1-2. Mâ ǀgaub ǃnâ i sida mâsiba ǂguro xoaǀgoras ǃnâ goro mîhe ǂkhamkhoeb khami ī?

 MÛNAN-AI re ǃkhū hâ ǁgûra xa kaikaihe hâ ǂkhamkhoeb hîna ge ǁîra tsūkeǃgâb ǃnâ ǂoaǃnâba. ǁÎb ǁgûra ge audo tsūkeǃgâb ǃnâ ge ǁō. Nēsab ge ǁnâu ob ge kaise ge ǃoa. ǁNās ǂam-ai i ge ǀkhara ǁgai ǂhôa-e ge hâ i. ǁÎb ge ge ǂanǂûi ǁgûra ge hoa marisa dītoa tsî ǁîba surudeb ǀkha a ǁnāxusa. ǁÎb ge mari-e ge ǀûmi tama hâ i xaweb ge hâ ge i surudena mataresa gere ǂgaoǀkhāhe. Khoen ge ǁîn marina ǁnā ǁaeb ai gere ǂhâba. ǁÎb ge nē surudeba tātsē hoase matare hō tide.

² ǀNî ǀgaub ǃnâ i ge sida ûiba ǁnā ǂkhamkhoeb ûib khami ī. Sada kai ǁgûra Adammi tsî Evas tsî ra ge ǀoasa kurusa ge ūhâ i tsî îsa Paradais ǃnâ gere hâ. (Gen. 1:27; 2:​7-9) ǁÎra ge ǀamosib kōse ǃgâiaǂgaob ǃnâ ûis di ǃēsa ge ūhâ i. Xawe i ge ǁgai xū-e ge ī, Adammi tsî Evas tsîn ge ge ǁore. Nēs xa ǃaromahe hâseb ge Jehovaba ǁîra Edenni ǃhanaba xu ge ūǂûi tsî ra ge ǀamose ûis di ǃēsa ge ǂoaǃnâ. ǁÎra ǀgôana tae-e ge ǀûmi? Elobmîs ge ra mîba da: “ǀGui khoeb ǃnâ-ūb ge ǁoreba ǃhūbaib ai ge hā tsî ǁoreba xu ǁōba. Tsî ǁnātib ge ǁōba hoaraga khoen ǃnâ ge khoraǂuisen, hoan ge ǁore amaga.” (Rom. 5:12) Adamma xu da ge ǁoreba ge ǀûmi tsîs ge nēsa ǁōba ge ǃaroma. ǀÛmi da ge  ǁoreb ge kai surudeb khami ī tsî i ge khoe-i xare-e nēsa matare ǁnā hō tide.—Psa. 49:8.

 3. Tae-i ǃaroma i sida ǁoreba surudeb ǀkha ra ǀgopeǀnōhe?

³ Elobmîs ge ‘ǁoreba’ surudeb ǀkha ra ǀgopeǀnō. (Mat. 6:12; Luk. 11:4) ǁOre da ga o da ge ǀnî mîdi ǃnâ Jehovaba ra surude. Jehovab ge sida a ǂgan ǁkhā î da ǁnā surudeba matare. ǁNā surudeba da ga matare tama ī, o i ge ǁō da ga o ǀgui nî ǀariǂûihe.—Rom. 6:​7, 23.

 4. (a) Huib ose i ga tae-e ǁore-aon ǀkha ī hâ? (Psalmdi 49:​7-9) (b) Elobmîs ǃnâ i ‘ǁore’ ti hâ mîsa tae-e ǃoa ra ǁnaeǁgau? (Boksisa mû re “ ǁOreb” ti hâsa.)

⁴ Īǁkhā-e Adammi tsî Eva hâra ge ǂoaǃnâ xū-e hō-oasa? Nēsa da ge aitsama a dīhō ǁoa. (Khomai re Psalmdi 49:​7-9 sa.) Huib ose da ge ǃâubasens tsî khâis tsîna ga ūhâ tama hâ. Sida ǁōb ge xamanin dib khami ga ī hâ, ǁō tsî da ge ǁkhapa khâisa ga hō tama hâ.—Aoǁn. 3:19; 2Pet. 2:12.

 5. Matib ge sida ǀnamxaǃnâ ǁGûba hui da sida ǁorena mataresa? (Tsoatsoas ai hâ ai-īsiba kō re.)

⁵ Nē ǁkhāǁkhāǃâs tsoatsoas ai goro ǃhoaǃgaohe ǂkhamkhoeb xa ǂâi re. ǁÎba mati nî tsâ ǃkhū hâ khoeb ga ǁîb di surudeb hoaba māsenxase matare o? Amase, ǁîb ge nēsa kaise nî ǃgôaǃgâ tsî nē ǀkhaeba nî ūǃoa. ǁNās ǁkhās khamib ge sida ǀnamxaǃnâ ǁGûb Jehovaba, sida surudeba a matare ǁkhā ǀkhaeba ge mā da. Jesub ge nēsa sao rase ge ǁguiǃā: “ǁNātikōseb ge Eloba ǃhūbaiba ge ǀnam tsîb ge ǁîb di ǀguise ǃnae hâ ǀGôaba ge mā, ǁîb ǃnâ ra ǂgomn hoan kāǁō tide, xawen nî ǀamo ûiba ūhâse.” (Jhn. 3:16) Nē ǀkhaeb tsîn ge ra īǁkhā kai î da Jehovab ǀkha ǀgū ǀhōsagusisa ūhâ.

 6. Tae-e da nē ǁkhāǁkhāǃâs ǃnâ nî ǃhoaǃgao tsî tae-i ǃaroma?

⁶ Mati da ǃgâiba nē ǀō-aisa ǀkhaeba xu a hō ǁkhā tsî sida ǁoren tamas ka io “surudena” ǀûbahe ǁkhā? ǁNā dîsa ǃereams ǃaroma da ge ǃkharagaǃnâgu Elobmîs mîdi tsî ǂâibasendi tsîna nî ǃhoaǃgao. Nēsa ǂâiǃgâs ge nî hui da, î da Jehovab ge sida ǀûbas ǃaroma dī xū-e ǃnāsa ǃgôaǃgâsiba ūhâba.

JEHOVAB GE ǂHÂBA HÂ Î DA ǁÎB ǀHŌSA KAI

 7. (a) Adammi tsî Eva hâra tae-i tsîna ge ǂoaǃnâ? (b) Adammi tsî Eva hâra di surib ase da tae-e ǁgariǁgarisase ǂhâ hâ? (Romeǁîn 5:​10, 11)

⁷ Adammi tsî Eva hâra ge ǁore ra ge o ǀamo ûib ǀguiba ge ǂoaǃnâ tama hâ i. Xawe ra ge ǁîra ǁGûb Jehovab ǀkha  ra ge ūhâ i ǀhōsagusis tsîna ge ǂoaǃnâ. ǁOre ra nîs aiǃâ ra ge Adammi tsî Eva hâra ge Elob omaris di ǃâ i. (Luk. 3:38) Xawe ra ge Jehovaba ǁnâuǀnam tama hâ i, o ra ge ǁnā omarisa xu ge ǃkhaeǂûihe, ǀgôana ra nî hōs aiǃâ. (Gen. 3:​23, 24; 4:1) ǁÎra surib ase da ge huiba ǂhâ hâ, î da Jehovab ǀkha ǃgâi ǀhōsagusisa ūhâ. (Khomai re Romeǁîn 5:​10, 11 sa.) Elob ǀkha da ūhâ khākhoesisa ǀû tsî da ge nî ǁîb di ǀhōsa kai. ǀGui ôaǃnâs ǃoagu i ge Grike gowab mîs, “ǂkhîbagu” ti hâsa a ǂâibasen ǁkhā “sa khākhoe-i ǀkhats a ǀhōsasagu” ǁkhāsa. Buruxaseb ge Jehovaba ǂgurose nēs xa xū-e ge dī. Mâ ǀgaub ǃnâ?

JEHOVAB GE GE ĪǁKHĀ KAI Î DA ǁÎB DI ǀHŌSA KAI

 8. Jehovaba tae-e ge īǁkhā kai?

⁸ Jehovab ge ǀgauba ge dī în ǀoasa kurusa ūhâ tama khoena ǁîb di ǀhōsa kai. ǁÎb ge Adammi ge ǂoaǃnâ xū-e hō-oas ǃaroma xū-e ge dī. Nēs ge ǀoasasiba ūhâ xū-e ǁkhā ǀoasasiba ūhâ xū-i ǀkha ǃkhōǃhunisa ǃoa ra ǁnaeǁgau. Grike gowab xoadi tsîn ge Jehovab ge ǃgâi ǀhōsagusisa ǁîb ǀkha ūhâsa īǁkhā kai ǀgauba ǃoa ra ǁnaeǁgau, î da ǁîb ǀhōsa kai.—Rom. 3:25.

 9. Jehovaba tae-e ge dī îb Israelǁaes di ǁorena ǀûba ǁkhā?

⁹ Jehovab ge xū-e ge dī îb Israelǁaes di ǁoreba ǀûba tsî ǁîn ǀkha ǀhōsagusisa ūhâ ǁkhā. Israeli ǃnâs ge ǂkhîbagus tsēsa ǀguiǃnās ǀguisa kurib ǃnâ gere tsēdīhe. ǁNātsēs aib ge ǀgapipristera xamanin ǁguibasa khoen ǃaroma gere dī. Xamanin di ǁguibadi ge ǁoreba ge ǃgū-ai tama hâ i, khoe-i ûib xamanin dib xa a ǀgapi amaga. Xawe i ga ǁnā ǃhausen hâ Israelǁî-e Jehovab ra ǂgaoǀkhā ǁguibasa mā, ob ge māsenxase ǁî-i ǁoreba gere ǀûba. (Heb. 10:​1-4) Israelǁaes ge ǂkhîbagus tsēs tsî nau nî hâ ǁaegu ai gere dī ǁguibadi ge ǁîna gere hui în mûǂan ǁore-aon a ǃkhaisa tsîn ǁnās xa ǃnāsa xū-e nî dīsa, î-i ǁîn ǁorena hoase ǀûbahe ǁkhā.

10. Jehovaba tae-e ge dī îb khoen di ǁorena ǀûba?

¹⁰ Jehovaba tae-e ge īǁkhā kai î-i khoen ǁorena ǀûbahe ǁkhā? ǁÎb di ǀnamxa ǀGôab ge, “ǀgui ǃnās ǀguisa ge ǁguibahe, ǂguin di ǁorenab nî ūbēse.” (Heb. 9:28) Jesub ge ǁîb di ûiba ‘ǂguin di orehes’ ǃgao ge mā. (Mat. 20:28) Xoremariba a tae?

MATAREHE GE XOREMARIB ǁGUIBAS

11. (a) Elobmîs ǃoagu xoremariba a tae? (b) Ham-i ǀgui-e xoremariba ga matare hō ǁkhā hâ?

¹¹ Elobmîs ǃoagub ge xoremariba ra matarehe î-i ǂkhîbagusa hau. Jehovab mûǂuiba xus ge nēsa ǂoaǃnâhe ge xū-e ra hau-oa. Mâ ǀgaub ǃnâ? ǂÂis ǃnâ ūhâ Adammi tsî Eva hâra ge ǁîra ǀoasa kurusa ūhâ ûiba ge ǂoaǃnâ tsî ǃaruǀî ǀamose ge ûi ǁoa ī. ǁNā-amagas ge xoremarib ǁguibasa ǂoaǃnâhe ge xū-i ǀkha nî ǀguitikō. (1Tim. 2:6) ǁNās ge kai ǀoa hâ khoe-i xa ǀgui nî matarehe, (1) ǀoasa kurusa ūhâ; (2) ǀamosib kōse ǃhūbaib ai ûis ǁkhāsiba ūhâ, (3) tsî māsenxase ǁî-i ûiba sida ǃgao ǁguibas ase nî mā-e. ǁNā khoe-i di ûib ǀguib ge ǂoaǃnâhe ge xū-e ge matare ǁkhā i.

12. Jesub ǀguiba tae-i ǃaroma ǂhâbasa xoremarib ǁguibasa ge matare ǁkhā i?

¹² ǃNona ǃaromade ǃgaoǃgâ re tae-i ǃaromab ge Jesuba xoremarib ǁguibasa matare ǁkhā i ǃkhaisa. (1) ǁÎb ge ǀoasa kurusa ge ūhâ i tsî “ǁore-i xare-e” ge dī tama hâ i. (1Pet. 2:22) (2) ǁNās xa ǃaromahe hâseb ge ǀamose ǃhūbaib ai ûis di  ǁkhāsiba ge ūhâ i. (3) ǁÎb ge māsenxase ǁō tsî ǁnā ûiba sada ǃgao ge mā. (Heb. 10:​9, 10) Jesub ge ǀoasa kurusa ge ūhâ i Adammi khami, Adammi nî ǁores aiǃâ. (1Kor. 15:45) ǁNā-amagab ge Jesuba ǁōb ge o, Adammi ge ǂoaǃnâ ûib ǂûba ge matare oa ǁkhā i. (Rom. 5:19) ǁNās ǀkhab ge Jesuba ge ‘ǀûniga Adam i.’ ǂHâbasa tama i ge ge hâ i ǀnî hâ ǀoasa kurusa ūhâ khoe-i hā tsî Adammi ge ǂoaǃnâ-e nî matare-oasa. Jesub ge “ǀgui ǁguibasa ǀamosib kōse . . . ge ǁguiba.”—Heb. 7:27; 10:12.

13. Mâ ǃkharagagusiba ǂkhîbagus ǁguibas tsî xoremarib tsîn ǁaegu hâ?

¹³ Mâ ǃkharagagusiba ǂkhîbagus ǁguibas tsî xoremarib tsîn ǁaegu hâ? ǂKhîbagus ǁguibas ge Elob ǁîb tsî khoen ǁaegu nî hâ ǃgâi ǀhōsagusis ǃaroma ra dīhe xū-e ǃoa ra ǁnaeǁgau. Xoremarib ǁguibasa matares ge ra īǁkhā kai în ǁore-aona ǂkhîbagusa Elob ǀkha ūhâ. Nē matares ge Jesub di ǃgomǀgausa ǀaoba ra ǂnûǁkhaeba hîna ge sada ǃgao a māheba.—Efe. 1:7; Heb. 9:14.

JEHOVAB GE GE ǃNORAǃNORA DA

14. Tae-e da nēsi nî ǃhoaǃgao tsî tae-i ǃaroma?

¹⁴ ǂKhîbagus ǁguibas ǀamǂoasa a tae? Elobmîs ge ǃkharagagu mîde ra sîsenū nēsa xu da ra ǀama xūna ǁguiǃās ǃgao. Nē mîdi ǂâibasendi ra ǂgâǃnâgu xawes ge mâ mîs hoasa ǂkhîbagus ǂâibasensa ūhâ, Jehovab ǀûbas ǂnûiǂgāsa ra ǁguiǃāsa. ǁNās ge ra īǁkhā kai îb Jehovaba sida ǁorena ǀûba. Nē mîde da ra ôaǃnâ khami da ge nî mû mati da ra tsâǀkhāhe ǀgausa.

15-16. (a) Elobmîs ǃnâ i ǃnorakaihe ti hâ mîsa tae-e ǃoa ra ǁnaeǁgau? (b) Nēsa mati ra tsâǀkhā da?

¹⁵ Elobmîs ge ra mî xoremarib ge matarehe amaga da ge ge ǃnoraǃnorahe. Apostel Petrub ge nēsa sao rase ra ǁguiǃā: “ǁÎn ge hîkākāhe ra xūn hîa ǀhaiǀurib tsî ǃhuniǀurib tsîn khami ge ī tama hâ i, xawe du ge ǃgomǀgausa ǀaob Xristub, ǂnao-o tsî ūo ǁkhaob dib ǀkha ge orehe.”—1Pet. 1:​18, 19.

¹⁶ Xoremarib di ǁguibas ge ge ǃaroma î da ǁoreb tsî ǁōba xus tsîna ǃnora kaihe, hîna ǂgui ǃgomsiga ra ǃaroma ga. (Rom. 5:21) ǁNā-amaga da ge Jehovab tsî Jesub ge dība da xūna kaise ra ǃgôaǃgâ, ǃgomǀgausa ǀaob ge a ǃnoraǃnora da amaga.—1Kor. 15:22.

17-18. (a) ǂHanu-aise mûhesa tae-e ra ǂâibasen? (b) Mâ ǃgâiba da ra ǀama Jehovab ga ǂhanu-aise mû da o?

¹⁷ Elobmîs ge ra mî Jehovaba ra ǃoaba khoen ǂhanu-aise ra mûhesa. Nēs ge ra ǂâibasen ǁîb ǁore da ga, o da xū-e nî mataresa ǂgaoǀkhā da tama hâsa. Nēsab ga dī xaweb ge Jehovaba noxopa ǁîb di ǂhanu-ai ǁgaraga ra ǃkhōǀgara. ǁÎb ge ǂhanu-aise ra mû da xawe nēsa da anu hâ ǃkhâis ǃaroma ǀguis ose. Jehovab ge māsenxase ra ǀûba ǂgomsa da ra ǁgau amaga ǁîb tsî Jesub ge amā xoremarib ǃaroma.—Rom. 3:24; Gal. 2:16.

¹⁸ Mati da ǃgâiba ra ǀama Jehovab ga ǂhanu-ai khoen ase mû da o? ǀNîn ge ǀnai nēsa xu ra ǀama ǁîn ǁhûiǂuihe hâ în Jesub ǀkha sī ǀhommi ǃnâ ǀguiba ǂgaeǂgui tsî Elob ôa kai amaga. (Tit. 3:7; 1Jhn. 3:1) ǁÎn ǁorenab ge ge ǀûba. ǁÎn ge tātsē ǁore tama hâ i, khami i ge ge ī-i. ǁNā-amagan ge Gaosiba ra ǀûmi. (Rom. 8:​1, 2, 30) Nau ǂhanu-ain ge ǀamosib kōse ǃhūbaib ai nî ûi. Jehovab ge ǁîn di ǁorena ge ǀûba tsîn ge ge ǁîb di ǀhōsa kai. (Jak. 2:​21-23) Kai ǂnubis khoen Armagedonsa ra  ûiǃkharun ge tātsē ǁō tide. (Jhn. 11:26) “ǂHanu-ain tsî ǂhanuoǃnân” hîna ge ǁōn ge khâisa nî hō. (ǃNǃkh. 24:15; Jhn. 5:​28, 29) ǀAms ain ge Elob di ǁnâuǀnamxa ǃoaba-aon hoana, ‘ǂkhaisib di ǃnorasasib Elob ôan dib ǃoa nî ǃnoraǃnorahe.’ (Rom. 8:21) ǀGaisa ǀhōsagusisa da sada ǀhomsi ǁGûb Jehovab ǀkha nî ūhâ ǁaeba ǃoa da ge ra mûǂui.

19. Sida mâsiba mati ge ǃgâiǃgâihe Jehovab tsî Jesub tsîn ge dība da xū-i xa? (Boksisa mû re “ Nēsa tae-e ra ǂâibasen?” ti hâsa.)

¹⁹ Sada mâsib ge ǁnā ǂkhamkhoeb ǃhoaǃgao da gob hîna ge ǃâubasensa ūhâ tama hâ îb khami ge ī-i. ǁÎb ge hoa xūna ge ǂoaǃnâ tsî matare ǁoab ge i surudeb tsîna ge ǀûmi. Xawe Jehovab ge hui da tsî ǀgauba ge dī îb sida ǁorena ǀûba. Jesub ge ǁnā xoremariba ge matare. Sada ǂgoms Jesub Xristub ǃnâ da ūhâs ge ra ǃnora kai da ǁoreb tsî ǁōb tsîna xu. Jehovab ga sida ǁorena a ǀûba, ob ge hoa ǁorena ra ǀariǂûi. Hoan xa a ǂhâǂhâsas ge nēsi da sada ǀhomsi ǁGûb Jehovab ǀkha ǀgū ǀhōsagusisa a ūhâ ǁkhāsa.

20. Tae-e da sao ra ǁkhāǁkhāǃâs ǃnâ nî ǃhoaǃgao?

²⁰ Jehovab tsî Jesub ge dība da xūn xa da ga ǂâiǃgâ, ob ge sida ǂgaoba ganganxasib xa ra ǀoa. (2Kor. 5:15) ǁÎkha huib ose da ge ǃâubasen-e ga ūhâ tama hâ. Sao ra ǁkhāǁkhāǃâs ǃnâ da ge aiǁgaude nî mû mati da xoremariba xu ǃgâiba a ǀama ǁkhā ǀgausa.