1. Tae-e ra ǁgau khoen xamanin xa a ǀgapisa?

KHOEN ge xamarina xu ra mâǂoa ǁîn ǃgâiǂâis ǀkha a kurusa xui-ao. ǁNās ge a ama khoen ge ǃhūbaib ai a hâ tsoatsoa ǁaeba xu. Adammi tsî Evas tsîn ge Jehovaba ǁnâuǀnamoǃnâ o, o ra ge aitsama ge sâusen. Nēs ge ra ǂâibasen, ǁîra ge ǁîra ǃgâiǂâis xa gere ǂhanihe di.

2. Sada ǃgâiǂâisa mati kompasi ǀkha a ǀgopeǀnōhe ǁkhā? (Tsoatsoas ǃnâ hâ ai-īsiba mû re.)

² ǁNān hîna ǂkhabusa ǃgâiǂâisa ūhân ge a ǀgopeǀnōhe ǁkhā ǂgaub hîna ǂkhabusa kompasa ūhâb ǀkha. ǃGâise sîsen tama hâ kompasi ǀkha hurib ai ǃnaris ge a ǁkhōǁkhōsa ǁkhā. ǂOa mâsib ge ǂgauba ǀnî hâ ǀkhā-e ǃoa a ī kai ǁkhā. Xawe ǃgâise ra sîsen kompasi ge ǂgaub ǃnari-aoba a hui ǁkhā îb ǂgauba ǁîb ra ǂgaoba ī kai. Sida ǃgâiǂâis ge kompasi ǀkha a ǀnōhe ǁkhā. Nēb ge sada ǃnâ hâ xū-i hîna ǂhanu daoba ǃoa ra daoǁgau daba. Xawe sida ǃgâiǂâisa ǃamkuse sîsen kais ǃgao da ge ǃgâise nî ǃamǂgāsi.

3. Tae-e a ī ǁkhā khoen ǃgâiǂâis ga ǃgâise sîsen tama io?

³ Khoe-i di ǃgâiǂâis ga ǃgâise sîsen tama io, o i ge ǁnā  khoe-e tsūba xu a ǂgōsen ǁoa. (1Tim. 4:1, 2) ǁNāti i ǃgâiǂâis ge a ǂgom kai da ǁkhā ‘ǂkhabab a ǃgâi’ ǃkhaisa. (Jes. 5:20) Jesub ge ǁîb saosabena ge mîba: “Iri, ge nîra hâ, o i ge sago kara ǃgam-i hoa-e Eloba i ǁnās ǀkha ra ǃoaba, ti nî ǂâi.” (Jhn. 16:2) ǁNās ge ge ama i khoen hîna ge Stefanuba a ǃgam an xa. Nēs tsîn ge a ama ǂguin hîna ǁnāti ī ǂâi ǀgauba ūhân xa. (ǃNǃkh. 6:8, 12; 7:54-60) ǃGams khami ī ǂkhabadīb ge ǁnān hîna ra mîn Eloban ra ǃoaban xa ra dīhe. (Eks. 20:13) ǃGāsa as ge ǁîn ǃgâiǂâis ǃgâise sîsen tama hâsa.

4. Mati da a ǁkhae ǁkhā îs sida ǃgâiǂâisa tā sîsen ǀû?

⁴ Tae-e a ǃaroma ǁkhā îs sida ǃgâiǂâisa sîsen ǀû? ǂHanugu tsî tsoatsoadi Elobmîs ǃnâ a ǃkhōǂgāsadi ge “harebe ǁkhāǁkhās ǃoa, tsî ǂgōǀaus ǃoa, tsî ǀkharaǀkharas ǃoa, tsî ǂhanu-aisib ǃnâ kaikais ǃoa.” (2Tim. 3:16) ǂŌrisase da ga Elobmîsa ôaǃnâ, ǂâiǃgâ tsî ǁîs ra mî xūna sida ûib ǃnâ ga ra ûiǂui o, o da ge sida ǃgâiǂâisa Elob di ǂâi ǀgaub ǀkha a ǃamǀhao ǁkhā. Nēs ge nî ǃaroma îs sida ǃgâiǂâisa ǂgomǂgomsa daoǁgau kai. Hā re, î da kō mati gu Jehovab ǂhanugu tsî tsoatsoadi tsîna a hui da ǁkhāsa î da sida ǃgâiǂâisa ǃgâise sîsen kai.

5, 6. Mati da ǃgâiba ra hō Jehovab ǂhanuga saos ǃnâ-ū?

⁵ Elob ǂhanuga xu ǃgâiba hōs ǃaroma da ge ǁîgu xa ǀgui khomai tsî ǁîga ǂan tide. Xawe ǃnāsase nî dī. Nē ǂhanuga da ge ǀnam tsî ǃgôasiba nî ūhâba. Elobmîs ge ra mî: “ǂKhababa ǁkhan î du ǃgâina ǀnam.” (Amo. 5:15) Xawe mati da ǁnāsa a dī ǁkhā? ǁKhāǁkhāsen da ge nî î da Jehovab xūna ra mû khami mû. Hā re, î da nēti ǂkhō: ǂÂi re, ǀnîsi du ge ǃgâise a ǁom ǁoa. Xaweb ge sadu ǀaeǃkhō-aoba ra ǀapemā du î du ǂuruse ǂû tsoatsoa, ǃâisen tsî sadu ûi ǀgaub tsîna ǀkharaǀkhara. Nē xūna dī tsî du ge ra mû sîsen-i ra ǃkhaisa. Sadu ǀaeǃkhō-aoba du ge kaise nî gangan, sadu ûibab ge huib ase ība ǃkhais ǃgao.

⁶ ǁNās ǁkhās khamib ge sida Kuru-aoba ǂhanuga mā da hâ îgu ǁkhauba da, ǁoreb ūhâ sîsenǂuiba xu tsî sida ûiba ǃgâiǃgâis ǃgao. ǂÂi re, mati gu Elobmîs ǂhanuga sao ra xūna xu a hui da ǁkhāsa ǂhumib, ǀhôakaosib, ǃnaris, ǀaib, ǂkhabadīb tsî ǃgaidība xus tsîna. (Khomai re ǂKhoamîdi 6:16-19; J.ǂHa. 21:8) Jehovab ra ǂgao khami da ga xūna ga ra dī o, o da ra hōǃâ ǀkhaeb ge ra ǃaroma îb sida ǂgaoba ǀnammi ǃnâ kai. Tsî Jehovab ǂhanuga ǃgôaǃgâsiba ūhâba.

7. Elobmîs ǃnâ xoamâisa ǃnaeǃkhaide khomai tsî ǂâiǃgâsa mati a hui da ǁkhā?

⁷ ǃGâi a ǃkhais ge Elob ǂhanuga khôa tsî da ǃgomma tsâ ǂgao tama hâsa. Elobmîs ǃnâ a xoamâisa khoen hîna ge a tsūdīna xu da ge a ǁkhāǁkhāsen ǁkhā. ǂKhoamîdi 1:5 ge ra mî: “Gā-ai-e a-i ǁnâu, î-i ǃaruǀî ǁkhāǁkhāsa ǀaro.” Ama as ge kaise ǀgapi ǁkhāǁkhāsa da ge Eloba xu ra ǃkhōǃoa. ǁÎb di mîs ǃnâ hâ ǃnaeǃkhaide da ge khomai tsî a ǂâiǃgâ ǁkhā. Aiǁgause, ǂâi re tsûb hînab ge Gao-aob Daviba a hōǃâba Jehovab ǂhanubab ge ǁnâuǀnamoǃnâ tsî Batsebas ǀkha a ǀai o. (2Sam. 12:7-14) Nē ǃnaeǃkhais xa da ra khomai tsî ǂâiǃgâ hîna da ge sao ra dîde a dîsen ǁkhā: ‘Matib Gao-aob Daviba Batsebas ǀkha ǀais xa ge ǃaromahe tsûba xu ga ǂgōsen hâ? Tita ga ǁnāti i mâsib ǃnâ ǃâitsâhe o, ǀgaiba ta nî ūhâ ǂgōsens diba? Joseb khami ta nî  ǃkhoebē tamas ka io ta Davib khami nî māǁnâsen?’ (Gen. 39:11-15) ǁOreb ūhâ ǁgai sîsenǂuiba ǂâiǃgâs ge nî sida ǂgaoba hui îb “ǂkhababa ǁkhan.”

8, 9. (a) Sida ǃgâiǂâisa tae-i ǂâibasensa ūhâ? (b) Jehovab tsoatsoadi tsî sida ǃgâiǂâisa mati ra sîsenǀhao?

⁸ Elob ǁkhan hâ ǁgai xūna xu da ge ǃnūse nî hâ. Xawe ǀnî hâ ǁaxasigu ûib ǃnâ ǀō-aisase Elobmîs ǃnâ mîmāhe tama hân tsîn ge hâ. ǁNāti i mâsib ǃnâ mati da a mîǁgui ǁkhā tae-i Eloba nî ǂkhîǂkhî ǃkhaisa? ǁNāti i mâisigu ǃnâs ge Elobmîs ai a ǃgaoǃgaosa ǃgâiǂâisa kai ǃâba ra ǀhuru.

⁹ Jehovab ge ǀnamxaǃnâ ǀgaub ǃnâ tsoatsoade mā da hâ sida ǃgâiǂâis hîna Elobmîs huib ǀkha ǃgâise ra sîsenǀhaos ǀkha. Jehovab ge ra mî: “Tita ge ǃKhūta [Jehovata, NW] sa Elota, satsa harebesaba xūna ra ǁkhāǁkhā tsi ta, ǁnā daob, ǁîba-ūts nî ǃgûb ai ra ǂgaeǂgui tsi ta.” (Jes. 48:17, 18) Sida ǂâis tsî ǂgaob tsîkha da ga sîsen-ū o, Elobmîs tsoatsoade ǂâiǃgâsa, o da ge sida ǃgâiǂâisa ǂhanuǂhanu, daoǁgao tsî ǃgâi daob ai a ǂgaeǂgui ǁkhā. Tsî ǁnās ge nî hui da î da ǃgâi mîǁguiga dī.

10. Tsoatsoade a tae tsî Jesuba mati gere sîsen-ū di?

¹⁰ Tsoatsoas ge sao rase a ǁguiǃāhe ǁkhā, amab di ǃgaoǃgaob ase, hoaǃnâ-aixa ǂhanub ase, ǁkhāǁkhās hîna ra ǂâi kais tamas ka io xū-e ra dī kais. Tsoatsoade ǁnâuǃās ge ǂHanub mā-aob ǂâi ǀgaub tsî tae-i ǃaroma ǀō-aisa ǂhanuba mā hâs tsîna ǁnâuǃāsa ǃkhōǂgā hâ. Jesub ge ǁîb aoǁnâ sîsenni ǃnâ-ū ǁîb ǁkhāǁkhāsabega hoaǃnâ-aixa amaba gere ǁkhāǁkhā îgu tanisen ǀgaub tsî dīgu tsîna mûǂan. Aiǁgause, Jesub ge ge ǁkhāǁkhā ǁaib ge ǂkhabadība a ǃaroma ǁkhā. Tsî ǁgoe-ūgus turaga ūhâs ge ǀai kai da ǁkhā. (Mat. 5:21, 22, 27, 28) Sida ǃgâiǂâis ga ǃgâise sîsen o, o da ge nî mā-am îs elosi tsoatsoadi xa daoǁgauhe, î da ǁnās ǀkha ǃgôasiba Eloba mā ǁkhā.​—1Kor. 10:31.

11. ǃGâiǂâide mati a ǃkharagagu ǁkhā?

¹¹ ǀGam ǃkharagaǃnâgu Xristeǁîn hîna Elobmîs ǀkha ǁîn ǃgâiǂâisa omkhâi hân ge ǃkharagaǃnâgu mîǁguiga a ūhâ ǁkhā. ǂÂi re, alkohol-e sîsen-ūs tawa i ga ra ǀkhī o. Elobmîs ge ǀnōsa ǀgaub ai alkohol-e sîsen-ūsa ǂkhā tama hâ. Xawes ge ra ǂkhā kaise ā tsî ǀhoromâsa.(ǂKhm. 20:1; 1Tim. 3:8) Nēsa ra ǂâibasen Xristeǁî-i ǀnî hâ xūna ǂâis ǃnâ ūhâ tidesa ǀnōsa ǀgaub ai ǀgui alkohol-e sîsen-ūs ǃgâ-ai? Hî-î. ǁÎ-i ǃgâiǂâis ge ǀnîsi ǁî-e ǂhani tama hâ xawe i ge nau hâ khoen ǃgâiǂâis xas tsîna nî ǂâi.

12. Romeǁîn 14:21 ǃnâ ra hōhe mîde mati a tsâǀkhā da ǁkhā î da nau khoena ǁîn ǃgâiǂâis ǃgao ǃgôasiba ǁgau?

¹² Nau khoen ǃgâiǂâis xa ǂâis ǃgaob ge Pauluba ge mî: ‘ǃGâiba tsi a, ǁgan-i xare-ets ǂû tidesa, tsî ǂauxûi-ets ā tidesa tsî . . . sa ǃgâsa-e ǃnôa kai tidesa.’ (Rom. 14:21) Māsenxa î du nî î du tā sadu ǃgâsa-e ǃnôa kai, ǁî-i ǃgâiǂâis sadu disa xu ra ǀkhara ǃkhais ǃgao? Ama as ge ǃkhō-oasen tamase da ge ǁnāsa nî dī ǂgao. Amab xan nî ǁkhāǁkhāsens aiǃân ge ǀnî ǃgâsana alkohol-e ǃgâi tama ǀgaub ǃnâ gere sîsen-ū. Xawen ge nēsi mîǁgui hâ alkohol-en ā tidesa. Ama as ge sida ǃâ-e ǀhuru ǂgao tama hâsa î-i sida ǃgâsa-e ǁnā tsî kai tsūb ǃnâ ǂgâ. (1Kor. 6:9, 10) ǁNā-amaga i ge ǀnamxaǃnâ  tide ǃhaokhoe-i ase sida ǃgâsa-e ǃkhōǃoa tsî ǁî-e ǁgarisa î-i alkohol-e ā, ǂkhā i ra hîna.

13. Timoteuba mati ǃgâi aiǁgau-e ge a ǁgau Gaosib ǃgâiǂhôasa aiǃgû kais ǃnâ?

¹³ Timoteub ge 20 kurixa i o, ob ge ge māsen îb ǁîb aorekhoe soros ai khōba ǃgaohe îb tā Jodeǁîn hînab gere aoǁnâbana ǃnôa kai. ǁÎb ǂâib ǀgaub ge ge ǀgui i apostel Paulub dis ǀkha. (ǃNǃkh. 16:3; 1Kor. 9:19-23) Timoteub khami da ra māsen nau khoen ǃgâib ǃgao?

14, 15. (a) Tae-e ǃkhōǂgāsa gagasise da ga ǀgai ǂgao o? (b) Khoena ǀnamma ǁgausa mati a ǃkhōǀhaosa gagasi ǀgaib ǀkha?

¹⁴ Hoa Xristeǁîn ge “Xristub di tsoatsoaǁkhāǁkhāsa nēsi ǁnāxū” tsî “dīǀoaǀoasib” ǃoa nî aiǃgû. (Heb. 6:1) Nēs ge īs ǀguisa dī tama hâ. “Aiǃâb ǃoa” ǃgûsa da ge ǂhâ hâ tsî ǀgaisase nî sîsen. Gagasise ǀgais ge ǂansa ūǂgāsa ǃkhōǂgā hâ. ǁNā-amaga da ge hoaǁae ra ǂkhâǃnâhe î da Elobmîsa tsēs hoasa khomai. (Psa. 1:1-3) ǁNāsa sada mîǁguib ase dī î da hâ? Elobmîsa khomais ge Jehovab ǂhanugu tsî tsoatsoade ǂans ǀkha nî hui da. ǁNās ǀkha da ge Elobmîsa ǃamkuse a ǁnâuǃā ǁkhā.

¹⁵ Xristeǁîn ǃaroma a ǂhâǂhâsa ǂhanub ge ǀnammi ǂhanuba. Jesub ge ǁîb ǁkhāǁkhāsabega ge mîba: “Nēs tawan ge hoana nî mûǂan, ti ǁkhāǁkhāsabe go asa, ǀnamguba go ga sago ǃnâ ūhâo.” (Jhn. 13:35) Jesub ǃgâsab Jakobub ge ǀnamma ‘Gao-aosi ǂhanub’ di ge ǂgai. (Jak. 2:8) Paulub ge ge mî: ‘ǀNammi a ǂhanub di dīǀoaǀoasa’ di. (Rom. 13:10) Nē ǁguiǃās ǀnammi ais ge buru kai da tama hâ, Elobmîs ra mî amaga “Elob a ǀnam xui-ao.” (1Jhn. 4:8) Elob ǀnammi ge tsâsib ǃnâ-ū ǀgui ǁgâiǂuihe tama hâ. Johaneb ge ge mî: “Nēs ǃnâb ge ǀnammi Elob diba sada ǃnâ ge ǂhai, Elob ge ǁîb di Ôab ǀguise ǃnae hâba ǃhūbaib ai sî ǃkhaisa, ǁîba xu da nî ûiga.” (1Jhn. 4:9) Elob ǀnammi ge ge tsâǀkhā bi îb xū-e dība da. Sada tsîn ge Jehovab, Jesub tsî nau hâ khoen tsîna ǀnamma nî ǁgau. ǁNāsa da ga dī o, o da ge ra ǁgau gagasise da ǀgai hâsa.​—Mat. 22:37-39.

16. Gagasise da ra ǀgai khami, tae-i ǃaroman Elomîs tsoatsoade kaise nî ǂhâǂhâsaba da?

 ¹⁶ Gagasise da ra ǀgai khamin ge Elobmîs tsoatsoade kaise nî ǂhâǂhâsaba da. ǃAromas ge ǂhanugu ge ǀō-aisa xū-i ai sîsenǂuiba ūhâ xawe tsoatsoadi ge kai sîsenǂuiba xū-i hoa i ai ūhâ. Aiǁgause, ǀgôa-i ge ǁkhōǁkhōsasib ǁgai ǀhōsan diba ǁnâuǃā tama hâ. Xawe ǂkhaikari ǁgû-i ge ǂhanu-e a ǂnûiǂgā ǁkhā nē ǀgôa-e a ǁkhauba ǁkhā-e. (1Kor. 15:33) Xawe nē ǀgôa-i ra kai tsî ǁnâuǃāxa tsoatsoa o, o i ge Elobmîs ai a ǃgaoǃgaosa tsoatsoadi ǀkha ǀguiǃnâxase a ǂâi ǁkhā. ǁNās ǀkha i ge nē ǀgôa-e gā-ai mîǁguiga nî dī ǁkhā ǀhōsan tawa i ga ra hā o. (Khomai re 1 Korinteǁîn 13:11; 14:20.) Elosi tsoatsoadi xa da ga ra daoǁgauhe o, os ge sida ǃgâiǂâisa, Elob ǂâi ǀgaub ǀkha nî ǀguiǃnâxa.

17. Tae-i ǃaroma da a mî ǁkhā hoa xūna da ūhâsa î da gā-ai mîǁguiga dī?

¹⁷ Hoa xūna da ū hâ î da gā-ai mîǁguiga dī tsî Jehovaba ǂkhîǂkhî? Î, Elobmîs ǃnâ ra hōhe ǂhanugu tsî tsoatsoade da ga ǃgâi ǀgaub ǃnâ sîsen-ū o, o da ge “mâ ǃgâi sîsenni hoab ǃoa ǁkhā.” (2Tim. 3:16, 17) ǁNā-amaga da ge Elobmîs tsoatsoade nî ôaǃnâ î da “ǁnâuǃā, mâs a ǃKhūb [Jehovab, NW] di ǂâi ǃkhaisa.” (Efe. 5:17) ǃGâise ǀhaohâb ǃnâ-ū ra māhe ôaǃnâs ǃgao hâ xūna sîsen-ū re. Aiǁgause, Watch Tower Publications Index, the Research Guide for Jehovah’s Witnesses, the Watchtower Library ǃKhē xu ǂgō-ommi INTERNETS AI HÂ ǂKHANINǁGÂUB tsî JW Library app tsîna. Nē xūn ge di a ǃamǀhaosa în sida ôaǃnâ sîsenni tsî omaris ǁkhāǁkhāsens ǃnâs tsîna hui da.

18. Tae-i ǀkhaega da a ǃkhōǃoa ǁkhā Jehovab ǂhanugu tsî tsoatsoadi ǀkha da ga ǀguiǃnâxasib ǃnâ ga ra ûi ǂgao o?

¹⁸ Jehovab ǂhanugu tsî tsoatsoade ǁnâuǀnams ge ǀkhaega ra ǀkhī-ū, Psalmdi 119:97-100 ge ra mî: “Matikōse ta sa ǂhanuba a ǀnam! Tsēs hoasa ta ǁîb xa ra ǂâiǂâisen. Sa mîmās ge ti khākhoen ǃgâ-ai ra gā-ai kai te, ǀamoses ti ǃnâ hâ xui-ao. Tita ge ti ǁkhāǁkhā-aogu hoagu ǂamai a ǁnâuǃāxa, sa ǀhûǀguitimîde ta ti ǂâiǂâisenxūse ūhâ amaga. Tita ge kairan xa a ǁnâuǃāxa, sa mîmāde ta ra sâu amaga.” Sida gā-aisib, ǂans tsî ǁnâuǃāxasib tsîna da ge a kaikai ǁkhā Elob di ǂhanugu tsî tsoatsoadi tsîn xa da ga “ǂâiǂâisen” o. ǁGuiǂgāsen da ga o, o da ge ‘Xristub di ǀoa hâ ǁkhāsib’ ǀkha Elob ǂhanugu tsî tsoatsoadi tsîn xa nî ǁkhāǁkhāsen, sida ǃgâiǂâisa ǀgaiǀgais ǀkha.​—Efe. 4:13.