1-2. Tae-i ǃaroma da a tsâ ǁkhā Jehovab sida ǀgorede ǃeream tama hâsa?

 “ǃKHŪB ǃnâ ǃgâiaǂgao re ob ge ǁîba sa ǂgaob di turaga nî mā tsi.” (Psa. 37:4) Kaise îxa mîmās ge ǁnāsa. Xawe da nî ǃâubasen îb Jehovaba ǂgan da ra xūn hoana ǁkhā ǁaeb ai māda? Tae-i ǃaromas nē dîsa a ǂhâǂhâsa? Saora aiǁgaudi xa ǂâiǃgâ re. ǃGamme tama hâ ǃgâsas ge ra ǀgore îs Gaosib aoǁnâ-aon skola ǃoa ǁkhauǂuihe. Xawe î ge kuriga ra ǃkharu ǁîs noxoba ǁkhauǂuihe tama hâ hîna. ǂKham ǃgâsab ge Jehovaba ra ǀkhoma îb huihe îb ǁkhōǁkhōsa ǀaeba xu ǂgau ǁkhā, îb ǃnāsase ǀhaohâba dība ǁkhā. Xaweb ge ǂgau tama hâ. Xristeǁî ǁgûn ge ra ǀgore în ǁîn ǀgôana amab ǃnâ hâ ǀgara. Xawen ge ǁîn ǀgôana ra ǁhûi Jehovaba ǃoaba ǀûsa.

² Sadu tsîn ge ǀnîsi Jehovaba xū-e ge ǂgan. Xawe du ge noxoba ǁnā du go ǂgan xū-e hō tama hâ. ǁNās xa ǃaromahe hâse du ge ǀnîsi ra ǂâi, Jehovab ǀnî ǀgoren ǀguina ra ǃeream xawe sadu din ose. Tamas ka io, o du ge ǀnîsi nî ǂâi sadu xū-e tsūse dī hâ ti. Janise ti ǀōn hâ ǃgâsas b ge ǁnāti ge re tsâ. ǁÎs tsî ǁîs aob ge Jehovaba ǃoa ge ǀgore, Betels ǃnâ ra gere ǃoaba ǂgao xui-ao. ǁÎs ge ra mî: “ǂGomǃgâ ta ge gere ǀgūǁaem Betels dawa sī nî ǃoabasa. Xawe i ge ǂgui kurina ge ǃkharu ǁîra Betelsa ǃoa ǁkhauhe tama hâ hîna.” Janise ge ra mî: “Tsûaǂgaos ge ge tsîs ge ǃgâi tamase ge tsâ.” ǂHâ ta ge gere tae-e ta ge tida dī îta Jehovaba tsûaǂgao kai. Kaise ta ge gere ǀgore Betelsa ǃoa īs ǃaroma. Tae-i ǃaromab ge Jehovaba ti ǀgorede ǃeream tama hâ i?

3. Tae-e da nē ǁkhāǁkhāǃâs ǃnâ nî ǃhoaǃgao?

 ³ ǀNî ǁaegu ai da ge dîsen ǁkhā, Jehovaba xare ti ǀgorede ǃgâ îb ta? ǀNî ǂgomǂgomsa ǃoaba-aogu Jehovab digu ǃkharuge ǁaeb ǃnâ ge hâ ī gu tsîn ge ǁkhā xū-e gere dîsen. (Job 30:20; Psa. 22:2; Hab. 1:2) Tae-e ǂgomǃgâsiba a mā du ǁkhā Jehovab sadu ǀgorede ra ǃereamsa? (Psa. 65:2) ǁNā dîsa ǃereams ǃaroma da ge ǂgurose saora xūna nî ǃeream: (1) Tae-e da Jehovaba xū a ǃâubasen ǁkhā? (2) Jehovaba sida xū tae-e ǃâubasen hâ? (3) Tae-i ǃaroma da sida ǀgorede nî ǀkhaǀkhara?

4. Jeremiab 29:​12, ǃoagub Jehovaba tae-e ra mîmâi dīb nîse?

⁴ Jehovab ge ra mîmâi sida ǀgoredeb nî ǃgâ tsî ǁnâusa. (Khomai re Jeremiab 29:12 sa.) Sida di Elob ge ǁÎb ǂgomǂgomsa ǃoaba-aona a ǀnam tsîb ge tātsē ǁîna ǃnōxu tide. (Psa. 10:17; 37:28) Xawes ge nēsa ǂâibasen tama hâ ǂgan da ra xūn hoanab nî māda ǃkhaisa. ǀNî xūn ǂgan da ra na da ge ǀnîsi ǀasa ǃhūbaib kōse nî ǃâu ǁîna da nî hōs aiǃâ.

5. Jehovaba taena ǂâis ǃnâ ūhâ sida ǀgoreteb ga ǃgâ o? ǁGuiǃā re.

⁵ Jehovab ge ǁÎb ǂâibasensab ǂâis ǃnâ ūhâse sida di ǀgorede ra ǃgâ. (Jes. 55:​8, 9) ǀGui xū-i ǁnā ǂâibasens di ǃâ i ge Jehovab ge ra ǂhâba îb hoa ǃhūbaib khoena ǁÎba ǁhûi, ǁîn ǂgaeǂgui-aob ase. Xaweb ge ǁGâuaba ra mî khoen ge kaise nî ǂkhî ǁîn ga aitsama ǂgaeǂguisen o. (Gen. 3:​1-5) ǁGauab ta mî xū-e ǂhumib ase ǁgauǂuisab ge Jehovaba khoena ge mā-am în aitsama ǂgaeǂguisen. Xawe-i ge khoesib di ǂgaeǂguisa nētse da ra hōǃâ ǂgui ǃgomsina ǃaroma hâ. (Aoǁn. 8:9) ǁNâuǃā da ge ra Jehovab nē ǃgomsin hoana nēsi ūbē tidesa. Nē ǃgomsin hoanab ga nēsi ūbē o, o i ge Elob ǃnâ ǂgom tama hâ khoena nî ǂgom, khoen ǃgâise a ǂgaeǂguisen ǁkhāsa. Tsîn khoena ǁîn di ǃgomsina, aitsama a ǀam kai ǁkhā ǃkhaisa.

6. Tae-i ǃaroma da ǂgomǃgâsiba nî ūhâ Jehovab hoaǁae ǀnamxaǃnâ tsî ǂgomǂgomsa xū-e nî dīsa?

⁶ Jehovab ge ǁkhā xūna ǃkharagaǃnâgu ǀgaugu ǃnâ a ǃeream ǁkhā. Aiǁgauseb ge Gao-aob Hiskiaba kaiseb ge ǀaesen hâ i o, Jehovaba gere ǀkhoma îb hui-e îb ǂgau ǁkhā. Jehovab ge ǁîb ǀgoresa ge ǁnâu-am tsî ge ǂgauǂgau bi. (2Gao. 20:​1-6) Xaweb ge Apostel Paulub tsîna Jehovaba ge ǀkhoma îb “sorosi ǃgomsiba” ūbēbahe. ǁNā i ge ǀaeba ǃoa ǀnîsi ge re ǁnaeǁgau. Xaweb ge Jehovaba ǁnā ǃgomsiba Pauluba xu ge ūbē tama hâ i. (2Kor. 12:​7-9) Apostel Jakobub tsî Petrub di aiǁgaudi xas tsîna ǂâiǃgâ re. Hoakha ge Gao-aob Herodeb xa gere ǃgamhe ǂgao. ǀHaohâb ge Petruba ge ǀgoreba tsî ǀnîsi Jakobub tsîna. Xaweb ge Jakobuba ge ǃgamhe tsîb ge Petruba buruburuxa ǀgaub ai ge sâuhe. (ǃNǃkh. 12:​1-11) ǀNîsi du ge ǂâi ǁkhā, ‘Jehovaba tae-i ǃaroma Petrub ǀguiba ge sâu?’ Elobmîs ge ǁnā-e ǁguiǃā tama hâ. c Xawe ǀgui xū-i hîna da a mî ǁkhā i ge Jehovab ge a ǂgomǂgomsa. (Deu. 32:4) Tsî da ge a ǂan Petrub tsî Jakobub tsîkha hoakha ge Jehovab xa ǀnamhe tsî ra ūǃoahe. (J.ǂHa. 21:14) ǀNî ǁaegu aib ge Jehovaba sida ǀgorede ǃâubasen tama da hâ ǀgaub ai ǃeream ǁkhā. ǂGomǃgâ da ge ra Jehovab a ǂgomǂgomsa ǃkhaisa tsîb hoaǁae ǀnammi xa ra ǂkhaǃnâhesa. O da ge ǃgae tama hâ ǁÎb sida ǀgorede ra ǃeream ǀgaub xa.—Job 33:13.

7. Taena xu da nî ǂgōsen tsî tae-i ǃaroma?

⁷ ǂGōsen da ge ra sida di mâsiba nau  khoen dib ǀkha ǀgopeǀnōsa xu. Aiǁgause, Jehovaba da ge a ǂgan ǁkhā îb huida. Xawe da ge ǁnā da go ǀgoreba xū-e hō tama. Tsî da ge ēga ra ǁnâu ǀnî hâ khoe-i go ǁkhā xū-e sida go ǂgan-e a ǀgorebasa. Tsî da ge ra mû ǁnā khoe-i di ǀgores go ǃereamhesa. Anna ti ǀon hâ ǃgâsas ge ǁnāti i xū-e ge ǃkharuǃnâ. ǀGores ge ge î-i ǁîs aob Mateuba ǂgau kankersa xu. ǁKhā ǁaeb ai i ge ǀgam kaira Xristeǁî ǃgâsara tsîna kankersa ge ūhâ i. Annas ge ǀaexase Mateuba gere ǀgoreba tsî nau ǀgam ǃgâsara tsîna. Nau ǀgam ǃgâsara ge ge ǂgau xaweb ge Mateuba ge ǁō. Annas ge ra dîsen, “nē ǃgâsa ra Jehovab xa ra go hui-e amaga go ǂgau.” ǁNāti-i nî īs ga o, ob Jehovaba mati io ǁîs ǀgoredi tsîna ǃeream tsî ǁîs aob tsîna ǂgauǂgau tama? Xawe da ge a ǀū nau ǀgam ǃgâsara go tae-i ǃaroma a ǂgausa. Xawe ǂan da as ge Jehovab ge ǀgūǁae nē da ra hōǃâ ǃgomsiga nî ǀam kai. Tsîb ge ra ǁkhore ǁîb ǀhosan ǁō ge na khâisa māsa. —Job 14:15.

8. (a) Jesajab 43:2 ǃoagub Jehovaba mati ra ǂkhâǃnâ da? (b) ǀGoresa mati ra huida ǃgomǁaega da ga ǃkharuǃnâ o? (ǀGores ge ra huida î da ǃgomsina tanî ti hâ vidioba kō re.)

⁸ Jehovab ge hoaǁae nî ǂkhaǃnâ da. ǀNamxaǃnâ ǁGûb aseb ge Jehovaba ǂhâba tama hâ tsûba da nî hōǃâsa. (Jes. 63:9) Xaweb ge ǁÎba ǁkhauba da tama hâ hōǃâ da ra ǃgomsina xu. ǀNî ǁaegu ai ǃāgu tamas ka io ǀaes flaman ǀkhā ra ǀgopeǀnōhena. (Khomai re Jesajab 43:2 sa.) Xaweb ge ra mîmâiba da huidab nîsa î da ‘ǃkharu,’ nē ǃāgu tsî flamga ǃoa ra ǁnaeǁgause. Mâ ǃgomsi-i ǀgui-e da ga nēsi a ūhâ xaweb ge Jehovaba hoaǁae nî huida îda ǁîba ǃoaba ǀgara. Jehovab tsîn ge ǁÎb di ǀgaisa ǃanu gāgāba sida ra mā, î da hui-e tsî nē xūn ǃnâ mâǀgai. (Luk. 11:13; Fil. 4: 13) ǁNās ǃaroma da ge hoaǁae ǂgomǃgâsiba a ūhâ ǁkhā ǁîb hoaǁae ǂhâda hâna nî mādasa. Î da mâǃkharu tsî ǁîb ǃoagu ǂgomǂgomsase hâ. d

9. Jakobub 1:​6, 7 ǃoagu, da tae-i ǃaroma Jehovaba nî ǂgomǃgâ huidab nîsa?

⁹ Jehovab ge ra ǂhaba îda ǁîba ǂgomǃgâ. (Heb. 11:6) ǀNî ǁaegu ai da ge tsâ ǁkhā sida di ǃgomsin ge kaise a kai tsî da ge ǁîna tanî ǁoa ti. Tsî da ge a înganǀgē ǁkhā Jehovab nî huidasa. Xawes ge Elobmîsa ǂgomǃgâsiba ra mā da, Jehovab ǀgaib ǀkhā da “ǂnubiǂgoaga nî īǂam” ǃkhaisa. (Psa. 18:29) ǁNāti-i ǂâiǀgauba da nî mā-ams xa da ge ǂgomǃgâsib ǃnâ nî ǀgore. Tsî da ge nî ǂgomǃgâ Jehovab hoaǁae sida di ǀgorede nî ǃereamsa.—Khomai re Jakobub 1:​6, 7 sa.

10. Jehovaba ǃoa da ga ǀgore toas khaoǃgâ da nî dī xū-i aiǁgausa mā re?

¹⁰ Jehovab ge ra ǂgaoǀkhā da, î da sida ǃâba dī ǀgore toa da ga o. Aiǁgauseb, ge ǃgâsaba Jehovaba a ǂgan ǁkhā îb hui-e sîsen-e xu ǂgan ǁnāsensa tsî ǀkharib kai ǀhaosa hâǃnâ ǁkhā. Jehovaba ǁnā ǀgoresa mati a ǃeream ǁkhā? ǀNîsib ge nē ǃgâsaba ǂhâb hâ ǁkhoaǂgaosiba a mā ǁkhā îb ǁîb di ǀhônkhoeb ǀkha si ǃhoa. Xaweb ge nē ǃgâsaba khâima tsî ǁîb di ǀhônkhoeb ǀkha sī ǃhoa tsî nî ǂganǁnâsen. ǀNîsib ge ǂgui ǃnāde nî ǂgan. ǀNîsib ge ǀnî sîsenǁare-aob ǀkha nî ǃhoa îkha sîsen ǁaega dawa. Tsî ǂhâbasa i ga ob ge ǀnîsi a mî ǁkhā, mātarehe tamaseb ge sîsen-e xū a ī ǁkhā ti.

11. Tae-i ǃaroma da hoaǁae nî ǀgore sida di ǂâiǂhansendi ǃaroma?

¹¹ Jehovab ge ra ǂgaoǀkhā da î da hoaǁae  sida di ǂhânsendi ǃaroma ǀgore. (1Tes. 5:17) Jesub di mîde xu da ra ǁnâu khammi i ge sida di ǂgande ǁkhā ǁaeb ai ǃereamhe tide. (Luk. 11:9) ǁNā-amaga da ge tā nî ǀûsen. ǂGaoba xu da ge hoaǁae nî ǀgore. (Luk. 18:​1-7) Aiǃgû tsî da ga ǀgore o xū-i ǃaroma o da ge Jehovaba ra ǁgau, nē da ra ǂgan xū-i a ǂhâǂhâsaba da ǃkhaisa. Tsî da ge ǂgomsa ra ǁgau ǁîb nî huidasa.

12. (a) Tae-e da nî dîsen ǂgan da ra xūn xa tsî tae-i ǃaroma? (b) Tae-e da nî dī îda ǁgau sida ǀgoredi Jehovaba ǃgôasiba ra mā ǃkhaisa? (“ Ti ǀgorede Jehovaba ǃgôasiba ra ǁgau?” ti hâ boksisa khomai re.)

¹² ǀGores ǃnâ da ra ǂgan xūna da ga hō tama io, o da ge ǃnona dîde dîsen ǁkhā. ǂGuros ge, ‘ǂhanû xū-e ta ra ǀgoreba?’ ǀNî ǁaega da ge ra ǂâi, ǂan da asa tae-i sida ǃaroma a ǃgâisa. Xawe ǂgan da ra xūn ge ǀnî ǁaegu ai sida ǃaroma ǃgâi tama hâ. ǃGomsi-i ǃaroma da ga ǀgore o, o i ge ǀnîsi ǀnî hâ ǃereamsa hâ ǁnā ǃgomsib ǃaroma sida ra ǂâis xa. Tsî ǀnî xūn hîna da ra ǂganan ge Jehovab ǂâis ǀkha ǀgui tama hâ. (1Jhn. 5:14) Aiǁgause, ǀgapiga da go ro ǃhoaǃgao ǁgûn di aiǁgaus xa ǂâi re. Jehovaba ra ge ge ǂgan, îb ǁîra ǀgôaba aiǃgû tsî ǁîba ǃoaba ǀgāra. ǁNā ǂgan ǀgaub ge ǂhanuse ra ǀō. Xaweb ge Jehovaba khoe-i xare-e ǁgari tide ǁîba ǃoabasa. ǁÎb ge ra ǂhâba î da hoada ǁhûi ǁîba ǃoabasa, sida ǀgôana ǃkhōǂgā hâse. (Deu. 10:​12, 13; 30:​19, 20) O ra ge ǁgûra aiǁgause Jehovaba ga ǂgan hâ îb hui nî îra ǁîra ǀgôab ǂgaoba tsâǀkhā îb ǂkhâǃnâhe, Jehovaba ǀnam tsî ǁîb di ǀhōsa kaisa.—ǂKhm. 22:6; Efe. 6:4.

13. Hebreǁîn 4:16 ǃoagub Jehovaba mâǁae nî huida? ǁGuiǃā re.

¹³ ǀGamǁî dîs hîna da a dîsen ǁkhās ge, ‘Jehovab di ǁaeba ti ǀgoresa ǁnâu-amsa?’  Nēsi di ge sida di ǀgorede nî ǃereamhe ti da ge a tsâ ǁkhā. Xawe Jehovab ge ǂhanu ǁaeba a ǂan huidab nîsa. (Khomai re Hebreǁîn 4:16 sa.) ǂGan da ra xū-e da ga ǁnā ǁaeb ai hō tama io, o da ge a ǂâi ǁkhā Jehovab ǃereams a ‘hî-i’ ti. Xawe ǁîb ǃereams ge ǀnîsi ‘nēsis ose.’ Aiǁgause, ǂkham ǃgâsab xa ǂâi re hîna go ro ǀgoreba îb ǁîb di ǀaeba xu ǂgauǂgauhe. Jehovab ga buruburuxa ǀgaub ǃnâ ǁîba ǂgauǂgau hâ o, ob ge ǁGâuaba ga mî hâ nē ǃgâsab Jehovab xab ǂgauǂgauhe hâ ǃkhais ǃaroma ǀgui ǁîba ra ǃoabasa. (Job 1:​9-11; 2:4) Tsî Jehovab ge ǀnai ǁaeba mîmâi hâ hoa ǀaegab nî ūbēsa. (Jes. 33:24; J.ǂHa. 21:​3, 4) ǁNā ǁaeb nî hās kōse da ge Jehovaba xu a ǃâubasen ǁoa, îb buruburuxa ǀgaub ǃnâ ǂgauǂgau da. Ob ge nē ǃgâsaba Jehovaba a ǂgan ǁkhā îb ǀgaib tsî ǁnā ǂkhîb tsîna māhe, nē ǀaeb ǃnâ mâǃkharu tsî Jehovaba ǂgomǂgomsase ǃoaba.—Psa. 29:11.

14. Tae-e da Janise di aiǁgausa xu ra ǁkhāǁkhāsen?

¹⁴ Janise di aiǁgaus xa ǂâi re, hîna gere ǀgoresa îs Bethels ǃnâ sī ǃoaba. Koro kurigu khaoǃgâs ge ǁîsa ge ǁnâuǃā Jehovab ge ǁîs di ǀgoresa ǃeream ǃkhaisa. Xawe ǁîs ge ǃâubasen tama hâ ī ǀgaub ǃnâ. ǁÎs ge ra mî: “Jehovab ge ǁnā ǁaeba ge sîsen-ū îb ǂgui xūna ǁkhāǁkhāte tsî huite î ta ǃgâi Xristeǁî kai. ǁÎb ǃnâ ta ūhâ ǂgomǃgâsib nî kai ge īs ge. Ti Elobmîs ǁkhāǁkhāsens di ǁnaetigu ge nî ǃgâiǃgâihe ge īs ge. Tsî ta ge tida ǃnâ ǂkhîba ga ūhâ hâ. Nē ǂkhîb ge tita hâǃnâ mâsiba xu hâ tama hâ. Nēsi ta ga Jehovaba mâ ǃkhai i hoa-i ǃnâ ǃoabas tsîn hoan ǃnâ.” Ēga ra ge Janise tsî ǁîs aob tsîra ge ǁkhauǂuihe ī ra ǃnarimâra sîsen-e dī. Kō-oa ta ga o, tis ge Janise sa ra mî: “Ob ge Jehovaba ti ǀgorede ge ǃeream xawe ǃâubasen tama ta hâ ǀgaub ǃnâ. ǁAeba i ge  ge ū îta mû nē ǃereams matikōse a îxa ǀgausa. Xawe ta ge ra gangan ǁîb di ǀnammi tsî ǃgâisib tsîna ta go hōǃâ ǃkhaisa”.

15. Tae-i ǃaroma da sida di ǀgore di ǃnâ ǀorose nî ǃgāsa? (Ai-īsiba mû re.)

¹⁵ ǃNonaǁî dîs ge, ‘ǀnî hâ xū-e ta nî ǀgoreba?’ ǀNî ǁaega i ge a ǃgâi sida ǀgoredi ǃnâ ǂgan da ra xūna ǃgāsa kaisa. Xawe i ge hoaǁae ǂhâbasa tama hâ ǁnāsa dīsa. Î da mûǂan Jehovab tae-e sida ǂhâbaba hâsa. ǃGamme tama ǃgâsas aiǁgaus xa ǂâi oa re, ǁîs ge gere ǀgore îs Gaosib aoǁnâ-aon skola hâǃnâ. ǁÎs ge nē skola ra hâǃnâ ǂgao īs ǂhâsib hâba sī ǃoaba ǁkhā. Aiǃgû tsîs ta ǀgore nē skola ǃoa ǁkhauǂuihesa, os ge Jehovab huiba ga ǂgan hâ īs mûǂan, ǀnî hâ ǃēn tsîn hâsa ǁîs aoǁnâ sîsen-es a khoraǂui ǁkhāna. (ǃNǃkh. 16:​9, 10) Tsî nēs xas go ǀgore toas khaoǃgâs ge ǃnarimâra mûǂam-aoba a dî ǁkhā, ǀgūse hâ ǀhaohâ-i hâsa hîna aimâba-aon ǂhâsiba ūhâba. Tamas ka ios ge ǁnâub berosa ǃoa sîǂkhanisa a sî ǁkhā, dî rasa mâpa i ǂhâsiba hâsa Gaosib aoǁnâ-aon ǃaroma. e

16. Tae-i ǃnâ da ǂgomǂgâsiba nî ūhâ?

¹⁶ ǁKhāǁkhāsen da go khami ǂgomǃgâsiba da ge ūhâ ǁkhā, Jehovab sida ǀgorede ǀnamxaǃnâ tsî ǂgomǂgomsa ǀgaub ǃnâ nî ǃereamsa. (Psa. 4:3; Jes. 30:18) ǀNî ǁaegu ai da ge ǃâubasen da go hâ i ǃereamde hō tide. Xaweb ge Jehovaba tātsē sida ǀgorede ǃgâ ǀû tide. ǁÎb ge kaise a ǀnam da. Tsîb ge tātsēs tsîna ǁnāxūǃgâ tide. (Psa. 9:10) ǁNā-amaga aiǃgû tsî “hoaǁae ǁîba ǂgomǃgâ” tsî sadu ǂgaoga ǁhōǂûi ǁîba ǃoa ǀgores ǃnâ-ū.—Psa. 62:8.