TITA ge Austriab, Grazi di ǀon hâ ǃās ǃnâ ge kai. Tsî ta ge 7 kurixa ta a hîna Elobmîs ǁkhāǁkhāde ra mā skoli ǃoa ge sî-e. Xawe ta ge nē skoli tawa ǁgaiǁgaibe xūna ǁkhāǁkhā-aogu tsî nun di ǁaegu ge mû. Tsîs ge ti ǁgûsa nēsas ge ǁnâu o, o ge mā-am te î ta ǀnî hâ skola ǃoa doe.

ǁAero-i khaoǃgâ ta ge hostelsa ǃoa ge sî-e. ǀNî ǃuib ge ti dadaba hostelsa xu ge ū te tsî ge ǃkhoebe ū te Graza xu, torob ge tsoatsoa amaga. ǃHūsabesem ge Schladming ti hâ ǃās ǃnâ gere hâ. ǁAerobam ǁnāpa hâ hîna i ge ǃās ǃnâ ǁkhawa toroba ge tsoatsoa. Ti aumas ǀkha ta hâ hînas ge anikhunisa sima ra ǂnoase ge ǃkharu. Torob ge toa o, o da ge ge mûǂan ǂhanub tsî ǂgomdi tsîn hui da tidesa.

Jehovab di ǀHûǀguitimî-aon ge 1950ǁî kuri ti ǁgûsa ge aoǁnâba. ǁÎn gere mî xūna ta ge gere ǃgâ tsî ti ǁgûsa ǀhaode ǃoa gere sao. ǁÎs ge Jehovab di ǀHûǀguitimî-aon gere ǁkhāǁkhān xa ge amabahe tsî 1952ǁî kuri ge ǁāǁnâhe.

ǁNā ǁaeb ai i ge ǀhaohâba kaira kaikhoedi xa ǀgui ge ǀoahe hâ i. Xawem ge ega ǀnî hâ ǀhaohâba ge sari. ǁNāpa i ge ǂgui ǂkhamkhoena ge hâ i. Grazas ǃoam ge oa o, o ta ge ǀhaode ǀoasase ge hâ ǃnâ tsoatsoa tsî ge mûǂan nēb a amasa. Mûǂan tsoatsoa ta ge ge Jehova Elob ǁîb ǃoaba-aona ǀû tamase ra kōǃgâsa. ǁÎb ge ǃgom mâsiga da ga ra hōǃâ ǁaeb ais tsîna ra kōǃga da.​—Psa. 3:5, 6.

Khoena ta ge amaba gere ǁkhāǁkhā ǂgao. ǂGurose ta ge ti ǃgâgu tsî ǃgâsadi ǀkha ge tsoatsoa. Ti 4 ǃgâsadi ge ǀnai omsa xu ge doe ǂoa hâ i tsî ǁgauǃnâ-aodi ase gere sîsen. Xawe ta ge ǁîde ǃkharagagu ǃgaro ǃādi ǃnâ sari tsî gere ǂkhâǃnâ î di Elobmîsa  ǁkhāǁkhāsen. ǁNās xa ǃaromahe hâsen ge ti ǃgâsan hoana ge Jehovab di ǀHûǀguitimî-ao kai.

Omsa xu oms ǀkha ta ra aoǁnâ hîna ta ge 30 kurixa tare khoesa ge aoǁnâba tsî ǁîsa Elobmîsa ge ǁkhāǁkhā tsoatsoa. ǁÎs ge ǁāǁnâs kōse ge sī tsî i ge ǁîs ǀgôakha tsî ǁîs aob tsîna ega ge ǁāǁnâhe. Nēs ge kaise ti ûiba ge tsâǀkhā. Tae-i ǃaroma? Khoe-i ge tita Elobmîsa ǁkhāǁkhā tama hâ i amaga. ǁNās ǃaroma ta ge mâ Elobmîs ǁkhāǁkhās hoas ǃaroma ǃgâise gere aiǂhomisen. ǂGurose ta ge aitsama ǁkhāǁkhāsen tsî ǀgui Elobmîsa ta ra ǁkhāǁkhā khoe-e gere ǁkhāǁkhā. Nēs ge amaba ǂansa kaise ge ǃgôaǃgâ kai te. Aprili 1954ǁî kuri ta ge Jehovab ai māǁnâsen tsî ge ǁāǁnâ kaisen.

1955ǁÎ kuri ta ge ǃhūbaib ǂhawase ra dīhe ǀharib kai ǀhaode ge hâǃnâ Duitsǃhūb, Fransi tsî Englandi ǃnâ. Englandi ǃnâ ta ge Albert Schroederi ǀkha ge ǀhao. ǁÎb ge Elobmîs ǁkhāǁkhās skoli Gileadi ǃnâ ge ǁgauǃnâ-ao-i tsî ega ge ǂGaeǂguira soros di ǁani kai. Britaniab Museumsa da sari hâ hînab ge ǁîba ǀoro Elobmîs ǂkhanirode gere ǁgau da. ǁÎdi ge Elob ǀonsa Hebre Xoadi ǃnâ ge ūhâ i tsîb ge ǁîba ǀons di ǂhâǂhâsasiba gere mîba da. Nēs ge kaise ge tsâǀkhā te tsî ta ge mîǁguiba ge dī î ta ǁkhoaǂgaose aiǃgû Elobmîs amaba aoǁnâs ǀkha.

Januarib 1, 1956ǁî kuri ta ge aimâba-aose ge sîsen tsoatsoa. Haka ǁkhâgu khaoǃgâ ta ge ǀō-aisa aimâba-aose Austriab ǃnâ ge ǁgaumâihe. ǁNā ǁae i ge Mistelbachs ǃnâ ǀHûǀguitimî-aona ge ǀkhai i. Kai ǃgomsib ge ge hāǂam te. Tita tsî ti aimâba-ao ǀhōsas ǁaegu i ge kai ǃkharagagusiba ge hâ i. Tita ge ge 19 kurixa i tsî kai ǃāsa xu gere hā tsî ǁîs ge ge 25 kurixa i tsî ǃgaro ǃāsa xu gere hā. Tita ge ǁgoaga ǁoms xa ge ǃgâibahe i tsî ǁîs ge ǁgoaga khâis xa ge ǃgâibahe i. Tsî tita ge ǃuia ǂkhaisase hâs xa ge ǃgâibahe i tsîs ge ǁîsa ti aisi ǁoms xa ge ǃgâibahe i. Xawem ge noxoba nēn hoan ǃnâ Elobmîs tsoatsoade ra sîsen-ūse ǀguiba ǁkhoaxase gere sîsenǀhao.

ǁNās xa a kai ǃgomsin tsînam ge gere hōǃâ. Khoen ge gere mâǃoami xawem ge ge ‘ǁnāxūǃnâhe tama hâ’ i. (2Kor. 4:7-9) ǀNî ǁaem ǂkhari ǃgaro ǃās ǃnâ ra aoǁnâ hînan ge khoena arina ge ore îm sima sauruhe. Sim ge ǂgui kaiǃgâ arin xa ge ǃnamiǂgāhe. ǃOmde ǃkhōgu tsîm ge ge ǀgore, “Jehova nē arigu ga ǃkhōmi o, o am toxoba ǁōs ǀguisa dī re.” Nē arigu ge ǁaerob khaoǃgâ ge tawasen xū-e dī tamase. Jehovab ge sima a ǁkhauba khamim ge ge tsâ. ǁNā ǃnaeǃkhais khaoǃgâm ge ge aoǁnâ tsoatsoa tsî ǃnāsa khoen ge ge ǃgâ tsî khoexaǃnâ ǀgauga gere ǁgau. ǁÎn ge ǀnîsi gere buru arigu ge ǁnāǂam mi tama hâ isa tsîm ge amase nēn hoana a mâǃkharusa. ǀNîn ge nēs khaoǃgâ ge ǀHûǀguitimî-ao kai.

ǀNî hâ xū-i ge ge ǃaoǃaomi. ǀNî tsēb ge hâ aim gere oms di aoba, ǃgâu hâse  ge hā. Tsîb ge gere mî sim ge ǀhûhâsib ǃnâ khoena ra ǂhani di. ǁÎb taras ge ge hui mi tsâ xawe i ge ge hui tama hâ i. Nēsam ge sim ǁomǃnâ ǃkhaisa xu gere ǁnâu. ǃAob xa ǃkhōhe hâsem ge ǁomǃnâ ǃkhais di dao-amsa ǀgaisase ǂganam tsî sim xūna ge ǀhaoǀhao tsoatsoa. Sim ge dao-amsa ǁkhowa-am o, ob ge nē aoba kaiǃgâ gôab ǀkha ǃgauga ge mâ i. Nēsam ge mû o, om ge ǃgâbǀkhāb dao-amsa xu ge ǂoa tsî ge ǃkhoebē.

Tsîm ge hotels tawa sī tsî hâǃkhai-e ge ǂgan. ǀAms aim ge ǁnāpa kuriba ge hâ tsî ǁnāpa aoǁnâ sîsen-e dīs ge kaise ge ǁkhoaxa i. Tae-i ǃaroma? Hotels ge ǃās di ǁaegub ǃnâ ge hâ i tsî ǁnāpam gere ǀhao-ū khoen tsîn ge Elobmîsa gere ǁkhāǁkhāsen ǂgao. ǁAeb ge ī khamim ge hotels ǃnâ wekheb ǁaegu ra dīhe Elobmîs ǁkhāǁkhāǃâs tsî ǃKhē xu ǂgō-ommi di ǁkhāǁkhāǃâs tsîna gere dī. Tsî i ge 15 xa ǃnāsa khoena gere ǁhao.

Sim ge Mistelbachs ǃnâ ǀgui kuriba ge hâ. Tsî ta ge tita ǁnās khaoǃgâ Feldbachs, Grazab ǃkhawagas ǃoa ge oa. Nē ǃnās ai ta ge ǁkhawa ǀasa aimâba-ao ǀhōsasa ge hō xawe i ge ǀhaohâ-e ge ǀkhai i. Sim ge ǂkhari ǁomǃnâ ǃkhais ǃnâ gere hâ. Sim oms ge ārode ūhâ i amaga i ge ǂoaxa tsēdi ai kaise ge ǃkhai i. ǁGam-em ge tsauba xu sī gere ū. Nēs ge kaise ge ǁkhoaxa i. ǁKhâgu khaoǃgâ i ge ǀgui ǃgubisa ge tsoatsoahe. Tsî i ge 30 ǁanin omaris hînam ge Elobmîsa gere ǁkhāǁkhāna amaba ge ūǃoa.

Nē aiǁgaudi ge kaise ge tsâǀkhā te tsî ti ǂgomǃgâsiba Jehovab ǀû tamase ra kōǃgâ ǃkhais ǃnâ ge omkhâi. Khoen ga hui da tama i xaweb ge Jehovab ǃomma ǁnāxūǃnâ da tide.​—Psa. 121:1-3.

1958ǁÎ kuri i ge Amerikab, Yankee ǂgāb tsî Polo Grounds ǃnâ ǀharib kai ǀhaosa ge hâ i. Xoaǂgāsen ta ge ge tsîs ge Austriab ǁnâub berosa ge ǂgan te î ta 32ǁî klas Gileadi disa hâǃnâ. Nēs ge kaise ge ǀō-aisa i ǂgansa. ǁAeba ǂkhôa tamase ta ge nē ǁkhauǂuisa ge ūǃoa.

Gileadi klas ǃnâ ta ge Martin Poetzingeri xōǀkhā gere ǂnû. ǁÎb ge ǁkhōǁkhōsa  ǃgomsiga Nazi ǃkhō-oms ǃnâ gere hōǃâ. Tsîb ge ega ge ǂGaeǂguira soros di ǁani kai. Martini ge ǀnî ǁaega “Erika nēsa tae-e ra ǂâibasen Duits gowab ǃnâ?” di gere dî.

Gilead klan ǀkha da nî toas aiǃgâb ge Nathan Knorra sida ǁgaumâide ǀnai gere māǂui tsoatsoa. Tita ge Paraguaba ǃoa ge sî-e. Kaise ta ge ǂkham i ǃkhais ǃaroma ta ge ti dadab mā-amsa ge ǂhâ hâ i ǁnā ǃhūb ǃnâ si sîsens ǃgao. Tsî ta ge Maarti ǃnâ 1959ǁî kuri Paraguab ǃnâ ge sī. Sîsaben ra hâ oms hîna Asuncióni ǃnâ hâs ǃoa ta ge ge sîhe ǁkhawa ǀasa sîsen ǁae-ao-i ǀkha.

ǁAero i khaoǃgâ ta ge Bright Walteri ǀkha ge ǀhao, ǁîb ge 30ǁî Gilead klasa xu gere hā. Tsîm ge ǁnās khaoǃgâ ge ǃgame tsî ǀguiba ǃgomsigu hînam gere hōǃâ ga gere sîsenǂam. ǃGomsigu gere hāǂam mi o, om ge Jehovab di mîmâis hîna Jesajab 41:10 ǃnâ xoasasa gere khomai nēti ra mîsa: “Tā ǃao, tita ge sa ǀkha hâ xuige; tā sau, tita ge a sa Elo xuige. Tita ge ra ǀgaiǀgai tsi.” Nēs ge ǀgaisa ǂgomǃgâsiba ge ǁgau mi, Jehovab tsî ǁîb Gaosibam ga ǂgurose ga ra mâi o, ob ǁîba sima tātsēs tsîna xūǃnâ tidesa.

ǁAero-i khaoǃgâm ge ǁkhawa Brasili xōǀkhā hâ ǃāsa ǃoa ge sîhe. ǂGomdi ǁkhāǁkhā-aogu ge ǂkham ǀgôana gere sî în sida omde ǀuidi ǀkha ǂnoa. Tsîb ge Waltera ǀapaǃamgu di danaba Elobmîsa ge ǁkhāǁkhā tsoatsoa. ǁNā danab ge ǁkhāb an hoana gere dī îgu ǀapaǃamga sîm omsa kōǃgâ tsîn ge mâǃoa-aona ge ǁore mi ǀû. Tsîm ge ǁnās khaoǃgâ Brasili grens tawa hâ sâsa ǃāsa ǃoa ge doe. Nēs ge kaise ge ǃgâi i, ǀgam ǀhaodem ge Paraguab tsî Brasili ǃnâ gere ūhâ amaga. ǁNā ǁgaumâis ge toas aiǃâ i ge ǀgam ǀhaohâga ge tsoatsoahe.

Ti doktergu ge ge mîba te ǀgôa-em a hō ǁoa ti. Xawem ge 1962ǁî kuri ge buru ǀgamǀkhā ta ge o. Tsîm ge Floridasa ǃoa ge doe. ǁAerob ǀgaibam ge Walter hama aimâba-aose ge sîsen tama hâ i. Omarisam nî kōǃgâ tsoatsoa amaga. Xawem ge nēn hoan ǃnâ Gaosiba ǂgurose sim ûib ǃnâ gere mâi.​—Mat. 6:33.

Novemberi 1962ǁî kurim ge Floridas ǃnâ a sī o, om ge ge ǁnâu khoen ǂgao tama hâsa în ǂnū ǃgâsan tsî ǃuri ǃgâsan tsîna ǀguiba ǃoaba. ǁÎn ge aoǁnâ sîsen-e ǃkharagagu ǃkhaib ais tsîna gere dī. Xaweb ge Jehovaba ǀgorasa ūhâ tama hâ tsî i ge nēs ǀkha ǃgâsana ǀguiba ge ǃoaba tsoatsoa. Jehovab ǃomma ta ge nēs ǃnâ ge mû tsî i ge nēs ǃaroma ǂgui ǀhaohâga hâ.

Walteri ge 2015 ǂkhûs di kankers xa ge ǁō. ǁÎm ge 55 kuriga ge ǃgame hâ i, ǁîb ge ge khoexaǃnâ ǀnamǀnamsa ao-i. Mûǂui ta ge ra ǁkhawa ǁîba khâis khaoǃgâ mûsa.​—ǃNǃkh. 24:15.

Kaise ta ge ra ǃgôaǃgâ Jehovaba ta 40 kuriga ǀoasase ra sîsenbasa. Nēs ge kai ǂkhîba ra mā te. Aiǁgausem ge Walter hama 136 khoen hînam ge Elobmîsa gere ǁkhāǁkhān ǁāǁnâde ge hâǃnâ. ǃGomsin ge hâ nîse ǀgui i. Xawem ge nē ǃgomsiga ge mā-am tama hâ i, îgu ǂhani mi Jehovaba ǃoabas ǃnâ. Tsîm ge nēs ǀkha Jehovab ǃoa ge ǀgū tsî ǂgomǃgâsiba ge ūhâ i ǁîb ǀgūǁae ǃgomsin hoana nî ǀamǀamsa. ǁÎb ge nēsa amabes ǃnâ nî dī hō.​—2Tim. 4:16, 17.

Kaise ta ge Waltera ra ǁkhore xawe i ge aimâba-ao sîsen-e ra hui te nēsa tanis ǀkha. ǃGâibahe ta ge a khoena amaba ǁkhāǁkhāsa tsî khâis di ǃâubasens tsîna ǁîn ǀkha ǀgoragusa. ǂÂi-oa ta ga ra o, ob ge Jehovaba tātsēs tsîna ǁnāxūǃnâ te tama hâ. ǁÎb mîmâis kōǃgâ te, ǀgaiǀgai te tsîb nî ǁîb di “amǀkhābǁôab ti ǂhanu-aisib dib ǀkha” ǃkhō tes ge ge ama kai.​—Jes. 41:10.