1-2. 1 Petrub 4:7, 8 ǃoagu i tae-e nî huida ǃgomsigu ǃnâ mâǀgais ǀkha?

ǃGAMSE DA “ǀuni tsēdi ǃnâ” ra ǂgâ khami da ge kai ǃgomsina ra hōǃâ. (2 Tim. 3:1) Aiǁgause, huriǂoas Afrikab dis ǃnâ i ge ǁhûisa toa o, o i ge kai ǃkhamsa ge hâ i. Kaise i ge ge ǁkhōǁkhōsa i sada ǃgâsan ǃaroma, khoen ǁnā ǂharidi ǃnâ gere ǃkham amaga. Tae-e nē ǃgom ǁaegu ǃnâ ge hui nî? ǀNîn ge ǃnomsa ǂharidi ǃnâ gere hâ ǃgâsan tawa sī gere hâ. ǀNî ǃgâsab ge ge mî: “Nē ǁaegu ǃnâ ta ge kaise ǃgâi ǀhōsana ūhâsa gere ǃgôaǃgâ di. Nēs ǃnâ-ū da ge a ǂkhâǃnâgu ǁkhā.”

² “Kai ǁgâiǀāb” ga tsoatsoa o, o da ge ǃgâi ǀhōsan hîna a ǀnam dana ūhâsa nî ǃgôaǃgâ. (J.ǂHa. 7:14) Nēs ǃaroma da ge nēsi ǀgaisa ǀhōsaguside ra omkhâi ǂgao. (Khomai re 1 Petrub 4:7, 8.) Jeremiab aiǁgausa xu da ge a ǁkhāǁkhāsen ǁkhā. ǁÎb ǀhōsab ge Jerusalems hîkākāhes ǁaeb ǃnâ ûiǃkharus ǀkha ge hui bi. * Jeremiaba da mati a ǁgae ǁkhā?

3. (a) Tae-i ǃaromab Jeremiaba nau khoena xu ǀguri gere hâ ǂgao? (b) Jeremiaba ǁîb di xoa-aob Baruxa tae-e ge mîba tsî tae-e ge hā?

³ 40 Kurigu ǀgaibab ge Jeremiaba ǂhauoǃnâ khoen, ǁîb ǁanǁare-aon tsî ǀaokhoen tsîna ǃkhōǂgā hân ǀkha ǁîb ge kai ǃnâ ǃās Anatots ǃnâ gere hâ. (Jer. 11:21; 12:6) Xaweb ge ǁîba nē khoena xu ge ǂgae-oasen tama hâ i. ǁÎb ge ǁîb di ǂgomǂgomsa xoa-aob Baruxa ǁîb di tsâsigu xa ge  mîba tsî sida tsîn ge ǁîb di tsâsigu xa a ǂan, xoahe i ge amaga. (Jer. 8:21; 9:1; 20:14-18; 45:1) Baruxi tsî Jeremiab tsîkha ge ǀnami tsî ǃgôasib tsîna ge omkhâiba gu, Baruxi Jeremiab ǀkha ge ī xūn hoana gere xoakâi ǁaeb ǃnâ.​—Jer. 20:1, 2; 26:7-11.

4. Jehovaba tae-e Jeremiaba ge ǂgan dīsa tsî nē ǁgaumâisa mati Jeremiab tsî Barux hâkha ǀhōsagusisa ge ǀgaiǀgai?

⁴ Jeremiab ge kurina ge sîsen, Elob xab ge mā-e ǁgaumâisa dīs ǃnâ. ǁNā ǁaeb ǃnâb ge Jeremiaba Jerusalems ǀkha nî īse ī xū-i ǃaroma Israelǁîna ǁkhoaǂgaosib ǀkha gere ǃkhâikhom. (Jer. 25:3) ǀUniga ǃnās hînab ge Jehovaba khoena ǂkhâǃnâs în ǃhōbasens aib ge Jeremiaba ge ǂgan îb ǁîb di ǃkhâikhomsa scrolli ai xoa. (Jer. 36:1-4) Jeremiab tsî Barux hâkha ge nē ǁgaumâis Eloba xu gere hās hîna ge ǀoro ǁkhâga a ūsa gere dī ǁaeb ǃnâ kha ge ǁîkha ǂgomsa ra ǀgaiǀgai ǃhoaǀhaode ge ūhâ i.

5. Mati da a ǂan Baruxi ge Jeremiab di ǃgâi ǀhōsa i ǃkhaisa?

⁵ Scrolli ge xoahe toas khaoǃgâb ge Jeremiaba ǁîb ǀhōsab Baruxi ai nî ǂgomaiǂnûise ge īs ge ǁîb khoena nē haisi-amsa nî sī māsa. (Jer. 36:5, 6) Baruxi ge nē ǃgomǀgausa ǁgaumâisa ge dīǀoaǀoa. ǂÂi ǁkhā du a Jeremiab matikōse ge ǂkhî īsa Baruxi ge tempeli tawa sī tsî nē haisi-amsa mā o? (Jer. 36:8-10) Judab di gao-aos ge ge ǁnâu Baruxi tae-e ge dīsa tsî ge ǂan bi îb nē scrolla ǃgarise khomai. (Jer. 36:14, 15) Gao-aos ge Gao-aob Jojakimma ge mîba Jeremiab tae-e ge dīsa. ǁGuiǃgârasen ge Baruxa ge mîba: “ǃGû îts sī gaugausen sats tsî Jeremiab tsîkho, î-i tā khoe-e ǂan mapa kho hâ ǃkhaisa.” (Jer. 36:16-19) Nēs ge ge ǃgâi ǃkhâikhom i.

6. Jeremiab tsî Barux hâkha mati nē mâǃoas ǃoa-ai ge tanisen?

 ⁶ Gao-aob Jojakimmi ge kaise ge ǁaixa Jeremiab xa xoahe hâ mîdeb ge ǁnâuo tsî scrolla ǂhubiǂûi kai tsî ge mî i kha Jeremiab tsî Barux hâkha ǃkhōsis ǃnâ ūhe. Xaweb ge Jeremiaba nēsa ge ǃao tama hâ i. ǁÎb ge ǀnîhâ scrolla ū tsî Baruxa ge mā, Jeremiab ge Baruxa Jehovab haisi amsa ge mîba tsîb ge Buruxa ‘ǂguro scrolli Jojakimmi, Judab gao-aob ge ǂhubis’ ai ge mâ i mîde nē scrolli ai ge xoa.—Jer. 36:26-28, 32.

7. Jeremiab tsî Barux hâkha ǀguiba ra sîsen hîna i tae-e ge ī?

⁷ Khoen hîna ǀguiba ǃgom ǁaega ra hōǃân ge ǀgaisa ǀhōsaguside ra omkhâi. Nēs ǃaroma da ge a ǂâi ǁkhā, Gao-aob Jojakimmi xa ge hîkākāhe scrolla kha gere dī-ūnu ǁaeb ǃnâ kha ge Jeremiab tsî Barux hâkha ǁîkha di ǃgâi ǀgauga gere ǃgôaǃgâ. Mati da nē ǀgam khoekha di ǃgâi aiǁgausa xu a ǁkhāǁkhāsen ǁkhā?

8. Tae-e ǃgâi ǀhōsana dīsa xu nî ǁkhae da tsî tae-i ǃaroma da nî aiǃgû ǃgâi ǀhōsana dīsa?

⁸ Kaise i ge a ǃgomba da ǁkhā sada ra tsâ ǀgauba nau khoen ǀkha ǀgoragusa, khoe-i xa da ga ǀnai tsûtsû-e hâ o. (ǂKhm. 18:19, 24) Tamas ka io da ge a tsâ ǁkhā, ǁaeb tsî ǀgaib tsîna da ūhâ tama hâ di ǃgâi ǀhōsana kurus ǃnâ. Xawe da ge nēs dīhe ǁoa di tsâ tide. Sada ǃgâsan xa da ga ǃgom ǁaegu ǃnâ mâxōǀkhā-e ǂgao o, o da ge nēsi ǀgaisa ǀhōsaguside ǁîn ǀkha nî kuru. ǀGui ǀgaub hîna da nēsa a dī ǁkhāb ge ǁîna sada ra tsâ tsî ǂâi ǀgausa mîbasa.—1Pet. 1:22.

9. (a) Matib Jesuba ge ǁgau ǁîb, ǁîb di ǀhōsana ra ǂgomǃgâ ǃkhaisa? (b) Sada di ǂâidi tsî tsâsigu tsîna sada ǀhōsan ǀkha ǀgoragusa mati ǃgâi ǀhōsagusisa ǁîn ǀkha ūhâs ǃnâ nî huida? Aiǁgau-e mā re.

⁹ Jesub ge ǁîb ǀhōsanab ra ǂgomǃgâ ǃkhaisa ǁîn ǀkha ǂhauǃnâse tsî xū-e sâu tamase ǃhoas ǃnâ-ū gere ǁgau. (Jhn. 15:15) ǁÎb aiǁgausa da ge a sao ǁkhā sada di ǂkhîb, ǃgomsin tsî ǁgâiǀāgu tsîna sada ǀhōsan ǀkha ǀgoragus ǃnâ-ū. Khoe-i ga ǃhoa o ǃgâise ǃgâ re, o du ge a ǂanǂûi ǁkhā ǁnā khoe-i ǂâidi, tsâsigu tsî mîǁguigu sadu digu ǀkha a ǀguisa. Cindy di ǀon hâ ǃgâsas aiǁgausa ǃoa kō re hîna a 29 kurixasa. ǁÎs ge 67 kurixa aimâba-aos Marie-Louise ǀkha ge ǀhōsagu. Cindys tsî Marie-Louise hâra ge mâ Dondertaxtsēs hoasa aoǁnâ sîsenni ǃnâ gere sîsen tsî ra ge hoaǃnâ-aixa xūn xa gere ǃhoa. Cindys ge ra mî “tita ge kaise a ǃgâibahe ǃgam ǁgamǀhaode ti ǀhōsan ǀkha ūhâsa, nēs  ra hui te î ta ǁîna ǃgâise ǂan tsî ǁnâuǃā amaga.” Sadu ǀhōsan ǀkha du ga sadu di ǂâidi tsî tsâsigu tsîn xa ǃhoa tsî ǁîn ga sadu ǀkha ǃhoa ǁaeb ai ǃgâ o, o du ge ǃgâi ǀhōsaguside ra omkhâi. Cindys khami da ga ǂhauǃnâ tsî ǃgâi ǁgamǀhaode nau ǃgâsan ǀkha ūhâ o, o da ge ǃgâi ǀhōsaguside a omkhâi ǁkhā.—ǂKhm. 27:9.

10. ǂKhoamîdi 27:17 ǃoagun mâ ǃgâi xūna a īǁkhā sada ǃgâsan ǀkha da ga sîsenǀhao o?

¹⁰ Jeremiab tsî Barux hâkha khami da ge sada ǃgâsan ǀkha da ga ǀguiba sîsenǀhao o, ǁîn di mâǀgaibesiba mû tsî ǁîna xu a ǁkhāǁkhāsen ǁkhā tsî nēs ǃnâ-ū ǀgū ǀhōsaguside ǁîn ǀkha a omkhâi ǁkhā. (Khomai re ǂKhoamîdi 27:17.) Aiǁgause aoǁnâ sîsenni ǃnâ da hâ hîna i ga sada di ǀhōsa-e ǁkhoaǂgaosib ǀkha ǁî-i ǂgoms xa ǃhoa tamas ka io Jehovab ǂâisa dīǀoaǀoas ǃnâ i ūhâ ǂgomǃgâsib xa, o da mati ra tsâ? Nēs ǃaroma du ge kai ǀnamma nî omkhâiba nî.

11-12. Aiǁgau-e mā re aoǁnâ sîsenni ǃnâ ǀguiba sîsens ǀhōsaguside ra ǀgaiǀgai ǀgaus di-e.

¹¹ ǀGam aiǁgaura hîna ra ǁgau ra aoǁnâ sîsenni ǃnân ga ǃgâsana ǀguiba sîsenǀhao, on ra ǀnamma omkhâibagu ǀgaus di ra ǃoa kō re. Adelines hîna 23 kurixas ge Candice sa ge ǂgan î ra kai ǂhâsiba ūhâ ǂharis ǃnâ sī aoǁnâ. “Sim ge ǁkhoaǂgaosib ǀkha gere aoǁnâ ǂgao tsî ǃgâi ǁaeba aoǁnâ sîsenni ǃnâ gere ūhâ ǂgao” dis ge ra mî. “Hoam ge ǂkhâǃnâsa ge ǂhâ hâ i Jehovaba ǃoaba ǀgaras ǀkha aiǃgûs ǃaroma.” Mati ra ǀguiba sîsenǀhaosa xu ge a ǀama? Adelines ge ra mî, “mâ tsēs hoas ǀams aim ge tsâm ta ǀgaub xa gere ǃhoa tsî tae-i ge tsâǀkhā mis tsî Jehovab daoǁgausam aoǁnâ sîsenni ǃnâ ge mû ǀgaus xas tsîna. Hoam ge nē ǃgam ǁgamǀhaode gere ǃgôaǃgâ tsîm ge ǃgâises tsîna ge ǂangu.”

¹² ǀGam ǃgame tama ǃgâsa ra Laïlas tsî Marianne hâra ge Franci ǃnâ koro wekhega gere sī aoǁnâ, Central Afrikab Republiki kai ǃās Banguib ǃnâ. Laïlas ge ra mî: “Mariannes tsî tita tsîn  ge ǃgomsina gere hōǃâ xawe ta ge sim di ǃgâi ǁgamǀhaodi tsî ama ǀnammi tsîna ra gangan sim di ǀhōsagusis ge ge ǀgai. Mariannes ǃhaese ǀasa ǀgauga gere ūǃoa ǀgaus, ǀnammi khoenas gere omkhâibab tsî ǁkhoaǂgaosib hînas aoǁnâ sîsenni ǃnâ gere ǁgaub amsi ta ge ǃgôaǃgâsiba ge omkhâiba si.” ǀNî hâ ǃā-e ǃoa does ge ǂhâbasa tama hâ nē ǃnôa ǁkhoaxa ǁaeba hōǃâs ǃaroma. Mâ ǁaeb hoab hîna da sada ǃgâsa-i ǀkha aoǁnâ sîsenni ǃnâ ra sîsens ai da ge ǁaeba ūhâ ǁîna ǃgâise ǂan tsî ǀgaisa ǀhōsaguside ǁîn ǀkha omkhâis ǃaroma.

13. Mâ ǃgomsina da a hōǃâ ǁkhā sada ǀhōsan ǀkha da ga ǀguiba sîsenǀhao o?

¹³ Sada ǀhōsan ǀkha da ga ǀguiba sîsenǀhao o, o da ge ǁîn di ǃgâi ǀgaugu ǀguiga mû tama hâ xawe ǁîn di ǂkhabusasigu tsîna. Tae-e a huida ǁkhā sada ǀhōsaguside ǀgaisase ūhâs ǃnâ ǃgomsina da ga hōǃâ xawes tsîna? Jeremiab aiǁgaus xa ǁkhawa ǂâi re. Tae-e ge hui bi nau khoen di ǃgâi ǀgaugu ai kō tsî ǁîn di dīsādi amsi ǀûba nîs ǀkha?

14. Jeremiaba tae-e Jehovab xa ge ǁkhāǁkhāsen tsî nēsa mati ge hui bi?

¹⁴ Jeremiab ge ǁîb ǀonsa tani hâ ǂkhanisa ge xoa tsî ǀnîsi 1 tsî 2ǁî Gao-aogu tsîna. Nē ǁgaumâis ge ge hui bi mûsa Jehovab ǀoasa kurusa ūhâ tama hâ khoen ǃoa-ai a ǀûbaǀnamxa ǃkhaisa. Aiǁgauseb ge ǁîba ge ǂan i Gao-aob Axab ge ǁîb di ǁgai ǀgauga xu ǃhōbasen o, ob ge Jehovaba ǁîb omaris ǁanin ra hîkākāhe ǀgausa mûsa xu ǁîba a ǁkhauba ǃkhaisa. (1Gao. 21:27-29) ǁKhā ǀgaub ǃnâb ge Jeremiaba ge ǂan i Manaseb ge ǃnāsa xūna Jehovaba tsûtsûs ǃnâ a dīsa Axab xa. Xaweb ge Jehovaba Manaseb tsîna ge ǀûba ǃhōbasen nî ge o. (2Gao. 21:16, 17; 2Kro. 33:10-13) Elob di ǃnūǃnâxasib tsî ǀûbaǀnamxasib tsîn ge Jeremiaba ge hui îb ǁîb ǀhōsan ǀkha ǁkhā ǀgaugu ǃnâ sîsen.—Psa. 103:8, 9.

15. Jeremiaba mati Jehovab di ǃnūǃnâxasiba ge ǁgae Baruxi di ǂâis ge ǂgaeǁnâhe o?

¹⁵ Kō re Jeremiab ge mati Baruxa huisa ǁîb ǂâis ge ǁgaumâisa xu ǂgaeǁnâhe ǁaeb ǃnâ. Jeremiab ge ǃhaese ge mîǁgui tama hâ i Baruxi ǀkharaǀkharasen tide di xaweb ge ǁîba ge hui Elob di ǃgâi xawe ǂhanu haisi-amsa mîba bis ǃnâ. (Jer. 45:1-5) Tae-e da nēsa xu a ǁkhāǁkhāsen ǁkhā?

16. ǂKhoamîdi 17:9 ǃnâ i ra ǁgau-e khami da tae-e nî dī sada ǀhōsaguside ûitsamase ūhâs ǃnâ?

¹⁶ Amaba da ga mî o, ǀoasasiba da ge sada ǃgâsana xu ǃâubasen ǁoa. Nēs ǃaroma da ge ǀasa ǀhōsaguside da ga om o ǃgarise nî sîsen nēsa ūhâ ǀgaras ǃaroma. Sada ǀhōsa i ga dīsā o, o da ge ǂhauǃnâ xawe ǃgâi daoǁgausa Elobmîsa xu ra mā nî ǂgao. (Psa. 141:5) Tsî tsûtsû dan ga o, o da ge nî ǀûba nî. ǀÛba nî toa da gas khaoǃgâ sada tsûtsûs ǃgaon ge dī xū-e ǁîn tamas ka io nau ǃgâsan ǀkha ǃhoasa xu ǂgōsen re. (Khomai re ǂKhoamîdi 17:9.) Nēs ge kaise a ǂhâǂhâsa nē ǀuni tsēdi ǃnâ sada ǃgâsan di ǃgâi ǀgaugu ai ǂâisa ǂnûisa tsî ǁîn di ǂkhabusasigu ose. Nēsa da ga dī o, o da ge sada ǃgâsan ǀkha da ūhâ ǀhōsaguside nî ǀgaiǀgai, nē ǀhōsaguside da ge kai ǁgâiǀāb ǁaeb ǃnâ ǂhâ hâ.

17. Tae-i ǃaroma da a mî ǁkhā Jeremiab ge ge ǃgâi ǀhōsa i ǃgom ǁaegu ǃnâ di?

¹⁷ Jeremiab gere dī xūn ge gere ǁgau ǁîb ge ama ǀhōsa i ǃkhaisa ǃgom ǁaegu ǃnâ. Aiǁgause, Ebed-Meleki ge Jeremiaba  ǂgoab xa ǀoa hâ ǃgam āsa xu huiǂnuis khaoǃgâb ge Ebed-Meleka gere ǃao gao-aos nî tsûtsû bi ǃkhaisa. Jeremiab ge nēs xa ǁnâu o, ob ge ǃnōs ǀguisa ge hî tama hâ i, ǁîb di ǀhōsab nēsa nî ûiǃkharu di ǂâi tsî. ǃKhō-oms ǃnâb ge hâ i xaweb ge Jeremiaba dī ǁkhāb ge i xūn hoana ge dī, ǁîb ge Ebed-Meleka, Jehovab di ǁkhaeǂgao ra mîmâide ge mîba.—Jer. 38:7-13; 39:15-18.

18. ǂKhoamîdi 17:17 ǃoagu da tae-e nî dī sada ǀhōsa i ga ǃgom ǁaeb ǃnâ ǃkharu o?

¹⁸ Nētsēn ge sada ǃgâsana ǂgui ǃkharagagu ǃgomsina ra hōǃâ. Aiǁgause ǀnîn ge ǂoab mâsigu xa ra ǃaroma-e tamas ka io khoen xa ra ǃaroma-e ǃgomsiga ra hōǃâ. Nēs ga ī o, o da ge ǀnî da âda nē ǀhōsan sada dina sada omdi ǃnâ a hâ kai ǁkhā. ǀNîn ge marisise a ǂkhâǃnâ ǁkhā. Xawe hoa da ge Jehovaba a ǂgan ǁkhā îb sada ǃgâsana hui. ǃGâsa i ǃgomsib ǃnâ hâ di da ga ǁnâu o, o da ge a ǀū mati da ǁî-e nî ǂkhâǃnâ tamas ka io tae-e nî mîsa. Xawe da ge hoa da a hui ǁkhā. Aiǁgause da ge ǁaeba ǁamaǂui tsî sada ǀhōsan ǀkha a hâ ǁkhā. ǃHoan ra ǁaeb ai da ge a ǃgâ nî ǁkhā. Tsî da ge sada a ǃgâiba xoasa ǁîn ǀkha a ǀgoragu ǁkhā ǂkhâǃnâs ǃaroma. (Jes. 50:4) ǂHâǂhâsa as ge sada ǀhōsana da hâbasa ǂhâ dan ga ǁaeb ai.—Khomai re ǂKhoamîdi 17:17.

19. Nēsi ǀgaisa ǀhōsaguside omkhâisa mati hānîǁaeb ǃnâ nî huida?

¹⁹ ǀGaisa ǀhōsaguside om tsî ūhâ ǀgarasa da ge nî mîmâi sada ǃgâsan ǀkha. Tae-i ǃaroma? Sada mâǃoa-aon ǂhumiba ǃhoas ǃnâ-ū nî khôa da ǂgao amaga. ǁÎn ge sada ǁaegu da ūhâ ǂgomǃgâsib tsî ǂkhâǃnâgusis tsîna nî hîkākā ǂgao. Xawe ǁîn dītsâdi ge dīǀoaǀoahe tide. ǁÎn ge sada ūba gu hâ ǀnamma khôa hō tide. Xūn hînan ra dītsân hoan ge sada ǀhōsaguside khôa hō tide. Nē ǀhōsagusidi sada ūhâ di ge ǀuni tsēdi ǃnâ ǀgui mâhō tide xawe ǀamosib kōse nî hâ.