1-2. (a) Mâ ǁaeb ai da ǃgōsase a ǃgombahe khoe-e ǀûbasa? (b) Mâ ǀgaub ǃnâs ge Denisa ǀûbaba ǁgau?

 NAU khoena ǀûbas xa du a ǃgombahe? Hoa da ge nēs ǀkha ǃgomsiba ra hōǃâ, ǃgōsase i ga khoe-e tsûtsûsa xū-e mî da tamas ka io tsûtsû da o. Xawe hâs ge xūna da ge a dī ǁkhā î da tā ǁaixa tsûtsû-e da ga o tsî ǁîna ǀûba ǁkhā. Aiǁgause, Denise a ti ǀon hâ ǃgâsas aiǁgausa ǃgaoǃgâ re hîna ge ǂoaǂamsa ǀgaub ǃnâ ǀûbaba a ǁgausa. Denise, ǁîs aob tsî ǀgôan ge 2017 nî ǃnâ Jehovab ǃoaba-aon dana berosa xu gere ǃnari oa, karun a hînab ge ǀnî audosa ra ǃnari khoeba ǁîn ǃnâ ge ǃnariǂgâ tsî audo tsūkeǃgâba ge ǃaroma. Denise ge ge ǀū-i tae-i ge īsa audo tsūkeǃgâb khaoǃgâ. ǂKhais ge os ge ge mîbahe ǁîs ǀgôan ǁgaise tsû hâsa tsîb ge ǁîs aob Braina a ǁōsa. Nēs xas ra ǂâi-oa os ge Denisa ra mî, “kaise ta ge ge tsûaǂgao tsî gere ǂâiǂhansen.” Egas ge ǁîsa ge ǂanǂûi nau audosa ge ǃnari hâ i khoeb ge ǂhani bi ra xū-e ǁîb aiǃâ ūhâ tama hâ isa îb nē tsūkeǃgâba ǃaroma ǁkhā. ǁÎs ge Jehovaba ǃoa ǀgore tsî ǃnomsasiba ge ǂgan.

² Nē khoeb ge ǃkhōhe tsî ǀgapi ǁnâuǃgâ ǃkhaiba ǃoa ge ī-ūhe, aobab ge ǂâibasen tamase a ǃgam amaga. ǁNâuǃgâ ǃkhaib ga ǀhapixase hō bi ob ge īǁkhāsib ga hâ o nî ǁkhara-e. Denise ge ǀgapi ǁnâuǃgâ ǃkhaib tawa ge ǂanǂanhe ǁîs ǃkhō-ams nē ǃnari-aob ǁkharaba nî mîǁgui ǃkhaisa. Denise ge ra mî, “ǁkhapa ta ge ǀoro ǀhapisa ta ra kora-amhe khami  gere tsâ ǃkharuge xū-i xa ǃhoasa.” Wekheroga ǃkharu tsîs ge Denisa ǁnâuǃgâ ǃkhaib tawa ge ǂnôa i īs ǃkhō-amsa mā, aob hîna ge ǁîs omaris tsûba a ǃaromab aiǃâ. Tae-es ge mî? Denise ge ǀgoraǃgâ-aoba ge ǂgan îb nē aoba ǀkhomxa. b ǃHoa toas ge ob ge nē ǀgoraǃgâ-aoba ge ā tsoatsoa. ǁÎb ge ge mî: “Tita ge 25 kuriga a ǀgoraǃgâ-ao xawe ta ge tātsē nēti-i xū-e ti ǁnâuǃgâ ǃkhaib ǃnâ ǁnâu tama. Tita ge tātsē tsûtsûhe ge omari-i ǁî-i ǃoagu ge tsudī khoe-e ǀkhoma ra ǂganba ǃkhaisa ge mû tama hâ i. Tita ge nēba noxopa ǀnammi tsî ǀûbab mîde ge ǁnâu tama hâ i.”

 3. Tae-e Denisa ge hui is ǀûba?

³ Tae-e Denisa ge hui is ǀûbaǀnamxa? ǁÎs ge Jehovab di ǀûbaǀnamxasib xa ge ǂâiǃgâ. (Mix. 7:18) Jehovab ǀûbaǀnamxasiba ra ǁgau ǀgauba da ga ǃgôaǃgâ, o da ge nî ǂkhâǃnâhe nauna ǀûbasa.

 4. Jehovaba tae-e da nî dīsa ra ǂgaoǀkhā da? (Efeseǁîn 4:32)

⁴ Jehovab ge ra ǂhâba î da nauna ǀûba ǁîb sada māsenxase ra ǀûba khami. (Khomai re Efeseǁîn 4:32 sa.) ǁÎb ge ra ǂgaoǀkhāda î da māsenxase ǁnān hîna ra tsûtsû da na ǀûba. (Psa. 86:​5, Luk. 17:4) Nē ǁkhāǁkhāǃâs ǃnâ da ge ǃnona xūna nî ǃhoaǃgao, ǃnāsase ǀûbas ǀkha nî huina.

TĀ SADU TSÂSIGA KŌǃKHARU

 5. ǂKhoamîdi 12:18 ǃoagu, mati da a tsâ ǁkhā khoe-i xa da ga tsûtsûhe o?

⁵ ǃGōsase da ge khoe-i ga sada ǀgū ǀhōsa tamas ka io omaris ǁani o, ǁî-i ra mî ǁgai xū-i tamas ka io i ra dī ǁgai xū-i xa kaise ra tsûtsûhe. (Psa. 55:​12-14) ǀNî ǁaegu ai da ge ti kōse ra ǁaixa tamas ka io ra tsû, î da ǃkhā-e go khoe-i khami tsâ. (Khomai re ǂKhoamîdi 12:18 sa.) Tsûaǂgaoba da ge ǀnîsi a kōǃkharu ǁkhā. Xawe ǁnās ge ǀnîsi ǃkhāmâihe hâ gôas ǀkha hâmâs khami a tsâ kai tsi ǁkhā. ǁNās ǁkhās khami da ge a ǃâubasen ǁoa sada tsûaǂgaob ǃgâis ǀguisa nî hî ti kōǃkharu da ga o.

 6. Tae-e da a dī ǁkhā khoe-i ga tsûtsû da o?

⁶ Khoe-i ga tsûtsû da, o da ge ǃnāsa ǁaeba ǃhaese ra ǁaixa. Elobmîs ge ra ǂanǃgâ ǀnîsi da kaise a ǁaixaǃnā ǁkhā ǃkhaisa. Xawes ge ra ǃkhâikhom da î da tā ǁaixasase hâ ǀgara. (Psa. 4:​4, Efe. 4:26) Tae-i ǃaroma? Tsâ da ra ǀgaub ge ǃnāsase xū-e da ra dī ǀgauba ra tsâǀkhā. ǁAib ge ǃnāsase ǁgai ǀamǂoasa ūhâ. (Jak. 1:20) ǁAib ge tsâsigu ai a ǃgaoǃgaosa xawe ǁaixa hâse hâ ǀgarasats ge aitsama ra ǁhûi.

 7. Mâ tsâsigu tsîna da a hōǃâ ǁkhā khoe-i xa da ga tsûtsûhe o?

⁷ Khoe-i ga ǁgai ǀgaub ǃnâ hâ-ū da, o da ge kaise ra tsûaǂgao. Aiǁgause Anns ti ǀon hâ ǃgâsas ge ra mî: “Tita ge ǂkhari ǀgôaro-ī, ob ge ti dadaba ti mamasa ǀgoraxū tsî tita gere ǃûi kaikhoesa ge ǃgamme. Tita ge ǂgaohe tama ta hâ khami gere tsâ, ǁîra ge tare ǀgôas tsî aore ǀgôab tsîna a hō o. Ti ǃkhaisa ra ge ū khami ta ge gere tsâ tsî ta ge ǁnā tsâsib ǀkha ge kai.” Georgete ti ǀon hâ ǃgâsas ge ra ǁguiǃā, matis gere tsâsa ǁîs aob ge ǀai o. “Sîm ge ǀgôarosisa xu ge ǀhōsagu i tsî aimâba-aose ǀguiba gere ǃoaba, kaise ta ge ge tsûaǂgao.” Naomi ti ǀon hâ ǃgâsas ge ra mî: “Tātsē ta ge ti kaikhoeb nî tsûtsûte ǃkhaisa ge ǂgom tama hâ i. ǁÎb ge  ǁgauoǃnâ ǁgoe-ūgub vidiogu tsî ai-īsigu tsîna gere kō tsî tita xub gere sâu ǃkhaisa ge mîbate. Nēs ge gaxaǃnâhe ta rase gere tsâ kai te.”

 8. (a) Tae-i ǃaroma da nauna nî ǀûba? (b) Mâ ǃgâiba da a ǀama ǁkhā ǀûba da ga o? (Boksisa mû re “ Tae-e da nî dī khoe-i xa da ga ǁaiǁaihe o?” ti hâsa.)

⁸ Khoen sida ǃoa mî tsî ra dī xūna da ge a ǁkhae ǁoa xawe da ge sida ra ǃeream ǀgauba a ǃkhō-oa ǁkhā. ǃGâi xū-i hîna da a dī ǁkhā i ge ǀûbasa. Tae-i ǃaroma? Jehovaba da a ǀnam amaga tsî ǁîb ge ra ǂhâba î da ǀûbaxa. ǁAixa hâse da ga hâ ǀgara tsî nauna ǀûba tama i, o da ge gâre tamas ka io ǁnâuǃāoǃnâse tanisen tsî ǀaeb mâsib tsîna a hōǃâ ǁkhā. (ǂKhm. 14:​17, 29, 30) Kristine ti ǀon hâ ǃgâsas aiǁgausa ǃgaoǃgâ re, ǁîs ge ra mî: “ǁAixa ta ga, o ta ge ǀorose ra ǀnom tsî ta ge ǂurusib ǃaroma ǃgâi tama ǂûna ra ǂû. ǀOrose ta ge ra ǁom tsî ta ge ǁnās ǀkha ti tsâsiga a ǃkhō-oa ǁoa tsîs ge ǁnāsa ti ǃgammeb tsî naun ǀkha ta ūhâ ǀhōsagusis tsîna ra tsâǀkhā.”

 9. Tae-i ǃaroma da nî ǁaixa ǀû?

⁹ Tsûtsû da go khoe-i ga ǀûbaba ǂgan tama i xawe da ge ǁî-i go ǃaroma tsûba a kōǃkharu ǁkhā. Mâ ǀgaub ǃnâ? Georgetes ǀnai da go ǃhoaǃgaos ge ra mî: “ǁAeba i ge ge ū ǃgamme da ge hâ i aob ǃoagu ǁaixa ǀûsa. Nēsa ta ge dī o ta ge kai ǂkhîba ge hōǃâ.” ǁAiba da ga ǁnāxū os ge nēsa ra hui da î da tā nauna ǁgaise hâ-ū. Nēs xa da ga ǂâi ǀû o da ge ǃgâi xū-e ra dībasen tsî ǁkhapa ǁkhoaxa ûiba ra ūhâ. (ǂKhm. 11:17) Sadu tsâsiga ǂanǃgâs khaoǃgâ du ga noxopa khoe-e ǀûba tama i, o du tae-e nî dī?

SADU TSÂSIGA SÎSENǂAM

10. Tae-i ǃaroma da ǁaeba ǂhâha î da ǁaixa ǀû? (Ai-īsiga mû re.)

¹⁰ Tae-e nî hui da î da ǁaixa ǀû? ǀGui ǀgaub hîna da nēsa a di ǁkhāb ge mā-amsa îb ǁaeroba ǃkharu. ǀAeǃkhōs khaoǃgâ i ge khoe-i hîna ǁgaise tsû hâ-e ǁaeba ǂhâhâ î-i ǂgau. ǁNās ǁkhās khami i ge ǁaeba nî ū khoe-e ǂgaoba xu ǀûbasa.—Aoǁn. 3:​3, 1Pet. 1:22.

11. ǀGoresa mati nî hui du î du ǀûbaxa?

 ¹¹ Jehovaba ǂgan re îb hui du î du ǀûbaxa. c Anns ǃhoaǃgao da gos ge ra ǁguiǃā, ǀgores ge mati a huisi ǀgausa. ǁîs ge ra mî: “Jehovaba ta ge ge ǂgan îb hoa da omaris ase da ge ǃgâise dī tama hâ ī xūn ǃgao ǀûba. ǁNās khaoǃgâ ta ge ti dab tsî ǁîb ǀasa taras tsîna sîǂkhanisa ge xoaba, ǁîra ta go ǀûba ti ra mîsa.” Anns ge ra ǂanǃgâ nēsa dīs ge ge supu tama hâ i. Xawes ge ra mî: “Tita ge ra ǁkhore Jehovab ǀûbaǀnamxasiba ta ge ǁgaes nî ti dab tsî ǁîb taras tsîna huisa ī ra Jehovab xa ǂan ǂgao.”

12. Tae-i ǃaroma da Jehovab ai nî ǂgomǃgâ sida tsâsiga ǂgomǃgâs xa? (ǂKhoamîdi 3:​5, 6)

¹² Jehovaba ǂgomǃgâ re sadu tsâsigu ais ose. (Khomai re ǂKhoamîdi 3:​5, 6 sa.) Jehovab ge hoaǁae a ǂan tae-i sida a ǃgâibasa. (Jes. 55:​8, 9) Jehovab ge tātsē tsûtsû da nî xū-e di kai da tide. ǁÎb ga ǂkhâǃnâ da î da ǀûbaxa, o da ge ǂgomǃgâsiba a ūhâ ǁkhā nēsa xu da ǃgâiba nî ǀamasa. (Psa. 40:​4, Jes. 48:​17, 18) Xawe da ga sida tsâsiga ǂgomǃgâ, o da ge nauna ǀûba hō tide. (ǂKhm. 14:​12, Jer. 17:9) Naomi ti ǀon hâ ǃgâsas ǃhoaǃgao da gos ge ra mî: “Tita ge gere ǂgom, ti aoba ta ǀûba hō tide ǃkhaisa, ǁgauoǃnâ ǁgoe-ūgub vidiogu tsî ai-īsigu tsînab gere kō amaga. Tita ge gere ǃao ǁkhapab nî tsûtsûtesa tamas ka iob nî ǀurusa matikō tsûbab ge ǃaromasa. Tsî ta ge Jehovab ti tsâsiga ra ǁnâuǃā ti gere mîbasen. Xawe ta ge ge mûǂan Jehovab ti tsâsiga ra ǁnâuǃās ǂâibasen tamasa ǁîb nēsa ra mā-am ti. ǁÎb ge a ǂan mati ta ra tsâsa tsî i ǁaeba nî ūsa ǁaixa ǀûsa xaweb ge ǁîb tsîna ǂhâba hâ i ta ǀûba.” d

ǃGÂI TSÂSIGA OMKHÂIS

13. Romeǁîn 12:​18-21 ǃoagu da tae-e nî dī?

¹³ Kaise ge tsûtsû da khoe-e da ga ǀûba, o da ge ī ge xū-i xa ǀgui ǃhoa ǂgao tama hâ. Sida ge tsûtsû khoe-i ga sida Xristeǁî ǃgâsa, os ge ǀamǂoasa ǂkhîba kurus ai nî ǃgaoǃgaosa. (Mat. 5:​23, 24) ǁAixa hâse hâs xa da ge a ǁhûi ǁkhā ǀkhomxasib tsî  ǀûbaxasiba ǁgausa. (Khomai re Romeǁîn 12:​18-21 sa, 1Pet. 3:9) Tae-e nî hui da ǁnāsa dīsa?

14. Tae-e dīsa da nî ǁgūtsâ tsî tae-i ǃaroma?

¹⁴ Jehovab ge ra ǁhûi khoen di ǃgâi ǀgauga mûsa. Jehovaba ǁgae tsî da ge ǃgâi ǀgauga tsûtsû da go khoe-i ǃnâ nî ôa. (2Kro. 16:​9, Psa. 130:3) ǃNāsa ǁaeba da ge khoe-i ǃnâ da ra mû ǂgao xū-i ǀgui-e ra mû, nēs ge ǃgâi tamas ka io ǁgai xūna ǃkhōǂgā hâ. ǃGâi ǀgauga da ga nau khoen ǃnâ ôa, o i ge nî supuba da ǁîna ǀûbasa. Aiǁgause Jarod ti ǀon hâ ǃgâsab ge ra mî: “Kaise i ge a supubate ǃgâsa-e ǀûbasa, ǁî-i ūhâ ǃgâi ǀgaugu xa ta ga ǂâiǃgâ o tsîs ge nēsa ra huite i ta tā ǁî-i go tsūdī xū-i xa ǂâi.”

15. Tae-i ǃaroma i a ǃgâi khoe-e mîbasa ǁî-e da go ǀûba ti?

¹⁵ ǀGui ǂhâǂhâsa xū-i hîna da a dī ǁkhā i ge khoe-e mîbasa ǁî-e da go ǀûbasa. Tae-i ǃaroma? ǃGaoǃgâ re Naomis ǀnai da go ǃhoaǃgaos ge tae-e a mîsa: “Ti aob ge ge dîte ‘ǀûbate î du go?’ ‘ǀÛba du ta ge go’ ti ta gere ǃeream ǂgao xawe di ge mîde ge  ǂoaxa ǁoa i. ǁNāpa ta ge ge mûǂan ǁîba ta ge ǂgaoba xu ǀûba tama hâ isa. ǁAeba ǃkharu tsî ta ge ‘ǀûba du ta ge go’ ti ge mî ǁkhā i. ǀÛbabi ta ge ob ge ti aoba gere ā. ǂGom tama ta ge ge hâ i, ǁîb ge nēs xa xū-i go ǁgarade xu a ǁgôa khami gere tsâsa, tita tsîn ge ǃnomsasiba gere hōǃâ. ǁNās khaoǃgâ ta ge ge ǁkhāǁkhāsen mati ta ǁîba nî ǂgomǃgâ tsoatsoa ǀgausa nēsim ge a ǃgâi ǀhōsa.”

16. Tae-e du go ǀûbaxasib xa ǁkhāǁkhāsen?

¹⁶ Jehovab ge ǂhâba hâ î da ǀûbaxa. (Kol. 3:13) Xawes tsîna i ge ǀnî ǁaega a ǃgomba da ǁkhā nauna ǀûbasa. Nēsa da ge a dī hō ǁkhā sida tsâsiga da ga kōǃkharu tama i tsî ǁkhā da ana ga dī o î da tā ǁaixa hâse hâ ǀgara. Nēti dīs ǃnâ-ū da ge ǃgâi ǀgauga ra omkhâi.—Boksisa mû re “ ǀÛbaxasib ǀkha nî hui ǃnona xūn” ti hâsa.

ǀÛBAǀNAMXASIBA XU DA RA ǀAMA ǃGÂIB

17. Mati da ǀûbaǀnamxasiba xu ǃgâiba ra ǀama?

¹⁷ ǂGui ǃaromade da ge ūhâ ǀûbasa. Hā î da ǀnîna ǃgaoǃgâ. ǂGurose da ge sida ǀkhomxaǃnâ ǁGûb, Jehovaba ǁgae tsî nî ǂkhîǂkhî. (Luk. 6:36) ǀGamǁîse, ǃgôaǃgâsiba da ge nî ǁgau Jehovab ge ǀûba da amaga. (Mat. 6:12) Tsî ǃnonaǁîse da ge ǃgâi ǂurusib tsî ǀgaisa ǀhōsagusisa ra ūhâ ǀgara ǂgao.

18-19. Mâ ǃgâiba da ǀûbaǀnamxasiba xu a hō ǁkhā?

¹⁸ Nauna da ga ǀûba, o da ge ǂgom tama da go hâ i ǀkhaega a hō ǁkhā. Aiǁgause, ǃgaoǃgâ re tae-i go Denise aisi da go ǃhoaǃgaos ǀkha a īsa. ǁÎs ge nēsa ǁnā ǁaeb ai ǀū-i xaweb ge nē khoeba ge ǀapeǁgui hâ i, ǁnâuǃgâs khaoǃgâb nî ǃgamsensa. ǁÎb ge Denise ǀûbaǀnamxasib xa kaise ge tsâǀkhāhe tsî Elobmîsa Jehovab ǃoaba-aon ǀkha ge ǁkhāǁkhāsen tsoatsoa.

¹⁹ Khoe-e ǀûbas kaise a ǃgom ti da ge a tsâ ǁkhā. Xawe da ge ǂgui ǃgâi ǀkhaega nēsa xu a ǀama ǁkhā. (Mat. 5:7) ǁNā-amaga da ge ǁkhā da as kōse aiǃgû tsî Jehovab di ǀûbaǀnamxasiba nî ǁgae.