1. Mâ ǃgâi ǀgaugan ge Jehovab di ǃoaba-aona ǃkharuge ǁaeb ǃnâ ǁgau?

 Jehovab ǀkha da ūhâ ǀhōsagusisa da ra ǃgôaǃgâ? Îo, ǀguri da ge hâ tama. ǃKharuge ǁaeba xūn ge ǂgui khoena sadu ra tsâ khami gere tsâ. (Psa. 104:​33, 34) ǂGuin ge ǁguibade ge dī în Jehovaba ǃoaba. ǁNāsan ge ǀorogam ǁaeb Israelǁîn hîna ge Nasirǁîn ti ǂansa îna gere dī. Hamna tsî tae-e da ǁîn aiǁgausa xū a ǁkhāǁkhāsen ǁkhā?

2. (a)Hamna ge Nasirǁî ī? (Numeri 6:​1, 2) (b) Tae-i ǃaroman ge ǀnî Israelǁîna Nasirǁîsisa gere mîǁgui?

² “Nasirǁî” ti hâ mîs ge Hebreǁî gowaba xū hâ hîna ra ǂâibasensa “ǁhûihe hâ khoe-i,” tamas ka io “Jehovab ǃoabas ǃaroma ǁhûiǂûihe hâ i.” Nasirǁîn ge ôasā ge i Israelǁîn hîna ge Jehovaba ǀō-aisa ǁguibade gere dībana în ǁîba ǃoaba. Moseb di ǂhanub ge aorekhoeb tamas ka io tarekhoesa gere mā-am, î-i ǀō-aisa mîǁguiga dī Jehovaba ǁaeroba Nasirǁîse ǃoabasa. a (Khomai re Numeri 6:​1, 2 sa.) Israelǁî-i ga Nasirǁîsisa mîmâi o i ge ǁî-e nau Israelǁîn gere sao daoǁgaun ǀnîna ge sao-ai tama hâ i. Tae-i ǃaroman ge ǀnî Israellǀîna gere ǁhûi Nasirǁî kaisa? ǁÎ-i Jehovaba ūba hâ ǃgam ǀnammi tsî ǃgôaǃgâsib ǁîb ǀkhaegu dib ǃaroma.—Deu. 6:5; 16:17.

3. Elob khoena mati Nasirǁîn ǀkha ǀgui ǀgauba ūhâ?

³ Nasirǁîn ǂnûiǂgās ge Moseb ǂhanub ge “Xristub di  ǂhanub” xa ǃkhōǃkhunihe o ge ǀam. (Gal. 6:2; Rom. 10:4) Nasirǁîn khamin ge Jehovab di khoena nētsē Eloba ǁîn ǂgaob, ǀoms, ǂâis tsî ǁkhāsib hoab ǀkha ǃoabas turaba ūhâ. (Mrk. 12:30) Māsenxase da ge ra mîmâi sida ûiba da Jehovaba ǃoa ra māǁnâ ǃkhaisa. ǁNā mîmâis ǃoagu ûis ge ra ǂâibasen, Jehovab di ǂâisa dī tsî da ǁguibana nî dīsa ǁîba ǃoabas ǃaroma. Nasirǁîn ge ǁîn di mîmâidi ǃoagu gere ûi ǀgauba ǃgaoǃgâs ǃnâ da ge nî ǁkhāǁkhāsen, mati da sida tsîna ǁnās ǃoagu a ûi ǁkhā ǀgausa. b (Mat. 16:24) Ha re î da ǀnî aiǁgaude ǃhoaǃgao.

MĀSENXASE XŪNA DĪ RE

4. Numeri 6:​3, 4, ǃoagu i ge Nasirǁîn di māsenxasiba mati gere ǃâitsâ-e?

⁴ Khomai re Numeri 6:​3, 4 sa. Nasirǁîn ge ge mā-amhe tama hâ i xûi-e ā tsî draibe di tsîna ǂûsa. Nau Israelǁîn ge xûi-e ā tsî draibe di tsîna gere ǂû, nē xūn ge ǁîn ǃaroma ge tsū tama hâ i. Elobmîs ge xûi-e Eloba xu hâ ǀkhaeb ase ra ǁguiǃā tsî ra mî: “ǂAuxûi-i khoeb di ǂgaoba ra ǃgâiaǂgao kaisa.” (Psa. 104:​14, 15) Nē xūn ge khoen di ûiga gere ǁkhoaxa kai xawen ge Nasirǁîna māsenxase ǁîna xu gere ǂgōsen. c

5. Madianni tsî Marselas tsîna tae-e māsenxase dīsa ge ǁhûi tsî tae-i ǃaroma?

⁵ Nasirǁîn khami da ge sada tsîna māsenxase Jehovab ǃoabas ǃnâ ǃnāsa-e ra dī. Madiani tsî Marselas di aiǁgausa ǃgaoǃgâ re. d ǁÎra ge ǃgâi ûiba ge ūhâ i. Madiani ge ǃgâi sîsen-e ge ūhâ i tsîra ge ǁnā-amaga kai îxa ommi ǃnâ gere hâ. Xawe ra ge Jehovab di ǃoabas ǃnâ ǃnāsase gere dī ǂgao. ǁNā mîǁguiba sīǃnâs ǃaroma ra ge ge mîǁgui, îra ǀnî ǀkharaǀkharana dī. “Mari-em ge ǀorose ge sîsenū tsoatsoa” ti ra ge ra mî. “ǂKhari omrosa ǃoa doe tsîm ge sîm audosa ge ǁamaxu.” Madianni tsî Marselas tsîn nē xūna māsenxase nî dīs ge ge ǂhâbasa tama hâ i, xawe ra ge nēsa ge mîǁgui Jehovaba ra ge ǃnāsase gere  ǃoaba ǂgao amaga. Ū ra hân ǀkha ǂâu tsî ra ge ǃgâiaǂgaoba ra hōǃâ nē mîǁguiga ra ge dī amaga.

6. Tae-i ǃaroman Xristeǁîna nētsē māsenxase xūna ra dī? (Ai-īsib tsîna mû re.)

⁶ Xristeǁîn ge nētsē ǃgâiaǂgaoba ra hōǃâ, māsenxasen ǁîn ǁaeba sîsenū tsî ǃnāsase Jehovaba ra ǃoaba o. (1Kor. 9:​3-6) Jehovab ge nē xūna dīsa ǁgui-ai da tama hâ, tamas ka io i ge māsenxase da ra ǁnāxu xūna tsū tama hâ. Aiǁgause, ǀnîn ge ge mîmâi în tā ǁîn omdi, oms ǀguru i tamas ka io sîsenni ǂhâban hâ-e ūhâ. ǂGuin ge ge mîmâi în tā ǃgamme tamas ka io ǀgôana hō ǃgammeb khaoǃgâ. ǀNîn ge ge ǁhûi în ǂhâsib hâba sī ǃoaba, ǁnās ǁîn ǀhōsan tsî omaride xu ǃnūse hâsa ǃkhōǂga hâ xawe. ǃNāsa da hoada ge nē xūna māsenxase ge dī, Jehovaba da ǁkhā da a i hoa-e ra mâ ǂgao amaga. ǂÂis ǃnâ ūhâ re Jehovab ra ǃgôaǃgâsa māsenxase du ra ǁhûi mîǁguiga kai tamas ka io i ga ǂkhariro xawe.—Heb. 6:10.

MÂǂOA TSÎ NAUNA XU ǀKHARA

7. Tae-i ǃaroma i ge ǀnîsi ǃgom i Nasirǁîna ǁîn di mîmâisa ǃkhōǀgarasa? (Numeri 6:5) (Ai-īsib tsîna mû re.)

⁷ Khomai re Numeri 6:5 sa. Nasirǁîn ge ge mîmâi ǁîn ǀûnan ǁara tidēsa. Nēs ge ra ǁgau ǀoasasen ge Jehovaba ǃoa gere ǃgamǃgamsensa. Xristeǁî i ga gaxū ǁaeba Nasirǁî, o i ge ǁî-i ǀûna kaise gaxū tsî naun xa ǃkhaese gere mûǃāhe. ǁÎb ǂnamipe hâ khoen ga ǁîba ǃgôaǃgâ tsî ǁîb mîmâisa ǃkhōǀgarasa ǂkhâǃnâ, o i ge Nasirǁîsisa ge supu i. Tsûaǂgaoxase i ge ǀnî ǁaegu ai Nasirǁîna ǃgôahe tamas ka io ge ǂkhâǃnâhe tama hâ i. Kēbo-aob Amosi ǁaeb ǃnân ge Jehovaba ge ǃoaba ǀû Israelǁîna, “Nasirǁîga ǂau xûi-e ge ā kai.” Nēsa gu ge ǀnîsi ge dī î gu Nasirǁîn di mîmās xûi-e ā tama is disa khôa. (Amo. 2:12) ǀNî ǁaegu ain ge Nasirǁîna ǁkhoaǂgaosiba ge ǂhâha i, ǁîn di mîmâisa ǃkhōǀgara tsî mâǂoasa.

8. Benjamenni aiǁgausa mati ra ǂkhâǃnâ da?

⁸ Jehovab huib ǀkhas tsîna da ge ǁkhoaǂgaose nauna xu ra mâǂoa tao ta ga xawe. Benjamen ti ǀon hâ disi kurixa axab Norweb ǃnâ ra hâb aiǁgausa ǃgaoǃgâ re. Ukrainni ǃnâ hâ torob ǃaromab ge skola ǁaxasiba ge ūhâ i, ǁîn ǂkhâǃnâsa ǁgaus ǃaroma. ǀGôan ge ge mîbahe în Ukrainni di ǃkhaub kleurna ana tsî ǃhūb amsa ǁnae. Nē ǁaxasib ǃnâ ǁhaosa xub gere ǂgōsen amagab ge Benjamena ǃnūse ge mâ i. Xawes ge ǁgauǃnâ-aosa  mûbis ge, o ge mî: “ǀKhī re i hā ǁnae, ǃâu tsi da ge hâ.” Benjamenni ge ǁkhoaǂgaose ǁgauǃnâ-aos tawa sī tsî ge mî: “Tita ge ǀkhā-e ǁhûi tama tsî ta ge ǂgīǂgōsi xūn ǃnâ ǃâ ǂgao tama hâ. ǂGui ǃgâsan Jehovaba ra ǃoaban ge ǃkhōsis ǃnâ ǂnôa, toroban ǃkham ǂgao tama amaga.” ǁGauǃnâ-aos ge ǁnâuǃā tsî Benjamena ge mîba îb tā ǃâ. Xawen ge ǁîb ǃgubis ǀgôana ge dî bi tsoatsoa tae-i ǃaromab ge ǃâ tama hâ isa. Benjamenni ge kaise ge ǃhuri hâ i tsîb ge gere ā ǂgao. Xaweb ge ǁkhoaǂgaose ǁgauǃnâ-aosab ge mîba xū-e hoa ǀgôana ge mîba. ǁNās khaoǃgâb ge Benjamena ǁîb ǁgûra ge mîba, Jehovab ge huibi tsî ǁkhoaǂgaosiba a mâbisa îb ǁîb ǂgomsa ǁkhauba.

9. Mâ ǀgaub ǃnâ da Jehovab ǂgaoba a ǂkhîǂkhî ǁkhā?

⁹ Jehovab ǂâisa dīsa da ra ǁhûi, amaga da ge hoa khoena xu ra mâǂoa. ǁKhoaǂgaosiba da ge ǂhâ hâ, î da khoena sîsenni tamas ka io skoli tawa mîba Jehovaba da ra ǃoaba ǃkhaisa. Nē ǃhūbaib tanisen ǀgaub tsî ǂâiǀgaub ra ǁgaiǂoa khami da ge ǃnāsase nî ǃgombahe, Elobmîs ǂgaoǀkhādi ǃoagu ûi tsî ǃgâiǂhôasa nau khoena aoǁnâbasa. (2Tim. 1:8; 3:13) Hoaǁae ǂâis ǃnâ ūhâ re, Jehovab ǂgaoba da ge ra “ǂkhîǂkhî,” ǁkhoaǂgaose da ga ǁîba ǃoaba tama khoena xu mâǂoa tsî ǀkhara o.—ǂKhm. 27:11; Mal. 3:18.

JEHOVABA ǂGUROSE SA ÛIB ǃNÂ MÂI

10. Numeri 6:​6, 7 ǃnâ māsa mîmâsa ǁnâuǀnamsa mati Nasirǁîga gere ǃâitsâ?

¹⁰ Khomai re Numeri 6:​6, 7 sa. Nasirǁîn ge ǁō hâ khoena ǀgūsa ge mā-amhe tama hâ i. ǀNîsi du ge ra ǂâi, nēs ge kai ǁguiba tama hâsa. Elobmîs ǁaeb ǃnân ge Nasirǁîna nē ǂgaoǀkhās xa kaise ge ǃgombahe ī, ǃgōsase ǀgū khoe-i gere ǁō-o. ǁNā ǃgôaǁaeb ǃnân ge khoena gere ǂgaoǀkhā-e în ǁōhâ soros xōǀkhā hâ. (Jhn. 19:​39, 40; ǃNǃkh. 9:​36-40) Xawe Nasirǁî-i ge ǁnā ǁnaetiba ge sao tama hâ i. Omaris ǃgomsina gu ge ǁnā ǁaeb ǃnâ gere sîsenǂam xawe gu ge Nasirǁîga ǀgaisa ǂgomsa gere ǁgau, ǁîgu mîmâisa ǃkhōǀgaras ǃnâ. Amaseb ge Jehovaba nē ǃoaba-aoga gere ǀgaiǀgai, î gu nē ǃgom ǁaega mâǃkharu.

11. Omaris mîǁguiga i ga dī, o i Xristeǁî-e tae-e ǂâis ǃnâ nî ūhâ? (Ai-īsib tsîna mû re.)

 ¹¹ Xristeǁîn ase da ge sida māǁnâsens mîǁguiba ǂhâǂhâsase ra mû. Sida omaridi ǃaroma da ra dī mîǁguigu tsî tanisen ǀgaub ge nēsa ra tsâǀkhā. ǃGarise da ge ra sîsen sida omaride kōǃgâs ǃnâ xawe da ge tātsē sida omaris turaga Jehovab ra ǂgaoǀkhā xūn ǂamai mâi tama. (Mat. 10:​35-37; 1Tim. 5:8) ǀNî ǁaegu ai da ge sida omaris khoena ǂkhîǂkhî tama xawe da ge Jehovaba ra ǂkhîǂkhî mîǁguiga a dī ǁkhā.

12. Omaris ǃnâb ge ǃgomsina gere hōǃâ ob ge Aleksandruba tae-e dī?

¹² Aleksandrub tsî ǁîb taras Dorinas aiǁgausa ǃgaoǃgâ re. Kuriba ra Elobmîsa ǁkhāǁkhāsen hâs khaoǃgâs ge, Dorinasa ge mîǁgui Elobmîsas da ǁkhāǁkhāsen ǀûsa tsîs ge gere ǂhâba îb ǁîs aob tsîna ǀû. Xaweb ge ǃnomsa tsî ǃgâi ǀgaub ǃnâ ge mîba si aiǃgûb nîsa. Dorinas ge nēs ǀkha ge ǂkhî tama hâ i tsî gere ǁgaribi îb ǁkhāǁkhāsen ǀû. Aleksandrub ge ra mî, ǁnâuǃā ǂgaob ge gere ǁîs tanisen ǀgauba xawe i ge ge supu tama hâ i. ǀNî ǁaegu aib ge Dorinas gere mîǁgaiǁgaibi, o gere ǀûsen ǂgao Elobmîsa ǁkhāǁkhāsensa. Xaweb ge Aleksandruba Jehovaba ǂgurose gere mâi tsî ǁkhā ǁaeb ai ǁîb tarasa kai ǀnammi tsî ǃgôasib tsîna gere ǁgau. ǀAms ais ge ǁîb di ǃgâi aiǁgausa ge ǂkhâǃnâsi, is Elobmîsa ǁkhāǁkhāsen tsoatsoa tsî ega ǁāǁnâhe.—Nēsa mûs ǃaroma jw.orgs ai Alexandru and Dorina Văcar “ǀNammi ge ǃnūǃnâxa tsî ǃgâi” ti hâ vidioba kō re “Truth Transforms Lives” ti hâ saogu ra ǃâgu ǃnāga.

13. Mati da ǀnamma Jehovab tsî sida omaris tsîna a ǁgau ǁkhā?

¹³ Jehovab ge omarisa ge ǂnûiǂgā tsîb ge ǂhâba hâ î da ǂkhîsa omarisa ūhâ. (Efe. 3:​14, 15) Ama ǂkhîba da ga ra hōǃâ ǂgao, o da ge Jehovab ra ǂgaoǀkhā da xūna nî dī. ǂÂis ǃnâ ūhâ re Jehovab māsenxase du ra dī xūna ra ǃgôaǃgâ ǃkhaisa, sadu omaride kōǃgâ tsî du ǁîna ǀnammi tsî ǃgôaǃgâsiba ra ǁgau o.—Rom. 12:10.

NASIRǁÎN KHAMI ǂKHÂǃNÂGU

14. Ham-e da ǃgōsase sida mîdi ǀkhā nî ǂkhâǃnâ?

¹⁴ Jehovaba ǃoabasa ra ǁhûi khoen hoan ge nētsē māsenxase ǁguibade ra dī, ǁîban a ǀnam amaga. ǁNāsa dīs ge hoaǁae supu tama hâ. Mati da a huigu ǁkhā î da ǁkhā ǀgauba ǁgau? Nēsa da ge  sada mîdi ǀkhā ǂkhâǃnâgus ǃnâ-ū a dī ǁkhā. (Job. 16:5) Sadu ǀhaohâb ǃnân ǀnîna hâ hîna ǁîn ûiga ra ǀgui ǃgubu kai ǂgaona în Jehovaba ǃnāsase dība. ǂKham khoen hîna ǃgom i ga xawe skoli ǃnâ ra mâǂoana du ūhâ. Elobmîsa ra ǁkhāǁkhāsen khoen tamas ka io ǃgâsa-e du a ǂan ǂgomǂgomsase mâǀgaras ǀkha ǃgomsi-e ūhâna, omaris khoen xan ra ǁgâiǀāhe amaga. A da mâǃēs hoasa sîsenū tsî sida ǃgâsan ǀkha ǃhoa tsî ǁgâiǂûisen, matikōse da ǁîn di māsenxa gagab tsî Jehovaban ra dība xūna ra ǃgôaǃgâ ǃkhaisa.—Flm. 4, 5, 7.

15. Matin ge ǀnîna ǀoasa ǁaeba ra ǃoaba ǃgâsana hui?

¹⁵ ǀNî ǁaegu ai da ge Jehovaba ǀoasa ǁaeba ra ǃoaba ǃgâsana a hui ǁkhā. (ǂKhm. 19:17; Heb. 13:16) Nēb ge ǂgomǂgomsa kaira ǃgâsas Sri Lankas ǃnâ ra hâs di turaba. ǃKhōǃoas ta kaira khoen maris ge ge ǀarohe tsîs ge ǀgam ǂkham aimâba-ao ǃgâsara gere hui ǂgao, î ra ǁîra aoǁnâ sîsenni ǃnâ aiǃgû ǃgom mâsigu ǃnâ. ǁNā-amagas ge ge mîǁgui îs mâ ǁkhâb hoaba ǁîra telefona mâtare ba. ǁNā ǃgâsas ge ǃgâi ǂâi ǀgauba ge ūhâ i.

16. Nasirǁîna xu da tae-e ra ǁkhāǁkhāsen?

¹⁶ ǃGâi aiǁgausa da ge Nasirǁîna xu a ǁkhāǁkhāsen ǁkhā. Nasirǁîn xa ǁkhāǁkhāsens ge xu-e sida ǀhomsi ǁGûb Jehovab xa ra ǁkhāǁkhā da. ǁÎba da ra ǂkhîǂkhî ǂgao ǃkhaisab ge a ǂan tsî da māsenxase sida māǁnâsens mîǁguiba ra dīǀoaǀoa ǂgao ǃkhaisa. ǃGôasibab ge ra ǁgau da mati da ǁîba ǀnamma nî ǁgaus ǃēsa mā das ǃnâ-ū. (ǂKhm. 23:​15, 16; Mrk. 10:​28-30; 1Jhn. 4:19) Nasirǁîn di ǂnûiǂgās ge ra ǁgau, Jehovab sida ǁguiǂgāsende ra mûsa tsîb ǁîba da ra dība xūn ǃaroma a ǀnam dasa. A da aiǃgû tsî māsenxase Jehovaba ǃoaba ǀgara tsî sida ǁkhāsib hoaba ǁîba mā.