1-2. (a) Tae-i ǃaromab ge apostel Pauluba mî ǁkhā i ǀnammi ge “kaise ǂhâǂhâsa”? (b) Mâ dîde da nî ǃhoaǃgao?

 APOSTEL Paulub ge ǂgoms, ǃâubasens tsî ǀnammi xas tsîna a ǃhoa. Xaweb ge ǀams ai ge mî: “Nē ǃnonan ǃnâ a kaib ge ǀnamma.” (1Kor. 13:13) Pauluba tae-i ǃaroma ti ge mî? Hānîǁaeb ǃnâ î ge Elob mîmâi hâ ǀasa ǃhūbaib ǃnâ ǂgomsa ǁgausa ǂhâbasa tide, nē xūn hoan nî ama kai ǃkhais ǃaroma. Xawe da ge hoaǁae Jehovab tsî khoena ǀnams ǂhâsiba nî ūhâ. Mîhe rase ǁîna da ūba hâ ǀnammi ge ǀamosib kōse nî ǀgai.

² ǀNamma ūhâsa da ǂhâ hâ ǃkhais ǃaroma da ge ǃnona dîde nî ǃhoaǃgao. ǂGurose, tae-i ǃaroma da nî ǀnamgu? ǀGamǁîse, ǀnamma da mati ra ǁgaugu? ǃNonaǁîse, mati da ūba gu da hâ ǀnamma ǀgaisase nî ūhâ ǀgara?

3. Tae-i ǃaroma da nî ǀnamgu?

³ Tae-i ǃaroma i a ǂhâbasa î da ǀnamgu? Nau nî hâ ǃaromadi ǂam-ai, î ǀnamma ama Xristeǁîn ase ra mâǂoa kai da? Jesub ge Apostelga ge mîba: “Sadu ǁîǃnābe ūbagu hâ ǀnammi aib ge ǃhūbaiba nî mûǂan, ti ǁkhāǁkhāsabedu a ǃkhaisa.” (Jhn. 13:35) Tsî ǀnamma ūhâs tsîn ge ra ǀguiǃnâxa kai da. Paulub ge ge mî, ǀnammi ge ‘ǀoasa tsî ǀguiǃnâxa ǃgaeǀhaosa’. (Kol. 3:14) Xawe ǀnî ǂhâǂhâsa ǃaromas ǃgaos tsîna da ge nî ǀnamgu. Apostel Johaneb ge ǁîb  ǃgâsana ǃoa ge xoa: “ǁNā-i hîa Eloba ǀnam-i ge ǁî-i di ǃgâsa-i tsîna ǁkhāti nî ǀnam.” (1Jhn. 4:21) ǀNamma da ga ǁgaugu, o da ge Elob tsîna ǀnamma ra ǁgau.

4-5. Elob tsî nau khoen tsîna da ūba hâ ǀnammi ǁaegu hâ ǃgaeǀhaosa ǁguiǃā re.

⁴ Eloba da ūba hâ ǀnamma mati ǃgâsana da ūba hâ ǀnammi ǀkha ra ǃgûǀhao? Nēsa ǁguiǃās ǃaroma ǃgaoǃgâ re, sada ǂgaob mati soros ti nau ǃâgu ǀkha ra ǃgûǀhao ǀgauba. ǀAeǃkhō-aob ge ǃomǃarosa ǃkhō tsî ra kō, matikō ǃkhaeseb sida ǂgaoba ra ǂnausa. Nēsa dīs ǃnâ-ūb ge a mû ǁkhā sida ǂgaob mâsib mati hâsa. Tae-e da nē aiǁgausa xu a ǁkhāǁkhāsen ǁkhā?

⁵ ǀAeǃkhō-aob ga sida ǂgaob mati ra ǂnausa kō toas khaoǃgâb ge a, mû ǁkhā ǂgaob mâsib mati hâsa. ǁNās ǁkhās khami da ge sada tsîna nî ôaǃnâsen, î da kō Elob tsî khoen tsîna da ūba hâ ǀnammi matikōse a ǀgaisasa. ǃGâsana da ūba hâ ǀnammi go ǂkhabusa da ga mûǂan, os ge nēsa ra ǁgau Eloba da ūba hâ ǀnammi tsîn go ǂkhabusa. Xawe da ga hoaǁae nau ǃgâsana ǀnamma ǁgau, o î ge ra ǁgau Eloba da ūba hâ ǀnammi kaise ǀgaisasa.

6. ǃGâsana da ûba hâ ǀnammi ga ǂkhabu, os ǁnāsa tae-i ǃaroma ǁkhōǁkhōsa? (1 Johaneb 4:​7-9, 11)

⁶ Sida ǃgâsana da ūba hâ ǀnammi ga ǂkhabu, os ge ǁnāsa kaise ǁkhōǁkhōsa ǃgomsiba ra ǁgau. Tae-i ǃaroma? ǁNās ra ǁgau amaga, Jehovab ǀkha da ūhâ ǀhōsagusis go ǂkhabusa. Apostel Paulub ge ǁnāsa ra ǃgāsa kai, nētib ra ǂâiǂâiǃnâ da o: “ǁNā-i hîa ǁî-i di ǃgâsa-i hîa i ra mû-e ǀnam tama-i ge Elob hîa i mû tamaba a ǀnam ǁoa.” (1Jhn. 4:20) Nēsa xu da tae-e ǁkhāǁkhāsen ǁkhā? Jehovab ge kaise ra ǂkhî, ‘sada ga ǁkhāti ǀnamgu’ o.—Khomai re 1 Johaneb 4:​7-9, 11 sa.

7-8. Mâ ǀgaugu ǃnâ da ǀnamma ǁgaugu ǁkhā?

⁷ ǁAeba xu ǁaeb ǀkha da ge “ǀnamgu re” ti hâ mîmāsa, Elobmîs ǃnâ ra khomai. (Jhn. 15:​12, 17; Rom. 13:8; 1Tes. 4:9; 1Pet. 1:22; 1Jhn. 4:11) Xawe ǀnammi ge ǂgaob ǂganagaba xu hâ tsâsiba. Nēb ge tsâsib hîna i khoe-e a mûǁoaba. ǁNās ǀkha da mati ǃgâsana ǀnamma a ǁgau ǁkhā? ǁNās ge sida mîdi tsî dīgu ǃnâs tsîna.

⁸ Amase ǂgui ǀgaugu ge hâ sida ǃgâsana da ǀnamma a ǁgau ǁkhāga. Saora aiǁgaude kō re: “ǀGūkhoe-i â-i ǀkha amaba ǃhoa.” (Sax. 8:16) ‘ǂKhîb ǃnâ sa ǀgūkhoe-i ǀkha ûi.’ (Mrk. 9:50) ǂGurose “ǃgôasiba ǁgausa turaxaba.” (Rom. 12:10) ‘ǃKhōǃoagu re.’ (Rom. 15:7) ‘A i nē-e nau-e . . ǀûba.’ (Kol. 3:13) “A i nē-e nau-i di ǃgomma tani.” (Gal. 6:2) ‘ǀGaiǀgaiǃnâgu ǀgara.’ (1Tes. 4:18) ‘Omkhâigu ǀgara.’ (1Tes. 5:11) ‘ǀGorebagu du re.’—Jak. 5:16.

9. Nauna ǁkhaeǂgaosa tae-i ǃaroma ǂhâǂhâsa ǀnamma da ga ǁgau o?

⁹ Hā re î da ǃhoaǃgao mâǀgaub ǃnâs tsîna da, nau ǃgâsana ǀnamma a ǁgau ǁkhā ǀgauba. Paulub ge ge mî: “ǀGaiǀgaiǃnâgu re.” Tae-i ǃaroma i ǃgâsana ǀgaiǀgaiǃnâs, tamas ka io ǁkhaeǂgaosa ǂhâǂhâsa ǀgau, ǀnamma ǁgaus diba? ǀNî ôaǃnâs ge ra mî, Paulub ge sîsenū mîs “ǀgaiǀgaiǃnâ” ti hâs ge ra ǂâibasen, “khoe-i xōǀkhā mâ tsî ǁî-e ǂkhaǃnâsa. Tsî ǁî-e huisa î-i ǀamo ûiba ǃoa garu daob ai ǃgû ǀgara.” Nau ǃgâsana da  ǁkhaeǂgao, tamas ka io ra ǀgaiǀgai ǃnās hoasa da ge ra ǁgau ǁî-e da a ǀnamsa.—2Kor. 7:​6, 7, 13.

10. Tsâbaǁhaos tsî ǁkhaeǂgaos tsîna mâ ǀgaub ǃnâ ra ǃgûǀhao?

¹⁰ Khoe-e tsâba tsî ǁkhaeǂgaos ge ra ǃgûǀhao. Mâ ǀgaub ǃnâ? ǀKhomxaǂgao khoe-i ge nau-i ǃgoma ra tsâ, o i ge ra ǂkhâǃnâhe nau khoe-e huisa. ǁNā-amaga da ge ǂgurose khoe-e ǀkhom tsî ǁnāpaxū ǁî-e nî ǁkhaeǂgao. ǃGaoǃgâ re apostel Paulub ge ra ǁguiǃā, matib Jehovab di ǀkhomxaǂgaosiba, ǁkhaeǂgaos hînab ra mās ǀkha ra ǃgûǀhao ǀgausa. Paulub ge Jehovaba ‘ǁGûb ǀkhomxaǂgaosigu dib tsî Elob hoa ǁkhaeǂgaob dib’ ase ra ǁguiǃā. (2Kor. 1:3) Nēbab ge Pauluba “ǀkhomxaǂgaosigu” ti hâ mîsa ra sîsenū, nau khoe-ets ra ǀkhom ots ra tsâ tsâsiga ra ǁguiǃāse. Elob ge ‘ǁGûb tamas ka io ǃGaoǃgaob ǀkhomxaǂgaosigu diba, tsamtsîǃnâsib ǁîba xu hâ xui-ao. Tsî i ge ǁnā ǀkhomxaǂgaosiba ǁîba ra ǂkhâǃnâ îb, sida ‘ǃgomsigu hoagu ǃnâ’ ǁkhaeǂgao da. (2Kor. 1:4) ǁGammi ǀausa xu ra hā ǃanu ǁgammi hîna khoe-e ra khoakhoa i, khamib ge Jehovaba khoakhoa tsî ra ǁkhaeǂgao da ǃgom ǁaegu ǃnâ. Mati da Jehovaba nau khoena ǀkhoms tsî ǁkhaeǂgaos ǃnâ ǁgae ǁkhā? ǀGui ǀgaub nēsa da a dī ǁkhāb ge, ǁkhaeǂgaosa mās ǀkha dī xū-e ūhâ ǀgauga omkhâisa. Nē ǀgauga a tae?

11. Koloseǁîn 3:12 tsî 1 Petrub 3:8 ǃoagu, da mâ ǀgauga ǂhâhâ ǃgâsana ǀnam tsî ǁkhaeǂgaosa?

¹¹ Tae-e nî hui da, î da aiǃgû nau khoena ǀnam tsî tsēs hoasa ‘ǀgaiǀgaiǃnâ’? Saora ǀgauga da ge a omkhâi ǁkhā, ǀkhomxaǂgaosib, ǃgâsa ǀnamgub tsî khoexaǃnâsib tsîna. (Khomai re Koloseǁîn 3:12 tsî 1 Petrub 3:8 sa.) Nē ǀgauga mati a huida ǁkhā? ǀKhomxaǂgaosiba tsâ tsî da ga, khoexaǃnâse sida ǃgâsana tsâba, os ge ǁnāsa ra huida î da ǁîna ǁkhaeǂgao ǃgomsinan ga hōǃâ o. Jesub ge ge mî: ‘Sa mîdi ge sa ǂgaob ǃnâ hâna ra ǁgauǂui. ǃGâi khoe-i di ǃgâi ǁuiba xun ge ǃgâi xūna ra hāu.’ (Mat. 12:​34, 35) Sida ǃgâsana ǁkhaeǂgaos ge kaise a ǂhâǂhâsa, nē ǀgaub ǃnâ da ǀnamma ra ǁgau xui-ao.

12. (a) Tae-i ǃaroma da ǂkhaikhari nî hâ? (b) Mâ dîde da nēsi nî ǃhoaǃgao?

¹² Hoa da ge aiǃgû tsî ra “ǀnamgu” ǂgao. (1Jhn. 4:7) Xawe i ge a ǂhâǂhâsa î da ǂâis ǃnâ ūhâ, Jesub ge mîsa ‘ǂgui khoen di ǀnammi ge nî ǃkhai.’ (Mat. 24:12) Jesub ge ge ǂâibasen tama hâ i, ǁîb di ǁkhāǁkhāsaben hoatsama nî ǀnam ǀûgusa. Xawe da ge ǂōrisase ǂkhaikhari nî hâ, î da tā ǃhūbaib khoen di ǀnamoǃnâ ǀgaugu xa ǂgaeǂkhapuhe. Nēs nauna da ra hâ-ū ǀgauba ra tsâǀkhā amaga. ǁNāsa ǂâis ǃnâ ūhâse, hā re î da saora ǂhâǂhâsa dîsa ǃhoaǃgao: Tae-e a huida ǁkhā, î da ǂan sida ǃgâsana da ūba hâ ǀnammi a ǀgaisasa?

13. Tae-e sida ǀnamma ǃâitsâ ǁkhā?

¹³ ǀGui ǀgaub hîna da a kō ǁkhāb matikōse i sida ǀnamma ǀgaisab ge, ûib mâsiga da ra sîsenǂam ǀgauba. (2Kor. 8:8) Nē mâsib xab ge apostel Petruba saorase ge xoa: “Î hoan ǂamai ǀaexase ǀnamgu, ǀnammi ra ǂgui ǁorena ǃgū-ai xuige.” (1Pet. 4:8) ǁNās ǀkha î ge naun di ǂkhabusasiga, sida ǀnamma a ǃâitsâ ǁkhā.

14. 1 Petrub 4:8 ǃoagu da mâ ǃnôa ǀnamma ǂhâhâ? ǁGuiǃā re.

 ¹⁴ Hā re î da ǂōrisase Petrub di mîde ǃgaoǃgâ. ǂGuro ǃâb 8ǁî ǁaraǃās dib ge ra mî, î da “ǀaexase ǀnamgu.” Petrub ge sîsenū mîs “ǀaexase” ti hâs ge ra ǂâibasen, “khoraǂuisen” ti. Tsî ǀgamǁî ǃâb ǁnā ǁaraǃās dib ge, ǀaexase ǀnamgus mati nî tsâǀkhā dasa ra ǁgau. Nē ǀaexa ǀnamma ūhâbagus ge ǃgâsan di ǁorena kōǃkharus ti ra ǂâibasen. Nēs xa da ge saorase a ǂâi ǁkhā: ǀNîsi du ge tafelsa ūhâ tsîs ge ǁnā tafelsa ǂgui ǂnaote ūhâ tamas ka io khôahâ ǃâroga. Kaise î ge nî supu, lapiba ū tsî tafelsa ǃgū-aisa, ǀgui ǀkhāb ǀguib ose xawe hoa tafelsa. “ǃGū-ais” ge ra ǂâibasen khoen ǁorena ǀûbasa. ǁNās ǁkhās khami î ge lapib tafels ai hâ ǂnaote ra ǃgū-ai khami, ǀnamma ra ǂkhâǃnâ da nau khoen di ǂkhabusasiga kōǃkharusa.

15. Sida ǃgâsana da ūba hâ ǀnammi ga ǀgaisa, o da tae-e nî dī hō? (Koloseǁîn 3:13)

¹⁵ Nau khoena da ūba hâ ǀnammi ge ǁnātikōse nî ǀgaisa, î-i hui da sida ǃgâsana ǀûbasa. Nēs ge ǀnî ǁaegu ai ǁguiǂgāsensa nî ǂhâ. (Khomai re Koloseǁîn 3:13 sa.) Nau khoena da ga ǀûba, o da  ge ra ǁgau sida ǀnammi a ǀgaisasa. Tsîs ge nēsa Jehovab tsîna ra ǂkhîǂkhî. Tae-i tsîna noxoba huida ǁkhā, î da nau khoen di dīsāde ǀûba?

16-17. Tae-e a hui da ǁkhā, î da nau ǃgâsan di ǂkhabusasiga kōǃkharu? ǁGuiǃā re.

¹⁶ ǃGâsan di ǃgâi ǀgaugu ai ǂâisa ǂnûi re, ǁîn di ǂkhabusasigu ais ose. Saora aiǁgaus xa ǂâi re. Mûnan-ai re ǁkhoaxa ǁaeba du ǃgâsan ǀkha ūhâsa. Tsî du ǁnā ǁkhoaxa ǂûǀhaos khaoǃgâ fotosa ra ǃkhōsa. Tsî ǂguro fotos ǀnîsi ǃgâi tamase nî mûsen ti du ra ǂâi, amaga du ge ǁnās ǀkha ǀgam tamas ka io ǃnāsa fotote ra ǃkhō kai. Xawe du ge ra mû ǁnā foto di ǀguis ǃnâb ge ǃgâsaba ǀnom tama hâ. Tae-e du ǁnā fotos ǀkha nî dī? ǁÎsa du ge ǀariǂui tsî nau ǀgam foto ra nî ūhâ ǀgara hoa khoen ǀnom hâ amaga, ǁnā ǃgâsab tsîna ǃkhōǂgā hâse.

¹⁷ Hā re î da fotona ǂâis ǃnâ da ra ǃkhō-mâi xūn ǀkha ǀgopeǀnō. ǃNāsase da ge ǃgâsan ǀkha da ra ūhâ ǁkhoaxa ǁaega ra ǂâihō. Xawe î ge ǀnîsi ǃgâsa-e ǀnî ǁae ǃgâi tama xū-e mî tamas ka io a dī ǁkhā. Tae-e da ǁnā ǁae nî dī? ǁNā fotosa du go ǀariǂuis ǁkhās khami, ǁnā tsū xū-e ǀariǂui. (ǂKhm. 19:11; Efe. 4:32) ǃGâsa-i go dī xū-e da ge a ǀuru ǁkhā ǂâihō da ga o, matikō ǁkhoaxa ǁaeba da ge ǁî-i ǀkha ūhâ-i ǃkhaisa. ǁNāti ī xūn ǂâis ǃnâ da ǃkhō-mâi  hâna da ge, hoaǁae ǃkhōǀgara tsî nî ǃgôaǃgâ.

18. Mâ ǂhâǂhâsa ǃâgu ǀnammi diga da go nē ǁkhāǁkhāǃâs ǃnâ ǃhoaǃgao?

¹⁸ Tae-i ǃaroma da ūbagu da hâ ǀnamma ǀgaisase ra ūhâ ǂgao? ǃHoaǃgao da go khami, ǃgâsana da ga ǀnamma a ǁgau, o da ge ra ǁgau Jehovaba da ǀnamsa. Mati da sida ǃgâsana ǀnamma ra ǁgau? ǀGui ǀgaub nēsa da dī ǁkhāb ge ǁîna ǁkhaeǂgaos ǃnâ-ū. Nau khoena da ga ‘ǀkhomxaǂgaosiba’ ūhâba, o da ge aiǃgû tsî nî ǁkhaeǂgaogu ǀgara. Mati da sida ǁaegu hâ ǀnamma ǀgaisase ūhâ ǀgara ǁkhā? ǃGâsan di dīsāde ǀûbas ǃnâ-ū, ǁnāsa dīs ga ǃgom xawe.

19. Tae-i ǃaroma-i nētsē a ǂhâǂhâsa ǀnamma ǁgaugusa?

¹⁹ Tae-i ǃaroma i nētsē ǃgōsase ǂhâǂhâsa ǀnamma ǁgaugusa? ǃGaoǃgâ re Petrub ge mā ǃaromasa: ‘ǀAms xūn hoan dis ge go ǀgū. ǁNā-amaga ǀaexase ǀnamgu re.’ (1Pet. 4:​7, 8) Nē ǁgai ǃhūbaib di ǀams ra ǀgū khami da tae-e ǃâubasen ǁkhā? ǁÎb saosaben xab ge Jesuba saorase ge kēbo: “Ti ǀons ǃaroma du ge hoaraga ǃhūbaib khoen xa nî ǁkhanhe.” (Mat. 24:9) Nēti ī ǁkhangus ǃnâ mâǀgais ǃaroma da ge ǀguiǃnâxase nî hâ ǀgara. Nēsa da ga dī, ob ge ǁGâuaba sida ǀgora ǁkhā tide. ǀNammi xa da ǃgaeǀhaohe hâ amaga, ǁîb hîna “ǀguiǃnâxasib ǃnâ ra ǃgaeǀhaoba.”—Kol. 3:14; Fil. 2:​1, 2.