1. Jesuba tae-i ǁkhauǂuisa haka ǁauǃkhō-aoga ge mā tsî ǁîga tae-e ge dī?

ǁKHĀǁKHĀSABE Petrub, Andreab, Jakobub tsî Johane hâgu ge ǁauna ǃkhō tsî gere ǁamaxu. ǂÂi re matikose gu ge ǁîga a burusa Jesub ge ǁkhauǂuigu tsî a mî o: “Sao te kho re, o ta ge khoeǃkhō-aose nîra dī kho.” * Nē khoega tae-e ge dī? Elobmîs ge ra mî: “O kha ge ǁnātimîsi ǀûide ǁnāxū tsî ge sao bi.” (Mat. 4:18-22) ǁNā mîǁguib ge ǁîgu ûiba kaise ge dawa. Ama ǁauna ǃkhō tama i tsî gu ge ǁîga “khoena nîra ǃkhō” în ǁkhāǁkhāsabe kai. (Luk. 5:10) Nētsēb ge Jesuba ǂhauǃnâ ǂgaoga ūhâ khoen hîna amaba a ǀnamna ǁkhā ǁkhauǂuisa ra mâ. (Mat. 28:19, 20) Khoeǃkhō-aos ǁkhauǂuis hînab ge Jesuba a māsa ūǃoa i du ge?

2. Tae-i ǃaroma da khoeǃkhō-aos di mîǁguiba ǂhâǂhâsase nî mû tsî tae-e nî huida nē mîǁguiba dīs ǀkha?

² ǀNîsits ge sa Elobmîs di ǁkhāǁkhās ǃnâ ra aiǃgû tsîts ge ra mîǁgui îts ǃgâiǂhôasa aoǁnâ tsoatsoa. Jesub di ǁkhauǂuisa ūǃoasa du ga îganǀgē o, tā ǂkhabuǂâi re. Îganǀgē du ra ǃkhais ge ra ǁgau nē mîǁguib kaise a ǂhâǂhâsasa. Elobmîs ge ra mî, Petru hâgu ge “ǁnātimîsi” ǁîgu ǀûide ge ǁnāxū. Xawe Petrub tsî ǁîb ǃgâb tsîn ge ǃhaeǃhaebes ǃnâ, ǂâi tamase nē mîǁguiba ge dī tama hâ i. ǁÎgu ge Jesuba ǃnani ǁkhâgu aisi ge ǀhao-ū tsî ǁîb a Mesia ǃkhaisa ge ǂanǃgâ. (Jhn. 1:35-42) ǁKhā ǀgaub ǃnâ du ge sado ǀnai Jehovab tsî Jesub tsîn xa ǁkhāǁkhāsen hâ tsî nēsi gagasise ra  aiǃgû ǂgao. Xawe du ge aoǁnâ tsoatsoa du nîs aiǃgâ nē mîǁguiba ǃamkuse nî ǂâiǃgâ. Petrub, Adreab tsî nau khoen tsîna tae-i xa ge huihe în ǁîn di mîǁguiba dī?

3. Mâ ǀgauga nî hui du i du Jesub di ǁkhauǂuisa ūǃoa?

³ Jesub di ǂguro ǁkhāǁkhāsabe gu ge ǁauǃkhōs turaba ge ūhâ-i, ǁîgu di sîsen-e ǃgâise ǂan, ǁkhoaǂgao tsî aitsama gere ǁnamasen. Nē ǀgaugu ge ge huigu îgu ǃgâiǂhôasa ǃgâi ǀgaub ǃnâ aoǁnâ. Nē ǁkhāǁkhāǃâs ǃnâ du ge nî mû mati du nē ǀgauga nî omkhâisa, i du nēs ǀkha ǃgâiǂhôasa aoǁnâ tsî nau khoena ǁkhāǁkhā.

4. Tae-e Petruba ge ǂkhâǃnâ îb ǁauǃkhō-ao kai?

⁴ Petrub ge ǁauna gere ǃkhō îb ǁîb di omarisa kōǃgâ. Xawes ge nēsa ǁîba sîsen-i ase ǀgui ge ība tama hâ i. (Jhn. 21:3, 9-15) ǁÎb ge ǁauna ǃkhōsa kaise ge ǀnam i tsîb ge khoenǃkhō-aos tsîna ge ǀnam tsoatsoa. Tsîb ge Jehovab di ǂkhâǃnâs ǀkha kaise ǃgâise gere sîsen.—ǃNǃkh. 2:14, 41.

5. Lukab 5:8-11 ǃoagu Petruba tae-e gere ǃao tsî tae-e nî huida i da ǁkhā tsâsiga ǃkham ǃoa?

⁵ Sida ge ra aoǁnâ Jehovaba da a ǀnam amaga. ǁNās ǃaroma da ge nē sîsen-e ra dī. ǁKhāsiba da ūhâ tama hâ di da ga ra tsâ xaweb ge ǁnā ǀnammi Jehovaba da ūba hâba ra huida i da khoena aoǁnâba. Jesub ge Petruba a ǁkhau o îb khoeǃkhō-ao kai ob ge ǁîba “tā ǃao” di ge mîba. (Khomai re Lukab 5:8-11.) Petrub ge ǁkhāǁkhāsebe kaib ga ra o nî ī xūna ge ǃao tama hâ i. Xaweb ge ge buru mûb ge o Jesub di huib ǀkha gu ge khoega ǂgui ǁauna a ǃkhō o. ǁNā-amagab ge Jesub ǀkha sîsen sab anu tama hâ khama gere  tsâ. ǀNîsi du ge Petrub khama ra tsâ tsî ra ǂâiǂhansen Xristub ǁkhāǁkhāsabe kai du nîs aiǃgâ du nî dī xūn xa. ǁNās ga ama o Jehovab, Jesub tsî sadu di ǀgūkhoena du ūba hâ ǀnamma ǀgaiǀgai re. Ots ge ǁnā turaba nî ūhâ its Jesub di ǁkhauǂuisa ūǃoa khoeǃkhō-aos disa.—Mat. 22:37, 39; Jhn. 14:15.

6. Mâ ǃaromadi ǃgao da ra aoǁnâ?

⁶ Hā re i da ǀnî xūn hîna aoǁnâs turaba ra māda na ǃoa kō. Jesuba da ge ra ǁnâuǀnam ǂgao “ǃgûǂoa, î . . . ǁkhāǁkhāsabedī” tib ra mî o. (Mat. 28:19, 20) Khoen “tsau hâ tsî ǁnāxūhe hâ” amagas tsîna da ge Gaosib ǃgâiǂhôasa ra aoǁnâ. (Mat. 9:36) Jehovab ge ǂhâba hâ i i mâ ǀguiǀguibe khoe-i hoa-e amaba ǂan tsî sâuhe.—1Tim. 2:4.

7. Romeǁîn 10:13-15 sa mati ra ǁgau aoǁnâ sîsen-i a ǂhâǂhâsa ǃkhaisa?

⁷ Sida aoǁnâ sîsen-i khoen di ûiga ra sâu ǀgaub xa da ga ǂâi o da ge aoǁnâs turaba nî ūhâ. ǁAuǃkhō-aob ge ǁaunab nî ǂû tamas ka io ǁamaxu amaga ra ǃkhō. Xawe da ge sida khoena ra ǃkhō ǁîn ûiga da ra sâu ǂgao amaga.—Khomai re Romeǁîn 10:13-15; 1Tim. 4:16.

8-9. ǁAuǃkhō-aoba tae-e nî ǂan tsî tae-i ǃaroma?

⁸ Jesub di tsēdi ǃnâ i ge Israelǁaes di ǁauǃkhō-aoba nî ǂans ge mâ ǃgôa ǁau-eb nî ǃkhōsa. (Lev. 11:9-12) Mapab ǁnā ǁauna nî hōsa ǂans tsîn ge ge ǂhâbasa i. ǁAun ge kai-amse ǁîna a ǃgâiba ǁgam-i tsî ǂâusa ǂû-i hâ ǃkhaib ai ra hâ. ǁAuǃkhō-aob ǁauna ra ôa ǁaeb tsîn ge kaise a ǂhâǂhâsa. ǀNî sîsabeb hîna Pecific Islandi ai ra hâb ge ge ǁkhāǁkhāsen ǀnî ǁaeb ai ǀguits ǁauna a ǃkhō ǁkhā ǃkhaisa. ǁÎb ge ǁnapa ra hâ ǀhûǀguitimî-aob xa ge ǁkhau-e îkha si ǁauna ǀguiba ǃkhō. “ǁArikamǁgoaga kham ge 9 ir nî ǀhao,” tib ge sîsabeba ge mî. Ob ge ǃgâsaba ǁîba ge mîba, “ǁnâuǃgā tama du ge hâ. ǁAun a ǂgui ǁaeb ai ge ge ra ī, sige a ǃgâiba ǁaeb ais ose.”

⁹ ǁNās ǁkhās xase gu ge Jesub di ǁkhāǁkhāsabegu hîna ge ǁauǃkhō-ao kai ga, khoena ǃoa gere ī, khoena gu nî ǀhao-ū ǁaegu ai. Aiǁgause i ge Jesub di ǁkhāǁkhāsabega sinagogegu, omsa xu oms tsî ǁamaxu ǃkhaigu ai gere aoǁnâ. (ǃNǃkh. 5:42; 17:17; 18:4) Sida tsîn ge nî ǂan, mâ ǁaegu ai da sida di ǂkharis ǃnâ ra hâ khoena nî ǀhao-ūsa. ǂHâbasa i ga ra o, o da ge sida di ǀapede nî mâiǂui, îda khoena da ra ǀhao-ū ǃkhais tsî ǁaeb ai ǁîna aoǁnâba.—1Kor. 9:19-23.

10. Jehovab di ǀapeǂhomisa mâ xūn hîna da aoǁnâ sîsen-i ǃnâ a sîsen-ū ǁkhāna ra māda?

¹⁰ ǁAuǃkhō-aob ge nî ǂan mâ xūnab nî sîsen-ūsa. Sida tsîn ge aoǁnâ sîsen-i ǃgao ǂhanu xūna nî ūhâ. Nē xūna da nî sîsen-ū ǀgaub tsîna da ge nî ǂan. Jesub ge ǁîb di ǁkhāǁkhāsabega ǃgāsase ge mîba mati gu ǃgâiǂhôasa nî aoǁnâsa. Tae-en nî ū-saos, mapan nî aoǁnâs tsî tae-en nî mîsab ge ǁîna ge mîba. (Mat. 10:5-7; Luk. 10:1-11) Jehovab di ǀapeǂhomis ge ǁkhāǁkhās di boksisa ra māda hîna sida di aoǁnâ sîsen-i ǃnâ ǃgâise ra sîsen-ūhe xūna ūhâsa. * Tsî da ge ra ǁkhāǁkhāhe mati da nē xūna nî sîsen-ūsa. Nēs ge ra huida i da supuse aoǁnâ tsî ǃgâi ǁkhāǁkhā-ao kai.—2Tim. 2:15.

11. ǁAuǃkhō-aona tae-i ǃaroma ǁkhoaǂgaosiba ǂhâ hâ?

¹¹ ǁAuǃkhō-aon ge ǁkhā ǁkhoaǂgaosiba  ǂhâ hâ. ǀNî ǁaegu ai i ge ǃâubasen tama gu hâse ǂoab tsî ǀnanub mâsiga ra dawa. Tsî gu ge ǁîga kai-amse ǃuia ǃkhaeb ǃnâ ra sîsen. Khoeǃkhō-aon tsîn ge ǁkhoaǂgaosiba ǂhâ hâ. Aoǁnâ tsoatsoa tsî da ga ra Jehovab di ǀhûǀguitimî-ao kai o, o i ge sida omaris khoena ra mâǃoa da, tsîn ge sida di ǀhōna ra ǃhō da tsî ǀnîn ge ǃgâ ǂgao tama hâ. Xawe da ge nēs xa tā nî buru. Jesub ge ǀnai ge mî ǁîb ǁkhāǁkhāsabenab ǃgâiǂhôasa ǁnâu ǂgao tama hâ khoena ǃoa nî sî ti.—Mat. 10:16.

12. Josuab 1:7-9 ǃoagu i tae-e ǁkhoaǂgaosiba omkhâis ǀkha nî huida?

¹² ǁKhoaǂgaosiba du mati a omkhâi ǁkhā? ǂGurose du ge nî ǂgom Jesub noxoba ǀhomma xu aoǁnâ sîsen-e ra mûǂamsa. (Jhn. 16:33; J.ǂHa. 14:14-16) ǁNāpaxū du ge Jehovab nî kōǃgâ du ǃkhais ǃnâ ǂgomsa nî omkhâi. (Mat. 6:32-34) Sadu ǂgoms ra ǀgai khamib ge sadu ǁkhoaǂgaosiba nî ǀgai. Petrub tsî ǁîb ǀkha ge hâ i khoegu ge ǀgaisa ǂgomsa gu ūhâsa ge ǁgau, ǁauǃkhōsa ǁnāxū tsî gu ge Jesuba a sao o. ǁKhā ǀgaub ǃnâ du ge sadu tsîna ǀgaisa ǂgomsa du ūhâsa ra ǁgau, sadu a ǂan khoen tsî sadu ǀao khoena du ga mîba o Jehovab ǀhûǀguitimî-aon ǀkha du ra ǁkhāǁkhāsen tsî ǁîn ǀhaode ra ǁhaoǃnâsa. Amase du ge sadu tanisen ǀgaub tsî sadu ûib ǃnâ, ǂgui xūna ge dawa Jehovab di ǂgaoǀkhādi ǃoa-ai du ra ûi ǂgao amaga. ǁNās tsîn ge ǂgoms tsî ǁkhaoǂgaosiba ge ǂhâ hâ-i. “ǃKhūb,  sa Elob ge sa ǀkha hâ” ǁkhoaǂgaosibats ra omkhâi hîna.—Khomai re Josuab 1:7-9.

13. Ī ge xūna ǂâiǃgâs tsî ǀgores tsîna mati ǁkhoaǂgaosiba omkhâis ǀkha nî huidu?

¹³ Tae-i tsîna du a dī ǁkhā i du ǁkhoaǂgaosiba omkhâi? ǁKhoaǂgaosiba ǀgores ǃnâ ǂgan re. (ǃNǃkh. 4:29, 31) Jehovab ge sadu ǀgorede nî ǃeream tsî hukas tsîna āxū du tide. ǁÎb ge hoaǁae nî ǂkhâǃnâ du. Jehovab ge ǃkharu gere ǁaeb ǃnâ nau khoena sâu ǀgaub xas tsîna du ge a ǂâi ǁkhā. ǃGomsina du ge ūhâ-i ǁaeb ǃnâb ge ǁîba a hui du tsî sadu ûib ǃnâ du ge ǀkharaǀkharana gere dī ǁaeb ǃnâ ǀgaiba a mā du ǀgaus xas tsîna ǂâi re. Amaseb ge Elob hîna ge ǁîb khoena ǂāxahurib ǃnâ-ū a daoǁgauba a huidu ǁkhā, î du Xristub di ǁkhāǁkhāsabe kai. (Eks. 14:13) Psalmdi xoa-aob ge Jehovab ǃnâ ūhâ-i ǂgomsa du ge sadu tsîna ūhâ ǁkhā. ǁÎb ge ge mî: “ǃKhūb ge tita hâba tsî ta ge ǃao tide. Tare xū-e i kha khoe-e nî dī te?”—Psa. 118:6.

14. Masaes tsî Tomoyos di aiǁgausa xu du tae-e go ǁkhāǁkhāsen?

¹⁴ ǀNî hâ ǀgaub hîna da ǁkhoaǂgaosiba a omkhâi ǁkhāb ge Jehovab ge khoena taoxasiba xu hui ǀgaub tsî ǁînab ge ǁkhoaǂgaosiba a mā ǀgaub xa ǁkhāǁkhāsensa. Masae ti ǀon hâ ǃgâsas di aiǁgausa kō re. ǁÎs ge ge taoxa i tsî gere tsâ ǁîs ǂgoms xas nau khoen ǀkha ǀgoragu hō tide di. ǀŪs a khoen ǀkha ǃhoas ge kaise ge ǃgombasi i. ǀGapi mieras ra ǂoa khama i ge gere tsâ tsîs ge hukas tsînas dī hō tide ti gere ǂâi. ǁNā-amagas ge ge ǁguiǂgāsen is ǁîs di ǁanǁare-aon tsî Jehovab tsîna ǀnam. ǁAeb hîna da ûi ǃnâ hâb xas ge ge ǂâi tsîs ge ǀgore tsî ge ǂgan, îb aoǁnâ sîsen-i ǃgaos ūhâ turaba ǀgaiǀgaihe. ǁÎs ge ǁîs ǃaoba ge dan tsî huira aimâba-aoses tsîna gere ǃoaba. Jehovab ge ǀasa aoǁnâ-aon tsîna a hui ǁkhā în “ǃgâiǂâixa” tamas ka io ǁkhoaǂgaosiba ūhâ. Tomoyo di ǀon hâ ǃgâsas di aiǁgausa kō re. ǁÎs ge omsa xu oms ǀkha a aoǁnâ tsoatsoa o, os ge ǂguro oms di kaikhoesa ǃau tsî ge mî: “Tida ge Jehovab di ǀhûǀguitimî-aon ǀkha ǃhoa ǂgao tama hâ” tsîs ge ǁnāpaxū daosa ge ǂnoaǂganam. Tomoyos ge ge ǃao tama hâ i tsî ǁîs ǀhōsa ge mîba: “ǁNâus go? Xū-i tsîna ta mî tama hâ hînas ge kaikhoesa go ǂan i Jehovab di ǀhûǀguitimî-ao ta a ǃkhaisa. Kaise ta ge ǃgâise ra tsâ.” Tomoyos ge nēsisa ǁnaetisa aimâba-aos ase ra sîsen.

15. Aitsama ǃkhō-oasensa a tae, tsî nēsa Xristeǁîn ǃgao tae-i amsi a ǂhâǂhâsa?

¹⁵ ǁAuǃkhō-aogu ge ǃkhō-oasensa ǂhâ hâ. ǃKhō-oasents ga ra o, ‘ots ge dīts nî se i xūna ra dī kaisen.’ ǁAuǃkhō-aogu ge aitsama ra ǁnamasen tsî vruse khâimâ tsî sîsen-i nî toas kōse ǁnāpa nî hâ, ǂoab mâsigu ga ra dawa xawe. Sida tsîn ge ǃkhō-oasensa ǂkhâ hâ nē sîsen-e da ga mâǀgai tsî ǀams kōse a dī ǂgao o.—Mat. 10:22.

16. Mati da ǃkhō-oasensa a ǁkhāǁkhāsen ǁkhā?

¹⁶ ǃKhō-oasens ge aitsamaba xu hā tama. Kai-amse da ge supu ǀgaub ai ǀgui xūna ra dī ǂgao. Xawe ǀnî ǁaegu ai i ge ǂhâǂhâsa xūna dīsa supu tama hâ. Aitsama ǃkhō-oasensa da ge nî ǁkhāǁkhāsen. ǁNā-amaga da ge huiba ǂhâ hâ, i da ǃgomba da a xūna dī. Jehovab ge ǁnā huiba ǃanu gagab ǃnâ-ū ra mâda.—Gal. 5:22, 23.

17. 1 Korinteǁîn 9:25-27 ǃnâ i xoasa khamib Pauluba tae-e ge mî dīb nî-e, aitsama ǃkhō-oasensa ǃkhōǂgā hâ-e?

 ¹⁷ Apostel Paulub ge gere ǃkhō-oasen. ǁÎb ge ge mî ǁîb sorosab “dā” hâ di, îb ǃgâina dī. (Khomai re 1 Korinteǁîn 9:25-27.) ǁÎb ge nau ǁkhāǁkhāsabena ge ǂkhâǃnâ în xūn hoana “anu hâse tsî ǃamkuse dīhe.” (1Kor. 14:40) ǃGarise da ge nî sîsen i da Jehovaba ǃoaba ǀgara. Nēs ge aoǁnâs tsî ǃgâiǂhôasa khoena mîbasa ǃkhōǂgā hâ.—ǃNǃkh. 2:46.

18. Tae-e da ga ra dī ob Jehovaba ǃgâi sîsen-e da ra dīsa nî mû?

¹⁸ ǁAuǃkhō-aob ge ǂgui ǁaunab ga ǃkhō o, o ǁîb sîsen-e ǃgâise ra dī. Xawe aoǁnâ sîsen-i ge ǁnāti i tama hâ. Sida di aoǁnâ sîsen-i ge matikō khoena da amab ǃnâ ra ǂgâxa-ūs ai ǃgaoǃgao-e tama hâ. (Luk. 8:11-15) ǀÛs ose da ga ǃgâiǂhôasa aoǁnâ tsî da ga nau khoena a ǁkhāǁkhā o, ob ge Jehovaba nēsa ǃgâi sîsen-i ase ra ǃgôa. Tae-i ǃaroma? ǁÎb tsî ǁîb ôab tsîna da ra ǁnauǀnam amaga.—Mrk. 13:10; ǃNǃkh. 5:28, 29.

19-20. Tae-i ǂhâǂhâsa ǃaromasa da ūhâ nēsi aoǁnâs disa?

¹⁹ ǀNî ǃhūgu ǃnâ i ge ǁauǃkhōsa ǀnî ǁkhâgu ǃnâ ǀgui a mā-amsa. Nē ǃhūgu ǃnâ i ge ǁauǃkhō-aoga ǁaeb ra mâtoasa gu ga mû o, ǁîgu sîsen-e ǁgariǁgarisase ra dī. Khoeǃkhō-aon ase da ge saora ǃaromas ams ai aoǁnâ sîsen-e ǁgariǁgarisase ra dī: Nē ǃhūbaib ǀams ge go ǀgū toa. ǃNubu ǁaerob ǀguiba da ge ūhâ nē ǃgâiǂhôas hîna khoen ûiga ra sâusa aoǁnâsa. Tā nē ǂhâǂhâsa sîsen-e mâiǂui tamas ka io ǃgâi mâsibats nî hō ǁaeba ǃâu re.—Aoǁn. 11:4.

²⁰ Nēsi aoǁnâ sîsen-i ǃgaots ūhâ turaba ǀgaiǀgai, Elobmîsa ǀgaisase ǁkhāǁkhāsen, ǁkhoaǂgaosiba omkhâi tsî ǃkhō-oasensa ǁkhāǁkhāsen re. ǁKhaisa miliuns xa ǃnāsa khoen hîna ǃhūbaib ǂhawase ǃgâi ǂhôasa ra aoǁnân ǀkha sîsenǀhao re, ots ge Jehovab ra mā ǂkhîba nî hōǃâ. (Neh. 8:10) ǁKhāts as kōse nē sîsen-e dī re Jehovab ǂâu i ge go ti nî mîs kōse. Saora ǁkhāǁkhāǃâs ge ǃnona xūn hîna Gaosib ǃgâiǂhôasa aoǁnâs di turaba sida ǃnâ nî ǀgaiǀgain xa nî ǃhoa.