1-2. Mâ ǀgam xūna Jehovab di ǀHûǀguitimî-aon ǃaroma a ǂhâǂhâsa?

KAISE ǂhâǂhâsa ǃgomsiba da ge hoada nētsē ra hōǃâ—Ham-i ǂgaeǂguisa anu hâs tsî Jehovab ǀonsa ǃanuǃanus. Jehovab di ǀHûǀguitimî-aon ase da ge nē ǀgam xūn xa ǃhoas xa a ǃgâibahe. Xawe Elob ǂgaeǂguisa anu hâs tsî ǁîb ǀonsa ǃanuǃanus tsîna ǀgam ǃkharagagu xūna? Hî-i.

² Hoa da ge ra mûǂan Elob ǀons ǃanuǃanuhesa ǂhâ hâ ǃkhaisa. ǁKhāǁkhāsens tsîna da ge ge hî Jehovab ǂgaeǂguis a ǃgâi ǃkhaisa. Nēs ǃaroma kha ge nē ǀgam ǃgomsikha a ǂhâǂhâsa.

3. Jehovab ǀonsa tae-e ǃkhōǂgā hâ?

³ Jehovab di ǀons ge hoa xūn ǁîb dina ǃkhōǂgā hâ nēs ge ǁîb ǂgaeǂguis ǂhanub tsîna. Mî da ga o Jehovab ǀons ai ge dīhe ǃanuoǃnâsiba ǂhanuǂhanus a ǂhâǂhâsa xu di, o da ge ra mî ǁîb ǂgaeǂguis a ǃgâi ǂgaeǂgui ǃkhaisa. Jehovab ǀons ge ǁîb ra hoaǀgaixa Elob ase ǂgaeǂgui ǀgaub ǀkha a ǃgaeǀhaosa.—“ Nē kai ǃgomsib ǃaromadi” di hâ boksisa mû re.

4. Psalmdi 135:13 sa tae-e Elob ǀons xa ra mî tsî mâ dîde da nē ǁkhāǁkhāǃâs ǃnâ nî ǃhoaǃgao?

⁴ Jehovab ǀons ge a ǀō-aisa. (Khomai re Psalmdi 135:13.) Tae-e Jehovab ǀonsa ra ǀō-aisa kai? Nē ǀonsa mati tsoatsoas ai ge ǃanuoǃnâ kaihe? Eloba mati nēsa nî ǂhanuǂhanu? Sada mati ǁîb ǀonsa a ǁkhauba ǁkhā? Hā re i da nē dîde ǃhoaǃgao.

5. ǀNîna tae-e a dî ǁkhā Jehovab ǀons ǃanuǃanus xan ga ǁnâu o?

⁵ “Sa ǀonsa as khaihe re.” (Mat. 6:9) Jesub ge nēsa ǂhâǂhâsa xū-i ase ǁîb ǀgores ǃnâ ge mî. Jesub mîde tae-e gere ǂâibasen? Xū-e ǂhanuǂhanus ge ra ǂâibasen nēsa ǃanuǃanu tamas ka io dī-unu di. Xawen ge ǀnî khoena a ǂâi ǁkhā, ‘Jehovab ǀonsa ǀnai ǃanu tama hâ?’ Nēsa ǃereams ǃaroma da ge ǀons taena ǃkhōǂgā hâs xa nî ǂâi.

6. Tae-e ǀonsa ra ǂhâǂhâsa kai?

⁶ ǀOns ge mîs ǀguisa hî tama hâ hîna ra ǂgaiǂûihe tsî xoahesa. Elobmîs nēs xa tae-e ra mîsa kō re: “ǀOns ge kai ǃkhūsib ǃgâ-ai a ǃkhōǂuihesa.” (ǂKhm. 22:1; Aoǁn. 7:1) ǀOnsa tae-i ǃaroma nēti a ǂhâǂhâsa? Nēs ge tanisen ǀgauba ra ǁgauǂûi tsî nau khoen ǀons tani ao-i xa, tae-e ra ǂâis tsîna. Nēs ǃaroma i ge ǀons mati ǂkhanib ai ra mûsen tamas ka io ra ǀō ǀgauba ǂhâǂhâsa tama hâ. Xawe ǀons a ham-i di tsî nau khoen ga nē ǀonsa ǁnâu o, on tae-i xa ra ǂâis ge a ǂhâǂhâsa.

7. Khoena mati Elob ǀonsa ge ǁgaiǁgai?

⁷ Khoen ga Jehovab xa ama tama xūna ǃhoa o, on ge khoen ǁîb xa ra ǂâi ǀgauba ra tsâǀkhā. Elob xūna ǂhanu tamase ra dī ǀgaub xan ga ǃhoa o, on ge ǁîb ǀonsa ra ǁgaiǁgai. ǂGuro ǃnās hîna i ge khoe-e Elob ǀons xa ǃgâi tama xū-e a mî ǁaeb ge Edenni ǃhanab ǃnâsa. Nēsa xu da tae-e ra ǁkhāǁkhāsensa kō re.

8. Adammi tsî Evas tsîra tae-e ge ǂân i tsî mâ ǀnî hâ dîna da nî dîsen?

⁸ Adammi tsî Evas tsîra ge Jehovab ǀonsa ge ǂan i. ǁÎra ge ǂgui ǂhâǂhâsa xūn tsîna ǁîb xa ge ǂan i. Aiǁgause ra ge ge ǂan i ǁîb a ǁîra di kuru-ao, ûib di mā-ao tsî ǁîra îsa paradais ǃhanaba oms ase a mā tsî ǀoasa ûib tsîna ǃkhaisa. (Gen. 1:26-28; 2:18) Xawe ra ge ǁîra di ǀoasa kurusa sîsen-ū nē xūn hînab ge Jehovaba ǁîra mān xa ǂâiǃgâs ǃnâ? ǀNammi tsî ǃgôaǃgâsib tsîna ra ge nē ǀonsa ra ǂnûǁkhaeba khoe-e ǁgau? ǃEreams ge ge ǃgāsa Elob di mâǃoa-aob ge ǁîra ǃâitsâ o.

9. Genesis 2:16, 17; 3:1-5 ǃoagub Eloba ǂguro khoe-aogura tae-e ge mîba tsî Satanna mati ǂhanu tama ǂâiǀgauba Elob xa ge ūhâ kai ra?

 ⁹ Khomai re Genesis 2:16, 17; 3:1-5. Satanni ge ǀaoba sîsen-ū tsî Evasa dîsa ge dî: Eloba amabes ǃnâ ge mî: “Saro ge ǂû tide mâ hai-i nē ǃhanab di-i hoa-i xa, ti?” Satanni ge ǂhûmiba ǃkhōǂgā hâ dîsa Evasa ge dî tsîs ge Evasa nēsa ǂâiǃgâ tsî Elob xa ǃgâi tama mûǂuiba ge ūhâ tsoatsoa. Elob ge ge mî ǁîra hoa haide xu a ǂû ǁkhā di xawe ǁîra ǀgui ǃkhâikhoms ǀguisa ge mâ. Adammi tsî Evas tsîra ge kaise ǂgui ǃkharagagu haide xu ge ǂû ǁkhā i. (Gen. 2:9) Jehovab ge amabes ǃnâ a māǀnamxa Elo. Xaweb ge Eloba Adammi tsî Eva hâra ge mîba i ra tā ǀgui haisa xu ǂû. Nēs ǃaromas ge Satanni dîsa ǂhumiba ge ǃkhōǂgā hâ i. Satanni dîs ge gere mî Elob māǀnamxa tama hâ di. Evas ge ǀnîsi gere ǂâi, ‘ǃgâi xū-e hâ hînab Eloba tida xu ra sâu-e?’

10. Satanna mati Elob ǀonsa ge ǁgaiǁgai tsî ǀamǂoasa ge tae-i?

¹⁰ Satanni ge ǁnā dîsa a dî ǁaeb ais ge Evasa noxoba Jehovaba gere ǁnâuǀnam. ǁÎs ge Satanna Elob di ǃgāsa ǃereamsa mîba bis ǃnâ-ū ge ǃeream. Tsîs ge ǀaro tsî ge mî Elob ge ge mî îm tā ǁnā haisa tsâǀkhās tsîna hî. ǁÎs ge Elob ǃkhaikhoms xa ge ǂân i tsî nēsa ǁnauǀnamoǃnâs, ǁōba nî ǃaroma ǃkhais tsîna. Xaweb ge Satanna ǃeream tsî ge mî: “Tātsē ro kom ǁō tideo.” (Gen. 3:2-4) Satanni ge Elob a ǂhumi-ao di ǀgui nēsisa ge mî tama hâ i. ǁÎb ge Elob ǀonsa ge ǁgaiǁgai tsî Evasa ge mîba Jehovab a ǂhumi-ao ǃkhaisa. Nē ǀgaub ǃnâb ge Satanna ge ǁgâua tamas ka io mâǃoa-ao kai. Evas ge Satanni xa ǂgaeǂhapuhe tsî ge ǂgom. (1Tim. 2:14) ǁÎs ge Satanna Jehovab ǃgâ-ai ge ǂgomǃgâ. Nēs ge ge ǃaroma is Evasa ǁnā mîmâisa dī. ǁÎs ge ge mîǁgui Jehovaba ǁnâuǀnamoǃnâsa. ǁÎs ge Jehovab ge tā ǂû di mî haisa xu ge ǂû tsoatsoa tsî Adammi tsîna ge mâ.—Gen. 3:6.

11. Adammi tsî Eva hâra tae-e ga dī hâ?

¹¹ ǁAero-e ǂâi re matis ga Evasa Satanna ǃeream hâ ǀgaus xa. ǀNîsis ge saora mîde ga mî hâ: “ǀŪ ta ge a sats a ham ǃkhaisa, xawe da ge ti ǁGûb Jehovaba a ǂan tsî ta ge ǁîba a ǀnam tsîra ǂgomǃgâ. ǁÎb ge Adammi tsî tita tsîma ūm hâ xūn hoana ge mā. Ots satsa nēti ī xū-e ǁîb xa ra mî? Ī garu.” Jehovab ge nēti-i ǃgâi ǂgomǃgâsib mîde ǁîb ôasa xū ǁnâus xa ga ǂkhî kaihe hâ. (ǂKhm. 27:11.) Xawes ge Evasa ama ǀnamma Jehovaba ge ūhâba tama hâ i; Adammi tsîn ge nē ǀnammi xa ge ǁgarihe tama hâ i. Nēti i ǀnamma ra ge ǁîra ǁGûba ūhâba tama hâ i, amaga ra ge Adammi tsî Eva hâra ǁîb ǀonsa ǁgaiǁgaihesa xu ge ǁkhauba tama hâ i.

12. Satanna mati Evas danas ǃnâ ǂgomoǃnâsiba ge ǃhana tsî Adammi tsî Eva hâra tae-e ge dī tama hâ i?

¹² Mû da go khamib ge Satanna  Jehovab ǀonsa ge ǁnāǂam Evasa Jehovab a ǃgâi tama ǁGû ǃkhais ǃnâ ǂgom kais ǃnâ-ū. Adammi tsî Eva hâra ge Jehovab ǀons tsî ǁîb a tae ǃnôa khoe ǃkhais tsîna ǁkhaubasa ge ǂoaǃnâ. Nēs ge ge supu kai i ra ǁîra Satanna ǃgâ tsî ǁîra ǁGûba ǁnâuǀnamoǃnâ. Satanni ge ǁkhā ǀgauba nētsē ra sîsen-ū. Satanni ge Jehovab ǀonsa ra ǁnāǂam ǁîsa ǁgaiǁgais ǃnâ-ū. Khoen hîna Satanni ǂhumiba supuse ra ǂgom an ge Jehovab ǂhanu-ai ǂgaeǂguisa supuse ra ǂhābē.

13. Esegieli 36:23 sa Elobmîs haisi amsa mati ra ǃkhōǀhao?

¹³ Jehovaba ǁîb ǀons ai ge dīhe ǁgaiǁgaisa ra mā-am i-i aiǃgû? Hî-i, ǁîb ge nēsa mā-am tama hâ. Hoa Elobmîs ge matib Jehovaba ǁîb ǀons ǃanuǃanusa ra sîsenǂam ǀgaub xa hâ, Edennni ǃhanab ǁaeba xu. (Gen. 3:15) Elobmîs haisi amsa da ge saora mîdi ǃnâ a ǃkhōǀhao ǁkhā: Jehovab ge ǁîb ǀonsa Elob Gaosib hîna ǁîb ǀgôab xa nî ǂgaeǂuihese ib ǃnâ-ū ǃanuǃanu tsî ǂhanu-aisib tsî ǂkhîb tsîna ǃhūbaib ai nî hau-oa. Elobmîs ge ǃnāsa ǃgāsasiba ūhâ matib Eloba ǁîb ǀonsa nî ǃanuǃanu ǀgausa.—Khomai re Esegieli 36:23.

14. Jehovaba Edenni ǃhanab ǃnâ ge ī xū-i tsî ǁîb ǀons ǃanuǃanus xa tae-e ge dī?

¹⁴ Satanni ge hoa xūna ge dītsâ Jehovaba ǁkhaesa îb tā ǁîb ǂâisa dīǀoaǀoa. Nēsab ge hoaǁae ra ǂoaǃnâ. Elobmîs ge Jehova Elob ge dī xūna ra ǁgau tsî nēs ge ra ǁgau ǁîb khami ī khoe-i a ǀkhai ǃkhaisa. Ama as ge Satanni mâǃoas tsî ǁîba ra ǂkhâǃnâ khoen tsîn ge Jehovaba kai tsûba a ǃaromaba ǃkhaisa. (Psa. 78:40) Xaweb ge ǁîba nē mâsiba gā-aisib, ǃnūǃnâxasib tsî ǂhanu-aisib tsîn ǀkha ra sîsenǂam. ǁÎb ti ǀgaib tsînab ge ǂgui ǀgaugu ǃnâ ge ǁgau. Hoan ǂam-aib ge ǁîb di ǀnamma dīb ta xūn hoan ǃnâ a mûhe ǁkhā. (1Jhn. 4:8) Jehovab ge ǁîb ǀonsa ǃanuǃanus ǃaroma noxoba ra sîsen.

15. Satanna mati Elob ǀonsa nētsē ra ǁgaiǁgai tsî mâ ǀamǂoas ǀkha?

¹⁵ Satanni ge noxoba Elob ǀonsa nētsēs tsîna ra ǁgaiǁgai. ǁÎb ge khoena Elob  ǀgaib, ǂhanu-aisib, gā-aisib, tsî ǀnammi ǃnâ ra ǂgomoǃnâ kai. Aiǁgauseb ge Satanna khoena ra ǂgom kai Jehovab kuru-ao tama hâ ǃkhaisa. Khoen ga Elob ûitsama ǃkhais ǃnâ ǂgom o, ob ge Satanna ǁîna ra ǂgom kai Elob ǁgaragu ra ǃkhō-oa da tsî ǂhanu-ai tama hâ ǃkhaisa. ǁÎb ge khoena ra ǁkhāǁkhā Jehovab khoena tsâba tama tsî ǀaeb ǃnâ ra ǂhubi ǃkhaisa. Nē xūnan ga khoena ǂgom tsoatsoa o, o i ge ǁîna a supuba—Jehovab ǂhanu-ai ǂgaeǂguisa ūǃoa tama īsa. Satanni hîkākāhe tama hâs kōseb ge Jehovab ǀonsa ǁgaiǁgais ǀkha nî aiǃgû tsî sadu tsîna Jehovaba xu ūbēsa nî dītsâ. ǁÎba nēs ǃnâ nî dan?

16. Tae-e da a dī ǁkhā hîna ra Adammi tsî Eva hâra ge dīhō tama hâ i-e?

¹⁶ Jehovab ge khoena ra mā-am în ǁîb ǀons ǃanuǃanus ǀkha hui. Nēs ǃaroma da ge Adammi tsî Eva hâra ge dīhō tama hâ i xū-e a dī ǁkhā. Jehovab ǀonsa ǃhāsara tsî ra ǁgaiǁgai khoen xa ǀoa hâ ǃhūbaib ǃnâ da ûihâ xawe da ge sada amaba ǃhoas aiǂhanuba ūhâ—nēs ge Jehovab ǃanusib, ǂhanu-aisib, ǃgâixasib tsî ǀnammi xa hâ amaba. (Jes. 29:23) ǁÎb nî sadu ǂgaeǂgui-ao ǃkhaisa du ǂhaba hâ ǃkhaisa ǁgau re. Khoena da ge a hui ǁkhā în ǁnâuǃā Jehovab ǂgaeǂguis ǀguis a ǂhanu-ai tsî ǃnōrasasib tsî ǂkhîb tsîna ǃhūbaiba nî hauba ǃkhaisa.—Psa. 37:9, 37; 146:5, 6, 10.

17. Jesuba mati ǁîb ǁGûb ǀonsa ge ǂanǂan?

¹⁷ Jehovab ǀonsa da ga ǁkhauba o, o da ge Jesub Xristub di aiǁgausa ra sao. (Jhn. 17:26) Jesub ge ǁîb ǁGûb di ǀonsa ǂanǂans ǀguisa ge dī tama hâ i, xawe Jehovab xa hâ amab tsîna gere ǁkhauba. Aiǁgause gu ge Farisega gere mî Jehovab a ǃgariǂgaoxa, ǁgâiǀāxa, khoen ǀgūse hâ tama tsî ǀûbaǀnamxa tama hâ ti, xaweb ge Jesuba nē ǂhumib xa xū-e ge dī. Jesub ge khoena gere hui în ǁîb ǁGûba ǂhanu-ai, ǃnūǃnâxa, ǀnamxaǃnâ tsî ǀûbaǀnamxa Elob ase mû. ǁÎb tsēkorobe ûiǀgaub ǀkhab ge khoena gere hui în Jehovab ǀgauga ǁîb tanisen ǀgaub ǃnâ mû.—Jhn. 14:9.

18. Tae-e da a dī ǁkhā i da ǁgau Jehovab mâǃoa-aon ǁîb xa ra mî xūn ama tama hâ ǃkhaisa?

¹⁸ Jesub khami da ge khoena Jehovab xa da ǂan xūna a mîba ǁkhā, ǁîna matib Eloba a ǀnamxaǃnâ tsî a tsaura ǀgauba, ǁkhāǁkhās ǃnâ. Nēsa da ga dī o, o da  ge Jehovab xa ra mîhe ǂhumiba ra mâǃoa. Jehovab ǀons xan khoena ra tsâ tsî ǂâi ǀgauba dawas ǃnâ-ū da ge ǁîb ǀonsa ra ǃanuǃanu. Jehovaba da ge a ǁgae ǁkhā. ǁNās ge a īǁkhā ǀoasa kurusa da ūhâ tama hâ xawe. (Efe. 5:1, 2) Khoena da ga sada tanisen ǀgaub ǀkha Jehovab a tae ǃnoa Elosa a ǁgau o, o da ge ǁîb ǀonsa ǃanuǃanus ǀkha ra hui. Nē ǀonsa da ge ra ǃanuǃanu khoena da ga nē ǀons xa hâ amaba mîba o. * ǀOasa kurusa ūhâ tama hâ khoen tsîn Elob ǃoa-ai ǂgomǂgomsase hâ ǁkhā ǃkhais tsîna da ge ra ǁgau. —Job. 27:5.

19. Jesajab 63:7 sa mati ra hui da mûsa tae-i nî sada haisi-ams di ǂhâǂhâsa ǃâ-i ǃkhaisa?

¹⁹ ǀNî hâ xū-i ge noxoba hâ hîna da a dī ǁkhā-e Jehovab ǀonsa ǃanuǃanus ǃnâ. Khoena da ga Elobmîsa ǁkhāǁkhā ǁaeb ai da ge Elob ǂhanub ǂgaeǂguis diba ra ǁguiǃâ, Jehovab ǃhūbaiba ǂgaeǂguis aiǂhanuba ūhâ ǃkhaisa. Nēs ge a ama. Jehovab ǃgâi ǀgauga da ge ra ǁguiǃâ ǂgao tsî ǀons tani-aob a tae ǃnôa khoe tsîna. (Khomai re Jesajab 63:7.) Nē ǀgaub ǃnâ da ga khoena ǁkhāǁkhā o, o da ge nî hui nî în Jehovaba ǀnam tsî ǁnâuǀnam ǁîb ǃoa-ain ga ǂhauǃnâse hâ ǂgao, o.

20. Saora ǁkhāǁkhāǃâs ǃnâ da tae-e nî ǃhoaǃgao?

²⁰ Xawe mati da nî ǂanǂui sada tanisen ǀgaub tsî ǁkhāǁkhā da ra xūn tsîn khoena nî huisa în Jehovab xan ga ǁnâu o, o ǃgâi ǂâiǀgauba ǁîb xa ūhâ? Saora ǁkhāǁkhāǃâs ge nē dîsa nî ǃeream.