ǂÂIǂHANSEN di ge a ǃgomba da ǁkhā. (ǂKhm. 12:25) ǃGoma du ge ǀnai hōǃâ tsâ hâ i. ǂÂiǂhansen du ra ǃkhais ǃaroma? Sadu tsâsiga du tani ǁoa. Tsî mâǀgai ǁoa du a khami ra tsâ? Di i ka io, o du ge ǀguri hâ tama hâ. ǂGui khoen ge tsau, ǂâiǂhansen tsî depresiba ra māhe. Aiǁgausen ge ǀAesen hâ omaris ǁani-e kōǃgâ. Tamas ka ion ge ǀnîna ǀnamsabena ǁōb ǃnâ ǂoaǃnâ hâ. Tsî ǀnîn ge tsūkeǃgâgu xa tsâǀkhāhe hâ. Xawe tae-e huida ǁkhā ǂâiǂhansen da go o? *

ǂÂiǂhansende da mati a tani ǁkhā ǀgaub xa da ge. Gao-aob Davib di aiǁgausa xu ǁkhāǁkhāsen ǁkhā. ǂGui ǃgom mâsigab ge ǁîb ûib ǃnâ gere hōǃâ. Tsîb ge ǁîb ûib tsîna ge ǂoaǃnâ ǁkhā. (1Sam. 17:34, 35; 18:10, 11) Tae-e Daviba ge hui îb nē ǂâiǂhansende tani ǁkhā? Mati da ǁîba a ǁgae ǁkhā?

Davib ge ǀgui ǁaeb ai ǂgui ǃgomsina ge ūhâ i. Aiǁgause ǂâi re, tae-i ge īsa. Gao-aob Sauli hîna gere ǃgambi ǂgaoba xub gere ǃkhoe o. Davib tsî ǁîb khoegu ge Siklagsa xu oaǀkhī. O gu ge ge mû ǁîgu khākhoen ge ǁîgu xūna ǃnari. ǁÎgu omde ǂhubi tsî ǁîgu omaride ǃkhōsis ǃnâ ūsa. Daviba mati ge tanisen? ‘Davib tsî ǁîb ǀkha ge hâ i ǁaes ge, dommi âna ūkhâi. Tsî ge ā, āǀgai-i xare-i ge ǃaruǀî ǁîn ǃnâ hâ tama is kōse.’ Davib ge kaise gere ǂâiǂhansen ǁîb ǂgomǃgâ hâ khoegu ge ‘ǁîbagu ǀui di ǀkha’ nî ǂnoas xa gere ǃhoa amaga. (1Sam. 30:1-6) Davib ge ǃnona kai ǃgomsiga ǀgui ǁaeb ai gere hōǃâ: ǁÎb omaris ge ǁkhōǁkhōsasib ǃnâ ge hâ i. ǁÎb ge gere ǃao ǁîb di khoegu ǃgambisa. Tsîb ge Gao-aob Sauli xas tsîna gere ǃgamhe ǂgao. ǂÂi re Davib gere tsâ ǀgauba.

Daviba ǁnāpaxu tae-e ge dī? ǁÎb ge ‘Jehovab ǁîb Elob ǃnâ ge ǀgaiǀgaisen.’ Daviba nēsa mati ge dī ǁkhā i? ǂAn da ge a Davib ge Jehovaba ǃoa. Hoaǁae gere ǀgoresa, huib ǃaroma. Tsî ǃkharu ge ǁaeb ǃnâb ge huihe ǀgaub xab ge gere ǂâiǂâisen. (1Sam. 17:37; Psa. 18:2, 6) Davib ge ge ǂan i Jehovab aib ǀapemā-e nî ôasa. ǁNā-amagab ge Jehovaba ge dî tae-eb nî dīsa. Davib ge Jehovab daoǁgausa hō, ob ge ǃhaese ǁnāsa ge dī. Nēs xa ǃaromahe hâse gu ge ǁîb. Tsî ǁîb khoegu tsîna Jehovab xa ge ǀkhaehe. Tsî ǁîgu omaridi tsî xūna ge hō-oa. (1Sam. 30:7-9, 18, 19) Davib ge dī ǃnona xūna ǃgaoǃgâ i du go? ǁÎb ge Jehovaba ǃoa ge ǀgore huib ǃaroma. Tsîb ge Jehovab ge ǃkharu gere ǁaeb ǃnâ dībabi xūn xa gere ǂâi oa. Tsî Jehovaba ge ǁnâuǀnam. Mati da Davib aiǁgausa ǁgae ǁkhā? Nē gu ge ǃnona ǀgauga.

1. ǀGore re. Mâǁaeb hoab hîna da ǂâiǂhansende ūhâb ai da ge. Jehovaba ǃoa ǀgore tsî huib tsî gā-aisib tsîna ǂgan ǁkhā. Huihe ǁkhā da ge a, î da ǃgâise tsâ. Sada ǃgomsin hoana da ga ǁîba mîba o. Tamas ka io da ge ǃhaese ǂgaob ǃnâ ǀgore ǁkhā. Sada mâsib ga ǁnāsa mā-am o. Jehovab ai da ga huiba ǂgan ǁaeb hoaba da ge ra ǁgau. ǁÎb ai da ra ǂgomǃgâ ǃkhaisa. Davib ge mî khami: ‘Jehovab ge a ti kai ǀui tsî ti sâuǃkhai. Tsî ti huiǂui-ao; ti Elob, ti ǃgareǀuib, ǁîb ai ta ra ǂgomaiǂnûib. Ti khōsikhō tsî ti ǃgâiǃōb di ǁnâb, ti ǀgapi sâuǃkhaiba.’ (Psa. 18:2) ǀGoresa ama hui i ra? ǁNaetisa aimâba-aos Kahlia di ǀon hâs ge ra mî: “ǀGore toas khaoǃgâ ta ge ǃgâise  ra tsâ. ǀGores ge ra huite i ta Jehovab khami ǂâi tsî ǁîba ǂgomǃgâ.” ǀGores ge ǃgâi ǀkhaeb Jehovaba xu da ra hōba. Nē ǀkhaeb ge ra huida î da. Sida ǂâiǂhansende tani ǁkhā.

2. ǂÂi-oa re Jehovab ge ǃkharu gere ǁaeb ǃnâ hui du ǀgausa. Sadu ûib ǃnâ du gere hōǃâ ǃgomsin xa du ga ǂâi. O du ge Jehovab huib ǀkha ǀgui du ge nēsa dī ǁkhā i ǀgaub xa ra ǂâi. Jehovab ge ǃkharu gere ǁaeb ǃnâ sada. Tsî ǁîb ǃoaba-aona hui ǀgaub xa da ga ǂâi. O i ge sida ǂkhîb tsî ǂgomǃgâsib Jehovab ǃnâ da ūhâba ra kai. (Psa. 18:17-19) Tita ge ǃereamhe ge ǀgorede xoamâi hâ.” Dib ge Joshua di ǀon hâ ǀhaohâb ǃûi-aoba ra mî. “Nēs ge ge huite î ta ǀgores ǃnâ ta ge ǂgan tsîb ge Jehovaba ǃeream xūna ǂâiho.” Jehovab ge ǃkharu gere ǁaeb ǃnâ huida ǀgaub xa da ga hoaǁae ǂâi. O da ge ǀasa ǀgaiba ra hō î da. Sida ǂâiǂhansende ǃkhamǃoa.

3. Xū-e dī re. Xū-e da nî dīs aiǃâ da ge. Elobmîs ǃnâ ǂgomǂgomsa doaǁgausa nî ôa. (Psa. 19:7, 11) ǂGuin ge xoa-en ga ôaǃnâ o ra mûǂan. Nēsan da ǃgâise ǁnâuǃā. Tsîn nēsa ǃgaise ǁîn ûib ǃnâ a sîsenū ǁkhāsa. Jarrod ti ǀon hâ ǀhaohâb ǃûi-aob ge ra ǁguiǃā: “Xoasa ôaǃnâs ge ra hui te î ta xoasa ǁnâuǃā. Tsî ǃamkuse mû Jehovab tae-e ra mîbate sa. Nēs ge ra hui te î ta khomai ta ra xūna ǂgom tsî dī.” Jehovab di daoǁgausa da ga Elobmîs ǃnâ ôa. Tsî sîsenū o, o da ge ǃnomsasib tsî ǃgâiaǂgaob tsîna ra hō. Tsî sida ǂâiǂhansende nî tani ǁkhā.

Davib ge ge mûǂan ǁîb di ǂâiǂhansende. Tani hōs ǃaromab ge Jehovab huiba ǂhâhâ isa. ǁÎb ge kaise Jehovab di huiba gere ǃgôaǃgâ. Tsî ge mî: ‘Elob ǀkha ta ge mira a ǂoa ǁkhā. Elob ge ǁîb, ti ǀgaib ǀkha ra anade.’ (Psa. 18:29, 32) ǀNî ǁaegu ai da ge ra tsâ. Sada ǃgomsin kaise ǃgom tsî sîsenǂamhe ǁoa di. Xawe da ge Jehovab huib ǀkha mâ ǃgomsi i hoa-e a sîsenǂam ǁkhā. Jehovab ǃoa da ga huib ǃaroma ǀgore. O da ge hoa xūn hînab ge dība da na nî ǂâihō. Tsî ǁîb daoǁgausa nî sao-ai. ǂGomǃgâsiba da ge a ūhâ ǁkhā ǂhâ da hâ ǀgaib. Tsî gā-aisib tsînab nî mādasa. Î da sida ǂâiǂhansende tani ǁkhā.