1. Jehovaba tae-e ǁîb di khoen ǃnâ ra mû?

JEHOVA ELOB ge “ǃgâiǃgâibasensa ūhâ ǁaes âb ǃnâ.” (Psa. 149:4) Nēs ge kaise ra ǂkhî kai da. Jehovab ge sida ǃgâi ǀgauga ra mû. Tsîb ge ra mû māǃnôa khoeda a ǃkhais tsîna. Tsî sida ǁîba ǃoa ra ǂgae. ǁÎb ǃoagu da ga ǂgomǂgomsase ga ra hâ o. Ob ge ǁîba ǀamosib kōse sida ǀgūse nî hâ.—Jhn. 6:44.

2. Tae-i ǃaroman ǀnîna ǂgom tama hâ Jehovab ǁîna ǀnamsa?

² ǀNîn ge ǀnîsi a mî ǁkhā, ‘tita ge a ǂan Jehovab ǁîb ǃoaba-aon hoana a ǀnamsa. Xawe mati ta a ǂan Jehovab tita ǀguri hâse ǀnamsa?’ Tae-i ǃaroma i khoe-e ǁnāti i dîsa ra dî? Oksanas * ge ǂkhams ge io ǂgui xūna ge hōǃâ. ǁÎs ge ra mî: “Tita ge kaise ge ǂkhî ǁāǁnâhe ta ge o. Tsî ta ge aimâba-aose a ǃoaba tsoatsoa o. Xawe 15 kurina ǃkharu tsî ta ge tita ǀkha gere ī ǁgai xūna ge ǂâi tsoatsoa. Tsî tsâ tsoatsoa Jehovab tita ǂgao tama di. Tsî ta ge ǃgâi mâsib ǃnâ hâ tama hâ isa î da ǁîb xa ǀnam-e.” Yua di ǀon hâ aimâba-ao ǃgâsas tsîn ge kaise ǂgui ǃgomsina ǂkhams ge io gere hōǃâ. Tsîs ge nēti ra mî: “Ti ûiba ta ge Jehovaba ge mā ǁîba ta gere ǂkhî kai ǂgao amaga. Xawe ta ge gere ǂâi ǁîb ge ǀnamte ǁoa isa.”

3. Nē ǁkhāǁkhāǃâs ǃnâ da tae-e nî ǃhoaǃgao?

³ Tsoatsoas ǃnâ goro ǂkhaihe ǂgomǂgomsa ǃgâsan khami du ge sadu tsîna. Jehovaba ǀnam xawe du ge ra înganǀgē. ǁÎb a ǀnam du sa. Tae-i ǃaroma du ǂgomǃgâsiba nî ūhâ ǁîb a ǀnam du sa? Tsî tae-e a hui du ǁkhā Jehovab ǀnam du tama di du ga ǂâi tsoatsoa o? Hā re da nē dîdi di ǃereamde ǃhoaǃgao.

4. Tae-i ǃaroma i a ǃaorosa Jehovab sida ūba hâ ǀnamma înganǀgēsa?

⁴ ǀNammi ge ǀgaisa ǂkhâǃnâ ra xū. ǂGomǃgâsiba da ga ūhâ  o Jehovab ǀnam dasa. O da ge ǁnās xa nî ǁkharihe î da ǁîba ǀamosib kōse ǃoaba. Sida ûib ǃnâ da ga ǃgomsina hōǃgâ xawes tsîna. Tsî da ga înganǀgē o Jehovab sida ǀnamsa, ob ge ‘ǀgaib sida diba nî toa.’ (ǂKhm. 24:10) Tsî da ga ǂkhabuǂâi tsoatsoa tsî Jehovab sida ūba hâ ǀnamma ga ra ǂgom ǀû o. Ob ge ǁGâuaba supuse a ǃâitsâ da ǁkhā.—Efe. 6:16.

5. Tae-e ge ī ǀnî hâ ǃgâsan hîna ge ǂgom tama hâ ina Jehovab ǁîna ǀnamsa?

⁵ ǀNî ǂgomǂgomsa ǃgâsan ge ge ǂâi tsoatsoa Jehovab ǁîna ǀnam tamasa. Tsî ǁîn ǀkha ǁae tama hâsa. Tsî i ge ǁnās ǀkha ǁîn di ǂgomsa ge ǂkhabu kaihe. James di ǀon hâ ǀhaohâb ǃûi-aob ge ra mî: “Betels ai ta gere ǃoaba tsî aoǁnâ sîsen-e ǀnî hâ gowaba ra ǃoa ǀhaohâb ǃnâ gere dī. Xawe ta ge ge ǂgom tama hâ i Jehovab ge tita gere dība bi sîsen-e gere ǃgôaǃgâsa. ǀNî ǁaeb ais tsîna ta ge ge dîsen tsoatsoa. Jehovab ge amabes ǃnâ ti ǀgorede gere ǃgâsa.” Evas hîna ǁîs tsîna ǀoasase Jehovaba ra ǃoabas ge ra mî: “Jehovab ūba te hâ ǀnammi xa înganǀgēs ge a ǁkhōǁkhōsa. Nēs Jehovabats ra dība xūn hoana ra tsâǀkha amaga. Tsî nēs ge sida ǂkhîba ra ūbe î da Jehovaba ǃoaba ǀû. Michaeli hîna ǀhaohâb ǃûi-ao tsî ǁnaetisa aimâba-aob ge ra mî: “ǂGom tama du ga io Jehovab sado ra tsâbasa. O du ge ǁîba xu nî ǂgaebesen.”

6. Tae-e da nî dī ǂâi tsoatsoa da ga ra o, Jehovab sida ǀnam tamasa?

⁶ Nē aiǁgaudi ge ra ǁgau mati da sida ǂgomsa a kôa ǁkhāsa ǂgom da ga ra o. Jehovab sida ǀnam tama hâsa. Xawe tae-e da nî dī înganǀgē da ga ra o tsî da ga ǂâi o. Jehovab ǀnam da tama hâsa? ǁNāti i ǃgâi tama ǀgauba da ge nî ǂâi ǀû. Jehovab ai huiba ǂgan re. Îb ǃgâi tama ǂâiǀgauba sadu ‘ǂgaob tsî sadu ǂâide’ xu ūbe. (Psa. 139:23; Fil. 4:6, 7) ǂÂiho re ǀguri du ge hâ tama hâ. ǀNî ǂgomǂgomsa ǃgâsan tsîn ge ǁkhā xū-e ra ǃkharuǃnâ. ǃKharu ge ǁaeb di Jehovab ǃoaba-aon tsîn ge ǁkhā xū-e ge ǃkharuǃnâ. Tae-e da apostel Paulub di aiǁgausa xū a ǁkhāǁkhāsen ǁkhā sa kō re.    

7. Pauluba tae ǃgomsina ge ūhâ i?

⁷ ǀNî ǁaegu ai du ra tsâ ǂgui xūna du ūhâsa dī du nîna tsî i a ǃgom ǁîna dīsa? ǁNati i ga īo, o du ge Pauluba nî ǁnâuǃā. ǁÎb ge ǂâiǂhansende ge ūhâ i “ǀhaohâgu hoagu ǂama.” Tsî ǀgui ǀhaohâb xa ǀgui ge ǂâi tama hâ i (2Kor. 11:23-28) ǁKhōǁkhōsa ǀaeb di  mâsiga du ra hōǃâ, sadu ǂkhîba ra ūbe-e? Paulub ge ‘ǁkhū-i ǁgans ǃnâ hâ i’ xa gere ǂhanihe. ǀNîsib ge ǂūrusib di ǃgomsiba ge ūhâ i, tsî gere ǂhâba i i bē. (2Kor. 12:7-10) ǀNî ǁaega du ra ǂkhabuǂâi ǀoasa tama du hâ amaga? Paulub tsîn ge ǀnî ǁaega ǁnāti gere tsâ. ǁÎb ge aitsâma “Ti tsūǀkhāxa khoeta” di ge ǂgaisen. ǀOasa kurusab ūhâ tama amagab ge ǃgâi xū-e dīsa gere ǃkhamba.—Rom. 7:21-24.

8. Tae-e Pauluba ge hui îb nē ǃgomsina ǃnâ mâǀgai ǁkhā?

⁸ Paulub ge ǂgui ǃgomsina ge ǃkharuǃnâ. Xaweb ge ge aiǃgû Jehovaba ǃoabasa. Tae-e ǁîba ǀgaiba gere mā îb mâǃkharu nē ǃgomsina? Amaseb ge ge ǂan i ǀoasa kurusab ūhâ tamasa. Xaweb ge ǁîba ǂgomǃgâsiba xoremarib ǃnâ ge ūhâ i. Paulub ge Jesub di mîmâis tsîna ge ǂâihō. ‘ǁÎb ǃnâ ra ǂgoman hoan ǀamo ûiba nî ūhâ’ di hâsa. (Jhn. 3:16; Rom. 6:23) Paulub ge ǁnā khoen di ǀgui, ǀgaisa ǂgomsa ge xoremarib ǃnâ ūhâ iba. ǁÎb ge ǁnā ǂgomǃgâsiba ge ūhâ i. Jehovab ǁgai ǁore-aon tsîna ǃhōbasenan ga o nî ǀûbasa.—Psa. 86:5.

9. Tae-e da Paulub mîdi hîna Galateǁîn 2:20 ǃnâ xoamâihe hâde xu ra ǁkhāǁkhāsen?

⁹ Paulub ge ǂgomǃgâsiba ge ūhâ i Jehovab a ǀnambisa. ǁÎb ge ge ǂan i Jehovab ge Jesuba ǃhūbaiba ǃoa a sîsa îb ǁîb tsîna ǁōba. (Khomai re Galateǁîn 2:20 sa) Kō re ǀuniga mîdi hîna ǁnā xoas ǃnâ ra mîhede. Paulub ge ge mî: “Elob Ôab” tita ge ǀnam hâ ib, tsî ǁî-aitsama tita ǃaroma ge māsenna.” Paulub ge ge tsâ tama hâ i ǁîb kaise tsū tsîb Jehovaba ǁîba a ǀnam ǁoa di. Nētib ge ge ǂâi tama hâ i, ‘mû ta ge ra Jehovab tae-i ǃaroma ti ǃgâsana ǀnamsa. Xawe ta ge ǂgom tama hâ Jehovab tita a ǀnamsa.’ Paulub ge Romeǁîna ge ǂâiǂâiǃnâ: “sada ganupe a ǁore-ao hîab ge Xristuba sada ǁōba ǃkhais ǀkha.” (Rom. 5:8) Jehovab sida ūba hâ ǀnammi ge tātsē xū-i xa a ǁkhaehe ǁoa.   

10. Tae-e da Romeǁîn 8:38, 39 sa xu ra ǁkhā-ǁkhāsen?

¹⁰ Khomai re Romeǁîn 8:38, 39 sa. Paulub ge ge ǂan i matikōseb Jehovab di ǀnamma a ǀgaisasa. ǁÎb ge ge xoa: Xū-i xare i “hoasa i sada Elob ǀnammi, sada ǃKhūb ǃnâ hâba xu a ǀgora ǁoa ǃkhaisa”.Paulub ge ge ǂan i matib ge Jehovaba ǃnūǃnâxasib ǃnâ Israelǁaes ǀkha a hâ ǀgausa. Tsîb ge ge ǂâihō matib ge Jehovaba ǀgomxaǂgaosiba ǁîba a ǁgausa. Paulub ge ǀnî mîdi ǃnâ nēti gere mî: ‘Jehovab ge ǁîb di ǀgôaba sî îb tita ǃaroma ǁō. O ta nîsisa înganǀgē-e nî ūhâ Jehovab tita ūba hâ ǀnammi ǃoagu?’ —Rom. 8:32.     

11. Paulub ge 1 Timoteub 1:12-15 ǃnâ ra ǂkhaikhâihe dīsade a dī xawe, mati iob ge ǂgomǃgâsiba ūhâ i Jehovab ǀnambisa?

 ¹¹ Khomai re 1Tim. 1:12-15 sa. Paulub ge ǀnîsi ǀnî ǁaega kaise ǁgaise gere tsâ. Xristeǁî kaib nîs aiǃgâb gere dī ǁgai xūn xa. Tsî da ge buru tama hâ ǁîb ge aitsâma ‘ǂguro’ ǁore-aon di ǀguib di a ǂgaisen o. Paulub amaba nî ǁkhāǁkhāsens aiǃgâb ge xristeǁîna gere ǁgâiǀā. Tsî ǀnîna tronkhedi ǃnâ gere ǂgā. (ǃNǃkh. 26:10, 11) Mûnanai re matib ge Pauluba gere tsâsa ǂkham xristeǁîn ǀkhab gere ǀgao o. ǁÎb mā-ams ǀkha ge ǃkhamhe ǁgûn dina? Paulub ge ǁîb di dīsade gere ǃhausen. Xaweb ge ge ǂan i ǃkharuge xūnab a dawa ǁoasa. ǁÎb ge ge ūǃoa Xristub ge ǁîba ǁōbasa. Tsîb ge ǂgomǃgâsib ǀkha nēti ge xoa: ‘Xawe Elob di ǀkhomma xu ta nē ta īse ī.’ (1Kor. 15:3, 10) Tae-e da nēba xu ra ǁkhāǁkhāsen? Ūǃoa re Xristub ge satsa a ǁōbasa. Tsîb ge ǁîba dao-amsa ge ǁkhoba-amba du. Î du Jehovab ǀkha ǀō-aisa ǀgū ǀhōsagusa ūhâ. (ǃNǃkh. 3:19) Jehovab ǃoagu a ǂhâǂhâsa i ge nēsi da ra dī-i. Tsî hānîǁaeb ǃnâ da sī nî dī i tsîna. Tsî dīsa di hîna da ge ǃkharu ge ǁaeb ǃnâ dīn ose. Nēsi i ga Jehovab di ǃoaba-ao tamas ka io. ǁÎb di ǃoaba-ao tama i xawes tsîna.—Jes. 1:18.

12. Mati di mîdi hîna 1 Johaneb 3:19, 20 ǃnâ hâde a hui da ǁkhā, ǂkhabuǂâi tsî da ga ǀnam-e tama khami ga ra tsâ o?

¹² ǀNîsi du ga Jesub ge sadu ǁoren ǃaroma ǁōsa ga ra ǂâi o. O du ge ǀnîsi a mî ǁkhā, ‘Tita ge anū hâ khami tsâ tama hâ ǁnā xū-e ǃkhōǃoasa.’ Tae-i ǃaroma du ǁnā ǀgaub ǃnâ nî tsâ? Sida ǀoasa tama ǂgaoba ūhâ amaga da ge a kāxaǃnâhe ǁkhā. Tsî xū-ose tamas ka io ǀnam-e ǁoa khami a tsâ ǁkha. (Khomai re 1 Johaneb 3:19, 20 sa) ǁNāti i ǁaegu ai da ge nî ǂâihō, ‘Elob sada ǂgaob ǃgâ-ai kai’ǃkhaisa. Nēsi da ga Jehovab ǀnam da tamas ka io ǀûba da tide di ga ra tsâ xawe. Î ge Jehovab di ǀnamma nî  hâhâ. Tsîb ge hoaǁae nî ǀûba da. ǂGomǃgâsiba da ge nî ūhâ Jehovab amabes ǃnâ sida ǀnamsa. ǁNāsa da ga dī ǂgao o. O da ge ǁîb di mîsa nî ǁkhāǁkhāsen. Tsî ǁîba ǃoa tsēs hoasa nî ǀgore. Tsî ǁnāpaxu ǁîb di ǂgomǂgomsa ǃoaba-aon ǀkha ǀguiba nî hâ. Tae-i ǃaroma i ǁnā xūna dīsa ǁnātikōse a ǂhâǂhâsa?

13. Mati i Elobmîsa ǁkhāǁkhāsensa nî hui da? (“ Matis Elobmîsa ǁîna a hui ǁkhā” di hâ boksisa khomai re.)

¹³ Elobmîsa tsēs hoasa ǁkhāǁkhāsen re, o du ge ǃnāsase Jehovab di ǀgauga nî ǁnâuǃā. Tsî du ge nî ǁnâuǃā matikōseb ǁîba sado a ǀnamsa. Tsēs hoasa du ga Elobmîsa xu du ra ǁkhāǁkhāsen xūna ga ra ǂâiǃgâ o. O i ge nî hui du î du ǃgâise ǂâi ǁkhā. Tsî “ǂhanu-aisib ǃnâ kaikais ǃoa” sadu ǂgao tsî ǂâis tsîna nî mâi. (2Tim. 3:16) Kevin di ǀon hâ ǀhaohâb-ǃûi-aob ge ǂkhabusase tsâs di mâsiba ge ūhâ i. Tsî nēti ra mî: “Psalmdi 103 sa ta ge khomai tsî ǂâiǃgâ o. O ta ge ge hui-e î ta Jehovab ǀgauga tita ǃoagu ǁnâuǃā.” Eva di ǀon hâ ǃgâsas hîna go tsoatsoas ai hâ is ge ra mî: “Tsēs di ǀams ai ta ge tae-i Jehovaba ǂhâǂhâsaba sa ra ǂâi. Tita ī ge ǃnōmsa ǂgaoba ra mā tsî ti ǂgomsa ra ǀgaiǀgai.”

14. Matis ǀgoresa sida a hui ǁkhā?

¹⁴ Tsēs hoasa ǀgore re. (1Tes. 5:17) Nau khoe-i ǀkha du ga ǀhōsagusa ga ra kuru ǂgao o. O du ge ǁnā khoe-i ǀkha hoaǁae ra ǃhoa. Tsî ǁî-e ra mîba tsâ du ra ǀgauba. ǁNās tsîn ge ama sida ǀhōsagus Jehovab ǀkha. Sida ra tsâ ǀgaub tsî ǂâiǂhansen kai da ra xūna da ga ǁîba mîba o. O da ge ǁîb ǃnâ ǂgomǃgâsiba ra omkhâi. Tsî amabes ǃnâ da ge a ǂan ǁîb kaise sida ǀnamsa. (Psa. 94:17-19; 1Jhn. 5:14, 15) Yuas hîna da go ǀnai ǂgai hâ is ge ra mî: “ǀGore ta ga o, o ta Jehovaba tsēs ǃnâ go ī xūn ǀguina mîba tama hâ. ǁÎba ta ge ra mîba mati ta ra tsâ tsî mati ta ra ǂâiǀgausa. Tsî ta ge ǁaeb ǀkha Jehovaba kai ǁamaxū ǃkhaib di ǂgaeǂgui-aob ase mû tama hâ. Xawe dadasab hîna ǁîb di ǀgôana ǀnammi ase ra mû.”—“ Khomai i du hâ?” Di hâ boksisa kō re.

15. Matib Jehovaba ǃgâiǃgâibasensa mâ ǀguiǀguibe-i hoa i ǃnâ ra ǁgau?

¹⁵ ǂGomǂgomsa ǀhōsan ǀkha hâ ǁae re, ǁîn ge a ǀkhae Jehovaba xu. (Jak. 1:17) Sida di ǀhomsi ǁgûb ge mâ ǀguiǀguibe i hoa-i ǃnâ ǃgâiǃgâibasensa ra ǁgau. Tsî ǀhaohâb ǃnâ hâ ǃgâsana sida ge mā. Hîna ‘mâ ǁaeb hoab ai ǀnamma’ ra ǁgau da na. (ǂKhm. 17:17) Koloseǁîna ǃoab ge xoa hâ i sîǂkhanis ǃnâb ge Pauluba ǀnî Xristeǁîn hîna ge ǁîba gere ǂkhâǃnâna ge ǂgai. Tsî ǁîna ǃoa ‘ǁkhaeǂgaose ībate di ge mî.’ (Kol. 4:10, 11) Jesub tsîn ge kaise gere gangan ǁîb di ǀhōna xub gere hō huiba. Nēsi i ga ǀhomǃgāgu tamas ka io khoe-e xu gere ǀkhī xawe.—Luk. 22:28, 43.   

16. Matin ǂgomǂgomsa ǀhōsana sida Jehovab ǀgūse a sī u ǁkhā?

 ¹⁶ Sadu ǀhōsan hîna du ǀhaohâb ǃnâ ūhâna xu huiba ūǃoa i du ra? Sadu ra tsâ ǀgauba du ga kai ǀoa hâ ǃgâsan ǀkha ga ra ǀgoragu o. Os ge ǁnāsa ǂâibasen tama hâ ǂkhabusa du a di. Xawes ge ǁnāsa sada a ǁgauba ǁkhā. James di ǀon hâ ǃgâsab hîna go ǀnai ǂgai-e hâ ib ge nēti go mî: “Kai ǀoa hâ ǃgâsan ǀkha ǀhōsagus ge ti ûiba amabes ǃnâ hui hâ. ǃGâi tama ǂâiǀgaugu ga tita ga ra hāǂam o. On ge nē ǀō-aisa ǃgâsana tita ǃnūǃnâxase ǃgâ. Tsî ra ǂâiǂâiǃnâ te ǁîn kaise ǀnamte sa. ǁNātin ga dī o, o ta ge ra mû matikōseb Jehovaba. Tita ǀnam tsî ra tsâbasa.” Kaise i ge ǂhâǂhâsa î da ǀgū ǀhōsagusa sida ǃgâsan ǀkha omkhâi.

17-18. Ham-e da nî ǃgâ tsî tae-i ǃaroma?

¹⁷ ǁGâuab ge ra ǂhâba î da ǀûsen ǃgâi xūna dīsa. ǁÎb ge ra ǂhâba î da ǂgom Jehovab sida ǀnam tama hâsa. Tsî da ǃgâi ǃaroma-e ūhâ tamasa Jehovab xa ǁkhaubahesa. Xawe mû da go khami ī ge xū-i xare-e amaba xu ǃnū tama hâ.

¹⁸ Jehovab ge sado a ǀnam. Kaise du ge ǁîb di mûn ǃnâ a ǀō-aisa. ǁÎba du ga ǁnâuǀnam o, o du ge ǁîb di ǀnammi ǃnâ nî hâ. ǀAmosib kōse Jesub tsîn ta dī khami. (Jhn. 15:10) Tā ǁGâuab ta mî xūna ǂgom re. Tamas ka io sadu ǂgaob ra mîna. Xawe Jehovaba ǃgâ re. ǁÎb ge ǃgâiba mâ ǀguiǀguibe i hoa-i ǃnâ ra mû. ǂÂiǂâiǃnâsen re ǁîb “ǃgâiǃgâibasensa ūhâ ǁaes âb ǃnâ,” sats tsîna ǃkhōǂgā hâse.