1, 2. (a) Jesuba tae-e ǁîb ǁkhāǁkhāsabega ge mîba ǁîb ǁōb aiǃâ? (Tsoatsoas ǃnâ hâ ai-īsiba mû re.) (b) Tae-i ǃaroma da aoǁnâ sîsenni ǂâibasensa nî ǂan? (c) Tae-e da nî ǃhoaǃgao?

ǀUNIGA ǃui ǁîb ǁōb aiǃâb ge Jesuba ǁîb apostelgu ǀkha ǃgâi ǁgamǀhaosa ge ūhâ i. Nē ǁgamǀhaos ǃnâb ge ǁîga ǁîb ǀnammi xa ge mîba. ǁÎb ge ǁîga ǂauxûiǂûhais di ǂkhōs hîna da go ǂoa goro ǁkhāǁkhāǃâs ǃnâ a ǃhoaǃgaos xas tsîna ge mîba. Nē ǂkhōsa ra sîsen-ūseb ge Jesuba ǁîga ge ǂkhâǃnâ îgu ‘ǂûtanis’ ǃnâ mâǀgai tsî Gaosib ǃgâiǂhôasa aoǁnâ ǀgara.—Jhn. 15:8.

² Xaweb ge Jesuba ǁîb ǁkhāǁkhāsabega tae-e gu nî dīs ǀguisa ge mîba tama hâ i xawe tae-i ǃaroma gu nēsa nî dīs tsîna ge mîba. ǁÎb ge ǁîga aoǁnâ sîsenni ǃaromasa ge mîba. Tae-i ǃaroma i a ǂhâǂhâsa nē ǃaromade ǃhoaǃgaosa? Sida ga ra ǂan o tae-i ǃaroma da nî aiǃgûsa aoǁnâ sîsenni ǃnâ, os ge ǁnāsa nî ǂkhâǃnâ da î da mâǀgai aoǁnâ sîsenni ǃnâ “hoa ǁaedi mîdansa ǃoa.” (Mat. 24:13, 14) ǁNās ǀkha hā re î da haka Elobmîs tsoatsoade ǃhoaǃgao aoǁnâ sîsenni xa. Tsî Jehovab ge mā da haka ǀkhaegu tsîna.

3. (a) Tae-i ǃaroma da nî aoǁnâ Johaneb 15:8 ǃoagu? (b) Jesub ǂkhōs ǃnâ i druiwena tae-e ra ǂnûǁkhaeba tsî tae-i ǃaromas nēsa a ǃgâi?

³ ǀGapi ǃaromas aoǁnâ sîsenni ǃnâ ǁhaos ge î da Jehovaba ǂhaisiba mā tsî ǁîb ǀons tsîna ǃanuǃanu khoen aisi. (Khomai re Johaneb 15:1, 8.) Jesub ge ǁîb ǁGûba ǃhana sîsen-aob ǀkha gere ǀgopeǀnō hîna druiwena ra ǃhanaba. Tsîb ge Jesuba aitsama ǂauxûiǂûhais [ǃgaob] tsî ǁîb saosabena ǁnâub ǃoa gere ǁnaeǁgau. (Jhn. 15:5) Druiwen ge Gaosib di ǂûna ǃoa ra ǁnaeǁgau hîna Xristub saosaben xa ra ǂûtanihena. Jesub ge ǁîb ǁkhāǁkhāsabega ge mîba: “Nēs ǃnâb ge ti Îba ǂkhaiǂkhaihe hâ, kaise go ga ǂûtanio.” ǃGâi druiwen hîna ǁîn ǃhana-aoba ra ǃgâiaǂgao kain khami da ge sida tsîna Jehovaba ǂhaisiba ra ǁgau ǁîb Gaosib xa da ga aoǁnâ o.—Mat. 25:20-23.

4. (a) Mâ ǀgaub ǃnâ da Elob ǀonsa ra ǃanuǃanu? (b) Tsî nēs xa du mati ra tsâ?

⁴ Mâ ǀgaub ǃnâ i sida aoǁnâ sîsen-e Elob ǀonsa ra ǃanuǃanu? Elob ǀonsa da ge a ǃanuǃanu ǁoa. ǁÎs ge ǀnai a ǃanu tsî a ǂnao o. Xawe kēbo-aob Jesajab ge ge mî: “ǃKhūb [Jehovab, NW] ǂnubidi dib, ǁîba du ge nî khai.” (Jes. 8:13) Elob ǀonsa da ge ra ǃanuǃanu ǂgao, ǁnās ge ǁîsa nau ǀondi hoade xu ǀgapiǀgapis ǃnâ. Tsî nau khoen tsîna huisa în ǁîn tsîna ǁÎb ǀonsa ǃanuse ūhâ. (Mat. 6:9) Aiǁgause da ge khoena Jehovab di îsa ǀgaugu tsî ǁîb di ǂâibasens khoesib ǃoagub ūhâs xas tsîna ra mîba ǂgao. ǁNā ǀgaub ǃnâ da ge ǁîb ǀonsa Satanni di ǂhumiba xu nî ǁkhauba. (Gen. 3:1-5) Tsî da ge khoena sida ǂharis ǃnâ ra ǁgau ǂgao Jehovab ǀguib anu hâsa “ǂkhaisib tsî ǃgôasib tsî ǀgaib tsîna māhesa.” (J.ǂHa. 4:11) Runeb hîna 16 kuriga aimâba-aose ra sîsenni ge ra mî: “Kai aiǂhanub ge ǃhūbaib di Kuru-aoba ǃoabasa, nēsa ta ge ra ǃgôaǃgâ. Nēs ge ǀû tamase aoǁnâs turaba ra mā te.”

5. (a) Tae-i ǃaroma da nî aoǁnâ Johaneb 15:9, 10 ǃoagu? (b) Jesuba mati mâǀgais ǂhâǂhâsasiba ge ǁguiǃā?

⁵ Khomai re Johaneb 15:9, 10. Jehovab tsî Jesub tsîna da ūba hâ ǀnammi ge ra ǂgae da î da Gaosib ǃgâiǂhôas xa aoǁnâ. (Mrk. 12:30; Jhn. 14:15) Jesub ge ǁîb ǁkhāǁkhāsabega ge mîba î gu tā ǁîb ǀnammi ǃnâ ǀgui ǃgû xawe ǁîb ǀnammi ǃnâ “hâhâ.” Tae-i ǃaroma? Xristub di ǁkhāǁkhāsabese kuriba xu kurib ǃnâ ǃgûs mâǀgaisa ǂhâ hâ amaga. Jesub ge mâǀgais a ǂhâǂhâsa ǃkhaisa ge ǁguiǃā ǁnās ǃaromab ge “hâhâ” di hâ mîsa Johaneb 15:4-10 ǃnâ ǂgui ǃnāde ge sîsen-ū.

6. Mati da a ǁgau ǁkhā Xristub ǀnammi ǃnâ da ra hâhâ ǂgaosa?

⁶ Mati da a ǁgau ǁkhā Xristub ǀnammi tsî ǁîb ǃgâib ǃnâ da ra hâhâ ǂgaosa? ǁNās ge ǁîb mîmāde ǁnâuǀnams ǃnâ-ū. Aiǁgauseb ge Jesuba ra mîba da ‘tita ǁnâuǀnam re.’ Jesub ge ǁîb ge dī hō xū-i ǀgui-e ra ǂgan da î da dī tsîb ge ra ǀaro: “Tita ti Îb di mîmāde dī tsî ǁîb di ǀnammi ǃnâ ra hâhâ khami” dī re. Jesub ge amase ǃgâi aiǁgausa ge ǁgau da.—Jhn. 13:15.

7. ǀNammi tsî ǁnâuǀnamxasib tsîna mati ra ǃgû ǀhao?

⁷ ǁNâuǀnams tsî ǀnammi tsîn ge ra ǃgû ǀhao, ǁnās ǀkhab ge Jesuba ǁîb ǁkhāǁkhāsabega ge mîba: “Ti mîmāde  ūhâ, tsî kara ǁîde dī-i ge tita ǀnam hâ-e.” (Jhn. 14:21) Jesub mîmās ǃgû ǂoa tsî aoǁnâs disa ǁnâuǀnams ǃnâ-ū da ge ra ǁgau ǁîba da a ǀnamsa. Tsî Jesub mîmās ǃnâ-ū da ge ǁîb ǁGûb ǂâi ǀgauba ra mû. (Mat. 17:5; Jhn. 8:28) Sida ǁîkha ǀnamma ra ǁgaus ǃnâ-ū kha ge Jehovab tsî Jesub tsîna ǁîkha ǀnammi ǃnâ ra ūhâ da.

8, 9. (a) Tae-i ǃaroma da nî aoǁnâ ǀgara? (b) Esegieli 3:18, 19 tsî 18:23 sa mati ra ǂkhâǃnâ da aoǁnâ sîsenni ǃnâ?

⁸ Noxoba da ge ǃaromasa ūhâ tae-i ǃaroma da nî aiǃgûsa aoǁnâs ǃnâ. Aoǁnâ da ge ra î da khoena ǃkhâikhom. Elobmîs ge Noaxa “aoǁnâ-aob” ase ra ǂgai. (Khomai re 2 Petrub 2:5.) ǁÎb ge kai ǁgammi dâus aiǃâ ǃkhâikhoms di haisi-amsa gere aoǁnâ. Tae-i ǃaroma da di a mî ǁkhā? Jesub ge sao ra mîde ge mî: “Tsî kai ǁgammi di tsēdi ǃnâ i ge ī khami, ǂû tsî ra āǃâ, ǃgame tsî ǃgameb ǃoa ra māǂuiǃâ, Noaxi ge arki ǃnâ ǂgâ tsēs kōse. Tsîn ge mûǂan tama i, kai ǁgammi hā tsî hoana ge ūbēs kōse; ǁnāti i ge ǁkhāti nîra ī Khoen Ôab di hās ǃnâ.” (Mat. 24:38, 39) Khoen ge ǁîn ûigu ǀkha gere ǁaeǁaesen xaweb ge Noaxa ǂgomǂgomsase ǃkhâikhoms haisi-amsa ge aoǁnâ.

⁹ Nētsēs tsîna da ge khoena ǁnā ǃēsa ra mā în Elob ǂâibasens ǃhūbaib disa ǁkhāǁkhāsen. Jehovab khami da ge sada tsîna ra tsâ în khoena ǁîb ǃkhâikhomsa ǁnâu tsî “ûi” ǀgara. (Ese. 18:23) ǁNās ǀkha da ge omsa xu oms ǀkha da ga ǃgû o, o khoena ra ǃkhâikhom tsî ra mîba Elob Gaosib ǀgūǁae nē eloxoresa ǃhūbaiba hā nî dīkākāsa.—Ese. 3:18, 19; Dan. 2:44; J.ǂHa. 14:6, 7.

10. (a) Mateub 22:39 ǃoagu da tae-i ǃaroma nî aiǃgû aoǁnâs ǃnâ? (b) Paulub tsî Silab tsîkha mati Filipeǁîn ǃās di ǃkhō-oms danaba ge hui?

¹⁰ Aoǁnâ sîsenni ǃnâ da nî aiǃgûba ǃaromas ge: Sida ǀgūkhoena da a ǀnam amaga. (Mat. 22:39) Nē ǀnammi ge ra ǂgae da î da nē sîsenni ǃnâ mâǀgai. Tsî mûǂansa khoen ra ǁîn ǂâi ǀgauba ǀkharaǀkharasa mâsib ra dawa khami. ǂÂi re apostel Paulub tsî Silab tsîkha di aiǁgaus xa. Filipeǁîn ǃās ǃnâ kha ge ǁîga ǃkhō-oms ǃnâ ge ao ǂgāhe. Tsî i ge ǃuia ǃhūǂgubi-e ge hā tsî ǃkhō-oms dao-amde ge ǁkhowam. ǃKhō-oms danab ge Paulub tsî Silab tsîkha ge ǃkhoebē ti ge ǂâi tsî nēs ǀkha gere ǃgamsen ǂgao. Ob ge Pauluba nēsab ge mû o, o ǃgari dommi ǀkha ge mî: “Tā tsūdīsen!” re. Tsîb ge nē ǃkhō-oms danaba ǃaob ǀkha ge dî: “Tare xū-e dī tsî ta nî ǃgâiǃōsiba hō?”. O kha ge ge mîba bi: “ǂGom ǃKhūb Jesub Xristub ǃnâ, o du ge sats tsî sa oms din tsîdo nîra ǃgâiǃō” di.​—ǃNǃkh. 16:25-34.

11, 12. (a) ǃKhō-oms di danab aiǁgausa da mati sida aoǁnâ sîsenni ǀkha a ǃgopeǀnō ǁkhā? (b) Tae-e da ra dī ǂgao?

¹¹ ǁNā ǃkhō-oms di danab aiǁgausa  da mati sida aoǁnâ sîsenni ǀkha a ǃgopeǀnō ǁkhā? Nēs xa ǂâi re: ǃKhō-oms danab ge ǁîb di ǂâi ǀgauba ǃhūǂgubib khaoǃgâ ǀgui ge dawa tsî huiba ge ǂgan. ǁNās ǁkhās khamin ge khoen hîna ge Elobmîs ǃgâiǂhôasa ǃgâ ǂgao tama hâ îna ǁîn ûib ǃnâ i ga ǃhuriǃhurisa mâsiba ga ra hā o, o ǁîn ǂâi ǀgauga ra dawa. Aiǁgausen ge ǀnîna ǀnîsi ǁîn sîsen-e ge ǂoaǃnâ tsî tsûaǂgaob xa ra dana mâhe. Tsîn ge ǀnîna ǃgameb go ǀgora ǃkhais xas tsîna ra ǂâiǂhansen. Tsîn ge ǀnîna ǁkhōǁkhōsa ǀaeba ge hōǃnâ-e tamas ka io khoe-e ǁōb ǃnâ ge ǂoaǃnâ. Nēti i ǃnaeǃkhaidi ǁîn ûib ǃnâ ra hâ o, on ge dîna ra dî ûib di ǂâibasens xa. ǀNîn ge ǀnîsi noxoba ra ǂâi, ‘tae-e ta nî dī î ta sâuhe ǁkhā?’ ǁNās ǃaroman ge ǁîna sida ǀkhan ra ǀhao o, o sida haisi-ams hîna ǃâubasensa ūhâsa ra ǃgâ ǂgao.

¹² ǁNās ǀkha da ge ǂgomǂgomsase aoǁnâs ǃnâ-ū ǁîna ra ǁkhaeǂgao. (Jes. 61:1) Charlotte ti ǀon hâ ǃgâsas hîna 38 kuriga aimâba-aose ra sîsens ge ra mî: “Khoen ge nētse kāǁō hâ. ǁÎn ge amabes ǃnâ ǃgâiǂhôasa ǂhâ hâ.” Ejvori hîna 34 kuriga aimâba-aose ra sîsenni ge ra mî: “Khoen ge nē da ûi ǃnâ hâ ǁaeb ǃnâ kaise emosioneelse khao-oa hâ. Tita ge ǁîna ra hui ǂgao. Nēs ge ra ǁgari te î ta aoǁnâ.” ǀGūkhoena ǀnams ge ra ǁgari da î da aoǁnâ sîsenni ǃnâ ǁhao.

13, 14. (a) Mâ ǀkhaeba Johaneb 15:11 ǃnâ a xoasa? (b) Jesub ǂkhîba da mati sada ǃnâ ra hōǃâ? (c) Tsî nē ǂkhîba mati sida aoǁnâ sîsenni ǃnâ ra ǂkhâǃnâ da?

¹³ ǁÎb di ǀuniga ǃuib ge Jesuba ǁîb apostelga ǀkhaegu xa ge mîba hîna ǁîga a mâǀgai kai ǁkhā ga. O nē ǀkhaega a tae tsî ǁîga xu da mati a ǀama ǁkhā?

¹⁴ ǃGâiaǂgaob di ǀkhaeb. Jesub di mîmās aoǁnâs disa a ǃgom tanisa? Aiǁgauseb ge Jesuba ǂauxûiǂûhais di ǂkhōs ǃnâ ge mî aoǁnâ-aon ǂkhîba nî hōǃâsa. (Khomai re Johaneb 15:11.) Nēs ǀkhas tsînab ge ge mî ǁîb di ǂkhîba da nî hōǃâ ti. Mâ ǀgaub ǃnâ? Jesub tsîn ge aitsama ǂauxûiǂûhais ase ge ǂgaisen tsî ǁîb ǁkhāǁkhāsabega ǁnâugu ase. ǂAuxûiǂûhais ge ǁnâuga ra ǂkhâǃnâ. ǁNâugu ga ǂauxûiǂûhais tawa ga ra ǂgāmâisens kōse gu ge ǁgam-i tsî ǀgaib tsîna nî hō. ǁNās ǁkhās khami da ga sada tsîna Xristub ǀkha ǀguiǃnâxasib ǃnâ hâ o tsî ǁîba ga ra ǁgae o, o da ge ǂkhîba nî hōǃâ ǁîb khami. (Jhn. 4:34; 17:13; 1Pet. 2:21) Aiǁgause Hannes hîna 40 kuriga aimâba-aose ra sîsens ge ra mî: “Aoǁnâ sîsenni khaoǃgâ ta ra hōǃâ ǂkhîb ge ra ǂkhâǃnâte î ta Jehovaba ǃoaba ǀgara.” Amaseb ge nē ǂkhîba ǀgaiba ra mā da î da aoǁnâ sîsenni ǃnâ da ra mâǃoahe xawe aiǃgû.—Mat. 5:10-12.

15. (a) Mâ ǀkhaeba Johaneb 14:27 ǃnâ a xoasa? (b) ǂKhîba mati ra hui da î da ǂûtani?

¹⁵ ǂKhîb di ǀkhaeb. (Khomai re Johaneb 14:27.) Jesub ge ǁōb nî ǃuis aiǃgâ ge mî: ‘ǂKhîba ta ra mā go.’ ǂKhîb di ǀkhaeba mati ra hui da î da ǂûtani? Mâǁapo da ra khami da ge sada ǂgaob ǃnâ ǂkhîba ra hōǃâ, Jehovab tsî Jesub tsîn mā-amsa da ūhâ amaga. (Psa. 149:4; Rom. 5:3, 4; Kol. 3:15) Ulf di ǀon hâ ǃgâsab hîna 45 kuriga aimâba-aose ra sîsenni ge ra mî: “Aoǁnâ sîsenni ge ra tsau kai xawe î ge ǂâibasens tsî ǃgâiaǂgaob tsîna ti ûib ǃnâ ra mā te.” Kaise da ge ra gangan nēti i ǃnomsa ǂkhîba sida ǂgaob ǃnâ hōǃâsa.

16. (a) Mâ ǀkhaeba Johaneb 15:15 ǃnâ a xoasa? (b) Apostelga mâ ǀgaub ǃnâ Jesub di ǀhōsase ge hâhâ?

 ¹⁶ ǀHōsana ūhâs ǀkhaeb. Jesub ge ǁîb di apostelga ge mîba îgu ǁîb di ǂkhîba ‘ǀoasase’ hōǃâ. Tsî ǁnās khaoǃgâ ǁîga aitsama māsenxa ǀnammi di ǂhâǂhâsasiba ge ǁguiǃāba. (Jhn. 15:11-13) Tsîb ge ǁîga “khoego [ǀhōsago] ti ge ǂgai.” Nēb ge kaise ge ǀō-aisa i aiǂhanuba, Jesub ǀhōsase ǃgôahesa. Xawe apostelga tae-e nî dī ǁÎb ǀhōsase gu ga ra hâhâ ǂgao o? ǁÎgu ge ‘ǃgû tsî  . . . nî ǂûtani.’ (Khomai re Johaneb 15:14-16.) ǀGam kurigu aiǃâb ge Jesuba ǁîb apostelga ge mîba: “ǃGû ǁnâi, î aoǁnâ, î go mî: Gaosib ǀhommi dib ge ǀgūse hā hâ.” (Mat. 10:7) ǁNās ǃaromab ge ǁîb ǀuniga ǃui ǁîga ge mîba îgu mâǀgai nē sîsenni ǃnâ. (Mat. 24:13; Mrk. 3:14) Jesub di mîmāsa dīs ge ǃgom-i xawe gu ge ǁîga nēsa ge dī hō tsî nē ǀgaub ǃnâ Jesub ǀhōsase ge hâhâ. Mâ ǀgaub ǃnâ? ǀNî hâ ǀkhaeb di huib ǀkha.

17, 18. (a) Mâ ǀkhaeba Johaneb 15:16 ǃnâ a xoasa? (b) Nē ǀkhaeba mati Jesub di ǁkhāǁkhāsabena nî hui? (c) Mâ ǀkhaega nētsē ra ǀgaiǀgai da?

¹⁷ ǀGorede ǁnâu-amhes ǀkhaeb. Jesub ge ge mî: “Îb Aboba ti ǀons ǃnâ go ga ǂgan-i hoa-e sago mā.” (Jhn. 15:16) Nē mîmâis ge kaise apostelga ge ǀgaiǀgai. * ǁÎgu ge nēsa ǀoasase ge ǁnâuǃā tama hâ i. ǁÎgu ǂGaeǂgui-aob di ûib ǀgūǁae nî ǀam xawe gu ge huib ose ge hâ tama hâ i. Jehovab ge ǁîgu ǀgorede ge ǁnâu-am îgu ǁîgu mîmās Gaosib ǃgâiǂhôasa aoǁnâs disa dī hō. Tsî gu ge nēsa ǁaerob ǃkharu hâse ge hōǃâ ǁîgu ǀgoredi ge ǁnâu-amhe o.—ǃNǃkh. 4:29, 31.

¹⁸ ǁNās tsîn ge nētsē a ama. ǂÛtanis ǃnâ da ra mâǀgai khami da ge Jesub ǀkha da ūhâ ǀhōsagusisa xu ǃgâiba nî hō. Tsî da ge ǂgomǃgâsib tsîna a ūhâ ǁkhā Jehovab sida ǀgorede nî ǁnâu-amsa Gaosib ǃgâiǂhôasa da ra aoǁnâ hîna nē ǃgomǁaegu ǃnâ. (Fil. 4:13) Kai ǀkhaeb ge sida ǀgorede ǁnâu-amhesa tsî Jesuba sida ǀhōsase ūhâsa. Nē ǀkhaeb hîna Jehovaba xu ra hāb ge ra ǀgaiǀgai da ǂûtani da ga o.—Jak. 1:17.

19. (a) Tae-i ǃaroma da aoǁnâ sîsenni ǃnâ ra ǁhao? (b) Tae-e nî hui da î da Elob sîsen-e dī toa?

¹⁹ Nē ǁkhāǁkhāǃâs go ǁgau khami da ge aoǁnâ sîsenni ǃnâ ra ǁhao î da Jehovaba ǂhaisiba ǁgau tsî ǁîb ǀons tsîna ǃanuǃanu. Tsî Jehovab tsî Jesub tsîna ǀnamma ǁgau. Tsî ǃkhâikhoms haisi-amsa khoena mîba tsî ǁnās ǀkha khoena ǀnamma ǁgau. Tsî ǀunis ai i ge ǃgâiaǂgaob, ǂkhîb, ǀhōsagusis tsî sida ǀgoredi hîna ra ǁnâu-amhe di tsîna ra ǀgaiǀgai da î da sida sîsenni ǀkha aiǃgû. Jehovab ge kaise nî ǂkhî mûb ga ra o mati da ǁkhāsib hoab ǀkha ra aiǃgûsa kaise da ga “ǂûtanio.”