1-2. Tae-e ra hui da, î da Jehovab ra tsâ ǀgauba ǁnâuǃā ǁîb ǀons ǁgaiǁgaihe hâ amaga?

 MÛNANAI re sao ra aiǁgausa: Kaise du a ǀnam khoe-i ge sadu xa ǁgai xū-e ra mî tsî du ge a ǂan ǂhumib asa xawe i ge ǁî-e ǀnîn xa ra ǂgom-e. ǁNās ǂam-ai i ge nauna ǁnā ǂhumib xa ra mîba tsîn ge ǂguin tsîna ǁnāsa ra ǂgom. Mati du ǁnās xa nî tsâ? Khoen tsî sadu ǃgâi ǀons tsîna du ga ǀnam, o i ge ǁnā ǂhumiba nî tsûtsû du.—ǂKhm. 22:1.

² Nē aiǁgaus ge ra hui da î da ǁnauǃā, Jehovab ge mati a tsâsa ǁîb ǀons gere ǁgaiǁgaihe o. ǁÎb ǀhomǃgān di ǀguib ge ǂguro khoes Evasa ge ǂhumiba tsîs ge ǁnā ǂhumiba ge ǂgom. ǁNā ǂhumib xa ǃaromahe hâse ra ge Adammi tsî Eva hâra tsîna Jehovab ǃoagu ge ǁore. Tsîn ge ǁnās xa ǃaromahe hâse hoa khoena ǁore tsî ra ǁō. (Gen. 3:​1-6; Rom. 5:12) ǃHūbaib ǃnâ da ra mû ǁōb, torogu, ǃgomsin tsî ǂkhîoǃnâsib tsîn ge ǁGâuab ge Edenni ǃhanab ǃnâ dī ǁoreb xa ra ǃaromahe. Jehovaba tsûba ra hōǃâ nē ǂhumib tsî ǃgomsin ge ǃaroma xūn xa? Îo. Xaweb ge Jehovaba ǁaixa tsî ǀhaoǂgaoxa tama. ǁÎb ge “ǂKhîb di Elob” ase ra hâ ǀgara.—1Tim. 1:11.

3. Mâ aiǂhanuba da ūhâ?

³ ǁGâuab ge Jehovab xa ǂhumisa da ge a ǁgau ǁkhā saora mîmās ǃnâ-ū: “Koa re ǃKhūb [Jehovab] di ǀonsa.” (Psa. 113:1) Jehovab ǀonsa da ge ra koa nauna da ga  mîba o ǁîb ge dī ǃgâi xūn xa. Sadu tsîna Jehovab ǀonsa nî koa? Hā re î da ǃnona xūna ǃgaoǃgâ ǂkhâǃnâ da ra na, î da Elob ǀonsa ǁkhoaǂgoase koa.

JEHOVABA DA GE RA ǂKHÎǂKHÎ ǁÎB ǀONSA DA GA KOA O

4. Tae-i ǃaromab Jehovaba ra ǂkhî koa bi da ga o? ǁGuiǃā re.

⁴ Sada ǀhomsi ǁGûba da ge ra ǂkhîǂkhî ǁîb ǀonsa da ga koa o. (Psa. 119:108) Nēsa ra ǂâibasen Hoaǀgaixa Elob ǀoasa kurusa ūhâ tama khoen khami īsa tsî naun xa koahesa ra turasa? Hî-î. Saora aiǁgausa ǃgaoǃgâ re. ǂKhari ǀgôaros ge ǁîs dadasaba ǁnamǂgā tsî ra mî, “sado ta ge kaise nē ǃhūbaib hoab ǃnâ ǀnam.” ǁGûb ge ǂkhî tsî kaise ra ǃgâiaǂgao. Tae-i ǃaroma? ǁÎb ǀgôas ǂkhâǃnâs tsî koahesab ǂhâhâ ti da nî mî? Hî-î. ǂGomǃgâ da ge ra nē ǁgûb a ǀgaisa tsî ra ǂkhîsa, mûb ga o ǁîb ǀgôas ǀnammi tsî ǃgôaǃgâsib tsîna ra ǁgau bisa. ǁÎs ǂkhî khoese nî kai ǃkhaisab ge a ǂan kaise ǀnamxa tsîs ganganxa amaga. ǁNā ǃkhais ǃaromab ge kai ǁGûb Jehovaba ra ǂkhî koa bi da ra amaga.

5. Jehovaba da ga koa, o da mâ ǂhumib ama tamasa ra ǁgau?

⁵ Sada ǀhomsi ǁGûba da ga koa, o da ge ra ǁgau ǀnî hâ ǂhumib ǁGâuab sida xa ge mîb ama tamasa. ǁGâuab ge ra mî khoe-i ǂgomǂgomsase Elob ǀonsa ǁkhaeba tidesa ǃâitsâhe i ga o. ǁÎb ge ra mî nēs sida ǃaroma a ǃgâi ti da ga ǂâi, o da Eloba nî ǃoaba ǀûsa. (Job. 1:​9-11; 2:4) Xaweb ge Joba ǂgomǂgomsase Elob ǃoagu ge hâ tsî ge ǁgau ǁGâuab a ǂhumi-aosa. Sadu tsîna ǂgomǂgomsase Elob ǃoagu nî hâ? Hoa da ge sada ǀhomsi ǁGûb ǀonsa ǁkhauba tsî ǂgomǂgomsase ǃoaba ǀgara ǁkhā. (ǂKhm. 27:11) Amase kai aiǂhanub ge nēsa dīsa.

6. Gao-aob Davidi tsî Leviǁîn tsîna da mati a ǁgae ǁkhā? (Nehemiab 9:5)

⁶ Jehovaba ǀnam khoen ge ǁîb ǀonsa ǂgaob hoab ǀkha ra koa. Gao-aob Davidi ge ge xoa: “ǃKhūba koa re ti ǀomse an ti ǃnâ hân hoana kare, ǁîb ǃanu ǀonsa.” (Psa. 103:1) Davidi ge ge ǂan i Jehovab ǀonsa koas Jehovaba koas ǀkha a ǀguisa. Jehovab ǀonsa da ga ǁnâu, o da ge ǁîb a mâǃnôa khoesa ra ǂâi. Aiǁgause ǁîb îsa ǀgaugu tsî dīb ge buruxa xūn xa. Davidi ge ǁîb ǁGûb ǀonsa ǃanuse ūhâ tsî gere koa ǂgao. ǁÎb ge ǁnāsa ǁîb “ǃnâ hân” hoan tsî ǁîb ǂgaob hoab ǀkha gere dī ǂgao. ǁNā ǀgaub ǃnân  ge Leviǁîna Jehovaba koas ǃnâ ǂgurose doaba ge ǁgau. ǁÎn ge ǃgamǃgamsenxase ge ǂanǃgâ, ǁîn Jehovab ǃanu ǀons anu hâ koasa ǁguiǃā ǁkhā hō tidesa. (Khomai re Nehemiab 9:5 sa.) Amase ǁnāti i ǃgamǃgamsenxa koas, ǂgaoba xu ra hās ge Jehovab ǂgaoba ra ǂkhîǂkhî.

7. Jehovaba da mati aoǁnâ sîsenni tsî sada tsēkōrobe ûib ǃnâ koa ǁkhā?

⁷ Nētsē da ge Jehovaba a ǂkhîǂkhî ǁkhā, ǃgôaǃgâsib tsî ǀnammi tsîna da ra ǁgau bi ǀgaub ǃnâ-ū. Aoǁnâ sîsen-e da ga dī, o da ge khoena ra hui în Jehovab ǃoa ǀgū tsî sada khami tsâ. (Jak. 4:8) Kaise da ge ra ǂkhî Elobmîs Jehovaba ra ǁguiǃā ǀgauba da khoena ra ǁgau o. Aiǁgause ǁîb di ǀnammi, ǂhanu-aisib, gā-aisib, ǀgaib tsî ǀnî hâ mâǂoa ra ǀgaugu tsîna. Jehovaba da ge koa tsî ra ǂkhîǂkhî ǁîba ǁgaes ǃnâ-ū. (Efe. 5:1) ǁNāsa da ga dī, o da ge nē eloxoresa ǃhūbaib khoena xu ra mâǂoa tsîs ge nēsa ǁîna buru kai ǁkhā. (Mat. 5:​14-16) Tsēkōrobe da ǁîn ǀkha ra hâ khami da ge ǁguiǃāba nî ǁkhā, mati io da ti ra tanisensa. ǁNā ǀgaub ǃnâ da ge Jehovab ǀonsa ra koa. Nēs xa ǃaromahe hâsen ge ǂhauǃnâna sada Eloba ǃoa ra ǂgaehe. Jehovaba nē ǀgaub ǃnâ koas ge ǁîb ǂgaoba ra ǂkhîǂkhî.—1Tim. 2:​3, 4.

JESUBA DA GE RA ǂKHÎǂKHÎ JEHOVAB ǀONSA DA GA KOA O

8. Jesuba mati a ǃgâi aiǁgau Jehovab ǀonsa koas ǃnâ?

⁸ ǀGui khoe-i ǀhommi tamas ka io ǃhūbaib ai hâ i tsîn ge Jehovaba ǃgâise ǂan tama Jesub khami. (Mat. 11:27) Jesub ge ǁîb di ǁGûba kaise a ǀnam tsîb ge daoba ge ǁgui Jehovab ǀonsa koasa. (Jhn. 14:31) ǁŌb nî ǃoes aiǃâb ge ǁîb ǁGûba ǃoa ǀgore, ob ge Jesuba ǁîb aoǁnâ sîsen-e nē ǀgaub ǃnâ ge ǁguiǃā tsî ge mî: “Tita ge sa ǀonsa ǁîna ge ǂanǂan.” (Jhn. 17:26) Jesuba ǁnāsa mati ge dī?

9. Jesuba mâ ǂkhōsa ge sîsenū ǁîb ǁGûb ǀgauba ǃgāsase ǁguiǃāsa?

⁹ Jesub ge ǃnāsa-e gere dī khoena Elob ǀons a Jehovasa mîbas xa. Jodeǁîn hînab gere ǁkhāǁkhān ge ǀnai Elob ǀonsa ge ǂan i. Xaweb ge Jesuba daoba ge ǁgau tsî “Elob xa ge mîba da.” (Jhn. 1:​17, 18) Aiǁgause Hebreǁî Xoadi ge ra mîba da Jehovab ǀkhomxasib tsî ǀkhommi xa ǀoa hâsa. (Eks. 34:​5-7) Jesub ge amaba ǃgāsase ge ǁgau gā hâ ǀgôab di ǂhōs ǃnâ-ū. “ǃNūsib aib ǃgôaxa” hînab ǁgûba ǁîb ǀgôaba ǃhoeǃoa tsî ra ǁnamǂgā ǀgausa da ga khomai, o da ge Jehovab ǀhommi tsî ǀkhomxaǂgaosib xa ǀoa hâsa ra mû. (Luk. 15:​11-32) Jesub ge khoena ge hui în ǁnâuǃā Jehovab a mâǃnôa khoesa.

10. (a) Mati da a ǂan Jesub ge ǁîb ǁGûb ǀonsa sîsenū tsî gere ǂhâbasa în naun tsîna ǁnāsa dī? (Markub 5:19) (b) Jesuba nētsē tae-e da nî dīsa ǂhâba hâ?

¹⁰ Jesuba ge ǂhâba hâ i, în naun tsîna ǁîb ǁGûb ǀonsa sîsenū? Amase. ǀNî ǂgomdi ǂgaeǂgui-aon ge ra ǂgom Elob ǀonsa sîsenūs ǃgôasiba ǁgau tamasa. Jesub ge ge mā-am tama hâ i, Elobmîs ai ǃgaoǃgaosa tama ǃhaoǃnâsi ǁnaetiga ǁîb ǁGûb ǀonsa sîsenūsa xu ǁkhae bisa. ǃGaoǃgâ re Jesub ge “ǂkhaba gaga-i xa hâǃnâhe” hâ khoeba Geraseǁîn ǃhūb ǃnâ ǂgauǂgau ǁaeba. Khoen ge ǃaob xa Jesuba ge ǀkhoma îb ǁnā ǀkhariba xu ī. (Mrk. 5:​16, 17) Xaweb ge Jesuba noxopa ge ǂhâba hâ i Jehovab ǀons ǁnāpa  nî ǂanhe ǃkhaisa. ǂGauǂgaub ge aobab ge ge mîba îb tā ǁîb ge dī xū-i xa ǃhoa xawe Jehovab ge dī xū-e khoena mîba. (Khomai re Markub 5:19 sa.) a Jesub tsîn ge sida nētsē ǁîb ǁGûb ǀonsa nî ǂanǂan ǃkhaisa ra ǂhâba. (Mat. 24:14; 28:​19, 20) Sada ǃâba da ga dī, o da ge sada Gao-aob Jesuba ra ǂkhîǂkhî.

11. Jesuba ǁîb saosabena tae-en nî ǀgorebasa ge ǁkhāǁkhā, nēsa tae-i ǃaroma ǂhâǂhâsa? (Esegieli 36:23)

¹¹ Jesub ge ge ǂan i, Jehovab ǂâibasens asa ǁîb ǀonsa ǃanuǃanusa. ǁNā-amagab ge ǁîb saosabena ge mîba în: “Sida Îtse ǀhommi ǃnâ hâtse sa ǀonsa as khaihe re” ti ǀgore. (Mat. 6:9) Jesub ge ge ǁnâuǃā hoa kurusaben [khoen] nē ǃgomsiba ra hōǃâsa. (Khomai re Esegieli 36:23 sa.) ǀNî hâ gagasi kurusabe-i xare i tsîn ge Jesub ge ǁîb ǁGûb ǀonsa ǃanuǃanu ǀgaub ǃnâ ǃanuǃanu tsâ tama. Jesub ge ǃkhōhe, o i ge ǁîb mâǃoa-aona ge ǂgāri-am bi ǁîb ǁGûbab ǃgôasiba ūhâba tamasa. Jesub ge gere tsâ ǁîb ǁGûb ǀonsa ǁgaiǁgai, tamas ka io ǂhumiǂgā-ams ge hoan ǂam-ai kai ǁore ti. ǁÎb ge gere ǂâiǂhansen nēs ǃaromab īǁkhā î ga, o ǀhapiǂgā-amhe tsî nî ǁkharahesa. ǁNā-amagab ge ǀnîsi Jesuba kaise gere “ǃao” ǃkhōheb nîs aiǃâ.—Luk. 22:​41-44.

12. Jesuba mâ ǀgaub ǃnâ ǁÎb ǁGûb ǀonsa ge ǃanuǃanu?

¹² Jesub ge ǁîb ǁGûb ǀonsa ǃanuǃanus ǃaroma tsûtsûhe, mîǁgaiǁgaihe tsî ge ǂhumiǂgā-amhe. ǁÎb ge ge ǂan i ǁîb ǁGûbab ge hoa xūn ǃnâ a ǁnâuǀnamsa tsîb taob nî xū-e ūhâ tamasa. (Heb. 12:2) Jesub tsîn ge ge ǂan i ǁGâuab tsîn ge ǁnā ǁaeb ǃnâ gere ǁnāǂam bisa. (Luk. 22:​2-4; 23:​33, 34) ǁGâuab ge Jesub ǂgomǂgomsasiba gere khôa ǂgao xaweb ge nēs ǃnâ ge dan tama hâ i. Jesub ge ge ǁgau ǁGâuab a kai ǂhumi aosa tsîb Jehovaba ǂgomǂgomsa ǃoaba-aona ūhâsa, ǃgomsigu ǃnâs tsîna ra mâǀgaina.

13. Mati da sida ǂgaeǂgui-aoba ǂkhî kai ǁkhā?

¹³ Sadu ǂgaeǂgui-aoba du ra ǂkhîǂkhî  ǂgao? Aiǃgû tsî Jehovab ǀonsa koa re tsî nau khoen tsîna ǁkhāǁkhā în Elob îsa ǀgaugu xa ǁǁkhāǁkhāsen. Nēsa da ga dī, o da ge Jesub aiǁgausa ra sao. (1Pet. 2:21) Jesub khami da ge Jehovab ǂgaoba kaise ra ǂkhî kai tsî ǁGâuab a ǂhumi-aosa ra ǁgau.

JEHOVAB ǀONSA DA GA KOA O DA GE ÛIGA RA SÂU

14-15. Mâ buruxa xūna ra ī khoena da ga Jehovab xa ǁkhāǁkhā o?

¹⁴ Jehovab ǀonsa da ga koa, o da ge khoen ûigu tsîna ra sâu. Mâ ǀgaub ǃnâ? ǁGâuab ge “ǂgomoǃnân di ǂâide ge ǂgī kai.” (2Kor. 4:4) ǁNās ǀkhan ge khoena ǁGâuab ǂhumiba ra ǂgom. Aiǁgause, Elo-i ǀkhai tsîb khoesib ǀkha ǁae tama tsîb ǁîna ǀamosib kōse nî ǁharasa. ǁGâuab ge nē ǂhumib hoaba ra mî Jehovab ǃgâi ǀonsab ra ǁgaiǁgai ǂgao amaga tsîb ǂgao tama hâsa în khoena Eloba ǃoa ǀgū. Xawe da ga aoǁnâ, o da ge ra ǁkhae îb ǁGâuaba tā ǁîb ǂâibasensa dīǀoaǀoa. Khoena da ge sida ǀhomsi ǁGûb xa hâ amaba ra ǁkhāǁkhā tsî ǁîb ǃanu ǀons tsîna nē ǀgaub ǃnâ ra koa. Nēsa mâ ǀamǂoasa ūhâ?

¹⁵ Elobmîs amab ge kai ǀgaiba ūhâ. Khoena da ga Jehovab tsî ǁîb ǀgaub xa ǁkhāǁkhā, o da ge kaise buruburuxa xū-e ra mû. ǁÎn mûdi ge ra ǁkhowa-amhe tsîn ge ǁGâuab di ǂhumiba ǃgāsase ra mû. Nēs tsîn ge ra īǁkhā kai în sada ǁGûb îsa ǀgauga mû ǁkhā. Tsîn ge ǁîb kai ǀgaib xa ra buru kaihe. (Jes. 40:26) Jehovab ai ǂgomaiǂnûis tsînan ge ra ǁkhāǁkhāsen ǁîb a ǂhanu-ai amaga. (Deu. 32:4) ǁÎb di kai gā-aisib xas tsînan ge ra ǁkhāǁkhāsen. (Jes. 55:9; Rom. 11:33) Jehovab a ǀnammi di ǃgaoǃgaos xan da ǁkhāǁkhāsen, on ge kaise ra ǁkhaeǂgaohe. (1Jhn. 4:8) Jehovaba ǃoan ra ǀgū khami i ge ǁîb ǀgôan ase ǀamose ǃhūbaib ai ûis di ǃâubasensa ra ama kai. Kai aiǂhanub ge khoena huisa în sida ǁGûb ǀkha ǀgū ǀhōsagusisa ūhâ. Nēsa da ga dī, ob ge Jehovaba  ǁîb “sîsenǁare-aon” ase ra mû da.—1Kor. 3:​5, 9.

16. ǀNîna mati ra tsâǀkhāhe Elob ǀonsan ga ǁkhāǁkhāsen o? Aiǁgaude mā re.

¹⁶ ǂGurose da ge khoena ra ǁkhāǁkhā Elob ǀons a Jehovasa. ǁNāsa ǂans ge ǀguri khoe-i ûiba dawa ǁkhā. Aiǁgause Aaliyah b ti ǀon hâ ǂkhamkhoes ge Elobmîs ǃnâǂgoms tama omaris ǃnâ ge kaikaihe. ǁÎs ge nē ǂgoms xa ge sīhe tama hâ ī tsî Elobas ǀgū ǁoa khami gere tsâ. Elobmîsas ge ǁkhāǁkhāsen tsoatsoa, on ge ǁnān hoana ge dawa. ǁÎs ge Eloba ǁîs ǀhōsab ase ge mû tsoatsoa. Kaises ge ge buru Elob ǀons ǂgui Elobmîde xu ūǂuihe hâsas ge ǁkhāǁkhāsen o tsî Abob ti hâ ǂgaiǀondi ǀkha ǃkhōǃkhunihe hâsa. Elob ǀons xa ǁkhāǁkhāsens ge ǁîs ûiba ge dawa. ǁÎs ge ge mî: “Ti ǀgū ǀhōsab ge ǀonsa ūhâ.” ǀAmǂoasa ge tae-i? ǁÎs ge ra mî: “Kai ǂkhîba ta ge nēsi ra hōǃâ, kaise ta ge nēsa ta anu hâ khami ra tsâ.” Steve ti ǀon hâ khoeb, Jodeǁîn khaoǃkhūba ūhâb ge amde gere ǁnae. ǁÎb ge ǀapeǂhumi-i ǃnâ ge ǃâ ǂgao tama hâ i, khoen a gāxaǃnâ amaga. Tsîb ge mamasas ge ǁōs khaoǃgâ Jehovab ǃoaba-aon Elobmîsa ra ǁkhāǁkhā ǃkhais dawa ge ǂnûǂgâ. Elob ǀonsa ǁkhāǁkhāsens xab ge ge tsâǀkhāhe. ǁÎb ge ra mî: “Elob ǀons xa da ge ǂguroǃnâs ase ge ǁkhāǁkhāsen.” ǀAro tsîb ge ra mî: “ǂGuroǃnās ase ta ge ge ǁnâuǃā ǁîb a ûitsâma khoesa, ǀhōsaba da go hōsa ta ge ge ǂan i.”

17. Tae-i ǃaroma da aiǃgû tsî Jehovab ǀonsa ra koa ǂgao?

¹⁷ Aoǁnâs tsî ǁkhāǁkhās sîsenni ǃnâ du Jehovab ǃanu ǀonsa khoen ǀkha ra ǀgoragu? ǁÎna du ra hui în Elob ǀgauga ǂan? Nēsa du ga dī, o du ge Elob ǀonsa ra koa. Aiǃgû tsî Elob ǃanu ǀonsa koa tsî khoena hui re în ǂan ǁîb a hamsa. Nēs ǃnâ-ū du ge khoen ûiga a sâu ǁkhā. Sada Gao-aob Jesub Xristub daoǁgaus tsîna du ge nēs ǃnâ-ū ra sao. Xawe nēn hoan ǂam-ai da ge sada ǀnamxaǃnâ ǁGûb Jehovab ǂgaoba ra ǂkhîǂkhî. Aiǃgû tsî Elob ǀonsa “ǀamosiba xu ǀamosib kōse” koa re.—Psa. 145:2.