsî ǁnā ǀgaub ǃnâ gangansa Jehovaba ǁgausa.” Tis ge 83 kurixa ǃgâsas Joannasa ra mî. Hîna Indiab ǃnâ ra hâsa. ǀGuri hâse du ra dī ǀgores ǃnâ. Tsēs ǃnâ du ra dīsa xūn ai ǀûbaba ǂgan re. Tsî amabes ǃnâ ǁgai ǁoreba du ga dī o. O du ge ǀhaohâb ǃûi-aogu di huib tsîna ǂhâ hâ. ǁÎgu ge sado nî ǃgâ tsî ǃgâi ǀgaub ǃnâ Elobmîsa nî sîsenū sado huis ǃnâ. ǁÎgu ge sadu ǀkha nî ǀgore. Tsî nî ǂgan Jehovaba îb ǀûba du î du ǀgū ǀhōsagusa ǁîb ǀkha ūhâ ǁkhā. Tsî ǁnāsa “ǂuru du nîga” nî dība du—Jak. 5:14-16.

15. Tae-i ǃaroma da ǁaeba nî ǁamaǂui xoremarib xa khomai tsî ǂâiǃgâsa?

¹⁵ Xoremarib xa ǂâiǃgâ re. Jesub ge ǃkhruǃnâ ǃgomsin xa ta ga khomai o. O i ge ti mûte ǁgamron xa ra ǀoa. Tis ge 73 kurixa ǃgâsas Rajamani di ǀon hâsa ra mî. Sadu tsîn ge ǀnîsi Elob di ôab ge ǃkharuǃnâ  ǃgomsin xa du ga ǂâi o. O tsūse a tsâ ǁkhā. Xawe du ga Jesub ge mā ǁguibas xa ga ra ǂâi o. O du ge sadu ǀnammi hîna du Jehovaba ūba hâ. Tsî Jesuba du ūba hâb tsîna kaise ra ǀgai. Xoremarib xa ǂâiǃgâs ǃaroma tae-i ǃaroma du nē ǁkhāǁkhāǃâsa ǃnāsase ôaǃnâ tama?

16. Xoremarib xa nau khoena ǁkhāǁkhāsa mati ra hui da? (Tsoatsoas ai hâ ai-īsiba kō re.)

¹⁶ Nau khoena ǁkhāǁkhā re xoremarib xa. Mā ǁaeb hoab hîna da xoremarib xa nau khoena ra mîbas. Ai i ge sida di ǃgôaǃgâsiba ra ǀgai. Sida ge ǂgui ǁkhanin tsî vidion tsîna ūhâ. Î da khoena hui în ǁnâuǃā tae-i ǃaromab ge Jesuba ǁōsa. Aiǁgause da ge 4ǁî danaǂams Eloba xu hâ ǃgâiǂhôas di hâ ǂkhaniba a sîsenū ǁkhā. ǁNā ǁkhāǁkhāǃâs ge xoaǂamsa ūhâ “Hama a Jesu Xristu?” di hâsa. Tamas ka io da ge Elobmîsa tae-e a ǁkhāǁkhā da ǁkhā? Di hâ ǂkhanis ǃnâ 5ǁî danaǂamsa a ǃhoaǃgao ǁkhā. Xoaǂams ge Xoremarib—Elob kai ǀkhaeb di hâ. Tsî mâ kurib hoaba da ge xoremariba ǃgôaǃgâsiba ra ǁgau. Jesub ǁōb di ǂâiǂâisensa da ra hâ ǃnâ o. Tsî da ga ôasase nau khoena ga ra ǁgau o. Jehovab xa da ge kai aiǂhanuba māhe hâ i da ǁîb di ǀgôab xa nau khoena ǁkhāǁkhā.

17. Tae-i ǃaroma i xoremariba Eloba xu hâ kais de ǀkhae?

¹⁷ Amase da ge ǃgâi ǃaromasa ūhâ xoremariba ǃgôasiba ǁgausa. Xoremarib ǃaroma da ge ǀgū ǀhōsagusa Jehovab ǀkha ūhâ. ǀOasa tama da hâ hînas tsîna. Xoremarib ǃaroma i ge ǁGâuab xūn hoana nî dīkakahe. (1Jhn. 3:8) Xoremarib ǃaroma i ge Jehovab ge tsotsoas ai ǃhūbaiba ūba hâ i ǃaromasa nî dīǀoaǀoahe ǁkhā. Hoaraga ǃhūbaib ge nî paradais kai. Mā khoe-i hîna du ra ǀgao-ū i hoa-i ge Jehovaba nî ǀnam tsoatsoa. Tsî ǁîba nî ǃoaba tsoatsoa. ǁNā amaga a da tsēs hoasa dītsâ re. Î da ǃgôaǃgâsiba xoremariba ǁgau. Elob di kai ǀkhaeba.