1. Sida di ‘gagasi ǂhâsiba’ a tae. Tsî matis nēsa sida ǃgâiaǂgaob ǀkha ra ǃgûǀhao?

 AMA ǃGÂIAǂGAOB ge ǃgâi tsâsib hîna hā tsî ra ī tamaba. ǁNāb ge hoa ûiǁaeb khoe-i dib ǃnâ a hâ ǁkhā. Matis nēsa īǁkhā? ǁÎb ǃhommi aoǁnâs aib ge Jesuba ge ǁguiǃā: “ǀKhaehen ge hâ gagasise ǀgâsana.” (Mat. 5:3) Jesub ge ge ǂan i khoen ge ǀgaisa turab ǀkha kuruhesa. ǁÎn Kuru-aob Jehova Eloba ǂan tsî ǃoabasa. ǁNāb ge a sida di ‘gagasi ǂhâsi.’ Jehovab a ‘ǃgâiaǂgaob di Elo’ amagan ge ǁîba ra ǃoaban tsîna a ǃgâiaǂgao ǁkhā.—1Tim. 1:11.

2-3. (a) Jesub ǃoagu haman tsîna a ǃgâiaǂgao ǁkhā? (b) Tae-e da nē ǁkhāǁkhāǃâs ǃnâ nî ǃhoaǃgao. Tsî tae-i ǃaromas ǁnāsa a ǂhâbasa?

² ǃGâi mâsiga da sida ûib ǃnâ ǂhâhâ, ǃgâiaǂgaoba ūhâs ǃaroma? Hî-î. ǃHommi aoǁnâs, ǃnâb ge Jesuba buruxa xū-e ge mî. “ǁNān ǃoa ran”—ǀnîsi dīn gere ǁoren tamas ka io ǁgai mâsigu. Hînan ge ǁîn ûigu ǃnâ ǃkharuǃnân, xa ǂkhabuǂâi hân tsîn ge a ǃgâiaǂgao ǁkhā. Jesub ge ǁkhā xū-e “ǁnān ǂhanu-aisib ǃaroma ra ǃgôaǃgonhen.” Tamas ka io ǁîb saosaben a ǃkhais ǃaroma ra ‘mîǁgaiǁgaihen’ xa ge mî. (Mat. 5:4, 10, 11) Xawe mati i-a īǁkhā, ǁnāti i mâsigu ǃnâ ama ǃgâiaǂgaoba ūhâsa?

³ Jesub ge ge ǁkhāǁkhāda, ama ǃgâiaǂgaob ge ǃgâi mâsigu. Hîna sida ûib ǃnâ hâ ga xu hâ tama hâ. Xawe sida gagasi ǂhâsiga ǀoaǀoa tsî Elob ǀgūse hâsa xu hâ. (Jak. 4:8) Mati da nēsa a dī ǁkhā? Nē ǁkhāǁkhāǃâs ǃnâ da ge ǃnona xūna nî ǃhoaǃgao. Hîna da nî dīna, î da ama ǃgâiaǂgaoba ūhâ.

4. Tae-e ǂguro xū-i hîna da nî dī-e, î da ama ǃgâiaǂgaoba hō? (Psalmdi 1:1-3)

⁴ ǂGUROSE: Ama ǃgâiaǂgaoba da ga ūhâ ǂgao, o da ge gagasi ǂû-e nî ūǂgā. Khoen tsî ǀgurun hoan ge sorosi ǂû-e ǂhâhâ, ûis ǃaroma. Xawe khoen ǀguin ge gagasi ǂû-e a ūǂgā ǁkhā. ǁÎ-e da ge ǂhâhâ, ǁnā-amagab ge Jesuba ge mî: “Khoe-i ge pere-e xu ǀgui ûi tama hâ, xawe mâ mîs Elob amsa xu ra ǂoas hoasa xu.” (Mat. 4:4) ǁNā-amaga da ge tā, tsē-e nî ǃkharu kai Elob ǀō-aisa ǂkhinis, Elobmîsa xu khomai tamase. Psalmdi xoa-aob ge ge mî: ‘ǀKhaehen ge hâ ǁnān Jehovab di ǂhanub ǃnâ ǃgâiǃgâisen. Tsî ǁîsa tsēs tsî tsuxuba ra ǂâiǃgâna.’—Khomai re Psalmdi 1:1-3 sa.

5-6. (a) Tae-e da Elobmîsa xu a ǁkhāǁkhāsen ǁkhā? (b) Elobmîsa khomaisa mâ ǀgaugu ǃnâ a huida ǁkhā?

⁵ Jehovab a ǀnam da amagab ge Elobmîs ǃnâ ra ǁgau da, î da ǃgâiaǂgaob ǀkha ûi. ǁKhāǁkhāsen da ge ra ǁîb ǂâibasens a taesa, sada ûib ǃaroma. ǁKhāǁkhāsen da ge ra mati da ǁîba nî ǀgūsa. Tsî tae-i a ǂhâbasasa dī da nîse în sida ǁorena ǀûbahe. ǃGâi ǃâubasens hînab hānîǁaeb xa mîmâihâs xas tsîna da ge ra ǁkhāǁkhāsen. (Jer. 29:11) Nē amab hîna da Elobmîsa ǁkhāǁkhāsensa xu ra hōb ge, sada ǂgaoga ǃgâiaǂgaob ǀkha ra ǀoaǀoa!

⁶ Sada a ǂan khamis ge Elobmîsa, tsēs hoas di ûib ǀapemādi xas tsîna ǀoa hâ. ǁNā ǀapemāde da ga sao, o da ge ǃgâiaǂgaoba a hō ǁkhā. Ûib ǃgomsigu xa du ga  ǂhapuǂâi ǁaeb hoaba. ǃNāsa ǁaeba Elobmîsa khomai tsî ǂâiǃgâ re. Jesub ge ge mî: “ǀKhaehen ge hâ ǁnān Elob di mîsa ǁnâu tsî ra sâubasenna.”—Luk. 11:28.

7. Mati du ǁaeb hîna du ūǂui. Tsî Elobmîsa ra khomaiba xu ǃgâiba nî hō?

⁷ Elobmîsa du ga khomai o, sadu ǁaeba ū re î ǃgâibahe khomai du ra xūn xa. Aiǁgause, nēti i xū-e hōǃâ tsâ i du ge hâ i? Khoe-i ge sado a ǃgâiba ǂû-e ra sâi, xawe du ge ǀnîsi ǂâusa ǁae-e ūhâ tama ǂûs di-e. Tamas ka ios ge sadu ǂâisa ǀkhara xūn xa ra ǂgaeǁnâhe. Tsî du ge ǃkhaese ra ǂû, ǁkhoa-e du hō tamase. ǂÛ toa du hâs khaoǃgâ ǀgui du ge, kaise du go ǃkhaese ǂûsa ra ǂâihō. Tsî du ge ra ǃhausen, ǂause ǂû tsî du ga mâ nâs hoas ǁkhoaba hō hâsa. ǁNās ge a ǀgui ǁkhā, Elobmîsa da ga ǀnî ǁaegu ai ǃkhaese a khomai. O da ge ǁkhoa-e hō tama, Jehovab ra ǁkhāǁkhāda xūna xu. Elobmîsa ǁaeb ǀkha khomai tsî ǁkhoaba hō re. Mûnanai re, ǃkhain tsî domgu di ǀōn tsîna i du khomai du ra xūna ǂâiǃgâ. Nēsa du ga dī, o du ge ǃnāsa ǃgâiaǂgaoba nî hō.

8. Matib “ǂgomǂgomsa tsî ǁnâuǃāxa” ǃgāba ǁîb ǃâba ra dīǀoaǀoa? (ǀGamirosa khomai re.)

⁸ Jesub ge “ǂgomǂgomsa tsî ǁnâuǃāxa” ǃgāba ge ǁgaumâi. Gagasi ǂûnab ǂhanu ǁaeb ai nî māse. Tsî da ge kaise ǃgâise ra ǂûmāhe. * (Mat. 24:45) Elobmîs ain ge hoa xūn hînab ǂgomǂgomsa ǃgāba ra dīna a ǃgaoǃgaosa. (1Tes. 2:13) ǁNā gagasi ǂû-i ge ra huida, î da Jehovab ǂâi ǀgauba ǂan ǁîb Elobmîs ǃnâ ra ǁgau khami. ǁNā-amaga da ge ǃKhē xu ǂgō-ommi, Awake! ǂkhinib tsî ǁkhāǁkhāǃâdi tsîna jw.orgs ai ra khomai. Wekheb ǁaegub tsî wekheb ǀams ai ra hâ ǀhaodi, ǃaroma da ge ra aiǂhumisen. Tsî da ge mâ ǁkhâb hoab programma, JW Broadcastings ai ra kō hâ i ga o. Elobmîsa da ga khomai tsî ga ra ǁkhāǁkhāsen ǀgara. O da ge ǀgamǁî xū-i hîna da nî dī-e a dī ǁkhā, î da ama ǃgâiaǂgaoba hō.

9. Mâ-e ǀgamǁî xū-i dī da nî-e ama ǃgâiaǂgaoba nî hau-e?

⁹ ǀGAMǁÎSE: Ama ǂkhîba da ga ra ūhâ ǂgao, o da ge Jehovab ǂhanugu ǃoagu nî ûi. Psalms xoa-aob ge ge xoa: “Mâtikōse i a ǀkhaesa, mâ-i hoa-i [Jehovaba] ǃKhūba ǃaoǃgâba ūba hâ tsî ǁîb di daogu ǃnâ ra ǃgû-e.” (Psa. 128:1) Jehovaba ǃaos ge ra ǂâibasen, ǁîba da ge kaise ra ǃgôa. Tsî ǁîba nî ǂkhîoǃnâ kai xūna dīsa xu ra ǂgōsen. (ǂKhm. 16:6) ǁNā-amaga da ge ǁkhā da a-i hoa-e ra dī ǀgara. Î da Jehovab di ǂhanuga sao, ǃgâib tsî tsūb digu hînab Elobmîs ǃnâ ra ǁguiǃāga. (2Kor. 7:1) ǃNāsa ǃgâiaǂgaoba da ge nî ūhâ. Jehovab a ǀnam xūna da ga dī tsî ǁîb ǃhui hâ xūna xu ga ra ǂgōsen o.—Psa. 37:27; 97:10; Rom. 12:9.

10. Sada di ǃereamsa a tae, Romeǁîn 12:2 ǃoagu?

¹⁰ Khomai re Romeǁîn 12:2 sa. Khoe-i ge ǀnîsi a ǂan ǁkhā. Jehovab ǁkhāsiba ūhâsa. Tae-i a ǂhanu tsî tae-i a tsūsa mîsa. Xawe i ge ǁî-i tsîna, Elob ǂhanuga saosa nî ūǃoa. Aiǁgause, khoe-i ge ǀnîsi a ǂan. ǃHūb ǂhanub ǁkhāsiga ūhâsa, ǂhanuga mās dība. Matikō ǃhaese i kai daob ai nî ǃnarihesa. Xawe i ge ǀnîsi ǁî-e māsenxa tide, ǁnā ǂhanuga ǁî-i ǃaroma ūǃoasa. ǁNās xa ǃaromahe hâse i ge ǁî-e, ǃnari-i nîs xa ǃhaese ra ǃnari. Sada di tanisens ǃnâ-ū da ge ra ǁgau, ama ǂgom da rasa. Jehovab di ǂhanuga saos a ǃgâi  ûiǀgausa. (ǂKhm. 12:28) Davib tsîn ge ǁnāti gere tsâ. Tsîb ge Jehovab xa ge mî: “Ti ûib di daob, ǃgâiǃgâisendi xa ǀoa hâb, sa aiǃâ hâbats ge nî ǂanǂan te tsî gu ge ǀnamǀnamsasigu âtsa ǀamose sa amǀkhāb ǃommi ǃnâ hâ.”—Psa. 16:11.

11-12. (a) ǂÂiǂhansen tamas ka io da ga ǂkhapuǂâi, o da tae-e nî ǂanbasen? (b) Filipeǁîn 4:8 ǃnâ hâ mîde mati a huida ǁkhā, ǃgâi ǁaeba da ga ǁhûi o?

¹¹ Xū-i xa da ga ra ǂhanihe tamas ka io ǂkhabuǂâi. O da ge ǀnîsi ǁnā ǂhâsiba a hōǃâ ǁkhā. ǃGâi ǁaeroba ūhâs diba, î da sida ǃgomsigu xa ǂâi ǀû. ǁNās ge a ǁnâuǃāxa, xawe da ge nî ǂanbasen. Î da tā Jehovab ǃhui hâ xū-e dī.—Efe. 5:10-12, 15-17.

¹² Efeseǁîna ǃoab ge xoa sîǂkhinis ǃnâb ge apostel Pauluba. Xristeǁîna ge ǀapemā în “ǂhanu-ai, ǃanu, ǀnamǀnamsa,  . . . tsî koahesa anun xa ǂâi” ǀgara. (Khomai re Filipeǁîn 4:8 sa.) Apostel Paulub ge ǁkhoaxa ǁaeba da nî ūhâ ǀgaub xa ge xoa tama hâ i. Xawen ge ǁîb ge xoa xūna a huida ǁkhā, ǁkhoaxa ǁaeba da ga ǁhûi o. Sao ra xūna dītsâ re: Nē xoas ǃnâ i “xūn” di hâ mîsa mā ǃkhais hoas ǃnâ. Nē mîdi ǀkha ǃkhōǃkhuni re, “musik-i,” “muvidi,” “khomai ǂkhinin.” Tamas ka io “vidio game” di. Nē-e dīs ge a hui du ǁkhā î du ǂanǂui. Mâ xūn ǀnîsi Jehovab mûǁae ūǃoahe ǁkhā tsî mân ūǃoahe ǁoasa. Sada di ûiba da ge Jehovab di ǀgapi ǂhanugu ǀkha, ǀguiǃnâxasib ǃnâ ra hau ǂgao. (Psa. 119:1-3) ǁNāpaxu da ge ǃanu ǃgâiǂâis ǀkha, sao ra-e a dī ǁkhā. Ama ǃgâiaǂgaoba nî hau-e.—ǃNǃkh. 23:1.

13. ǃNonaǁî xū-i hîna ama ǃgâiaǂgaoba ra hau-e a tae? (Johaneb 4:23, 24)

¹³ ǃNONAǁÎSE: Jehovaba ǃoabas sadu ûib ǃnâ a ǂgurosa mîǁgui re. Sada Kuru-aob aseb ge Jehovaba ǀoasase anu hâ, sada xa ǃoabahesa. (J.ǂHa. 4:11; 14:6, 7) ǁNā-amaga sida ûib ǃnâ nî ǂhâǂhâsa xū-i ge Jehovaba, ǁîb ra ǃoabahe ǂgao ǀgaub ǃnâ ǃoabasa. ǁNās ge “gagab tsî amab” ǃnâ. (Khomai re Johaneb 4:23, 24 sa.) Sida ǃoabas Elob gagab xa nî daoǁgauhesa da ge ǂhâba hâ. Î-î ǀguiǃnâxa ǁîb mîs ǃnâ ra hō-e amab ǀkha. Sada ǃoabas ge ǂguro nî ǀkhī. Sada sîsenni ǃnorasase mā-amhe tama, tamas ka io ǂkhāsa ǃhūb ǃnâ da ga ǁan xawe. Nēsi i ge 100 xa ǃnāsa ǃgâsana tronkes ǃnâ ǂnôa, Jehovaban ra ǃoaba amaga. * ǁNāti i ga i, xawen ge ǃgâiaǂgao rase dī ǁkhān a-i hoa-e ra dī în ǀgore. Elobmîsa ǁkhāǁkhāsen tsî nauna sida Elob tsî ǁîb Gaosib xa ǁgamba. Mîǁgaiǁgaihe tamas ka io da ga ǃgôaǃgonhe, o da ge a ǃgâiaǂgao ǁkhā. Jehovab sada ǀkha hâsa da a ǂan amaga. Tsîb ǁîba nî mādawa-am dasa.—Jak. 1:12; 1Pet. 4:14.

14. Tae-e ǂkham ǃgâsab ǀkha ge hā, Tajikistans ǃnâ tsî tae-i ǃaroma?

¹⁴ Ama ī ge xūn aiǁgaudi ge ra ǁapoǁapo. Nē da goro ǃhoaǃgao xūn, ama ǃgâiaǂgaoba ra hausa. Mâ mâsi-i ǃnâ ǀgui da ga hâ xawe. Kō re tae-i ge 19 kurixa, Jovidon Bobojonovib hîna Tajikistansa xu ra hāb ǀkha a isa. Toro ǃkham-ao kai ǂgao tamab ge hâ i amaga. Oktoberi 4, 2019 nî ǃnâb ge ǁgarihe hâse, ǁîb omsa xu ge ī-ūhe. Tsî ǂgui ǁkhâga Tronkes ǃnâ ge ǂganamǂgāhe. Tsîb ge ǂkhabadī-ao i khami gere hâ ūhe. Nē ǂhanuoǃnâsib ge ǂgui ǃhūgu ǃnâ ǂhôan ǃnâ-ū ge ǂhôahe. ǂNauhe tsîb ge ǁgâiba gere  māhe, îb ǂgomǂgomsase amies ǃoa-ai hâ. Tsî toro saraba ana ti i ge ge ǃnurihe. ǁNās khaoǃgâb ge ǁnâuǃgâ ǃkhaib xa ǀhapixase ge hō-e. Tsîb ge ǃgom sîsenni ra dīhe kampa ǃoa ge sîhe. ǃHūb ǂgaeǂgui-aob ge ǀhapiose hōbi tsî a ǃnora kaibis kōse. Nē ǁaeb hoab ǃnâb ge Jovidona, ǁîb ǂgomǂgomsasib. Tsî ǃgâiaǂgaob tsîna ge ǃkhōǀgara. Mâ ǀgaub ǃnâ? Hoaǁae ǁîb di gagasi ǂhâsiga ǂanǃgâs ǃnâ-ū.

15. Matib ge Jovidona Tronkes ǃnâb ǂnôa, hîna gagasi ǂû-e gere ūǂgā?

¹⁵ Tronkes ǃnâb hâ hînab ge Jovidona gagasi ǂûna gere ūǂgā. Elobmîs tamas ka io Elobmîs ai a ǃgaoǃgaosa ǂkhininab ge ūhâ tama hâ i xawe. ǁNāsa mati ge īǁkhā i? ǃĀs ǃgâsan ge ǂûna gere sī-ūbabi. Tsî tsēs mîsa ǂûn ǁgarugu ai gere xoaǁnâba bi. ǁNās ǀkhab ge Elobmîsa tsēs hoasa khomai tsî ge ǂâiǃgâ ǁkhā i. Tronkesa xub ge ǂoa kaihes khaoǃgâb ge nē ǀapemāsa. ǁNân hîna noxopa kai ǃgomsina ǃkharuǃnâ tamana ge ūba hâ i. ǁÎb ge ra mî: “ǂHâǂhâsa i ge a sa ǃnorasasiba ǀoasase sîsenū. Tsî sa ǂansa Jehovab xa ǀāǀāsa. Elobmîs tsî Elobmîs ai ǃgaoǃgaosa ǂkhinina khomais ǃnâ-ū.”

16. Tae-i aib ge Jovidona ǁîb ǂâisa ǂnûi hâ i?

¹⁶ Sida ǃgâsab ge Jehovab ǂhanugu  ǃoagu gere ûi. ǁÎb ge ǁgai turagu xa ge ǂâi ǀgara tama hâ i. Tsî ǁgai xūn tsîna ge dī tama hâ i. ǁÎb ge Jehovab ai ǂâisa ge ǂnûi hâ i. Tsî ǁîba a ǀō-aisaba xūn ais tsîna. Jovidonni ge Jehovab buruxa kurus xa ge îsabahe i. Mâ ǁgoas hoasab ge aniron di ǀōb tsî ǁnaeb ai gere ǂkhai. ǃUis hoasab ge ǁkhâb tsî ǀamirona ǃoa gere kō. ǁÎb ge ge mî: “ǁNā ǀkhaegu Jehovaba xu hâ gu ge ǃgâiaǂgao kai bi tsî gere ǂkhâǃnâ bi.” Jehovab ra mā da gagasi tsî sorosi ǂhâsigu ǃaroma da ga gangan xa, o da ge ǃgâiaǂgaoxa ǂgaoba nî ūhâ. Tsî ǁnā ǃgâiaǂgaob ge sida di ǁkhāsiba nî ǀgâiǀgâi î da mâǀgai ǁkhā.

17. 1 Petrub 1:6, 7 ǃnâ hâ mîde, mati ǁkhā mâsib ǃnâ Jovidonni ǀkha hâ khoe-e a hui ǁkhā?

¹⁷ Jovidonni ge Jehovab ǃoabasa ǂgurose gere mâi. ǁÎb ge ge ǂan i matikōse i-a ǂhâǂhâsasa. ǁÎb ǂgomǂgomsasiba ama Elob ǃoa ai ūhâ ǀgarasa. Jesub ge ge mî: ‘Jehovab sa Eloba ǀgoreǀî, î ǁîb ǀguiba ǃoaba.’ (Luk. 4:8) Toro ǃkham-aogu di dana gu tsî toro ǃkham-aogu tsîn ge ge ǂhâba hâ i. Îb Jovidona Jehovab di ǃoaba-ao ǀû. ǁNā-amagab ge mâ tsēs tsî ǃuis hoasa ǀgaisase gere ǀgore. Tsî Jehovaba gere ǂgan îb huihe, îb tā ǁîb ǂgomsa ǁnāxu. Tsî ǁkhōǁkhōsa mâsib ǃnâ mâi. Matikōseb ge ǂhanuoǃnâse gere sîsenūhe. Xaweb ge Jovidona tātsē ge māǁnâsen tama hâ i. ǁNās xa ǃaromahe hâseb ge nēsi kai ǃgâiaǂgaoba a ūhâ ǁkhā. ǀGui xū-i hînab ge, ǃkhōhe, ǂnauhe. Tsî tronkes ǃnâb nî ǂgāhes aiǃâb ge ūhâ tama hâ i-i ge—ǃâitsâhe hâ ǂgomsa.—Khomai re 1 Petrub 1:6, 7 sa.

18. Mati da sida ǃgâiaǂgaoba a ūhâ ǀgara ǁkhā?

¹⁸ Jehovab ge a ǂan tae-e da ǂhâhâsa, ama ǃgâiaǂgaob ǃaroma. ǃNona xūn hîna ama ǃgâiaǂgaoba ra hauba dana du ga sao. O du ge sadu ǃgâiaǂgaoba a ūhâ ǀgara ǁkhā, ǃgomsina du ga ūhâ xawe. Tsî du ge sadu tsîna a mî ǁkhā: ‘ǀKhaehes ge hâ ǁnā ǁaes, ǁîs di Elob a Jehovasa.’—Psa. 144:15.