Harvib ge haka ǀgôagu ǃnâ ge ǂguro i. ǁÎb omaris ge Midland Junction ǃās, Australiab westes ǃnâ hâs ǃnâ amaba ge hō 1930ǁî kurib ǃnâ. ǁNā ǁaeb ain ge khoena kaise ge ǀgâsa i. Harvib ge kaise Jehovaba ge ǀnam tsoatsoa tsî 14 kurixab a hîna ge ǁāǁnâhe. Tsîb ge ge ǁkhāǁkhāsen ǁgaumâidi hînab ra māhede hoaǁae ūǃoasa. ǂKhammi a hînab ge ǃKhē xu ǂgō-ommi ǂkhaniba ǀhaohâb ai khomai kaihe o, ob ge ge ǂkhā dīhōb tide ti ǂâi tsî. Harvib ǀkha gere ǃhoa ǃgâsab ge ǁîba ge mîba: “Khoe-i ga Jehovab di organisasis ǃnâ ǂgan tsî o xū-e dīsa, o i ge ǁî-e a ǂan dīhōts nîsa.”—2Kor. 3:5.

Ti mamas tsî ti ausis tsîn ge dī khami ta ge tita tsîna Englandi ǃnâ amaba ge ǁkhāǁkhāsen. Ti dadab ge ǂgurob gere māǃoa xawe ega amaba sī ge ūǃoa. ǂGao tamab ge hâ i, xawe ta ge 9 kurixa ta a hîna ge ǁāǁnâhe. Aimâba-ao tsî sîsabese ta ge gere ǃoaba ǂgao. Xaweb ge ti dadaba ge mā-amte tama hâ-i 21 kurixa ta nîs kōse. Xawe ta ge ǁnātikōse gaxuse ge ǃâu ǂgao tama hâ-i. 16 Kurixa ta ge o, ob ge ge mā-amte i ta ti kai ausis Australiab ǃnâ ra hâsa ǃoa ī. Tsî ta ge 18 kurixa ta ge o, o ge aimâba-ao kai.

 Australiab ǃnâ ta ge Harviba ge ǀhao ū. Sim hoam ge gere sîsabe kai ǂgao. 1951ǁÎ kurib ǃnâm ge ge ǃgamme. ǀGam kurigam aimâba-aose sîsen hâs khaoǃgâm ge ǃnarimâra sîsen-e dīsa ge ǂgan-e. Nē ǃnarimâ sîsen-i ge kai ǃâb Australiab westesa ge ǃkhōǂgā hâ-i.

1954ǁÎ kurib ǃnâm ge Gilead skoli 25ǁî klasa ǃoa ge ǁkhauhe. Sim ǁkhapos sîsabe kais dis ge gere ama kai. ǂGaus ǀkham ge New Yorki ǃnâ ge sī tsîm ge ǃgamse Elobmîsa gere ǁkhāǁkhāsen. Gilead skoli tawa i ge Spanish gowab tsîna gere ǁkhāǁkhā-e. Tsî i ge Harviba ge ǃgomba i r-xoamûs ǀkha ra xoahe mîde ǂgaiǂuisa.

Skoli ǃnâb ge ǁgauǃnâ-aoba ge mî ǁnān Japana ǃoa ra ī ǂgaon Japanes gowab kladi ǃgao a xoamâisen ǁkhā ǃkhaisa. Xūm ge ge is Jehovab di ǀapeǂhumisa sim ǁgaumâide ǁhûiba mi. ǃNubu ǁaeb khaoǃgâb ge ǁgauǃnâ-aob Albert Schroedera ge ǂanǂgui sim ǀondem xoamâi tama ǃkhaisa. ǁÎb ge ge mîba mi: “ǂÂiǃgâ ro re.” Sim di ǀondem ge noxoba xoa tama io ob ge ǃgâsab Schroedera ge mî: “Nau haka ǁgauǃnâ-aogu tsî tita tsîn ge saro go xoaǂgā. Japanes gowaba ro ǁkhāǁkhāsen tsâ re.” Harviba i ge ge supuba i Japanes gowab di mîde ǂgaiǂuisa.

1955ǁÎ kurib ǃnâm ge Japani ǃnâ ge sī, tsî i ge 500 ǃoaba-aon ǀguina hoa ǃhūb ǃnâ ge hâ-i. Harvib ge ge 26 kurixa i tsî tita 24. Sim ge Kobe ti ǀon hâ ǃāsa ǃoa ge sî-e. Tsîm ge haka kuriga ǁnapa gere ǃoaba. Kaisem ge ge ǂkhî i ǃnarimâra sîsen-i ǃnâm ge ǁkhawa a ǁkhauhe o. Tsîm ge Nagoya ti ǀon hâ ǃās ǀgūse gere hâ. Sim di ǁgaumâisam ge kaise ge ǀnam-i. ǃGâsan, ǂûn tsî hâm gere ǃkhaib ge sim ǁgaumâisa gere ǁkhoaxa kai. Gaxu ǁaeb tsîn ǃkharu tama hînam ge ǀnîhâ ǃēsa ge hō im Jehovaba ǃoaba.

ǃNona kurigam ǃnarimâra sîsen-i ǃnâ hâ hînas ge Japani di ǁnâub berosa ge ǂgan mi, im Taiwani ǃnâ Amis ǃhaos ǀkha sī sîsen. ǂGui ǃgâsan ge amaba xū ge ǁnāǁgôa hâ-i tsî i ge Taiwani ǃnâ ǃgâsab hîna Japanes  gowaba ǃgâise ra ǃhoaba ge ǂhâsa i, ib nē ǃgomsina kōǃgâ. * Japani ǃnâm ge ūhâ i ǁgaumâisam ge ge ǀnam i ǁnā-amaga i ge nē mîǁguiba ge ǃgom i. Xaweb ge Harviba ge ǁkhāǁkhāsen ib tā ǁgaumâide ǂkhā ǁnā-amagam ge ge ī.

Novemberi 1962ǁî kurib ǃnâm ge ge sī. Taiwani ǃnâ i ge 2 271 ǃoaba-aona ge hâ i tsî ǃnāsan ge ge Amis ǃhao i. Xawem ge aibe Chines gowaba ge ǁkhāǁkhāsen. ǀGui ǂkhanis tsî Engelsa ǃhoa tama ǁkhāǁkhā-ao-i tsînam ge ge ūhâ i, xawem ge ge ǁkhāǁkhāsen.

Taiwani ǃnâm ge sī toas khaoǃgâb ge Harviba ǁnā ǃhūb ǃnâb nî sîsen-e mûǂgamga ge ǁgaumâihe. ǁNâub beros ge ge ǂkhariro i. ǁNā-amagab ge Harviba ǁîb beros di ǁgaumâide sîsen. Tsî Amis gowaba ra ǃhoa ǃgâsagu ǀkha ǃnona wekhega ǁkhâb ǃnâ ge sîsen ǁkhā i. ǁÎb tsîn ge ǃnarimâra mûǂam-aob ase gere sîsen tsî kai ǀhaodi tawa ǃhoadi tsîna gere mâ. Harvib ga nē ǃhoade Japanes gowab ǃnâ mâ hâ o, on ge Amis ǃgâsana ga ǁnâuǃā hâ. Xaweb ge ǂhanuba gere ǂhâba în Chines gowab ǃnâ ǀgui ǃoabade dīhe. Harvib ge ǁnā gowaba ǃgâise ǂan tama hâ i xaweb ge ǁnā ǃhoade Chines gowab ǃnâ gere mā. Tsî i ge ǃgâsaba Amis gowab ǃnâ gere tolkhoe.

ǁNā ǁaeb ai da ge ǂhanub ai gere ǂganamsen kai ǀhaode dīsa. Xawe i ge ǀnî ǁaegu ai ge ǃgom-i ǂganamsensa mā-amhesa. Tsî i ge gaxuses tsîna gere ū. ǀAwaǃnamgu ga nē ǂganamsensa kai ǀhaos di wekheb ai mā-am tama ga ra io, ob ge Harviba ǁnapa gere ǂnûǃâu dīgu nîs kōse.

ǃGâsan ǀkha da gere hâ ǁaeb ai da ge iri xa ǃnāsase gere ǀnoba, ǃhomga ǂoa tsî ǃāga gere ǃgâu. ǂGuro ǃnās ǃhomga ta ge ǂoasa ta ge ra ǂâihō. ǃHaese da ge ǁgoaga ǂû toas khaoǃgâ da ge 5:30 bēb ai ǂoa tsî ǃnūse ǂnôa ǃgaroǃāsa ǃoa ge ǃnari. ǁNapaxu da ge kai ǃāba ǃâu tsî ǃhommi ai ge ǂoa tsoatsoa. ǃHommi ge kaise ge ǀgapi i tsîts ge sa ais ai gere kō o, ots ge khoe-i di ǂaide gere mû.

ǁNā ǁgoas aib ge Harviba ǃās di ǃgâsagu ǀkha gere aoǁnâ tsî ta ge tita ǀguri, ǂkhari ǃāros Japanes gowab ra ǃhoaheba gere aoǁnâ. ǀGui ir hân ǃnâ da ge ǂkhabusase gere tsâ gaxuse ta ge ǂû tama hâ-i amaga. Tita ge Harvib ǀkha a ǀhao o, o i ge ǀnîhâ ǃgâsa-e ge ǀkhai-i. Harvib ge ǂkhaniga mā tsî ǃnona ǃupude ge māhe. ǁÎb ge ge ǁgaute ǀgapiga asa ǃnām tsî ǃnāga asa ǃnām tsî ǀgomǂuisa. ǁKhoaxase i ge mûsen tama hâ-i xawe ta ge ǀguisa ge dītsâ. Xawe ham-e ǃnonaǁî ǃupusa nî ū? Tita ge ge ū. Harvib ge ǃâs xa ta ga flau o ob nî tanide khami tsâ tama hâ-i amaga.

ǀGui kai ǀhaos ais ai ta ge ǃâubasen tama ta hâ xū-e ge hōǃgâ. ǀGui ǃgâsab ǀhû-ommi  xōǀkhā ra hâb oms aim ge gere hâ. Amis khoen ǁāsensa kaise ǃgôa hâ amagas ge ǃnarimâra mûǂam-aob di kaikhoesa xūna ge aiǂhomi hâ i, im Harvi hama ǁāsen. Harvib ge ǁaxa i amagab ge ge mîba te i ta ǂgurose ǁāsen. ǃNona xapadi ge ge hâ-i, ǃgai ǁgammi dis, ǀgamsa ǁgammi dis tsî ǀkhaiǃgâs tsîna. ǃÂubasen tama ta hâses ge ǃnarimâra mûǂam-aob di kaikhoesa nē xapade oms ǃauga ge mâi. Tsîgu ge ǃgâsagu hîna ge ǀhû-ommi tawa ge kai ǀhaosa gere aiǂhomiga ge mû ǁkhā i. ǂGanam-ū ta nî xū-e ta ge ge ǂgan. Os ge ǁîsa plastiki hîna ra mûǃkharusena ge ǀkhī ūba te. Oms ǃgâba ǃoa ta ge gere naba ǂgao, xawe ta ge ǂnaradi ǁnapa hâde gere ǃao. ‘ǃGâsagu ge kaise a ǀhabe tsî mû tide ǁāsen ta rasa. Tsî ta ga ǁāsen tama ka ra io, on ge tsūse nî tsâ. Dīs ǀguisa ta nî hî,’ ti mîbasen tsî ta ge ge ǁāsen.

Harvib ge ge mû Amis ǃgâsan gagasise kai tama hâsa khomai ǁoa tsîn ǁîn di gowab ǃnâ ǂkhanina ūhâ tama hâ amaga. Amis gowab ge Romeǁî xoamûdi ǀkha gere xoa tsoatsoa-e amaga i ge ge ǃgâi-i ǃgâsana ǁîn di gowaba ǁkhāǁkhāsa. Nēs ge kai sîsen-e ge ǃkhōǂga hâ-i, xawen ge ǃgâsana ǁîn di gowab ǃnâ Jehovab xa ge ǁkhāǁkhāsen ǁkhā i. Amis gowab ǃnâ hâ ǂkhanin ge 1960ǁî kurib ǃnâ ge mâǂui tsoatsoa-e tsî 1968ǁî kuri i ge The Watchtower ǂkhaniba Amis gowab ǃnâ ge mâǂui tsoatsoa-e.

ǂHanub ge Chines gowab ǃnâ hâ tama ǂkhaniga da nî mâǂuisa ge ǂgao tama hâ-i. ǁNā-amaga da ge Amis Watchtower ǂkhaniba ǃkharagaǃnâgu ǀgaugu ǃnâ gere mâǂui. Aiǁgause, ǁaerob ǀgaiba da ge Chines tsî Amis gowab ǃnâ hâ The Watchtower ǂkhaniba gere mâǂui. Khoe-i ga dîde ga ra ūhâ o, o i ge khoena da Chines gowaba ra ǁkhāǁkhā khami gere mûsen. ǁNā ǁaeba xūs ge Jehovab di organisasisa Amis gowab ǃnâ hâ ǂkhanina ra mâǂui. În ǁnā khoena Elobmîs amaba ǁkhāǁkhāsen.—ǃNǃkh. 10:34, 35.

1960ǁÎ tsî 1970ǁî kurigu ǃnân ge ǃnāsa Amis ǃgâsana Jehovab di ǀgaub ai ge ûi tama hâ-i. ǂGuin ge Elobmîs tsoatsoade ǁnâuǃā tama hâ i amagan ge ǀai, āǃgâu tsî tabaka-e gere sîsenū. Harvib ge ǂgui ǀhaohâga sari tsî gere hui in Jehovab ra nē xūna mû ǀgauba sao. ǁNāti-i ǃnās ai i ge tsoatsoas ai ta goro ǁgam xū-e ge ī.

ǃGamǃgamsenxa ǃgâsan ge ǀkharaǀkharana ge dī xawe ǀnîn ge dī tama ge hâ-i. Tsî i ge Taiwani ǃnâ ge hâ-i ǃgâsan di ǃgôaba 2 450 sa xu 900 sa ǃoa ge ǁgôa, 20 kurin ǃnâ. Nēs ge kaise gere ǂkhabuǂâi kai da. Xawe da ge ge ǂan i Jehovab ǀurixa ǀapeǂhumisa ǀkhae tidesa. (2Kor. 7:1) ǁAe i khaoǃgân ge Jehovaba ǃanu ǀgaub ǃnâ ge ǃoaba tsoatsoa. Nētsēn ge Taiwani ǃnâ 11 000 xa ǃnāsa ǃgâsana hâ.

1980ǁÎ kuriba xu da ge ge mû gagasi mâsib ge Amis ǀhaohâgu ǃnâ a ǀgaisa. Tsîb ge Harviba ǃnāsa ǁaeba Chinesan ǀkha gere hâ. Kaiseb ge gere ǂkhî ǃnāsa ǃgâsadi aogab ge huisa î gu Jehovaba ǃoaba. ǂÂihō ta ge ra mîbateb ge o, ǁnā khoegu hînab ge huigu ge ǂguro ǃnāsa Jehovaba ǃoa a ǀgore o. Tita tsîn ge ra ǃgâiaǂgao ǂguin hîna ǂhauǃnâ ǂgaoga ūhâna ta ge huisa în Jehovab ǀgūse hâ. Tita tsîn ge aiǂhanuba ge ūhâ i Taiwan ǁnâub beros tawa Elobmîsa ta gere ǁkhāǁkhā khoe-i ǀgôa-i ǀkha ǀguiba ǃoabasa.

Nēsi ta ge ti kaikhoeb ǀkha hâ tama. 59 Kurigam ge ǃgamme hâ-i hînab ge Harviba 1 Januarib, 2010ǁî kuri ge ǁō. Kankers xa ǃaromahe hâse. ǁÎb ge 60 sa ǃoa garu kurina Jehovaba ǀoasase gere ǃoaba. Nēsis kōse ta ge kaise ra ǁkhore bi. Xawe ta ge ǁnātikōse ra ǂkhî ǁîba ta ge ǂkhâǃnâsa kaise ǂoaǂamsa ǃhūgu ǃnâ. Asiab di ǀgam ǃgom gowakha ǃhoasam ge ge ǁkhāǁkhāsen tsî Harvib ge xoas tsîna gere hî.

Haka kuriga ǃkharu tsîs ge ǂgaeǂguira sorosa ge mîǁgui i ta Australiaba ǃoa oa. Kaira tsî ta ǀgaisa huiba ǂhâ hâ amaga. Ti ǂguro ǂâis ge ‘tita ge Taiwana xu ī ǂgao tama hâ’ ti ge hâ i. Xawe Harvib ge ge ǁkhāǁkhāte i ta tā Jehovab di organisasis ta mā ǁgaumâide ǂkhā. Tsî ta ge ǁnās ǀkha ge ī. Ega ta ge ge mû tae-i ǃaromab ge ǁnā mîǁguiba ǂhâǂhâsa i ǃkhaisa.

Nētsē ta ge Australasiab ǁnâub beros tawa wekheb ǃnâ ra sîsen tsî ǁnapaxu naweekdi ǃnâ ǀhaohâb ǀkha ra sîsen. Betels ai ra sari khoena ta ga ǁgaumâ o, o ta ge Japanes gowab ǃnâ ra ǃhoa. Mûǂui ta ge ra Jehovab mîmâi hâ khâisa ǃoa. Tsî ta ge a ǂan ǁîb Harviba nî ǂâihō ǃkhaisa.—Jhn. 5:28, 29.