1. Tae-i ǃaroma da buru tide nē ǃhūbaib ǃnâ i ǂgomǃgâsi-e ǀkhai amaga?

 ǁGÂUAB ǃhūbaib ǃnâ hâ khoen ge ham-en nî ǂgomǃgâ ǃkhaisa a ǀū. ǁÎn ge hoaǁae besigheid na ūhâ khoen di tanisen ǀgaugu, politikan. Tsî ǂgomdi ǂgaeǂgui-aon xa ra ǂkhabuǂâi kaihe. ǀNîn ge ra tsâ ǁîn di ǀhōsan, ǁanǁare-aon. Tsî omaris ǁaninan a ǂgomǃgâ ǁoasa, nēs ge tā nî buru kai da. Elobmîs ge ge mîmâi: “ǀUni tsēdi ǃnân ge khoena. . . , ǃanuoǃnâ. . . mîǁgaiǁgaixa, . . . tsî nî ǀapexūxa.’ Nēs ge ra ǂâibasen khoen ǁGâuab khami nî īsa. Nē ǃhūbaib di eloba, ǂgomǃgâhe ǁoaba.​—2Tim. 3:1-4; 2Kor. 4:4.

2. (a) Ham-e da amabes ǃnâ a ǂgomǃgâ ǁkhā? (b) ǀNîna tae-e a dîsen ǁkhā?

² Xristeǁî da a amaga da ge a ǂan, sida ǂgomǃgâsiba da Jehovab ǃnâ a mâi ǁkhāsa. (Jer. 17:7, 8) ǂGomǃgâsiba da ge ūhâ ǁîb a ǀnam da. Tsî ǁîb ǀhōsana “ǁnāǃgâ” tidesa. (Psa. 9:10) ǂGomǃgâsib tsîna da ge Jesub Xristub ǃnâ a ūhâ ǁkhā. ǁÎb ge ǁîb ûiba sida ǃaroma a mā, amaga. (1Pet. 3:18) Tsî da ge sida di aiǁgaude xus tsîna ǁkhāǁkhāsen hâ. Elobmîs ǂgomǂgomsa daoǁgaude ra māsa. (2Tim. 3:16, 17) ǂGomǃgâsiba da ge ūhâ Jehovab, Jesub tsî Elobmîs ǃnâ da a ǂgomǃgâ ǁkhāsa. Xawe ǀnîn ge a dîsen ǁkhā, ǁîn di ǀhaohâb ǃnâ hâ ǃgâsanan hoaǁae a ǂgomǃgâ ǁkhāsa. Îo di du ga ǃeream o, tae-i ǃaroma da nî ǂgomǃgâ nî?

3. Mâ ǂoaǂamsa aiǂhanuba da ūhâ? (Markub 10:29, 30)

³ Jehovab ge sida ǁhûiǂui hâ î da ǃhūbaib ǂhawase hâ, omaris ǃoaba-aon di ǃâ kai. Nēb ge kaise kai aiǂhanub hîna ǂgui ǀkhaega ǃkhōǂgā hâba. (Khomai re Markub 10:29, 30 sa.) ǃHūbaib ǂhawase da ge ǃgâsan hîna ǀnamma Jehovaba ra ǁgauna ūhâ. Tsî ǁnās ǀkha ǁkhān a-e ra dītsâna, în ǁîb di ǂhanugu ǃoagu ûi. Sida gowaba ǃhoas tsî ana ǀgaub ge ǀnîsi  a ǃkharagagu ǁîn dina xu. Xawe da ge ǁîn ǀgūse ra tsâ. Nēsi da ga ǂguro ǃnās ase ǁîna ǀhao-ū xawes tsîna. Tsî da ge kaise a ǃgâibahe koas tsî ǃoabas tsîna. Sida ǀnamxaǃnâ ǀhomsi ǁGûba ǁîn ǀkha ǀguiba māsa.​—Psa. 133:1.

4. Tae-i ǃaroma da sida ǃgâsana ǂhâhâ?

⁴ ǀNais xa ǃnāsase da ge nēsi, ǀguiǃnâxase sida ǃgâsan ǀkha nî hâ. ǀNî ǁaegu ain ge a hui da ǁkhā în sida ǃgomsina taniba da. (Rom. 15:1; Gal. 6:2) ǁÎn ge ǂkhâǃnâ das tsîna ra hî, î da Jehovab di ǃoabas ǃnâ hâ ǀgara. Tsî ǁnās ǀkhas tsîna gagasise ǀgai ǁkhā. (1Tes. 5:11; Heb. 10:23-25) ǂÂis ǀguisa hî re mati da nî tsâsa, ǀhaohâba xu da ga ǁkhaubas. Tsî hui-e hō tama ga io, î da sida ǂanǂansa khākhoeba mâǃoa. Satanni hîna a ǁGâuab tsî nē ǁgai ǃhūbaib tsîna. Satanni tsî ǁnān hîna ǁîb xa ra ǂgaeǂguihen ge ǀgūǁae, Elob ǃoaba-aona nî ǁnāǂam. ǂÂis ǀguisa hî re, matikōse da nî ǃgôaǃgâsa. Sida ǃgâsana da ǀgūse ūhâ amaga.

5. Tae-i ǃaroman ǀnîna ra ǃkhō-oasen tsî ǃgâsana ǂgomǃgâ tama?

⁵ ǀNîn ge ǃgomsiba ūhâ, ǁîn di ǃgâsana ǂgomǃgâsa. ǀNîsi i ǁnā ǃgâsa-e, ǂganǃgâsa xū-e nau ǃoaba-ao-e a mîba ǁkhā amaga. Tsî î ǁnā khoe-e nau-e a mîba ǁkhā amaga. Tamas ka io ǀnîsi mîmâi-e dīǀoaǀoa tama hâ i ǃkhais ǃaroma. Tamas ka io i ge ǀnîsi ǀhaohâb ǃnâ khoe-e xū-e ge mî hîna ge ǀgaisase tsûtsû nî-e. ǁNāti-i xūn ge a ǃgom kai ǁkhā, în nauna ǂgomǃgâ. Xawe tae-e a hui da ǁkhā î da ǁnā ǂgomǃgâsiba omkhâi sida ǃgâsan ǃnâ?

6. Matib ǀnamma a hui da ǁkhā, î da ǂgomǃgâsiba omkhâi? (1 Korinteǁîn 13:4-8)

⁶ ǀNammi ge a ǃgaoǃgao ǂgomǃgâsib diba. ǂGuro Korinteǁîn di 13ǁî danaǃâs ge  ra ǁguiǃā. ǂGui ǃkharagagu ǀgaugu hînab ǀnamma a hui da ǁkhāba. Î da ǂgomǃgâsiba omkhâi, sada ûib ǃnâ. (Khomai re 1 Korinteǁîn 13:4-8 sa.) Aiǁgause vers 4 ge ra mî “ǀnammi ge ǃnūǃnâxa tsî a ǃgâi” di. Jehovab ge a ǃnūǃnâxa ǁîb ǃoagu da ga ǁore xawes tsîna. Tsî ǁnās ǃaroma da ge sida tsîna nî ǃnūǃnâxa sida ǃgâsan ǃoagu. Mî tsîn ga xūna dī hîna ra tsûtsû da tamas ka io ǂhani da na. Vers 5 ge ǀaro tsîra mî: ‘ǀNammi ge ǃhaese ǀarakaisen tama tsîb ǁîb ǃoagu ra dīhe tsū xūna ǃgôakhâi tama hâ.’ Sida ge sida ǃgâsan sida ǃoagu ra ‘dī xūna ǃgôakhâi ǂgao tama hâ.’ Hānîǁaeb ǃnâ da ǁnā xūna nî sîsen-ūse. Aoǁnâ-aob 7:9 ge ra mî: “Tā ǃhaese ǁaixa” di. ǁNās ǃaroma i ge kaise a ǃgâi, Efeseǁîn 4:26 ǃnâ hâ mîde sîsenūsa: “Tās soresa ǁaixats hâ hîa ǂgâ” di ra mîsa.

7. Matis Mateub 7:1-5 ǃnâ hâ ǀapemāsa a hui da ǁkhā, î da ǂgomǃgâsiba omkhâi?

⁷ ǀNî hâ ǀgaub hîna da ǂgomǃgâsiba sida ǃgâsan ǃnâ a omkhai ǁkhāb ge. Jehovab ǁîna ra mû khami ǁîna mûsa. Elob ge a ǀnam nî tsî ǁîn ǁoren ai kō tama hâ. Tsî da ge sida tsîna ǁîn ǁoren ai kō ǂgao tama hâ. (Psa. 130:3) ǁÎn di dīsādi ai ǀgui sida ǂâide ǂnûis, xa da ge nî dītsâ. Î da ǁîn ra dī ǃgâi ǀgaugu ai kō. (Khomai re Mateub 7:1-5 sa.) Tsî da ge ra ǂgomǃgâ ǁîn ra ǃgâi xū-e dī ǂgaosa. Tsî tātsē tsûtsû da ǂgao tamasa, ǀnammi “hoana ra ǂgom” amaga. (1Kor. 13:7) ǁNā ǃkhais ge ǂâibasen tama hâ. Jehovab ra ǂhâbasa î da ǁîna ǂgomǃgâ, ǃgâi ǃaroma i-a ǀkhai hîna. Xaweb ge ra ǃâubasen î da ǁîna ǂgomǃgâ. ǂGomǃgâhe ǁkhān a ǃkhaisan ra ǁgau amaga. *

8. Mati du nî dī, î du ǃgâsana ǂgomǃgâ?

⁸ ǂGomǃgâsib ge ǃgôasib khami nî hō-e. Tsî nēs ge ǁaeba ra ū. Mati du ǂgomǃgâsiba sadu ǃgâsan ǃnâ a omkhâi ǁkhā? ǁÎna ǃgâise ǂan tsoatsoa re. ǀHaohâb di ǀhaodi dawa ǁîn ǀkha ǃhoa re. ǀApe re î du ǁîn ǀkha aoǁnâ sîsenni ǃnâ ǀguiba sîsen. ǃNūǃnâxa tsî ǃēsa mā nî re în ǁgau, ǂgomǃgâhe ǁkhān a ǃkhaisa. ǂGurose du ge ǀnîsi nî mîǁgui, î du tā hoa xūna ǁnā khoe-e nēsi ǀgui du ra ǂan-e mîba. Sadu ǀhōsagusis ra ǀgai khami du ge ǀnîsi nî tsâ. Î du ǁîna harase sadu tsâsiga mîba. (Luk. 16:10) Xawe tae-e du nî dī, ǃgâsa i ga sadu ǂgomǃgâsiba ǃgâi tamase sîsenū o? Tā ǃhaese ǁnā ǀhōsagusisa ǀam kai re. Xawe ǁaeba mā re, nē xū-i ǃoagu. Tā ǀoron xa ǂhapuǂâi kaihesa mā-am re, î du tā nauna ǂgomǃgâ tama i. Jehovab ǂgomǂgomsa ǃoaba-aon ge hōǃâ aiǁgaude da ge nî ǃhoaǃgao. Hîna ge ǀnîn xan ge tsûtsûhe xawe ǂgomǃgâsiba a ǁgauna.

9. (a) Hanasa mati Jehovab di daoǁgaudi ǃnâ ǂgomǃgâsiba gere ūhâ ǀgara, ǁîb ǁgaumâihâ khoen gere dīsa xawe? (b) Hanas ge ǃkharu ǃnâ xūna tae-e Jehovab di daoǁgaudi ǃnâ ǂgomǃgâsiba ūhâs xa ra ǁkhāǁkhā du? (Tsoatsoas ǃnâ hâ ai-īsiba mû re.)

⁹ ǃGâsab hîna ǃereamsa ǀhaohâb ǃnâ tani hâb, xa du ǂkhabuǂâi kaihe tsâ hâ? Tsî di i nî īs ga o, o du ge ǃgâiba a hō ǁkhā Hanas di aiǁgausa du ga ǂâiǃgâ o. ǁNā ǁaeb aib ge, ǀgapi pristeri Eliba Jehovab ǃoabasa gere ǂgaeǂgui Israeli ǃnâ. Xawe ǁîb omaris ge ǃgâi aiǀgausa ge ūhâ tama hâ i. ǁÎb ôagu hîna ge prister i gu ge, taotaoxa tsî ǁgauoǃnâ xūna gere dī. Xaweb ge ǁîgu îba ge mî-unuba gu tama hâ i. Jehovab ge Eliba ǀgapi pristersisa xu ge ūǁnâ tama hâ i. Xawe Hanas ge Jehovaba tabernakeli ai  ge ǃoaba ǀû tama hâ i. Elib ge ǁnāpa gere ǂgaeǂgui ǃkhais ǃaroma. ǃOab ǃnâs Hanasa ra ǀgore hînab ge Eliba mûb ge o, ǀhoros hâ ti ge ǂâi. ǃNō tsî ǃgâise kō tamaseb ge nē ǃoa hâ tarasa ge mîǁgaiǁgai. (1Sam. 1:12-16) ǁNāti i ge ī-i xawes ge Hanasa ge mîǁgui. Aore ǀgôabas ga hō, os tabernakeli dawa nî sī-ū bisa. Îb ǀgapi pristeri Elib ǃûis ǃnaga ǃoaba. (1Sam. 1:11) Elib ôagu di tanisen ǀgauba dī-unusensa noxoba ge ǂhâǂhâsa i? Îo, Jehovab ge ǁnāsa ǁîb di ǁaeb ai ge dī. (1Sam. 4:17) Elob ge Hanasa aore ǀgôab ǀkha ge mādawa-am, Samuel di ǀon hâba.​—1Sam. 1:17-20.

10. Matib ge Daviba ǂgomǃgâsiba nau khoen ǃnâ ūhâ ǀgara, ǁgai xūnab ge ǃkharu ǃnâ xawe?

¹⁰ Sadu ǀgū ǀhōsa i xa du ǀhôagao-e tsâ hâ? Di i nî īs ga o, Gao-aob Davib ge ǃkharuǃnâ xūn xa ǂâiǃgâ re. ǁÎb di ǀhōgu di ǀguib ge, Ahitofel di ge ǀon hâ i. Davib di ôab Absolomi ge ǁîb di gaosisa gere ū-aibi ǂgao. Ob ge ǁîb ǀhōb Ahitofela ǀgôasab ǀkha mâǀhao tsî gere mâǃoa bi. Davib ge kaise ge tsûtsûhe ǁîb di ôab tsî ǀhōsab tsîkha di ǂkhâǃnâsa ǂoaǃnâsa. Davib ge ǀapexuheb ge xawe ge mā-am tama hâ i. Tsîb ge ge ǀû tama hâ i, nau khoena ǂgomǃgâsiba ūhâbasa. Davib ge ǁîb ǀgū ǀhōsab, Husaiba ǂgomǃgâsiba ge ūba ǀgara hâ i. ǁÎb ge ǃgâi ǃaromasa ge ūhâ i Husaiba ǂgomǃgâs diba. Husaib ge ǃgâi ǀhōsab a ǃkhaisa ge ǁgau. Davibab ra hui hînab ga ǁîb ûiba ǂoaǃnâ xawes tsîna.​—2 Sam. 17:1-16.

11. Mâ ǀgaub ǃnâb ge Nabali di ǃgāba ǂgomǃgâsiba ǁgau?

¹¹ Nabali di ǃgāb di aiǁgaus xas tsîna ǂâiǃgâ re. Davib tsî ǁîb di khoegu tsîn ge Nabal di ǀon hâ Israelǁîb di ǃgāga gere ǁkhauba. Davib ge ǃkhū hâ khoeb, Nabala ge ǂgan îb Davib di khoega ǁkhāb a ǂû-e mā. Nabali ge Davib di ǃgamǃgamsenxa ǂgansa ǂkhā o. Ob ge Daviba kaise ǁaixa tsî mâ-aore khoeb hoab Nabali omaris diba gere ǃgam ǂgao. ǀGui ǃgāb ge nē mâsiba Nabali di taras Abigailsa sī ge mîba. Nē omaris ǁanib aseb ge ge ǂan i. ǁÎb di ûib Abigails ǃomdi ǃnâ hâ ǃkhaisa. ǃKhoebē tama i tsîb ge ge ǂgomǃgâ. Abigails nē mâsiba a ǂhanuǂhanu ǁkhā ǃkhaisa. ǁÎb ge ǂgomǃgâsiba ge ūhâ i, ǁîs ge gā-ai taras ase ǂansa i ǃkhaisa. Sao rase ra  ī xū-i ge ra ǁgau, ǁîb ge ǃgâi ǃaromasa ūhâ isa Abigailsa ǂgomǃgâsa. Abigails ge ǁkhoaǂgaose Daviba ge ǁkhae, îb tā ǁîb di ǀapeǁguiba dī. (1Sam. 25:2-35) ǁÎs ge Daviba ge ǂgomǃgâ gā-ai ǂâis ǀkhab nî sîsen ǃkhaisa.

12. Jesuba mati ǁîb di ǁkhāǁkhāsabegab ra ǂgomǃgâsa gere ǁgau, ǃnūbusiga gu ge ūhâ-i xawe?

¹² Jesub ge ǁîb di ǁkhāǁkhāsabega ge ǂgomǃgâ hâ i, dīsā gu gere xawe. (Jhn. 15:15, 16) Jakobub tsî Johaneb tsîn ge Jesuba ǀō-aisa ǃkhai-e Gaosib ǃnâ a ǂgan o. Ob ge Jesuba ǁîkha Jehovaba kha ra ǃoaba ǃaromasa ge dî tama hâ i. Tamas ka io apostelsisa xu ge ūǁnâ kha tama hâ i. (Mrk. 10:35-40) ǁAe-i khaoǃgâ, ǃkhō-eb ge ǃuis ai gu ge Jesub di ǁkhāǁkhāsabegu hoaga ǁnāxu bi tsî ge ǃkhoebē. (Mat. 26:56) Xaweb ge Jesuba ǁîgu ǃnâ ǂgomsa ge ǀû tama hâ i. ǁÎb ge ǁîgu di ǀoasa-oǃnâsiba ge ǂan i. Xaweb ge ǁîga ‘ǀunis kōse ge ǀnam i.’ (Jhn. 13:1) ǁÎb di khâis khaoǃgâb ge Jesuba ǁîb di 11 ǂgomǂgomsa apostelga. ǂHâǂhâsa ǁgaumâisa ge mā, ǁkhāǁkhāsabedī sîsenni ǃnâ. Tsî ǁîb di ǀō-aisa gūna kōǃgâsa. (Mat. 28:19, 20; Jhn. 21:15-17) ǁÎb ge ǃgâi ǃaromasa ge ūhâ i, nē ǀoasa-oǃnâ khoega ǂgomǃgâsa. Hoagu ge ǂgomǂgomsase ge ǃoaba ǁōgu nîs kōse. Hanas, Davib, Nabali ǃgāb, Abigails tsî Jesub ge ǃgâi aiǁgausa ge ǁgau. ǀOasa-oǃnâ khoena ǂgomǃgâsa.

13. Tae-e a ǃgomǃgomba da ǁkhā, nau khoena ǂgomǃgâsa?

¹³ Saro ǁaegu ǀgui nî hâ xū-i ǀkha du ǃgâsa-e ǂgomǃgâ tsâ hâ? Tsî du ge ega sī ǂanǂui, ǁî-î go sadu ǂgomǃgâsiba gaxaǃnâsa? ǁNās ge kaise a tsûtsû tsi ǁkhā. ǀGui ǃgâsas ge ǀhaohâb di ǃûi-aoba ǁîs di ǃgam xū-e ge mîba. Tsî ge ǂgomǃgâ bi, ǀkhara khoe-eb mîba tide ǃkhaisa. Sao ra tsēs ge ǀhaohâb ǃûi-aob tarasa, ǃgâsasa gere ǂkhâǃnâ. ǀHaohâb ǃûi-aobas ge ǀguri a mîba xū-i xa. ǁNâuǃāxases ge ǃgâsasa kaise ge ǃgombahe i, nē ǀhaohâb ǃûi-aoba ǁkhawa ǂgomǃgâsa. Xawe ǃgâsas ge ǃgâi xū-e ge dī, huibas ge ǂgan o. ǁÎs ge ǀkhara ǀhaohâb ǃûi-aob ǀkha nē xū-i xa ge ǃhoa. Tsîb ge ǁîba ge huisi, îs ǂgomǃgâsiba ǀhaohâb ǃûi-aogu ǃnâ ǁkhawa omkhâi.

14. Tae-e ǀgui ǃgâsaba ge hui, îb ǂgomǃgâsiba ǁkhawa omkhâi?

¹⁴ ǀGui ǃgâsab ge gaxu ǁaeba, ǀgam ǀhaohâb ǃûi-ao kha ǀkha ge ǁaixa hâ i. Tsî ǁîkhab a ǂgomǃgâ ǁoa khama gere tsâ. Xaweb ge kai ǃgôasibab ūba hâ, ǃgâsab ge mî xū-i xa ge ǂâi hō. Hîna ra mî-e: “ǁGâuab ge a khākhoe. Sada ǃgâsan ose.” ǃGâsab ge ǃamkuse ǀgores ǀkha nē xū-e ge ǂâiǃgâ. Tsî tae-eb a dī ǁkhās tsîna. Tsîb ge ǁaeb ǀkha ǂkhîba nē ǀgam ǀhaohâb ǃûi-aokha ǀkha ge dī ǁkhā i.

15. Tae-i ǃaroma i ǂgomǃgâsiba omkhâisa ǁaeba ra ū? Aiǁgau-e mā re.

¹⁵ Aiǂhanu-e ǂoaǃnâ tsâ î du hâ ǀhaohâb ǃnâ? ǁNāti i xū-e ǃkharuǃnâs ge a tsûtsûsa ǁkhā. Gretes tsî ǁîs mamas ge ge ǂgomǂgomsa ǃoaba-ao i, Nazi Duitslands ǃnâ 1930ǁî kuri. ǁNā ǁaeb ǃnâ i ge sada di sîsen-e, ǁnā ǃhūb ǃnâ ge ǂkhāsa i. Gretes ge ǃKhē xu ǂgō-ommi ǂkhaniba ǁîs ǃgâsana tekpas aiǂhanuba ge ūhâ i. Xawe gu ge ǃgâsaga a ǂanǂui o, ǁîs di papab ge amaba gere mâǃoa ǃkhaisa. O gu ge nē aiǂhanuba ǁîsa xu ge ūbē. ǁÎgu ge gere ǃao, ǁîs pap nî ǀhaohâba mâǃoa-aogu ai nî ǀapexu ǃkhaisa. Gretes ǃgomsigu ge ǁnāpa ge toa tama hâ i. ǃGâsagu ge ǀgamǁî ǃhūbaib torob ǁaeb ǃnâ. Gretes tsî ǁîs mas tsîna ǃKhē xu ǂgō-ommi ǂkhanina mās ǀkha ge ǂgomǃgâ tama hâ i. Tsî daob ǃnân gere ǀhaos tsîna ge  ǃhoa-u ra tama hâ i. ǁNās ge kaise ge tsûtsûsa i. ǁNā tsûb ge kaise ge ǃgam i. Gretes ge ra mî, gaxu ǁaeba i ge ge ū ǁîsa ǁkhapa nē ǃgâsaga ǀûba tsî ǂgomǃgâsa. ǁAeb ra ī khamis ge ge ǂanǃgâ, Jehovab ge ǁîga a ǀûbasa. Tsîs ǁîs tsîna ǁîga nî ǀûbasa. *

16. Tae-i ǃaroma da ǃgarise sîsen tsî sada ǃgâsana ǂgomǃgâsa nî ǁkhāǁkhāsen?

¹⁶ Nēti ra ǂhapuǂâi kai xūna du ga ǃkharuǃnâ o. ǃGarise sîsen re î du ǂgomǃgâsiba omkhâi. ǁAeba du ge ǂhâhâ xawe i ge sadu ǁgūtsâde nî ǀkhaehe. Aiǁgause, ǁgai hâ ǂû-e du ga ǂû o. O du ge ǃnāsase nî ǂanbasen mati ī ǂû-e du ra ǂûsa. Xawe ǀgui ǃnâsa ǁgai ǂû-e, ǂûs ge ǂû ǀû kaida tide. ǁNās ǁkhās khami da ge tā ǀgui ǁgai xū-i hîna da ge ǃkharuǃnâ-e nî mā-am. Sada di ǂgomǃgâsiba sada di ǃgâsan ǃnâ ǂhapu kaisa. ǀOasa kurusa ūhâ tama di da a ǂan na. Sada ǂgomǃgâsiba da ga omkhâi, o da ge ǂkhîba nî ūhâ. Tsî dī ǁkhā da a xūn ai ǂâisa nî ǂnûi. O da ge ǂgomǃgâsib gagaba ǀhaohâb ǃnâ ra aiǃgû kai.

17. Mati iob ǂgomǃgâsiba a ǂhâǂhâsa? Tsî tae-e da saora ǁkhāǁkhāǃâs ǃnâ nî ǃhoaǃgao?

¹⁷ ǁGâuab di ǃhūbaib ǃnâ i ge ǂgomǃgâsiba a ǀoro. Xawe da ge sada ǃgâsana a ǂgomǃgâ ǁkhā, sada ǁîna a ǀnam. Tsîn ǁîn tsîna sida a ǀnam amaga. ǁNāti ī ǂgomǃgâsib ge ǂkhîb tsî ǀguiǃnâxasib tsîna nî hā-ū nēsi. Tsî ǁkhaubas ase nî ī, hānîǁaeb ǃnâ da nî hōǃâ ǃgomsigu ǃnâ. Tae-e du nî dī khoe-i ga sadu ǂgomǃgâsiba khôa o. Tsî du ga ǁkhawa ǁîna ǂgomǃgâ tama ga ra io? Dītsâ tsî mâsiga Jehovab ra mû ǀgaub ǃnâ mû re. Î Elobmîs daoǁgaude ûiǂui, ǃgam ǀnamma sida ǃgâsana omkhâiba. Tsî Elobmîs aiǁgaude xu ǁkhāǁkhāsen. Tsûaǂgaoba da ge a dan ǁkhā. Tsî sada ǂgomǃgâsiba naun ǃnâ a omkhâi ǁkhā. ǁNāsa da ga dī, o da ge nî ǀkhaehe, ǃgôahe ǁoasa ǀhōsan ǀkha. Sadu ǃgâsa î xa ǃnāsase a ‘ǀgū-e.’ (ǂKhm. 18:24) ǂGomǃgâsib ge ǀgam ǀkhāga xu hâ. Xawen ge nî ǂan sida naun ǃnâ ǂgomǃgâsiba ūhâ. Khamin ge ǁîn tsîna ǂgomǃgâsiba a ūhâ ǁkhā. Sao ra ǁkhāǁkhāǃâs ǃnâ da ge a ǃhoaǃgao ǁkhā. Mati da sada ǃgâsana ǁgau ǁkhā ǃkhaisa ǁîn ǂgomǃgâsiba da a anusa.