ǃGāsa i ge a Jesub ge 29ǁî kurib ǃnâ ǁāǁnâhe-o, ob ge ǀgapiprister kai ǃkhaisa. Nēsa da mati a ǂan? ǁÎb di ǁāǁnâs aib ge Jesuba ge ǁgau ǁîb ûibab mâǁnā tsî Elob ‘ǂâis’ di altars ai ǁguibas ase ra mā ǂgao ǃkhaisa. (Gal. 1:4; Heb. 10:5-10) Altars a tempeli di ǂhâǂhâsa ǃâ amagab ge nē gagasi tempela Jesub ge ǁāǁnâ-e sa xu hâ. Jehovab kai gagasi tempeli ge ama ǃoabasa ra ǂnûǁkhaeba, Jesub xoremarib ǁguibas ai a ǃgaoǃgaosase.—Mat. 3:16, 17; Heb. 5:4-6.

Nē kai gagasi tempeli ge ǀgapiprister-e ge ǂhâ hâ i. ǁNā-amagab ge Jesuba Jehovab xa “ǃanu gagab tsî ǀgāib ǀkha” ge ǂkhauhe. (ǃNǃkh. 10:37, 38; Mrk. 1:9-11) Xawe mati da a ǂan Jesub ge ǁîb ǁōb tsî khâis aiǃâ ǀgapipristeri ase ǁgaumâihe ǃkhaisa? Aronni tsî ǁîba xu ge hâ-i ǀgapipristergu di aiǁgaus ge nē dîsa nî ǃereamba da.

Jehovab ge Moseba a mā ǂhanub ǃoagub ge ǀgapipristeri ǀguiba tabernakeli tsî tempeli di ǃanun di ǃanub ǃnâ ǂgâsa ge mā-amhe hâ i. ǃAnun di ǃanub tsî ǃanub ge ǂgāmâisab tamas ka i o xordyni ǀkha ge ǀgorasa i. ǂKhîbagus di tsēs ai ǀguigu ge ǀgapipristerga ǃanun di ǃanub ǃnâ gere ǂgâ. (Heb. 9:1-3, 6, 7) Aronni tsî ǁîba xu ge sao ǀgapipristergu ge ǃanun di ǃanub ǃnâ gu nî ǂgâs aiǃâ ge ǂkhauhe. ǁNā-amaga da ge a mî ǁkhā Jesub Xristub ge ǁōb nîs aiǃâ ǀgapipristeri ase a ǂkhauhesa tsî ǀhommi ǃnâb ge ǂgâ-o ob ge “ǂgamâisas, ǁnās ge ǁîb di ǁgansa” ge xu. (Heb. 10:20) ǁNā-amagab ge Apostel Pauluba ge mî, Jesub ge “ǀgapipristerse ge hā” tsî “naub ǃgâ-ai kai tsî dītoahesa tabernakeli, ǃomgu ǀkha dīhe tamab,” ǀhommi ǂûb ǃnâ ge ǂgâ.—Heb. 9:11, 24.

ǀAsa ǃgaeǀhaos ge ǀgaiǀgaihe ǁaeb tsî ǂnûiǂgāhes ge ǁaeb ǁaegu i ge ǃkharagagusi-e a ǀkhai. Tae-i ǃaroma? Jesub Xristub ge ǀhomǃapa tsî ǁîb ǀoasa ûiba sida ǃaroma a mā ǁaeb aib ge ǀasa ǃgaeǀhaosa ge ǀgaiǀgai tsoatsoa. ǁNās ǀkhas tsînab ge nē ǃgaeǀhaosa ge ǂnûiǂgā. Nēb ge dī xū-e tae ge ǃkhōǂgâ hâ i?

ǂGuroseb ge Jesuba Jehovab aisi ge sī, tsî ǁîb uîb ǁguibasa Jehovaba ge mā tsîb ge Jehovaba ǁîb di ǀaobǁguibasa ge ū-ǃoa. Nē ǃnona xūn nî dīhes aiǃâs ge ǀasa ǃgaeǀhaosa sîsenǂui-e ge ūhâ tama hâ i.

Elobmîs ge mî tama hâ Jehovab ge mâǁae Jesub ǁguibasa a ūǃoasa. ǁNā-amaga da ge a mî ǁoa nē ǀasa ǃgaeǀhaos ge mâǁae a ǂnûiǂgāhe tsî a ǀgaiǀgaihe ǃkhaisa. Xawe da ge a ǂan Jesub ge disi tsēde pinkstertsēs aisi ge ǀhomǃapa. (ǃNǃkh. 1:3) ǁNā ǃnubu ǁaerob ǃnâb ge Jesuba Jehovaba ǁîb ǁguibasa ge mā tsîb ge Jehovaba nē ǁguibasa ge ūǃoa. (Heb. 9:12) 33ǁÎ kurib ai ge tsoatsoa xū-i ge nē-e ra ǃgāsa kai. (ǃNǃkh. 2:1-4, 32, 33) ǃGāsa-i ge a ǀasa ǃgaeǀhaos ge ǁnā ǁaeb ai sîsenǂuiba ūhâ-isa.

ǃKhōǀhaos ase, nē ǀasa ǃgaeǀhaos ge ǀgaiǀgaihe tsî ge ǂnûiǂgāhe Jehovab ge Jesub di ǁguibasa a ūǃoa-o. Tsî ǂkhauhesana ǃgaeǀhaos ǃnâ ge ǂgā. Nē ǃgaeǀhaos ge nēsisa ra sîsen Jesuba ǀgapiprister tsî mâba-aose ūhâse.—Heb. 7:25; 8:1-3, 6; 9:13-15.