1-3. (a) Mâ ǃgomsigan ǂkhamkhoena ra hōǃâ? ǂKhō re. (Tsoatsoas ǃnâ hâ ai-īsiba mû re.) (b) ǂKhamkhoena tae-e dīs ǃnâ-ū ǃgâi mîǁguiga a dī ǁkhā?

ǀNÎSITS ge ǀūts a ǃā-e ǃoa ra ǃnari, ǂhâǂhâsa ǁaxasib ǃgao. ǁNāpa sīs ǃgaots ge bēb ǀkha nî ǃnari. Xawets go bēgu ra mâ ǃkhaib tawa a sī o, ots ge ǃaob xa ra hāǂamhe, khoen a ǂgui amaga. Kaise nî ǃgâis ge sats ga ra ǂan i o sats mâ bēb ai nî ǂoasa îts ǃnaribats ra ǃās tawa sī. ǀKharaba ra ī bēb ai ǂoas ǃnâ-ūts ge ǃnaribats ra ǃās ǃoa sī tide.

² ǂKhamkhoen ge nētsē ǁnā bēb ǀkha ra ǃnari khoen ǀkha a ǀgui. ǂKhamkhoen ge gaxu daob ai noxoba nî ǃnari, bēb ǀkhas ose xawe ǁîn ûib ǃnâ. ǀNî ǁaeb ain ge mîǁguigu tsî ǃgâi ǃēsa ûib ǃnâ ūhâs mîǁguigu xa a dana mâhe ǁkhā. ǂKhamkhoets axase î ge ǃgâi mîǁguiga dīsa nî supu i, sats ga ra ǂan o tae-ets ûib ǃnâ ǂhâba hâsa. Mâ daob aits garu?

³ Nē ǁkhāǁkhāǃâs ǃnâ da ge nî ǃhoaǃgao matin ǂkhamkhoena Jehovaba ǀoasase a ǃoaba ǁkhā ǀgausa. Nēs ge ra ǂâibasen ǁîn ge ǀgapi ǁkhāǁkhāsens, sîsenni tsî omaris ǃereamsa tanis  ǃnâ Jehovab ǂâi ǀgauba nî ūhâ di. Tsî nēs ge gagasi mîǁguiga dīs tsîna ǃkhōǂgā hâ. ǂKhamkhoen hîna ǁkhāsib hoab ǀkha Jehovaba ra ǃoaban ge ǁîb xa nî ǀkhaehe.​—Khomai re ǂKhoamîdi 16:3.

4. Tae-e da nē ǁkhāǁkhāǃâs ǃnâ nî ǃhoaǃgao?

⁴ Gagasi mîǁguiga ǂkhamts a hîna dīs ge kaise a ǃgâi. Tae-i ǃaroma? ǃNona ǃaromade da ge nî ǃhoaǃgao. ǂGuro ǀgam ǃaroma ra ge ra ǁgau gagasi mîǁguigu ge Jehovab tsî khoe-i ǁaegu hâ ǀhōsagusisa a ǀgaiǀgai ǁkhā. Tsî ǃnonaǁî ǃaromas ge gagasi mîǁguigu a hau ǁkhā ǀkhaegu xa ra ǃhoa.

5. Tae-i ǃaromats gagasi mîǁguiga nî dī?

⁵ ǂGurose, ǃgâi gagasi mîǁguiga dīs ǃnâ-ū da ge Jehovaba ǃgôaǃgâsiba ra ǁgau ǁîb ge dība da ǃgâi xūn hoan ǃaroma. Psalmǁnae-aob ge ra mî: “ǃGâi i ge a ǃKhūba karesa . . . Sats ge tita ge ǃgâiaǂgao kai, ǃKhūtse, sa dīgu ǀkha; tita ge nîra dâ sa ǃomkha di sîsengu ǃaroma.” (Psa. 92:1, 4) ǂKhamkhoets ase ǂâi re Jehovabats tae-e a mā ǁkhāsa. Sa ûib, ǂgoms, Elobmîs, ǀhaohâb tsî ǀamosib kōse ûisa. ǂGurose gagasi xūna mâis ge nî ǁgau Elobats ra ǃgôaǃgâsa dīb gen hoan ǃgao tsîts ge nēs ǀkha ǁîb ǃoa a ǀgū ǁkhā.

6. (a) Sada gagasi mîǁguiga mati sida ǀhōsagusisa Jehovab ǀkha ra tsâǀkhā? (b) Mâ mîǁguiga ǂkhamsis ǃnâ ǀnai a dīhe ǁkhā?

⁶ ǀGamǁîse, gagasi mîǁguiga dīs ge ra hui tsi îts ǃgarise sîsen tsî Jehovab aiǃgâ ǃanu. Tsîts ge nēs ǃnâ-ū ǁîb ǃoa a ǀgū ǁkhā. Apostel Paulub ge ge mîmâi: ‘Elob ge ǂhanuoǃnâ tama xui-ao, ob ge sadu sîsenni tsî ǀnammi . . . tsîna ǀuru tide ǁîb ǀons ǃnâ du ge ǁgauba.’ (Heb. 6:10) Sats ge tātsēs tsîna kaise ǂkham tama hâ mîǁguiga dīsa. Christines ge 10 kurixas a hîna ǀnai ge mîǁgui ǁîs aimâba-ao sîsen-e ra dī ǂgaosa tsîs ge ǂgomǂgomsase Jehovaba ra ǃoaba khoen ûib xa khomais xa ge ǃgâibahe i. Tobib ge 12 kurixab a hîna ge mîǁgui, ǁîb hoaraga Elobmîsa ǁāǁnâheb nîs aiǃgâ nî khomaisa. Maximi ge ge 11 kurixa i tsîs ge ǁîb ǃgâsa Neomis ge ge 10 kurixa i ǁāǁnâhe ra ge o. Betels tawa sī ǀgui tsē sîsens ǃgao ra ge gere ǂhomisen. Nē mîǁguib ai sîsens ǃgao ra ge Betels di xoaǂgā-ūsens ǂkhaniba oms ǃnâ ge ǂao mâi hâ i. ǂHâǂhâsa mîǁguiga xoa mâi tsî ǁîgu ǃoagu sîsen tsoatsoa re.​—Khomai re Filipeǁîn 1:10, 11.

7, 8. (a) Nēsi ǀnai mîǁguiga dīsa mati ega nî hui tsi? (b) ǀNî ǃgâsasa tae-e ge mîǁgui ǂkhamsis ǃnâ tsî nēsa mati ge huisi?

⁷ ǃNonaǁîse, mîǁguiga ǂkhamsis ǃnâ dīs ge ǃgâise nî daoǁgau tsi. ǂKhamkhoen ge skoli, sîsen-i tsî ǀnî hâ ǃâgu ûib digu ǃnâ mîǁguiga nî dīse i. ǃGâi mîǁguiga dīs ge ǂhanu daoba ǁhûis ǀkha a ǀgui. ǂAnts ga ra o, mâ daob aits garusa ots ge ǃgomsi-e ūhâ tide ǃās tawa sīsa. ǁNās khamits ga ǂhanu mîǁguiga tsoatsoasa xu ga ra dī o, ots ge ǀunis ai ǃgâi mîǁguiga nî dī. ǂKhoamîdi 21:5 ge ra mî: “ǂÂidi ôasab didi ǀguidi ge ǃnāǂamsiba ra hā kai.” Kaise nî ǃgâis ge ǀnai ǁaeb aiǃâ mîǁguiga dīsa. Damaris di ǀon hâ ǃgâsas tsîn ge ǂkhams a hîna ǂhâǂhâsa mîǁguiba ge dī.

⁸ Damaris ge kaise ǀgapi ǃgôaga skoli ǃnâ ge hō, ǁîs ǀuniga kurib ǃnâ. ǁÎs ge ǀgapi ǁkhāǁkhāsen ǃkhaib tawa sī prokoreursisa ǁkhāǁkhāsens aiǂhanuba ge ūhâ i xawe banks tawa sī sîsensa ge ǁhûi. Tae-i ǃaroma? “ǀNai ta ge ǂkhamsisa  xu mîǁgui hâ i amaga, aimâba-aose sîsensa. ǁNās ǀkha ta ge ǀoasase ge sîsen ǂgao tama hâ i. Grada prokureursis ǃnâ ūhâs ge ga ǃaroma hâ i ta ǀgapi marisa matare-e tsî i ge ga ǃgom hâ ǃkhare tsēs ǀguisa sîsensa.” Damaris ge 20 kuriga aimâba-aose ra sîsen. ǁÎsa ǂkhamsis ǃnâ ǃgâi mîǁguiba ge dī? ǁÎs ge ra mî: “Banks tawa ta ge ǃnāsase prokureurgu ǀkha ra sîsen. ǁÎn ge ǀgapi ǁkhāǁkhāsensa ta ga ūhâ hâ o, o ta ga dī hâ sîsen-e ra dī. Xawen ge ǂguina kaise a ǂkhîoǃnâ. Aimâba-aose sîsens ge ǀgapi ǁkhāǁkhāsa ūhâs tsî ǂkhîoǃnâse ûisa xu ge ǁkhauba te. Kaise ta ge ra ǂkhî Jehovaba ta ǀoasase ra ǃoaba ǃkhais ǃgao.”

9. Tae-i ǃaroman ǂkhamkhoena koahesa anu hâ?

⁹ Sida ǀhaohâgu ǃnâ î ge ǂgui ǂkhamkhoena koahesa anu hâ. ǁÎn Jehovab ǃoa kō tsî ǃgâi gagasi mîǁguiga ra dī amaga. ǁÎn ge ǂkhamsis ǃnâ ǁkhoaxa ǁaeba ra ūhâ xawe nauǀkhāb ais tsîna Jehovab ǃoa ra kō daoǁgauhes ǃgao. Nēs ge ǀgapi ǁkhāǁkhāsens, sîsenni tsî omaris ûib tsîna ǃkhōǂgā hâ. Salomob ge ge mî: “ǂGomaiǂnûi ǃKhūb ai sa ǂgaob hoab ǀkha, ǁîba ǂan sa daogu hoagu ǃnâ, ob ge ǁîba daogu âtsa nîra ǂhauǂhau.” (ǂKhm. 3:5, 6) Sadu ǀhaohâb ǃnâ hâ ǂkhamkhoen ge kaise a ǀō-aisa Jehovab mûǁae. Jehovab ge ǁîna kaise a ǀnam ǁnās ǀkhab ge ǁîna ǁkhauba, daoǁgau tsî ra ǀkhae.

10. (a) Tae-i ǃaroma da aoǁnâ sîsen-e ǂgurose nî mâi sida ûib ǃnâ? (b) Mati da ǁkhoaǂgaosiba aoǁnâ sîsenni ǃnâ a ūhâ ǀgara ǁkhā?

¹⁰ ǂKhamkhoe-i hîna Jehovaba ra ǂkhîǂkhî ǂgao i ge ǃnāsase aoǁnâ sîsenni ai ǂâisa nî ǂnûi. Jesub ge ge mî: “Tsîs ge ǃgâiǂhôasa aibe hoa ǁaedi ǃnâ nîra aoǁnâhe.” (Mrk. 13:10) Aoǁnâ sîsenni ge kaise a ǂhâǂhâsa, ǁnās ǀkha da ge ǁî-e ǂgurose sida ûib ǃnâ nî mâi. Sats tsîna nēs ǃnâ ǃâ-e ūhâ ǂgao tama hâ? Aimâba-aose sîsen ǁkhā îts a? Xawe tae-e nî ī sa aoǁnâ sîsenni ǃnâts ga ǂkhîoǃnâ o? Matits ǁkhoaǂgaosib ǀkha a aoǁnâ ǁkhā? Sats a dī ǁkhān: ǃGâise aiǂhomisen tsî tā ǃao ǂants a xūna nau khoen ǀkha ǀgoragusa. Kaisets ge nî buru hōǃâ ǁkhāts a ǀkhaeba nēsa dīs ǃnâ-ū.

11, 12. (a) ǂKhamkhoena aoǁnâs ǃgao mati a ǂhomisen ǁkhā? (b) ǀNî ǂkhamkhoeba mati ge ǃhoa khâi ǁîb ǂgom ǀgaub xa?

¹¹ Sats ge ǀnîsi sa skol ǀhōsan hoaǁae ra dî tsi dîs di ǃereamsa a hōǁkhā. Aiǁgause, “tae-i ǃaromats Elob ǃnâ ra ǂgom?” Sida di internets ǂhaweb jw.org’s ai i ge ǁkhāǁkhāǃâde hâ, hîna ǂkhamkhoen hîna ǁnāti i dîde ūhâna ra huide. Look under BIBLE TEACHINGS > TEENAGERS. ǁNāpats ge ǃereamdi ǂkhaniba nî hō hîna “tae-i ǃaroma ta Elob ǃnâ ra ǂgom?” di hâba. Nē ǂkhanib ge nî hui tsi îts ǃgâise sa ǃereamsa aiǂhomi. ǁNāpa i ge ǃnona xoade hâ hîna sa ǂgomsa a ǀgaiǀgai ǁkhāde—Hebreǁîn 3:4, Romeǁîn 1:20 tsî Psalmdi 139:14. Nē ǂkhaniba sîsen-ūs ǃnâ-ūts ge ǃnāsa ǃereamde a hō ǁkhā.​—Khomai re 1 Petrub 3:15.

¹² ǁAebats ga ra ūhâ o, o sa skol ǀhōsana mîba re în jw.org’sa sari. Tsî ǁnāpa ǃnāsase khomaibasen. Lukab di ǀon hâ axab aiǁgausa kō re. Klas ǃnâ i ge ǃkharaǃnâgu ǂgomdi xa gere ǃhoa-e tsîb ge Lukaba ge mûǂan skoli ǂkhanis ǃnâ i ama tama xūna Jehovab di ǀHûǀguitimî-aon xa a xoasasa. Taob gere xaweb ge ǁîb ǁgauǃnâ-aosa ge ǂgan îb nē ama tama xūn hîna ǀHûǀguitimî-aon xa ra mîhe  na ǂhanuǂhanu. ǁÎb ge ǁîna ǁîb ǂgom ǀgaub xa ǀgui ge mîba tama hâ i xawe ǁîna internets ǂhaweb tsîna ge ǁgau. ǁGauǃnâ-aos ge klasa oms sîsenni ase ge mîba în ǃuri xoa-aihe ra ǂhaweb ai hâ vidiob ǁOre-ao-e sa ǃomra sîsenū tamase dī ǃoa re di hâba sī kō. Lukab ge kaise ge ǃgâiaǂgao ǁîb ǂgom ǀgaub xab ge ǃhoa khâi o ǃao tamase.

13. Tae-i ǃaroma da tā aoǁnâ sîsenni ǃnâ da ga ǃgomsiga ga ra hōǃâ xawe tā nî ǀûsenba?

¹³ Tātsēs tsîna tā ǂkhabuǂâi re, daob ga ǃgomse ga ra mûsen xawe. (2Tim. 4:2) ǃGomsib ga hā xawe sa mîǁguib ai mâ. Katarinas ge 17 kurixas a hîna ge mîǁgui, ǁîs ge sîsen ǀhao-ūs ra khoena nî aoǁnâba di. ǀGui khoe-i ge ǂgui ǃnādi kōse ge mîǁgaiǁgai te xawe i ge ǁnā-e tita ge ǃkhō-oa tama hâ i khoena aoǁnâbasa. ǁÎs di tanisen ǀgaub ge Hans di ǀon hâ khoeb hîna ge ǁîs ǀkha gere sîsenna ge tsâǀkhā. Nēs xa ǃaromahe hâseb ge ǁîba ega Elobmîsa ǁkhāǁkhāsen tsî ge ǁāǁnâhe. Katarinas ge ǁnā ǃāsa xu ge doe tsî nēn hoan xa ge ǀū i. Nēs xa ǂâi re, 13 kurigu ǃkharu hâseb ge Hansa sari ra ǃhoa-aob ase Katarinas di ǀhaohâb ǃnâ sī ǃhoasa gere mâ. Nēn hoan ge Katarinas ga aoǁnâ sîsenni ǃnâ ǀûsen hâ o, o ga ī tama hâ.

14, 15. (a) ǁGâib ǃnagan ga hâ o, on ǂkhamkhoena tae-e ǂâis ǃnâ nî ūhâ? (b) ǂKhamkhoena mati ǁgâiba a mâǃoa ǁkhā?

¹⁴ Nē ǁkhāǁkhāǃâs ge go hui tsi îts sa ǂâisa Jehovab ǂâisa dīs ai mâi. Nēs tsîn ra ǂâibasens ge sa ûiba gagasi mîǁguiga dīs ai mâisa. Sats khami a ǂkham an ge ǁkhoaxa ǁaeba ūhâs xa a ǃgâibahe. Tsîn ge ǁîna satsa a ǁkhau ǁkhā îts ǁîn ǀkha sī ǁkhoaxa ǁaeba ūhâ. Xawets ge sa mîǁguiba dī tsî ǁîna nî mîba sats ǁîn ǀkha ǁkhoaxa ǁaeba ūhâs ǃnâ ǁhao ǂgao tama hâsa. Tā nēs xa ǂgaeǂhapuhe re. ǁKhawa bēb di ǂkhōs xa ǂâi re. Sats ge amase mâ bēb hoab ai a ǂoa ǁoa, bēb ai hâ khoen ǁkhoaxa ǁaeba ūhâ ǃkhais ǃgao.

¹⁵ ǂGui ǃnâgu ǀgaugu ge hâ ǂkhamkhoena xu ra hā ǁgâiba mâǃoasa. Aiǁgause, ǃâitsâde a ǃaroma ǁkhā mâsiba  xu ǂgōsen re. (ǂKhm. 22:3) Tsî ǁgâib ǃnâ māǁnâsens a ǃaroma ǁkhā tsûb xas tsîna ǂâi re. (Gal. 6:7) Huiba nauna xu ūǃoa re. ǃGamǃgamsenxa ǀgaub ge nî hui tsi îts sa ǁgûn tsî gagasise a ǀgaisa Xristeǁîna xu huiba ūǃoa.​—Khomai re 1 Petrub 5:5, 6.

16. ǃGamǃgamsenxa ǀgauba xu da mati nî ǀama? ǂKhō re.

¹⁶ ǃGamǃgamsenxa ǀgaub ge Kristofa ge hui îb ǃgâi ǀapemāde ūǃoa. ǁĀǁnâheb ges khaoǃgâb ge ǁîba ǃâisens ǃkhaiba ǃoa ge ī tsoatsoa. ǁNāpa î ge nau ǂkhamkhoena ǁîba ge ǂkhâǃnâ îb ǁîn ǀhûgus ǃnans ǃnâ xoaǂgāsen. Kristofi ge ǀhaohâb ǃûi-aob ǀkha nēs xa ge ǃhoa, ǁîb ge Kristofa ge dî îb ǁkhōǁkhōsasib nē ǃnans ǃnâ xoaǂgāsens diba mû. Nēs ge a ǃaroma ǁkhā îb ǁîba dan ǂgaos di gagaba ūhâ. Kristofi ge nē ǀapemāde ge ǃgâ tama hâ i tsî ge xoaǂgāsen. Xaweb ge ega ge mûǂan nē ǀhûgus a ǁkhōǁkhōsa ǃkhaisa. Tsîb ge ǁkhawa ǃkharagaǃnâgu ǀhaohâb ǃûi-aogu ǀkha ge ǃhoa, hoagu ge ǁîba Elobmîsa xu ge ǀapemā. “Jehovab ge ǃgâi ǀapemā-aoga ge sîba te. Tita ge Jehovab ǀapemāde ge ǃgâ, ǁaeba i ge ū xawe.” ǃGamǃgamsenxa ǀgaubats ūhâ ǃgâi ǀapemāde ūǃoas diba?

17, 18. (a) Jehovaba tae-e ǂkhamkhoena ra ǁkhoreba? (b) Tae-i ǃgomsiba kaisis ǃnâ a hōǃâ-e ǁkhā? ǂKhō re.

¹⁷ “ǃGâiaǂgao re, ǂkhamkhoetse, ǂkhamsis âts ǃnâ, îts ǃgû sa ǂgaob ra ǂnanǀî daoga ǃoa, tsî kōǀîs sa mûdi dis ǃnâ; xawe ǂan Elob nî nē xūn hoan ǃaroma ǀgoraǃgâ tsi ǃkhaisa.” (Aoǁn. 11:9) Jehovab ge ǂhâba hâ în ǂkhamkhoena ǃgâiaǂgao. Nē ǁkhāǁkhāǃâs ge go ǁgau da nēs amabes ǃnâ a ī ǁkhāsa. Sa ǂâisa gagasi mîǁguiga dīs ai mâi re tsî Jehovaba sadu di ǀapedi hoadi ǃnâ ūhâ re. Nēsats ga ǁaeb aiǃâ ga ra dī o, o i ge nî supu Jehovab daoǁgaus, ǁkhaubas tsî ǀkhaeb tsîna mûǂansa. Jehovab mîs ǃnâts ra hō ǁnamasa ūǃoa re, sao ra mîdi ǀkha: “Îts sa Kuru-aob xa ǂâi ǂkhamkhoesis âts di tsēdi ǃnâ.”​—Aoǁn. 12:1.

¹⁸ Khoe-i ge tātsēs tsîna gaxuse ǂkhamse hâ toa tama hâ. Hoa da ge ǃhaesa ra kai tsî ra tara tamas ka io ra ao kai. Kaise a tsûtsûsas ge ǂguin ge ǃgâi tama mîǁguiga ge dī ǂkham an a hîna. Xawen ge nētsēs ǂkhamkhoena ǃgâi gagasi mîǁguiga dīs aiǂhanuba ūhâ tsî nēs ge ǁîna kaisis ǃnâ a hui ǁkhā. Nēs ge Mirjanas ǀkha ǂkhamsis ǃnâ ge ī. ǁÎs ge ǀhûgus ǃnâ kaise ge ǃgâi i tsî ge ǂgan-e îs Olympik ǀhurugu ǃnâ ǁhao xawes ge ǁîsa ge ǁhûi aoǁnâ sîsenni ǃnâ ǀoasase ǁhaosa. Mirjanas ge 30 kurigu khaoǃgâ ǁîs aob ǀkha noxoba ǀoasase aoǁnâ sîsenni ǃnâ ra ǁhao. ǁÎs ge ra mî: “ǀGapiǃgôahes, ǂhaisib, ǀgaib tsî ǃkhūsib tsîn ge ǁaerob dis ǀguisa i. Nēn ge ǀgui tsē nî ǃgû-i. Amase Jehovaba ǀoasase ǃoabas mîǁguigu ge kaise a ǃgâi, khoenats ra hui amaga în gagasise ǀgai.”

19. Gagasi mîǁguiga ǂkhamsis ǃnâ dīs ra mā ǃgâiaǂgaob xa ǃhoa re.

¹⁹ Sadu ǀhaohâb ǃnâ hâ ǂkhamkhoen ge koahesa anu hâ Jehovaban ǀoasase ra ǃoaba ǂgao amaga. Tsîn ge ǁgâigu tsî ǃgomsigu tsîna ra dan. Xawen ge ǂkhamkhoena ǃgâi gagasi mîǁguiga dīs tsî aoǁnâ sîsenni ǃnâ ǁhaos ǃnâ-ū nē ǁgâib hoaba ra mâǃoa. ǁÎn ge ra mîǁgui xū-i ǁîna ǃkhō-oa tidesa. ǂKhamkhoen ge ǂâis ǃnâ nî ūhâ ǁîn sîsengu ge tātsēs tsîna ǀuruhe tide. ǁÎn ge ǃgâi huiba ǁîn Xristeǁî ǃgâsana xu nî hō. Tsîn ga Jehovaba ǃoa ga ra kō o ǁîn ûib ǃnâ ob ge ǁîba ǁîn daoga nî ǂhanuǂhanu.