1. “Amab” ti da ga mî o, o da tae-e ra ǂâibasen?

“MATI du ge amaba hō?” “Amab ǃnâ du ge kai?” “Matikō ǁaeba du amab ǃnâ hâ?” Nē dîna du ge ǀnîsi khoe-e ge dî hâ ī tamas ka io, du ge khoe-i xa ge dîhe hâ ī. “Amaba” tae-e ra ǂâibasen? Amab ti da ga mî o, da ge mati da ra ǂgoms, mati da Eloba ra ǃoabas tsî sida ra uî ǀgaub xas tsîna ra ǃhoa. “Amab ǃnâ” hâ khoen ge Elobmîsa a ǂan tsî Elobmîs tsoatsoadi ǃoa ai ra ûi. ǁNā-amagan ge ǂhumi ǁkhāǁkhāde ǂgom tama hâ tsîn ge Satanni di ǃhūbaib ǃnân ûi hâ xawe ǂkhî ûiba ūhâ.—Jhn. 8:32.

2. Johaneb 13:34, 35 ǃoagu, tae-e ǂgurose khoe-e amaba ǃoa ra ǂgae ǀkhī-ū?

² Tae-e amab tawa ge ǂgae ǀkhī-ū du? ǀNîsi du ge Jehovab di khoen ǃgâi ǂūb xa ge ǂgae-e tamas ka io, ǀnammi hînan gere ǁgaugub xa. (1Pet. 2:12) ǂGui khoen hîna ǀhaodi tawa ge sīn ge, nē ǀnamma ge hōǃâ tsî ǁkhāǁkhāhen ge xūnan ge ǀuru xawen ge nē ǀnamma ǀuru tama hâ. ǀNammi hîna da Elob khoen ǁaegu ra mûb ge nî hui da i da Jehovab khoena mûǃā. (Khomai re Johaneb 13:34, 35.) Xawe ǀgaisa ǂgomsa da ga ǂhâba o, o da ge ǀnî xūna noxoba nî dī.

3. Tae-e nî hā sida ǃgâsan ra ǁgau ǀnammi ǃaroma ǀgui da ga Elob ǃnâ ǂgom o?

³ Sida ǂgoms ge Elob khoen ǁîn ǁaegu ūhâ ǀnammi ai ǀgui tā nî ǃgaoǃgaosa. Tae-i ǃaroma? Sida ǂgoms ga nē  ǀnammi ai ǀgui ǃgaoǃgaosa o, o da ge supuse nē ǂgomsa a ǂoaǃnâ ǁkhā. Aiǁgause, ǀhaohâb ǃûi-aob tamas ka io, aimâba-ao i ga tsū ǁore-e dī o, o da ge Jehovaba a ǃoaba ǀû ǁkhā tsî ǃgâsa i ga ǁaiǁai da, tamas ka io amaba mâǃoa tsî sida ra ǂgom xūn ama tama ti a mî ǁaeb ais tsîna da ge Jehovaba a ǃoaba ǀû ǁkhā. ǁNā-amagas ge sida ǀgaisa ǂgomsa Jehovab ǀkha da ūhâ ǀhōsagus ai nî ǃgaoǃgaosa ī. Nau khoen ra dī xūn ǃgao du ga Jehovaba ǃoaba tsî ǁîb ǀkha du ūhâ ǀhōsagus ǃgao ǃoaba tama io os ge sadu ǂgomsa mâǁapo tide. Jehovab tsî ǁîb khoen xa du ra tsâ ǀgaub ge ǂgomsa omkhâis ǀkha nî hui du. Kaise i ge a ǂhâǂhâsa i da Elobmîsa ǁnâuǃā tsî ǁkhāǁkhāsen tsî ôaǃnâ, i da ǀgaisa ǂgomsa ūhâ nē da ra ǁkhāǁkhāsen amaba Jehovab xa.—Rom. 12:2.

4. Mateub 13:3-6, 20-21, ǃoagun ǀnî khoena tae-e ra dī, ǁîn di ǂgoms ga ǃâitsâhe o?

⁴ Jesub ge ge mî ǀnîn ge amaba nî ūǃoa “ǃgâiaǂgaob ǀkha” xawe ǁîn di ǂgoms ge nî ǂkhabu ǃgomsinan ga ūhâ o. (Khomai re Mateub 13:3-6, 20, 21.) Tsî ǁîn ge ge ǂâi tama hâ i Jesuba saos ge ǃgomsiba nî hau ti. (Mat. 16:24) Tsî ǁîn ge ge ǂâi hâ i Xristeǁîn ge ǀkhaeb ǀguiba ūhâ tsî ǃgomsi-e ūhâ tama. Xawe nē tsēs di ǃhūbaib ǃnân ge ǃgomsina nî hâ. ǀNî xūn ge sida ûib ǃnâ nî dawa tsî da ge ǂkhîba hoaǁae ūhâ tide.—Psa. 6:6; Aoǁn. 9:11.

5. Matin sida ǃgâsana ra ǁgau amaban ūhâsa?

⁵ Sida ǃgâsan ge ra ǁgau amaban ūhâsa. Mati? ǁÎn ǂgoms ge ǂkhabu tama, ǃgâsan xan ga ra tsûtsûhe xawe tsî nau khoen ga Jehovaba ǃgâ ǂgao tama io. (Psa. 119:165) ǃGomsinan ūhâ ǁaeb hoab ai i ge ǁîn di ǂgomsa ra ǀgai tsî ǂkhabu tama. (Jak. 1:2-4) Mati du ǁnāti i ǀgaisa ǂgomsa nî hō?

6. ǂGuro Xristeǁîna tae-i ai ǁîn di ǂgomsa ge om hâ i?

⁶ ǂGurokham ǁaeb ǁkhāǁkhāsabegu ge ǁîgu di ǂgomsa Elobmîs tsî Jesub Xristub gere ǁkhāǁkhā xūn ai ge om hâ i, nēs ge ‘ǃgâiǂhôas di amaba.’ (Gal. 2:5) Nē amab ge Xristeǁîn ǁkhāǁkhās tsî Jesub di xoremaris tsî khâis tsîna ra ǃkhōǀhao. Apostel Paulub ge ge ǂgom hâ i nēb ge amaba. Tae-i ǃaroma? ǁÎb ge xoade xu “ge mâi-aiǃâ, Xristub nî tsâ tsî ǁō hâna xu khâi ǃkhaisa.” (ǃNǃkh. 17:2, 3) ǂGurokham ǁkhāǁkhāsebegu ge, nē ǁkhāǁkhāsa ge ūǃoa tsî ǃanu gagab xa gere hui-e Elobmîsa ǁnâuǃāsa. ǁÎgu ge gere ôaǃnâ îgu kō nē ǁkhāǁkhādi xoasa xu hâsa. (ǃNǃkh. 17:11, 12; Heb. 5:14) ǁÎn ge ǁîn di ǂgomsa tsâsigu ai ǀgui ge om tama hâ i tsî ǁîn ge Jehovab khoen ǀkhan ra hâ o, on ǃgâise ra tsâ amaga ǀgui Jehovaba ǃoaba tama. Xawe ǁîn di ǂgoms ge “Elob di ǂans” ai a ǃgaoǃgaosa.—Kol. 1:9, 10.

7. Elobmîs ǃnâ da ūhâ ǂgomsa mati nî hui da?

⁷ Elobmîs ǃnâ hâ amab ge dawa tama. (Psa. 119:160) Aiǁgause, khoen ga tsûtsû da tsî ǁgai xūna dī xaweb ge nē amaba dawa tide. ǃGomsina da ga ūhâ xawes tsîna i ge dawa tide. Mîsa da ge nî ǂan tsî da ge nî ǂgom. Mîs ǃnâ hâ xūn ge amaba. Elobmîs ǃnâ da ga ǀgaisa ǂgomsa ūhâ o, o da ge ǃgom tsēdi ǃnâs tsîna ǂgomǂgomsase nî hâ. Matits sa ǂgomsa nî ǀgaiǀgai amabats ūhâsa?

8. 2 Timoteub 3:14, 15 ǃoagub ge Timoteuba mati ǂan ī nēb a ama ǃkhaisa?

⁸ Timoteub ge ge ǂgom hâ i amabab ūhâsa. Matib ge ǂan i? (Khomai re 2Timoteub 3:14, 15.) ǁÎb mas tsî oumas tsîn ge ǁîba “ǃanu xoade” ge ǁkhāǁkhā. Xaweb ge ǁîb tsîna ǁaeba ǁamaǂui tsî xoade gere ôaǃnâ. Amagab ge ǁîba ge “ǀgaiǀgaihe.” Timoteub di mas tsî ouma hāra ge Xristeǁîn xa ge ǁkhāǁkhāsen. Timoteub ge nē gere ǁgauhe ǀnammi Jesuba gere sao khoen dib xa ǂkhâǃnâ-e hâse, ǁaeba ǁamaǂui tsî ǁîb di ǃgâsana ǀhaohâb ǃnâ gere hui. (Fil. 2:19, 20) Xaweb ge ǁîba ǁîb di ǂgomsa khoen ai ge om tama hâ i. ǁÎb ge mîs ǃnâ hâ xūnab gere ǁkhāǁkhāsen o, o ge a mû nēn a amasa tsî gere Jehovab di ǀhōsa kai ǂgao. Sadu tsîn ge Elobmîsa ôaǃnâ tsî aitsama nî mû tae-ets Jehovab xa ra ǁkhāǁkhāsensa.

9. Mâ ǃnona ǁkhāǁkhāde du nî ǂgom?

⁹ Tsoatsoas ǃnâ du ge aibe ǃnona ǁkhāǁkhāde nî ǂgom. ǂGuro du ge nî ǂgom Jehovab ge hoa xūna a kuru ǃkhaisa. (Eks. 3:14, 15; Heb. 3:4; J.ǂHa. 4:11) ǀGamǁîse du ge nî ǂan Elobmîs a haisi-amsa khoen ǃoa. (2Tim. 3:16, 17) Tsî ǃnonaǁîse du ge nî ǂgom Jehovab di ǀHûǀguitimî-aon Xristub daoǁgaus ǃnāga Eloba ra ǃoaba ǃkhaisa. (Jes. 43:10-12; Jhn. 14:6; ǃNǃkh. 15:14) Nē amaba du ra ôa amaga du Elobmîs hoasa danasa xu nî ǂan di i ge ǂâibasen tama hâ. Sadu ge ‘gā-aisib’ tamas ka io sadu ǁnâuǃāba nî sîsen-ū, i du nē amaba ǂgom.—Rom. 12:1.

10. Amaba da ga ǂan xawe da tae-e nî dī?

¹⁰ Elob, Elobmîs tsî Elob khoen xa hâ amaba du ga ǂgom o, o du ge Elobmîsa xu nau khoen tsîna amaba nî ǁguiǃāba  ǁkhā. Tae-i ǃaroma? Sida Xristeǁî da ge ǃereamsa ūhâ i da khoen hîna sida ra ǃgâna amaba mîba. * (1Tim. 4:16) ǀNî hâ khoena da ga Elobmîs ǃnâ hâ xūna mîba o, os ge sida ǂgomsa ra ǀgai.

11. Apostel Pauluba khoenab gere ǁkhāǁkhā o mâ aiǁgausa ge mā da tsî mati da ǁîba a ǁgae ǁkhā?

¹¹ Apostel Paulub ge khoena gere ǁkhāǁkhā o, ob ge ‘ǁîna Jesub xa gere mîdanba, Moseb tsî kēbo-aogu tsîga xu’. (ǃNǃkh. 28:23) Mati da Pauluba nî ǁgae, nau khoena amaba ǁkhāǁkhās ǃnâ? Elobmîs ǃnâ hâ xūn ǀguina da ge tā khoena nî mîba. Sida ǀkha ra ǁkhāǁkhāsen khoena da ge nî hui în Elobmîsa oâǃnâ tsî ǁkhāǁkhāsen an ra xūna ǂâiǃgâ. Sida ge ra ǂhâba în amaba ūǃoa, sida xan ǃgâibahe ǃkhais ǃaromas ǀguis ōse, xawe sida di ǀnamxaǃnâ Elob xan gere ǁkhāǁkhāsen xūn ǃaroma.

12-13. ǁGûna mati ǁîn di ǀgôana nî hui in amab ǃnâ hâ?

¹² ǁGûn ge ra ǂhâba in ǁîn di ôana amab ǃnâ hâ. ǃGâi ǀhōsanan ga ǀhaohâb ǃnâ ūhâ o, on amab ǃnâ ǀgaisase nî hâ ti du ge ǀnîsi ra ǂâi. Xawe ǂhâba du ga ra o sadu ôana amab ǃnâ ǂgomsa, on ge ǃgâi ǀhōsan ǀguina ǂhâ tama. ǁÎn ge Elob ǀkha aitsama ǀhōsagusa nî ūhâ tsîn ge aitsamaba xu Elobmîs amaba ra ǁkhāǁkhāsa nî ǂgom.

¹³ ǁGûn ga ǀgôana Elobmîsa xu amaba ǁkhāǁkhā ǂgao o, on ge ǁîn ǂûna Elobmîsa ǃgâise nî ôaǃnâ. ǁKhāǁkhāsen an ra xūn xan ge nî ǂâiǃgâ. On ge ǁîn tsîna ǁîn ǀgôana ǁkhā xū-e a ǁkhāǁkhā ǁkhā. ǁÎn ge ǁîn di ôana nî ǁkhāǁkhā în Elobmîs ra ôaǃnâ ūhe xūna sîsen-ū nau khoenan ra ǁkhāǁkhā khami. Nētin ga dī o, on ge ǁîn di ǀgôana nî hui în Jehovaba ǀnam tsîn ge ǁnā ǀgôana nî ǂgom Jehovab ǂgomǂgomsa tsî gā-ai ǃgāba ra sîsen-ūse ra hui dasa i da mîsa ǁnâuǃā. (Mat. 24:45-47) ǁGûdo tā du supu xūn ǀguina ǀgôana mîs amab disa xu ǁkhāǁkhā re. Xawe hui nî re în ǀgaisa ǂgomsa omkhâi “Elob di ǃgamsib” di xūna ǁkhāǁkhā nîs ǃnâ-ū, ǁîn kurin ra mā-am khami.—1Kor. 2:10.

14. Tae-i ǃaroma da Elobmîs di kēbode nî ǁkhāǁkhāsenba? (“ Nē kēbode ǁguiǃā ǁkhā i du a?” di hâ boksisa mû re.)

¹⁴ Elobmîs di kēbodi ge kaise a ǂhâǂhâsa tsî ra hui da i da ǀgaisa ǂgomsa  omkhâi Jehovab ǃnâ. Mâ kēbode sadu ǂgomsa ge ǀgaiǀgai? “ǀUni tsēdi” xa hâ kēbode di du ge ǀnîsi nî ǃeream. (2Tim. 3:1-5; Mat. 24:3, 7) Xawe mâ dīǀoaǀoasa kēbode sadu ǂgomsa a ǀgai kai ǁkhā? Aiǁgause, Danieli 2ǁî danaǃâs tamas ka io Danieli di 11ǁî danaǃâs ǃnâ hâ kēbodi hîna dīǀoaǀoahe hâ tsî noxoba nî dīǀoaǀoahede ǁguiǃā ǁkhā i du a? * Sadu ǂgoms ga Elobmîs ai hâ o, o i ge ǃhaese khôa tide. Germanib ǃgâsan hîna ge ǀgamǁî ǃhūbaib torob ǃnâ ǁgaise gere hâ ūhen di aiǁgausa kō re. Elobmîs ǃnâ hâ kēbodi hîna ǀuni tsēdi xā hâden ge ǃgâise ǁnâuǃā tama hâ i xawen ge Elobmîs ǃnâ ǀgaisa ǂgomsa ge ūhâ i.

15-17. Sida ǃgâsan hîna Nazin xa ǁgaise gere hâ-ūhena Elobmîsa ôaǃnâs xa mati ge ǀgaiǀgaihe?

¹⁵ Nazi ǂhanub ge Germaniba ǂgaeǂgui o, on ge ǀoadisi ǃgâsana ǃkhōsis ǃnâ ge ǂgāhe. Hitleri tsî SS di danab Hendrik Himmleri ge ǀHûǀguitimî-aona ge ǃhui hâ i. Himmleri ge sida ǃgâsadi hîna ǃkhōsis ǃnâ ge hâ i de ge mîba: “Sadu Jehovab ge ǀhommi ǃnâ ra ǂgaeǂgui, xawe nepa ǃhūbaib ai da ge sida ra ǂgaeǂgui. Sida ge nî ǁgau du ham-i gaxuse nî mâǀgaisa, sida of sadu?” Tae-e Jehovab di khoena ge hui în ǀgaisase hâ?

¹⁶ Elobmîsa gere ǁkhāǁkhāsen khoen ge Elob Gaosib ge 1914ǁî kuri a ǂgaeǂgui tsoatsoasa ge ǂan i. ǁÎn ge ge ǃhuri tama hâ i ǁgaisen gere hâ ūhe o. Xawe Jehovab khoen ge ge ǂan i khoen ǂhanub Eloba ǁkhae tidesa îb ǁîb di ǂaîsa dī. Hitleri ge ama ǃoabasa ge ūbe hō tama hâ i. ǁÎb ge Elob Gaosib xa a ǀgaisa ǂhanuba ga dīhō tama hâ. Sida ǃgâsan ge ge ǂgom hâ i, Hitleri di ǂgaeǂguis ǀgui tsē nî ǀamsa.

¹⁷ ǁNā ǃgâsan ge ǂgom hâ īb ge amaba. ǀOro kurin khaoǃgâb ge Nazib ǂhanuba ǀamsa ge hō. Hendrik Himmleri ge ge  ǃkhoebē “nepa ǃhūbaib ai da ge sida ra ǂgaeǂgui” tib ge mî hâ i xawe. ǃKhoebēb hâ hînab ge ǃgâsab Lübkeba ge ǀhao-ū, ǀHûǀguitimî-aon di ǀguib hînab ge ǂan ība. ǂKhabu hâseb ge ǃgâsab Lübkeba ge dî: “Elobmîs ǁkhāǁkhāsabe, tae-e nēsi nî ī?” ǃGâsab Lübkeb ge Himmlera ge mîba Jehovab di ǀHûǀguitimî-aon ge ǂan īsa Nazi ǂgaeǂguis nî dīgāgā-e tsîn nî ǃnorakaihesa. Himmleri ge ǂgui ǁgai xūna Jehovab di ǀHûǀguitimî-aon xa ge mî hâ i, xawe ǁnā ǁaeb aib ge mîb nî xū-e ge ūhâ tama hâ i. ǃNubu ǁaerob khaoǃgâb ge ge ǃgamsen. Tae-e da nēba xu ra ǁkhāǁkhāsen? Elobmîsa da ga ôaǃnâ o, kēbodi tsîna ǃkhōǂgāhâse o da ge ǀgaisa ǂgomsa Elob ǃnâ nî omkhâi tsî ǃgom ǁaegu ǃnâs tsîna nî mâǀgai hō.—2Pet. 1:19-21.

18. Johaneb 6:67, 68 ǃoagu da tae-i ǃaroma ‘ǂans tsî hōǃâs hoasa’ ǂhâ hâ?

¹⁸ ǀNamma da ge nî ǁgaugu i da ama Xristeǁî da a ǃkhaisa ǁnās ǃnâ-ū ǁgau. Xawe da ge ‘ǂans tsî hōǃâs hoasa’ ǂhâ hâ. (Fil. 1:9) Nēsa da ga dī tama io, o da ge ‘ǁkhāǁkhā-ai-i hoa-i tsî khoen di gāxaǃnâsib’ xa a ǂgaeǂhapuhe ǁkhā. Nē khoen ge ǁnāǁgôa hâ khoen tsîna ǃkhōǂgā hâ. (Efe. 4:14) ǂGui ǁkhāǁkhāsaben ge Jesuba ǃoaba ǀû xaweb ge Petruba ǁîb ǃnâb ǂgom hâ ǃkhaisa ge ǁgau. ǁÎb ge Jesub “mîdi ǀamo ûib dide” ūhâ di ge mî. (Khomai re Johaneb 6:67, 68.) ǁNā ǁaeb aib ge ǁnā mîde ǃamkuse ǁnâuǃā tama hâ i, xaweb ge Petruba ǂgomǂgomsase ge hâ Jesub xa hâ amabab ge ǁnâuǃā amaga. Sadu tsîn ge Elobmîs ra ǁkhāǁkhā xūn ǃnâ du ūhâ ǂgomǃgâsiba a ǀgaiǀgai ǁkhā. Nēsa du ga dī o, os ge sadu ǂgomsa tae-i ga i xawe ǀgaisase nî hâ tsî du ge nau khoen tsîna ǀgaisa ǂgomsa oms ǀkha nî hui.—2Jhn. 1, 2.