1. Daviba Jehovab xa mati gere tsâ tsî nēsa tae-e ge ǁgari bi dīsa?

GAO-AOB DAVIB ge ge xoa: “ǃKhūb ge a kai tsî karehesa anu.” (Psa. 145:3) ǁÎb ge Jehovaba ge ǀnam-i tsî nē ǀnammi ge ge ǁgari bi îb Eloba koa “ǀhaohâb ǃnâ.” (Psa. 22:22; 40:5) Sada tsîn ge Davib mîde ra ǂgom: “Ats koahe, sats ǃKhūts, sida îb Israeli di Elotsa, ǀamosiba xu ǀamosib kōse.”​—1Kro. 29:10-13.

2. (a) Mati da Jehovaba nî koa? (b) Mâ ǃgomsinan ǀnîna ra hōǃâ tsî tae-e da nî ǃhoaǃgao?

² ǀGui ǀgaub Jehovaba koas dib ge ǃereamdi ǃnâ-ū Xristeǁî ǀhaodi tawa. Xawen ge ǀnî ǃgâsan sada dina nēs ǀkha ǃgomsiba ūhâ. ǁÎn ge ǀhaodi tawa ra ǃeream ǂgao xawe ra ǃao. Matin nē ǃaos ǃgomsiba nî sîsenǂam? Tsî taena hoada nî hui i da ǂkhâǃnâ ra ǃereamde mā? Nē dîde da nî ǃereams aiǃâ hā re i da aibe haka ǂhâǂhâsa ǃaromade ǃhoaǃgao, tae-i ǃaroma da ǀhaodi tawa ra ǃereamsa.

3-5. (a) Hebreǁîn 13:15 ǃoagu da tae-i ǃaroma ǀhaodi tawa ra ǃeream? (b) Hoada ǀgui ǃnoa ǃgâi ǃereamde nî mā? ǁGuiǃā re.

³ Jehovab ge mâ-i hoa-e aiǂhanuba ge mā ǁîba koas diba. (Psa. 119:108) Sada ǃereamdi ǀhaodi tawa di ge sada di “ǁguibas di koa” tsî ǀnî hâ khoe-i ge nēsa a dība da ǁoa. (Khomai re Hebreǁîn 13:15.) Jehovaba ǀgui ǃnoa ǁguibas tamas ka io ǃereamde sada xū ra ǂgaoǀkhā? Hî-i, di tamas ge.

⁴ Jehovab ge ǂan ǃkharagagu ǀgaugu tsî mâsigu tsîna da ūhâsa tsî nē ǁguiba di hîna da ra dība bi de ra  ǃgôaǃgâ. ǀNî Isrealǁîn ge ǁkhaona gere ǁguiba tsî ǀnîna pīrina. Xawen ge ǀgâsa Isrealǁîna ‘ǂnaidi tamas ka io ǂkham ǂnabude’ gere ǁguiba. Xawe-i ga ǀgam ǂnabura ǁguiba ǁoa ob ge Jehovaba ‘efab di disiǁîǃâs tsampereb disa’ gere ūǃoa. (Lev. 5:7, 11) Tsampereb ge ǂgui mari-e ge ǂgan tama hâ-i xaweb ge Jehovaba nē ǁguibas ǃgâi “tsampereb”dis tsîna gere ǃgôaǃgâ.

⁵ Sada Elob ge nētsēs tsîna nēti ra tsâ. ǃEreamde da ga mā ob ge hoada ǀgui ǃnoa ǃgâi ǃereamde nî mā ǃkhaisa ǂgaoǀkhā da tama hâ Apolob tsî Paulub khami. (ǃNaeǃkhaidi 18:24; 26:28) Jehovab ge sida ǁkhāsib ǃnâ hâ ǃereamde da nî māsa ra ǂgao. ǃOa taras hîna ge ǀgam ǂkhari mariro ra a mās xa ǂâi re. ǁÎs ge Jehovab mûǁae kaise ge ǂoaǂamsa i ūs ge hâ in hoanas ge mā xui-ao.​—Lukab 21:1-4.

6. (a) Hebreǁîn 10:24,25 ǃoagu di ǃereamdi hîna da ra ǁnâude mati a tsâǀkhā da ǁkhā? (b) Mati du nē ǃereamdi hîna ra ǂkhâǃnâdu de du ra ǃgôaǃgâ ǃkhaisa a ǁgau ǁkhā?

⁶ Sada di ǃereamdi ǃnâ-ū da ge ra ǂkhâǃnâgu. (Khomai re Hebreǁîn 10:24, 25.) Hoada ge ǃkharagaǃnâgu ǃereamde ǀhaodi tawa ǁnâusa ra ǃgôaǃgâ. Supu ǃereamdi ǀgôaron dide da ge ra ǃgôaǃgâ. Khoen domgu ǃnâ hâ ǂkhîb ge ra ǃgâiaǂgao kai da amab hînan go hōb xan ra ǃeream hîna. Tsî ǁnān hîna “ǁkhoaǂgaosiba ǀhaoǀhao” tsî ra ǃereamde mān taon ra tamas ka io nēsi ǀgui gowaba ra ǁkhāǁkhāsen an. (1Tes. 2:2) Mati da ǃgôaǃgâsiba nē ǃgâsana a ǁgau ǁkhā? ǁÎna da ge ǀhaodi khaoǃgâ a ǂkhâǃnâ ǁkhā ǁîn ǃereamdi ǃaroma. ǀNî ǀgaub ǃgôaǃgâsiba ǁîn ǃereamdi ǃgao ǁgaus ge sada tsîn ga ǃeream o. O da ge ǂkhâǃnâ-es ǀguisa hî tama xawe sada tsîna ra ǂkhâǃnâ.​—Rom. 1:11, 12.

7. Mati da ra ǀama ǃereamde mās ǃnâ-ū?

⁷ Aitsama da ge ra ǂkhâǃnâsen ǃeream da ga o. (Jes. 48:17) Mati io? ǂGurose ǃeream-e māsa da ga aiǂhomisen o, o da ge ǃaromasa ūhâ ǀhaodi ǃaroma aiǂhomisensa. ǃGâise da ga aiǂhomisen o, o da ge Elobmîsa ra ǁnâuǃā. Sada ǁnâuǃāb ga ǃgâi o, o da ge  ǁkhāǁkhāsen da ra xūna sada ûigu ǃnâ a sîsen-ū ǁkhā. ǀGamǁîse da ge ǀhaode xū a ǀama ǁkhā ǃereamde mās ǃnâ da ǃâ-e ūhâ amaga. ǃNonaǁîse ǃereamde mās ǁguiǂgāsensa ǂhâ hâ amaga da ge ǃeream da ra ǃâga ra ǂâiho ǀhaos ga toa xawe.

8-9. (a) Maleaxib 3:16 ǃnâ i ra ǁgauhe khamib Jehovaba sida ǃereamdi xa mati ra tsâ? (b) ǀNî khoena tae-e noxoba ra ǃao?

⁸ Jehovab ǂgaoba da ge ra ǂkhî kai sada ǂgoms ǃnâ da ga ǁgâiǂuisen o. ǂGomǃgâ ǁkhā da ge a Jehovab sada ǃoa ra ǃgâ tsî nēsa kaise ra ǃgôaǃgâsa. Sada ǁgūtsâ di ǃereamde mās didi ǃnâ. (Khomai re Maleaxib 3:16.) ǁÎb ge nēsab ra ǃgôaǃgâsa sada ǀkhaes ǃnâ-ū ra ǁgau dītsâ da ga o ǁîba ǂkhîǂkhîsa.​—Mal. 3:10.

⁹ ǁNā-amaga da ge ǃgâi ǃaromasa ūhâ ǀhaodi tawa ǃereamsa. Xawen ge ǀnîna noxoba a ǃao ǁkhā ǃoma ǃkha khâisa. ǁNāti da ga tsâ o, o da tā ǂkhabu ǂâi re. Hā re i da Elobmîs tsoatsoadi, ǀnîhâ aiǁgaudi tsî hui da ǁkhā a ǀgaugu ǀhaodi tawa ǃereams xa ǃhoaǃgao.

10. (a) Tae-i ǃaoban ǀnîna ūhâ? (b) Tae-i ǃaromab ǃereamde mās ǃaoba a ǃgâi?

¹⁰ ǃGâi tama ǀgaub ǃnâ du ra tsâ ǀhaodi tawa du ga ǃomkha ūkhâi o ǃereamsa mās ǃgao? Nēti du ga tsâ o, o du ge ǀguri hâ tama hâ. Ama as ge hoa da ge ǃaob tsâsiba ūhâ ǃereamsa da ga mā o. ǃAoba du ga mâǃoa ǂgao o, o du ge aibe nî ǂan tae-i nē ǃaoba ra ǃaromasa. ǃAo i du ra mî ǂgao du ra xūna du nî ǀūrusa tamas ka io du ǀnî hâ xū-e nî mîsa? Tamas ka io du ra tao sadu ǃereamdi nau khoen ǃereamdi khami ǃgâi tidesa? Nē ǃao tsâsib ge a ǃgâi ǁkhā. Nēs ge ra ǁgau sadu tsamtsiǃnâ tsî nau khoena sadu xa ǀgapise ra mûsa. Jehovab ge nē ǀgauba  a ǀnam. (Psa. 138:6; Fil. 2:3) Xaweb ge Jehovaba ǂhâba hâ i da sada tsîna ǁîba ǃoaba tsî sada ǃgâsana ǀhaodi tawa ǂkhâǃnâ. (1Tes. 5:11) ǁÎb ge a ǀnam da tsî ǂhâ da hâ ǀgaiba nî mā da.

11. Mâ Elobmîs ǂâiǂâiǃnâde a hui da ǁkhā?

¹¹ Hā re i da ǀnî Elobmîs ǂâiǂâiǃnâde ǃhoaǃgao. Elobmîs ge ra mî hoa da ra dasasa mî da ra xūn tsî mî da ra ǀgaub tsîn ǃnâ. (Jak. 3:2) Jehovab ge ǀoasa da nî sa ǂgao ǀkhā da tama hâ tsî sada ǃgâsan tsîn ge ǁnāsa sada xū ǂgao tama. (Psa. 103:12-14) ǁÎn ge sada di gagasi ǃgâsa tsîn ge a ǀnam da. (Markub 10:29, 30; Johaneb 13:35) ǁÎn ge ra ǁnâuǃā sada ǃereamdi ǂhâba da hâ ǀgaub ǃnâ ǁaen ai ǂoaxa tama hâsa.

12-13. Tae-e da Nehemiab tsî Jonab tsîkha aiǁgaude xū a ǁkhāǁkhāsen ǁkhā?

¹² ǀNî Elobmîs aiǁgaudi xa ǂâi re hîna nē ǃao tsâsib ǀkha a hui du ǁkhāde. Nehemiab xa ǂâi re. ǁÎb ge ǀgaisa gao-aob ommi ǃnâ gere sîsen. Nehemiab ge ge ǂkhîoǃnâ ǁnâub ge o Jerusalems mirgu tsî dao-amdi tsîn ge hîkakahe ǃkhaisa. (Neh. 1:1-4) ǂÂihō re ǁgâib hînab ge ūhâ ība gaob ge dîbi o tae-i ǃaromab ge ǂkhîoǃnâ i ǃkhaisa. Nehemiab ge ǃhaese ǀgore tsî ǁnāpaxū ge ǃeream. ǃEreams ǃnâ-ūb ge gaoba xū-e nēs ǂam-ai ge di Elob khoena huis ǃnâ-ū. (Neh. 2:1-8) Jonab xas tsîna ǂâi re. Jehovab ge Jonaba ge ǂgan îb Nineves ǁanǂgāsaben ǀkha ǃhoa ob ge kaise ǃaob xa ǃkhō-e tsî ge ǃkhoebē. (Jonab 1:1-3) Xaweb ge Jehovaba Jonaba ge hui ǁîb ǁgaumâisa taniǂuis ǃnâ. ǁÎb mîdi ǃhoab ge dige ǃgâi xū-e Nineves ǁanǂgāsabena ge dība. (Jonab 3:5-10) Nehemiaba xū da ge ǃhoa da nîs aiǃâ ǀgores ǂhâǂhâsasiba ra ǁkhāǁkhāsen. Tsî Jonaba xū da ge ra ǁkhāǁkhāsen Jehovab hoaǁae nî hui da sa ǁîba ǃoabasa, ǃao da ga xawe. Nētsēs ǀhaohâga Nineves ǁanǂgāsaben xa a ǃaorosa?

¹³ Mâ xūna a hui da ǁkhā ǂkhâǃnâ ra ǃereamde ǀhaodi tawa māsa? Hā re i da ǀnî xūn hui da nî na ǃhoaǃgao.

14. Tae-i ǃaroma da ǀhaodi ǃgao ǃgâise nî aiǂhomisen tsî nēsa da mâǁae a dī ǁkhā?

¹⁴ Mâ ǀhaos hoas amsi aiǂhomisen re. ǀNai du ga mîmâi tsî ǃgâise aiǂhomisen o, o du ge ǃereamde mās ǃgomsi-e ūhâ tide. (ǂKhm. 21:5) Hoada ge ǀguitikō ǁaeba ūhâ tama hâ. Eloises hîna ǃoa taras 80 kurixas ge ǁîs di ǃKhē xu ǂgō-omma wekheb ǃnâ ǀnai gere aiǂhomi. ǁÎs ge ra mî: “ǀHaodi ge a ǁkhoaxa ǀnaits ga ǁaeb aiǃâ ǂhomisen o.” Joys hîna ǀoasase ra sîsens ge ǁaeba Satertaxtsēs ai gere ǁamaǂui ǁîs ǃKhē xu ǂgō-omma  aiǂhomis ǃaroma. Nē ǂâide ti ǂkhûs ǃnâ ǃgāsase ūhâs ge kaise a ǃgâi. Ikes hîna kaise ǀhawe tsî ǀoasases tsîna ra ǃoabas ge ra mî “Tita ge ǃgâiba-e tsēs hoasa ǁaeroba ǁamaǂuisa aiǂhomisens ǃgao, ǀgui tsēs ǃnâ hoa xūna aiǂhomis xa.”

15. Mati du ǃgâise ǀhoadi ǃaroma a aiǂhomisen ǁkhā?

¹⁵ Taena a ǃkhōǂgāsa ǃgâise ǀhaodi ǃgao aiǂhomisens ǃaroma? Mâ aiǂhomisens hoas aisi Jehovaba ǀgores ǃnâ-ū ǁîb ǃanu gagaba ǂgan re. (Lukab 11:13; 1 Johaneb 5:14) ǁNāpaxū ǁaeroba ū re nē ǁkhāǁkhāǃâsa kōǃgâsa. ǁNāpaxū xoaǂamdi, ǂkhōdi tsî ǁkhāǁkhā xū boksidi tsîna kōǃgâ re. Mâ ǁaraǃās hoas ǃnâ māsa Elobmîs xoade khomai re. ǂÂiǃgâ re nē ǁkhāǁkhāǃâde tsî ǀō-aisase ǃeream ǂgao du ra ǃâga. ǃGâise du ga aiǂhomisen o, o du ge nēsa xū nî ǀama tsî i ge nî supuba du ǃereamsa.​—2Kor. 9:6.

16. Mâ sîsen-ū da nî xūna da ūhâ tsî nēna da mati a sîsen-ū ǁkhā?

¹⁶ Īǁkha-i ga o, o internets ai sadu gowab ǃnâ māsa xūna sîsen-ū re. Jehovab ge ǁîb ǀapeǂhomis ǃnâ-ū ǂgui xūna internets ǃnâ-ū ge mā da sîsen-ū ǁkhā da ana aiǂhomisens ǃnâ. JW Libraris ge ra īǁkhā kaiba da ǂkhanina ǃnaoǁnâsa sada ǁâǁawagu ai. Tsî da ge ǁnāpaxū a aiǂhomisen ǁkhā​—tamas ka io a khomai ǁkhā. Hâ da a ǃkhai-i hoa-i ai. ǀNîn ge sîsenni sâǁaeb tamas ka io skoli sâǁaeb ai nē xūna ra sîsen-ū. Watchtower Librarib tsî ǃKhē xu ǂgō-ommi INTERNETS AI HÂ ǂKHANINǁGÂUB tsîkha ge ǁkhāǁkhāsen ǂgao da ra xūna ôaǃnâsa kaise ra supu kai.

17. (a) Tae-i ǃaroma i a ǂhâǂhâsa ǀguis xa ǃnāsa ǃereamde aiǂhomisa? (b) Tae-e du Jehovab di ǀhō kai re—Prepare Your Comment di hâ vidioba xū go ǁkhāǁkhāsen?

¹⁷ Īǁkhā i ga o, o ǀguis xa ǃnāsa ǃereamsa ǀgui dîs ai aiǂhomi re. Tae-i ǃaroma? Hoaǁae du ǂgai-e dide amaga ǃereams ǃgao du ga ǃoma ǃkhākhâi o. Naun tsîn ǁîn ǃomga nî ǃkhākhâi amaga sadu ǀkhā ǀgui ǁaeb ai tsîb ge ǃgâsab hîna ǁkhāǁkhāǃâsa ra ǃhoaǃgaoba nau ǃgâsan ǀgui-e a ǁhûi ǁkhā. Māsa ǁaeb ai ǀhaosa dītoas ǃaromab ge ǁkhāǁkhāǃâsa ra ǃhoaǃgao ǃgâsaba ǃeream ra khoena a ǀoroǀoro ǁkhā. ǁNā-amaga da ge tā ǃgâi tamase nî tsâ tamas ka io nî ǂkhabuǂâi sadu ga ǂgai-e tama io. ǀGuis xa ǃnāsa ǃereamde du ga aiǂhomi o, o du ge ǃeream-e mās ǃēsa ūhâ. Aiǂhomi du hâ ǃereamdi ǃnâ i ge Elobmîs ǃâ-e khomaisa a  hâ ǁkhā. Dī ǁkhā du ga o sadu mîdi ǃnâ ǃeream-e aiǂhomi re. *

18. Tae-i ǃaroma du ǃnubu ǃereamde nî mā?

¹⁸ ǃNubu ǃereamde mā re. ǃNāsa ǁaeb ai dige ǃnubu ǃereamde ra ǂkhâǃnâ da. ǁNā-amaga sadu ǃereamde ǃnubuse ūhâ re. ǁÎde 30 ǀgâugu ǃnâ māre. (ǂKh 10:19; 15:23) ǂGui kuriga du ǀhaodi tawa ra ǃeream, o du ge ǂhâǂhâsa ǃâsa ra ǀuru​—ǃgâi aiǁgausa ǃnubu ǃereamde mās ǃnâ-ū. Gaxu ǃereamde du ga mā o, o du ge nau khoena ǃgâi tamase a tsâ kai ǁkhā sadu khamin ǃeream tama ǃkhais ǃaroma. Tsî ǃnubu ǃereamde mās ge ra hui în ǃnāsa ǃgâsan tsîna ǃeream ǁkhā. ǁNā-amaga du ga ǂguro ǂgai-e o, o ǃnubu ǃereamde dîs ai mā re. Tā hoaraga ǁaraǃās ǃereamde mā re. ǃUru ǂâibasens ga mā-e toa o, o du ge ǃgau ra ǃereamde a mā ǁkhā.​—Boksisa mû re “ Tae-i ai da a ǃeream ǁkhā?”

19. Matib ǃgâsaba a hui du ǁkhā, xawe sado tae-e nî dī?

¹⁹ ǃKhē xu ǂgō-omma ra ǃhoaǃgao ǃgâsaba ǂanǂan re mâ dîs ai du ra ǃeream ǂgaosa. Nēsa du ga dī ǂgao o, o du ge ǃgâsaba nî ǂanǂan ǀhaos aisi. ǁAexa i ga o sadu dîs ai ǃereamsa o sadu ǃoma ǃhaese ūkhâi re tsî ǀgapise ūhâ îb ǃgâsaba mû ǁkhā.

20. Mati di ǀhaohâb ǀhaode ǀhōsan ǀkhā ra ǀgoragu-e ǂûǀhaos ǀkhā a ǀgui?

²⁰ ǀHaohâb ǀhaode ǀhōsan ǀkhā du ūhâ ǃgâi ǂûǀhaos ase mû re. ǀHaohâb khoen ūhâ ǁaxasi-e ǃoa du ga ǁkhauhe tsî ǂû-e dī kaihe o. O du mati nî tsâ? ǂKharirose du ge a ǃao ǁkhā xawe du ge ǃgâi ǂû-e nî aiǂhomi ǂgao hoa khoena nî ǃgâiba-e ǂûn ga o. Jehovab hîna sado ǁkhau hâb ge ǂgui ǃgâi xūn mâ-ai tafelsa aiǂhomiba du hâ sada ǀhaodi tawa. (Ps 23:5; Mt 24:45) Tsîb ge sadu ga ǀkhae xūro-e hau o nēsa kaise ra ǃgôaǃgâ. ǁNā-amaga ǃgâise aiǂhomisen tsî hoaǁae ǃeream re. ǁNā ǀgaub ǃnâ du ge Jehovab tafels ai ǀgui ǂû tide xawe ǀkhae xū-e nî hau ǀhaohâb ǀkhā du nî ǀgoragu-e.