ǂOA GORO kuri î ge ǀoadisidi ǃnâ hâ ǃgâsaga ǀhaohâb ǃûi-aogu tsî ǀhaohâb hui-aogu ase ǃhūbaib ǂhawase Jehovab di ǀHûǀguitimî-aon ǁaegu ge ǁgaumâihe. Sago ga nē ǃgâsagu ǀgui o, o go ge sago ǁgaumâis ǃnâ nî ǃgâiaǂgao.

Xawe go ge ǀnîsi ra ǂâiǂhansen. Jason di ǀon hâ ǂkham ǀhaohâb ǃûi-aob ge ra mî, “ǀhaohâb ǃûi-aob ase ta ge ǁgaumâihe o, o ta ge gere ǃao.” Moseb tsî Jeremiab tsîn ge ǁîkha ǁgaumâis Jehovaba xu ra hāsa kha dīhō tide di gere tsâ. (Eks. 4:10; Jer. 1:6) Sago tsîn ga nēti ga ra tsâ o, o go nēsa mati nî mâǃoa tsî nî aiǃgû? Timoteub di aiǁgaus xa ǂâi re.​—ǃNǃkh. 16:1-3.

Timoteub ge ǀnîsi ge 20 kurixa i apostel Paulub ge a ǁkhau bi o îb ǁîb ǀkha ǀnî hâ ǃādi ǃnâ sī aoǁnâ. Timoteub ge ge ǂkham i ǁnā-amaga ǂgomǃgâsens ǀkha ǃgomsiba ge ūhâ i ǁîb ǀasa ǁgaumâis ǃnâ. (1Tim. 4:11, 12; 2Tim. 1:1, 2, 7) ǁAeroba ǃkharu hâseb ge Pauluba Filipeǁîn ǀhaohâba ge mîba: “Tsî ta ra ǂâi ǃKhūb Jesub ǃnâ, Timoteuba ta nî ǃhaese sadu ǃoa sîsa . . . . ǀGuib xaweba ta kom ūhâ tamao, ǁkhā ǀguiǂâixasib ǀkha nî sadu dina ǂhansenbaba.”​—Fil. 2:19, 20.

Tae-e Timoteuba ge ǀō-aisa ǀhaohâb ǃûi-ao kai? ǃNani xūna da ge Timoteub aiǁgausa xu nî ǁkhāǁkhāsen.

1. ǁÎb ge khoena gere kōǃâ. Paulub ge Filipeǁî ǃgâsana ge mîba: ‘[Timoteub] ge nî ǂhansenba’ du di. (Fil. 2:20) Timoteub ge khoena gere kōǃgâ. ǁÎb ge khoen gagasi mâsib xa gere ǂhansen tsî gere ǂgao în ǁîna Jehovab ǃoa ǀgū.

Tā bēb ǃnari-aob hîna ǃkhais tawa ǁaeb ai sīs xa ǀgui ra ǂhanseni khami ī re. Willem di ǀon hâ ǃgâsab hîna 20 kuriga a ǀhaohâb ǃûi-aob ge ǀasase ǀhaohâb ǃûi-aose ra ǁgaumâihe ǃgâsaga ge ǀapemā: “ǃGâsana go ge nî ǀnam tsî ǁîn ǂhâsiga nî kōǃgâ ǀapeǂhumis di ǁgaragu ǀguigu ose.”

2. ǁÎb ge gagasi xūna ǂgurose gere mâi. Timoteub aiǁgausab ge nau khoen ǀkha a ǀgopeǀnō o, ob ge Pauluba ge mî: “ǁÎgu hoagu kom ǁîgu ǃgâiba ra ôao, tsî Xristub Jesub dina ôa tamao.” (Fil. 2:21) Paulub ge ge mû Romeb ǃnâ hâ ǃgâsagu ge ǁîgu dī xūn ǀkha ǀgui gere ǁaeǁaesensa. ǁÎgu ge gagasi xūn ǃnâ ǁhaosa xu gere ǃkhō-oasen. Xawe Timoteub ose. ǁÎb ge ǃgâiǂhôasa aoǁnâs ǃnâ gere ǁhao tsî Jesajab ǂâi ǀgauba ge ūhâ i, mî rase: “Mû, nē ta a, tita sî re.”​—Jes. 6:8.

Mati go sago di ûib tsî gagasi ǁgaumâidi tsîna nî ǀguiǀgui? ǂGuroseb ge Pauluba ge mî: “ǁÎsa xu ra ǀgora xūna du nî ǃâitsâ ǁkhāse.” (Fil. 1:10) Elob ǂgurose ra mâi xūna sago tsîna ǂgurose mâi re. ǀGamǁîse, ǀgui ǃgupu ûiba  ûi re. Tsî ǁaeb tsî ǀgaib tsîna ra ǂkhôa xūna xu ǂgō re. Paulub ge Timoteuba ge mîba: “ǂKhamkhoesis di turaga ǁhâxū; î sauruǃgon ǂhanu-aisib, tsî ǂgoms, tsî ǀnammi tsî ǂkhîb tsîna.”​—2Tim. 2:22.

3. ǁÎb ge ǃanu ǃoabas ǃnâ ǃgarise gere sîsen. Paulub ge Filipeǁîna ge hōhōǃnâ, mî rase: “Tsî ǂhauǃnâb a ǃkhaisa du a ǂan: ǀGôaseb tita ǁgûta ǀkha ǃgâiǂhôas ǃnâ gere sîsen xui-ao.” (Fil. 2:22) Timoteub ge ge ǀopesa tama hâ i. ǁÎb ge Paulub ǀkha ǀguiba gere sîsen tsî nēs ge ǁîkha ǀhōsagusisa ge ǀgaiǀgai.

Elob ǀapeǂhumis ge nētsē hoaǁae sîsen-e ūhâ. Nē sîsenni ge ra ǃgâiaǂgao kai da tsî sida ǃgâsana ǃoas tsîna ra ǀgū kai da. Hoa go ge nî ǁgūtsâ “ǃKhūb di sîsenni ǃnâ” ǀoasase dīsa.​—1Kor. 15:58.

4. ǁÎb ge ǁkhāǁkhāsen nî ge xūna gere ûiǂui. Paulub ge Timoteuba ǃoa ge mî: “Xawets ge satsa ge sao ti ǁkhāǁkhās, tsî ti tanisens, tsî ti ǂâibasens, tsî ti ǂgoms, tsî ti ǃnūǃnâxasib, tsî ti ǀnammi, tsî ti sâsasib” tsîna. (2Tim. 3:10) Timoteub ge ǁkhāǁkhāsen nî gere xūna gere ûiǂui amagab ge kai ǁgaumâide ge hō.​—1Kor. 4:17.

Gagasise ra daoǁgau go khoe-e ū î go hâ? Ūhâ tama go ga ra io, o tae-i ǃaroma go ôa tama hâ? Tom di ǀon hâ ǃgâsab hîna ǂgui kuriga a ǀhaohâb ǃûi-aob ge ra mî: “ǂAnsa ūhâ ǀhaohâb ǃûi-aob ge tita ǃnâ ǃgâiǃgâibasensa ge ūhâ i tsî ǃgâi ǀgaub ǃnâ ge ǁkhāǁkhā te. Tita ge ǁîba xu ǀapemāde gere hō tsî ǁîb ra mî khami gere dī. ǁNās ǀkha ta ge ti ǁkhoaǂgaosiba ge omkhâi.”

5. ǁÎb ge aitsama gere ǁkhāǁkhāsen. Paulub ge Timoteuba ge mîba: ‘Eloǃaoǃgâxasib ǃnâ ǁkhāpesen [ǃâisen].’ (1Tim. 4:7) ǃKhoe-ao-i ge ǁî-e ra ǃâi khoe-e ūhâ xawe î ge ǁî-e aitsamas tsîna nî ǃâisen. Paulub ge Timoteuba ge mîba: ‘Khomai, î ǁnama, î ǁkhāǁkhā hâhâ, sī ta nîs kōse .    Nēn xa ǂâiǂâisen, î ǁîn ǃnâ hâ, îs aiǃâ ǃgûs âtsa ǂhaisa hoa xūn ǃnâ.’​—1Tim. 4:13-15.

Sago ǂansa go ge hoaǁae nî omkhâi. Gagasise go ge tā nî ǂkhabu tsî ǀapeǂhumis ra mā go daoǁgaudi hoade nî sao. Tā go ge nî ǀgapiǂâixa tsî nî ǂâi hoa xūna go aitsama a dī ǁkhāsa. Timoteub khami go ge ‘aitsama kōǃgâsen tsî nî ǁkhāǁkhāsen.’​—1Tim. 4:16.

6. ǁÎb ge Jehovab gagab ai gere ǂgomaiǂnûi. Paulub ge Timoteuba ǁîb aoǁnâ sîsenni xa ge mîba: “Nē ǃgâi ǁguibēbahets hâ ǁauǁauxūba sâubasen re, ǃAnu Gagab sada ǃnâ ǁan hâba xu.” (2Tim. 1:14) Aoǁnâ sîseni ǃnâ ǁkhaubasens ǃgaob ge Timoteuba Elob gagab ai gere ǂgomaiǂnûi.

Donaldi hîna ǂgui kuriga a ǀhaohâb ǃûi-aob ge ra mî: “ǁGaumâisa ǃgâsagu ge ǁîgu ǀhōsagusisa Jehovab ǀkha nî ǃgôaǃgâ. ǁÎgu hîna nēsa ra dīgu ge nî ‘ǀgai’. Elob gagaba gu ga ǀgoreba tsî gagab ǂûga ga ra ôaǃnâ o, o gu ge ǁîgu ǃgâsan ǃgao ǀkhaeb ase nî ī.”​—Psa. 84:7; 1Pet. 4:11.

Kaise î ge a ǃgâi mûsa Jehovab ǀasase ǁgaumâisa ǃgâsaga ǁîb ǃoabas ǃnâ ra sîsen-ūsa. Jason nî ge ra mî: “ǀHaohâb ǃûi-aob ase ta ge ǁgaumâihe ǁaeb ai ta ge ǂgui xūna ge ǁkhāǁkhāsen tsî ge ǂgomǃgâsen tsoatsoa. Tita ge ti ǁgaumâisa ra ǃgôaǃgâ tsî nēsa ǃgâi aiǂhanub ase ra mû.”

Jehovab xa sîsen-ūhes ǃnâ aiǃgû î go ra? ǁGūtsâ go re Timoteub aiǁgausa xu ǁkhāǁkhāsensa. O go ge Elob ǃoaba-aon ǃoa ǀkhaeb ase nî ī.