1. Mati da gā-aisiba ra hō tsî nēsa xu da mati ra ǀama?

JEHOVAB ge gā-aisib di tsoatsoaba tsî ǁîb gā-aisiba khoen ǀkha ra ǀgoragu. Jakobub 1:5 ge ra mî: “Tsî ǀgui-i â du ga gā-aisiba tôasio, a-i Elob tawa ǂganbasen, mâ-i hoa-e ǀguiǃnâxase ra māb tsî ǂgōǀau tamaba, o i ge nîra māhe.” ǀGui ǀgaub gā-aisiba da Eloba xu ra hōb ge ǁîb ga ǁnama da o. Nē gā-aisib ge sida gagasi mâsiba ǁgaiǁgais ǃoagu ra ǁkhauba da. (ǂKhm. 2:10-12) ǁNās ǀkha da ge ra “sâusen Elob di ǀnammi ǃnâ, . . . ǀamo ûib ǃoa.”​—Jud. 21.

2. Mati da ǃgôaǃgâxasiba a omkhâi ǁkhā Elob ga ǁnama da o?

² Sida ǂkhabusasigu tsî kaikaihe da ge ǀgaub tsîn ge a dī ǁkhā î da tā ǁnamsa ūǃoa. ǃGôaǃgâsiba da ge a omkhâi ǁkhā ǂan da ga o, ǁnamasa xu da ǃgâiba ra hōsa. Nēs ge Elob ǀnamma ra ǁgau da. ǂKhoamîdi 3:11, 12 ge ra mî: “Ti ôa, ǃKhūb [Jehovab, NW] di ǃkhâisa tā aoxū . . . ǃKhūb, ǁîb ǀnam hâba ra ǁkhara xui-ao”. Tā da ge nî ǀuru Jehovab ge ǃgâib ǀguiba ra ǂâiba da. (Khomai re Hebreǁîn 12:5-11.) Jehovab sada ǃamkuse a ǂan ǃkhais ǃgaob ge ǀnōsa ǀgaub ai ra ǁnama da. Hā re î da haka ǃâgu ǁnamas diga ôaǃnâ: (1) aitsama ǁnamasens, (2) ǁgûn ǁnamas, (3) ǀhaohâb ǃnâ ra  māhe ǁnamas tsî (4) ǁaerob di tsûb ǁgau-oahesa xu ra hāb.

3. ǀGôa-e mati aitsama ǁnamasensa a omkhâi ǁkhā? ǂKhō re.

³ Aitsama ǁnamasens ge sida tanisens tsî ǂâi ǀgaub ǂam-ai ǃkhō-oasensa ǃkhōǂgā hâ. Aitsama ǁnamasens ǀkha da ge ǃnaehe tama hâ. Nē ǀgaub xa da ge nî ǁkhāǁkhāsen. Aiǁgause: ǀGôa-i ga ǀurihāba ǃgabi ǁkhāǁkhāsen o, o i ge ǁgû-e tsoatsoas ǃnâ ǀgôa-e ra huiǃnâ. Xawe ǀgôa-i ra ǃgabi ǁnaeti khami i ge ǁgû-e ǁî-e ra xū, mû i ga ra o, ǀgôa-i ǃgâise ra ǃgabisa. ǁNās ǁkhās khamin ge ǁgûna ǁîn ǀgôana Jehovab ‘ǂgōǀaus tsî ǁnamas tsîra ǃnâ nî kaikai.’ ǁÎn tsîn ge ǀgôana nî hui în aitsama ǁnamasen tsî gā-aisiba hōǁkhā.​—Efe. 6:4.

4, 5. (a) Aitsama ǁnamasensa tae-i ǃaroma a ǂhâǂhâsa ‘ǀasa khoeba’ anas ǃgao? (b) Tae-i ǃaroma da ǁnāxūǃnâsen tide “hû ǃnādi kōse” da ga ǁnā xawes tsîna?

⁴ ǁNās tsîn ge a ama, ǁnān hîna Jehovab xa kaikhoe kain hâ hîna ra ǁkhāǁkhāsen an xa. Ama as ge ǁîn ǀnîsi aitsama ǁnamasensa ǀnai omkhâi hâsa. Xawe ǀasase ǁāǁnâhe hâ khoe-i ge gagasise ǀgaisa tama hâ. Xawe i ge ǁî-e gagasise a ǀgai ǁkhā, Xristub ǀgaub tsî ‘ǀasa khoeba’ anas ǃnâ-ū. (Efe. 4:23, 24) Aitsama ǁnamasens ge ǃgâi ǀgauba gagasise ǀgais ǃaroma. ǁKhāǁkhāsen da ge ra î da “eloxoresasib tsî ǃhūbaib di turagu tsîna ǀūxū, tsî da nî tanisen tsî ǂhanu-aise tsî eloǃaoǃgâxase nē ǃhūbaib ai ûi ǃkhaisa.”​—Tit. 2:12.

⁵ ǁNās xōǀkhā da ge ǁoreb ǃnâ hoa da ǃnae-e hâ. (Aoǁn. 7:20) ǁOreb ge ǂâibasen tama hâ aitsama ǁnamasensa da ūhâ tama hâsa. ǂKhoamîdi 24:16 ge re mî: “ǂHanu-aib ge hû ǃnādi kōse ǁnā tsî ǁkhawa nîra khâi.” Tae-e nî hui da? Elob ǀgaib ge nî hui da ǀnî hâ xū-i ose. (Khomai re Filipeǁîn 4:13.) Elob gagab di ǂûb ge ǃkhō-oasensa ǃkhōǂgā hâ tsî nēs ge aitsama ǁnamasens ǀkha a ǀgui.

6. Mati da Elobmîsa ǃgâise a ôaǃnâ ǁkhā? (Tsoatsoas ǃnâ hâ ai-īsiba mû re.)

⁶ Aitsama ǁnamasensa a ǀgaiǀgai ǁkhā-i ge ǀgores, Elobmîsa ôaǃnâs tsî ǁkhāǁkhāsen da ra xūna ǂâiǂâisensa. Xawe Elobmîsa ôaǃnâs ǁkhoa-e du ga ūhâ tama i os? ǀNîsi du ge xoade ôaǃnâs khoe tama hâ. Xawe ǂâis ǃnâ ūhâ re Jehovab ge māsen du ga ra o, o nî hui du. ǁÎb ge nî hui du ǁîb mîsa ‘turaba’ ūhâbasa. (1Pet. 2:2) Aibe Jehovab ǃoa ǀgore re, î du ǁîb mîsa ôaǃnâ ǁkhā. ǁNāpaxū sadu ǀgoredi ǀkha ǀguiǃnâxasib ǃnâ ûi re. Tsî tsoatsoas ǃnâ ǃnubu ǃâna khomai tsî ôaǃnâ re. ǁAeb ra ī khamis ge khomais tsî ôaǃnâs tsîna kaise supu tsî nî ǁkhoaxaba du. Jehovab mîs ǃnâ du sadu ǃnōsa ǁaeb ǃnâ ra ûiǂgāsen khami du ge nî ǃgâibahe.​—1Tim. 4:15.

7. Aitsama ǁnamasensa mati gagasi mîǁguiga sīǃnâs ǀkha a hui da ǁkhā?

⁷ Aitsama ǁnamasens ge ra hui da î da gagasi mîǁguiga sīǃnâ ǁkhā. ǂÂi re ǀgui aob hîna ge gagasise a ǂkhabub xa. ǁÎb ge ge ǂâiǂhansen tsî ge mîǁgui aimâba-ao kaib nîsa. Tsî ǂkhabuǂâis xa hâ ǂkhanin ǀapeǂhumis dina gere khomai. ǀGores ǀkha ǀguibab ge gagasise ge omkhâisen tsî ǁîb ǂâibasens tsîna ge ǀgaiǀgai. ǁÎb ge ǁaeba xu ǁaeb ǀkha huiǃnâ ra aimâba-ao-i ase  gere xoaǂgāsen. ǀAm ǂoasa ge tae-i? ǃGomsin ge hâ i xaweb ge ǁîb mîǁguib aimâba-ao kais diba ge a sīǃnâ.

8-10. Tae-e ǁgûna a hui ǁkhā în ǁîn ǀgôana hui în Jehovaba ǃoaba ǁkhā? ǂKhō re.

⁸ Xristeǁî ǁgûn ge aiǂhanuba ūhâ ǁîn ǀgôana ‘ǃKhūb [Jehovab, NW] ǂgōǀaus tsî ǁnamas tsîra ǃnâ kaikaisa.’ (Efe. 6:4) Nēs ge a ǃgom ǁkhā nē da ûi hâ ǃhūbaib ǃnâ. (2Tim. 3:1-5) ǀGôan ge ǃgâin tsî tsūn ǃnâ ǀgoras ǁkhāsib ǀkha ǃnaehe tama hâ. ǁÎn ge ǃgâiǂâis ǀkha ra ǃnaehe tsî ǁkhāǁkhāhes tsî ǁnamahes tsîna ǂhâ hâ. (Rom. 2:14, 15) ǀGui Elobmîs ǂnûiǃkhaunis ge ra mî Grikegowab mîs “ǁkharas” [ǁnamas] di hâs ge “ǀgôa-e kaikaisa” ǃoa ra ǁnaeǁgau.

⁹ ǀGôa-i hîna ǀnamxaǃnâ ǀgaub ǃnâ ra ǁnamahe i ge ǃgâise ra kai. ǁÎn ge ra ǁkhāǁkhāsen ǃnorasasib tsî mîǁguiga dīs ge ǃgâi tsî tsū ǃaromana ūhâ. Matikōse i a ǂhâǂhâsa Xristeǁî ǁgûn Jehovab ai huiba nî ôasa. Tā ǀuru re ǂâi ǀgaugu ge khoena xu khoen ǀkha ra ǀkhara. ǁGûn ga Eloba ǃgâ o, on ge ǁîn ǀgôana ǃgâi ǁnamas ǀkha a kaikai ǁkhā. ǀGôana kaikais ge tā khoesi ǂans ai nî ǃgaoǃgaohe, xawe Elob dis ai.

¹⁰ Noaxi di aiǁgaus xa ǂâi re. Jehovab ge mîba bi o, îb arka kuru ob ge ǁîb ǂans ai ge kō tama hâ i. ǁÎb ge arka kurus ǂansa ge ūhâ tama hâ i. Xaweb ge ǁîba Jehovab ai ge kō tsî ‘ǁîb ge mîmā khami’ ge dī. (Gen. 6:22) ǀAm ǂoasa ge tae-i? Noaxi ge arka ǂguro ǃnāsa ge kuru hō. Dī hōb ge ge! Noaxi tsîn ge omaris danab ase ǃgâi aiǁgausa ge ǁgau. Elob gā-aisib aib gere kō amaga. ǁÎb ge ǃgâi aiǁgausa ǁgau tsî ǁîb ǀgôaga ǃgâise ge kaikai. ǀGôa-e Kai ǁgammi dâus aiǃâ kaikais ge ǃgom i xawe.​—Gen. 6:5.

11. ǁGûn di aiǁgausa matikōse a ǂhâǂhâsa ǀgôa-e kaikais ǃaroma?

¹¹ ǁGû-i ase mati du Elob ra mî “khami” ra dī? Jehovaba ǃgâ re. ǁÎba mā-am re îb hui du, î du Elobmîs ǃnâ-ū sadu ǀgôana kaikai. Tsî ǀapeǂhumis ǃnâ-ū du ra hō huib tsîna ūǃoa re. ǁAeb ra ī khamin ge sadu ǀgôana nî gangan du. ǀGui ǃgâsab ge ge xoa: “Kaise ta ge ra aio ti ǁgûra ge kaikai te ǀgaub xa. ǁÎra ge ti ǂgaoba ge a tsâǀkhā. Ti gagasi aiǃgûs ǃgao ta ge ǁîra koasa ra mā.” Xawe ǁgûn ga ǁguiǂgāsen xawen ge ǀnî ǀgôana amaba ra ǁnāxū. ǁGûn hîna amaba ǁîn ǀgôana ra ǁkhāǁkhān ge ǃgâiǂâisa ūhâ. ǁÎn ge ǃâubasensa ūhâ ǁkhā ǁîn ǀgôa-i ǀgui tsē Jehovab “oms” ǃoa nî oaǀkhī ǃkhaisa.

12, 13. (a) ǀGôa-i ga ra ǂnûiǂuihe o, ǁgûna mati a ǁgau ǁkhā Eloban ra ǁnâuǀnam ǃkhaisa? (b) ǀGui omarisa mati Jehovaba ǁnâuǀnams ǃnâ ǃgâiba ge hō?

 ¹² ǁGû-i di ǁnâuǀnamxasib ge ra ǃâihe ǁî-i ǀgôa-i ga ǀhaohâba xu ǂnûiǂuihe o. ǂÂi re ǀgôas hîna ge ǂnûiǂuihes xa tsî ge mamasas omsa xu a doeǂoas xa. Mamasas ge ra mî: “Sida ǂkhanin ǃnâ da ge ǃaromade gere ôa î ta ti ǀgôas tsî ti ǁnuris ǀkha hâǀhao.” ǁÎs ge ǀaro tsî ra mî: “Ti aob ge ǀnamxaǃnâ ǀgaub ǃnâ ge hui te tsî ge mî ǁîs sim ǀkha ǀgui oms ǃnâ hâ tama hâsa. Tsî ǁîs ǀkha ta tā nî ǀhōgusa.”

¹³ Kurigu ǃkharu hâses ge nē ǀgôasa ǀhaohâba ǃoa ge oaǀkhī. Mamasas ge ra mî: “ǁÎs ge nēsi hoaǁae ǁîsa ra sms tsî ra bel.” “Tsî ǁîs ge sima kai ǃgôasiba ūba hâ Elobam ge ǁnâuǀnam ǃkhais ǃaroma. ǃGâise da ge nēsi ra ǁnâugu.” ǂNûiǂuisa ǀgôa-e du ga ūhâ o, o ǂgomaiǂnûi re “ǃKhūb [Jehovab, NW] ai sa ǂgaob hoab ǀkha, îts tā sa ǁnâuǃāb ai ǂgomǃgâ.” (ǂKhm. 3:5, 6) ǂÂis ǃnâ ūhâ re Jehovab ǁnamas ge ǁîb gā-aisib tsî ǀnammi tsîna ra ǁgau da. Tā ǀuru re Jehovab ge ǁîb ǀGôaba hoa khoen ǃaroma ge a mā, sadu ǀgôa-i tsîna ǃkhōǂgā hâse. Elob ge ǂgao tama hâ khoe-i nî dīkākāhe ǃkhaisa. (Khomai re 2 Petrub 3:9.) ǁNās ǀkha Jehovab ǁnamas tsî daoǁgaus ǃnâ ǂgom re. Tsû i ga ra xawe ǁgûdo Jehovab ra mî-e dī re. Elob ǁnamas ǀkha sîsenǁae re, ǁîb ǃoagus ose.

14. Mati da ǃgâiba ra hō Jehovaba da ga mā-am o, îb ‘ǂgomǂgomsa tsî gā-ai mûǂamaogu’ ǃnâ-ū ǁkhāǁkhā da?

¹⁴ Jehovab ge ge mî ǁîb ge Xristeǁî ǀhaohâba nî ǁkhauba tsî nî ǁkhāǁkhā. ǁÎb ge ǂgui ǀgaugu ǃnâ nēsa ra dī. Aiǁgause, ǁîb ge ǀhaohâba ǁîb ǀgôab di kōǃgâs ǃnaga ge mâi tsî ‘ǂgomǂgomsa tsî gā-ai mûǂamaoga’ ge ǁgaumâi hîna gagasi ǂûhe ǂhanu ǁaeb ai ra māga. (Luk. 12:42) Nē gagasi ǂû-i ge ǁkhāǁkhās tsî ǁnamas ǃnâ-ū ra māhe. Dîsen re, ‘ǃhoa-i tamas ka io sida ǂkhanin di ǀgui-e ti tanisens tsî ǂâi ǀgaub tsîkha tsâǀkhā tama hâ?’ ǃGâiaǂgao re, ǃgâise du ga ǃeream o. Jehovaba du ge ra mā-am îb daoǁgau du, sadu ǃgâib ǃgao.​—ǂKhm. 2:1-5.

15, 16. (a) Mati du ǃgâiba a hōǁkhā ‘ǀhaohâb ǃûi-aoga’ xu? (b) Mati du ǀhaohâb ǃûi-aogu ǃereamsa a supusupu ǁkhā?

¹⁵ Xristub tsîn ge ‘khoena mādi ase ge mā’ ǀhaohâb ǃnâ, aiǁgause ǀhaohâb ǃûi-aoga îgu Elob gūna kōǃgâ. (Efe. 4:8, 11-13) Mati da ǁîgu māsa xu ǃgâiba a hōǁkhā? Aiǁgause da ge ǁîgu ǂgoms tsî ǃgâi aiǁgaudi tsîna a ǁgae ǁkhā. ǀNî hâ ǀgaub ge Elobmîsa xu gu ra mā da ǁnamasa ūǃoasa. (Khomai re Hebreǁîn 13:7, 17.) ǂÂis ǃnâ ūhâ re ǀhaohâb ǃûi-aogu ge a ǀnam da tsî ra ǂhâba î da gagasise ǀgai. Aiǁgause, gu ga ǂan o, sida ǀhaode hâǃnâ tama hâsa tsî gagasise ra ǂkhabusa, o gu ge ǃhaese ra hui da. ǁÎgu ge ǃgâ tsî ra ǂkhâǃnâ da Elobmîsa xu. ǁNāti i huiba du Jehovab ǀnammi ǁgauǁgaus ase mû tama hâ sadu ǃgao?

¹⁶ ǂÂis ǃnâ ūhâ re ǀhaohâb ǃûi-aogu ge supubahe tama hâ, sida Elobmîsa xu ǂhâbasa ǁnamasa mās ǃaroma. Aiǁgause, ǂâi re matikōse i ge kēbo-aob Natanna ǃgomba isa Davib ǀkha ǃhoasa ǁîb ǁorebab gere ǃgū-ai xui-ao. (2Sam. 12:1-14) ǁNās ǁkhās khamib ge apostel Pauluba ǁkhoaǂgaosiba ge ǀgoreba, îb Petrub hîna ge Jodeǁîn ǀkha ǀkhāga  gere ūba ǁnama. (Gal. 2:11-14) Mati du ǀhaohâb ǃûi-aogu ǃereamsa sadu ǀhaohâb ǃnâ a supusupu ǁkhā? ǃGamǃgamsen, khoexaǃnâ tsî ganganxa re. ǁÎgu huiba Elob di ǀnammi ase mû re. Nēs ge sadu ǃgâib kōse ǀgui hâ tama hâ xawe du ge ǁîgu ǃgâiaǂgaob tsîna nî kaikai.

17. Matis ge ǀgui ǃgâsasa ǀhaohâb ǃûi-aogu di ǀnamxaǃnâ huiba xu ǀama?

¹⁷ ǀGui ǃgâsas ge Jehovaba ǀnams xa kaise ge ǃgombahe i, ǃkharu ge xūn ǃgao. “ǃKharu ge ǁae ge ī xūn tsî ǀnî xūn ge kaise ge a tsautsau te.” Nē ǃgâsas ge ǀaro tsî ra mî, “ǂan ta ge ge i ǀhaohâb ǃûi-aogu ǀkha ta nî ǃhoa ǃkhaisa. ǁÎgu ge ge ǀgoraǃgâ tsî ge mî ǁgaiǁgai te tama hâ i, xawe gu ge ǂkhâǃnâ tsî ge a ǀgaiǀgai te. Mâ ǀhaos hoas khaoǃgâb ge ǀgui ǀhaohâb ǃûi-aoba tita ǀkha gere ǃhoa. Elob tita amabes ǃnâ ǀnam tama hâ tita ge gere tsâ. ǁAeba xu ǁaeb ǀkhab ge Jehovaba ǁîb ǀnamma ǀhaohâb ǁanin tsî ǀhaohâb ǃûi-aogu ǃnâ-ū ge ǁgau te. ǀGore ta ge ge î ta tā ǁkhawa xu bi.”

18, 19. Tae-e kaise a tsûtsû da ǁkhā ǁnamahes ǂam-ai? ǂKhō re.

¹⁸ ǁNamahes a tsûtsûsa xawe i ge ǀgui xū-e hâ kaise ra tsûtsû tsî a ǁkhōǁkhōsa-e. ǁNās ge ǁnamasa ūǃoa ǂgao tama isa. (Heb. 12:11) Kanni tsî Gao-aob Sedekiab aiǁgau ra xa ǂâi re. Kanni ge Abeli ǃoagu ǃhui tsâsiba ūhâ i o, ob ge Eloba Kanna ge mîba: “Tare xū-i ǃaromats kha go ǁaixa? Tsî tare xū-i ǃaromab kha sa ais di īsiba go ǀkhara? ǁNāti ī tama hâ; ǃgâidīts ka ots ra ǀgapiǀgapihe, xawe ǃgâidī tamats ga io, ob ge ǁoreba dao-ams aiǃâ ǁgoe. Turab âb sa ǃoa hâse ī, xawets ge ǁîba nî gaoǂam.” (Gen. 4:6, 7) Kanni ge ge ǃgâ tama hâ i. ǁOreb ge ǁîba ge a dan. Kanni ge ǂhâbasa tama tsûb tsî ǃgommi tsîna ge haubasen. (Gen. 4:11, 12) Elosi ǁnamas ra mā tsûb ge kaise a tsaura.

¹⁹ Kaise ge ǂkhabusa tsî ǁgai i ǂgaeǂgui-aob Sedekiab ge ǃgom ǁaegu ǃnâ Jerusalemsa gere ǂgaeǂgui. Kēbo-aob Jeremiab ge Sedekiaba gere mîba îb ǁîb ǁgai ǀgauga xu xaweb ge gao-aob Sedekiaba ǁnamahesa ge ǂgao tama hâ i. ǀAm ǂoas ge ge ǁkhōǁkhōsa i. (Jer. 52:8-11) Jehovab ge ǂanabega ǃgomsiga xu ra sâu da ǂgao.​—Khomai re Jesajab 48:17, 18.

20. Hānîǁaeba tae-e ǃkhōǂgā hâ ǁnān hîna Elob ǁnamasa ra ūǃoan tsî ūǃoa ǂgao tama hân ǃgao?

²⁰ Nētsē i ge aitsama ǁnamasensa ǃhūbaib ǃnâ ra ǃgôaǁnâhe. Xawe ǁnā gâre ǀgaub ge tsūdī-aona nî sīǃnâ. (ǂKhm. 1:24-31) ǁNā-amagab ge Eloba ra mî ‘ǃgâ te re tsî ti ǂgōǀausa ǁnâu, î du gā-ai.’ ǂKhoamîdi 4:13 ge ra mî, “ǂgōǀausa ǃkhōǀgara îts tā ǁnāxū si; ǁîsa ǃkhōǀgaipe, ǁîs a sa ûi xuige.”