1-2. (a) Jehovaba mati ǃhobasen ǂgao tama ǁore-aon xa ra tsâ? (b) Jehovaba ǁore-aon tae-e nî dīsa ra ǂhâba?

 JEHOVAB ge hoa tanisen ǀgauga ūǃoa tama hâ, ǁîb ge ǁōreba ǃhui hâ. (Psa. 5:​4-6) Jehovab ge ra ǂgaoǀkhā da î da ǁîb mîmādi Elobmîs ǃnâ hâde ǁnâuǀnam. Jehovab ge ǃâubasen tama hâ î da ǀoasa kurusa ūhâ. (Psa. 130:​3, 4) ǁNās ǀkhab ge Eloxoresa khoen ‘Elob ǀkhomma ǁgauoǃnâ ûib ǃnâ ra dabana’ ūǃoa tama. (Jud. 4) Elobmîs ge ra mî, “eloxoresa khoen” Elob torob Armagedons dib tawa nî dīkākāhesa.—2Pet. 3:7; J.ǂHa. 16:16.

² Jehovab ge ǂhâba tama ǀgui khoe-i tsîn nî dīkākāhesa. Nē ǂkhanib ǃnâ da go saogura ǁkhāǁkhāǃâdi ǃnâ a ǁkhāǁkhāsen khamis ge Elobmîsa ǃgāsase ra ǁgau, ǁîb ra ǂhâbasa în ‘hoana ǃhobasen.’ (2Pet. 3:9) Jehovab khami gu ge ǀhaohâb ǃûi-aoga a ǃnūǃnâxa ǁore-ao-e gu ga hui o, î-i ǃhobasen tsî ǁkhapa Jehovaba ǃoa ǀgū. Xawe hâs ge ǀnî ǁore-aon ge ǃhobasen ǂgao tama. (Jes. 6:9) ǀHaohâb ǃûi-aogu ga aiǃgû tsî ǁî-e hui î-i ǃhobasen xawen ge ǀnîna noxopa aiǃgû tsî ǁoreba ra dī. ǀHaohâb ǃûi-aoga nē mâsib ǃnâ tae-e nî dī?

 “ǂKHABAXA [ELOXORESA] KHOE-E ŪǂÛI”

3. (a) Elobmîsa tae-e ra mî ǃhobasen ǂgao tama ǁore-ao-i xa? (b) ǁOre-ao-i ga ǃhobasen ǂgao tama i, o da tae-i ǃaroma a mî ǁkhā ǁî-i go ǁhûisa ǀhaohâba xu ūǂûihesa?

³ ǁOre-ao i ga ǃhobasen tama ī, o gu ge ǀhaohâb ǃûi-aoga 1 Korinteǁîn 5:13 ǃnâ hâ daoǁgausa nî sao: “Sadu ǁaeguba xu ǁnāti ī ǂkhabaxa [eloxoresa] khoe-e ūǂûi.” ǀNî mîdi ǃnâ i ge ǁore-ao-e ǃhobasen tama i ga ī, o aitsama ra mîǁgui ǀhaohâba xu ūǂûihesa. Nēs ge ra ǁgau ǁî-i go aitsama nē mîǁguiba a dīsa. ǁÎ-i age tsoro i go-e ra ǃgao. (Gal. 6:7) Tae-i ǃaroma da ti a mî ǁkhā? ǁÎ-i ǀhaohâb ǃûi-aogu di huiba ūǃoa ǂgao tama hâ amaga. (2Gao. 17:​12-15) ǁÎ-i tanisen ǀgauba xu i ge ra ǁgau Jehovab di ǁgaraga i ǁnâuǀnam ǂgao tama hâsa.—Deu. 30:​19, 20.

4. Tae-i ǃaroma i ǀhaohâb ǃnâ ra ǂanǂanhe khoe-i go ūǂûihesa?

⁴ ǃHobasen tama ǁore-ao-i ga ǀhaohâba xu ūǂûihe, o i ge ǂanǂansa ra dīhe mî rasa ǁî-i Jehovab ǃoaba-ao tamasa. b Nē ǂanǂans ge ǁî-e taotaos ǃaroma dīhe tama hâ. Xawe i ge ǀhaohâba ra hui în Elobmîs daoǁgausa hōhōǃnâhe mî rasa, î du ǁî-i xare-i ǀkha tā “habagu tsî ǁkhāti ǂûs xawesa” dī. (1Kor. 5:​9-11) ǁNā daoǁgaus ge ǃaromas ǃgao māhe hâ. Apostel Paulub ge ge xoa: “ǂKhari khūkhū-i ge ǀâpereb hoaba ra khū kai.” (1Kor. 5:6) Nē ǃhobasen tama ǁore-ao-i ga ǁî-i ǁoreb ǃgao ǀhaohâba xu ūǂûihe tama ī, on ge nau ǃgâsana a ǂâi ǁkhā ǂhâbasa tama ī hâsa Jehovab ǂhanu-ai ǁgaraga ǁnâuǀnamsa.—ǂKhm. 13:20; 1Kor. 15:33.

5. Khoe-i hîna ǀhaohâba xu ūǂûihe hâ i ǃoagu da mati nî tanisen tsî tae-i ǃaroma?

⁵ ǀHaohâba xu ūǂûihe hâ ǃgâsa-i ǃoagu da mati nî tanisen? ǁÎn ǀkha da ǀguiba hâ ǀhao tama hâ xawe da ge tā ǁîna xū-en ǃoaǂui tama hâ khami nî mû. ǁÎna da ge gā hâ gūn ase nî mû. Gū-i hîna ra gā i ge ǁkhapa ǃharasa ǃoa a oaǀkhī ǁkhā. ǂÂis ǃnâ da ge nî ūhâ kā hâ gū-i tsîn ge Jehovab ai ge māǁnâsen hâ i. ǁÎ-i ge Jehovab ǃoa-ai ǂgomǂgomsase hâs di mîmâis ǃoagu ge ûi ǀgara tama hâ i, tsîs ge ǁnāsa kaise a ǁkhōǁkhōsa. (Ese. 18:31) Nē tsūdī-ao-i ǃaroma i ge noxopa ǁaeba hâ tsîb ge Jehovaba ǁî-e ǀkhoma a ǁgau ǁkhā. ǃÂubasen da ge ra î-i ǁî-e oaǀkhī. ǀHaohâb ǃûi-aoga mati ǀhaohâba xu ūǂûihe hâ ǁore-ao-e a hui ǁkhā î-i ǃâubasensa ūhâ ǀgara ǀhaohâba ǃoa oaǀkhīsa?

ǀHAOHÂB ǃÛI-AOGU, ǀHAOHÂBA XU ŪǂÛIHE HÂ-E RA HUI ǀGAUB

6. ǀHaohâb ǃûi-aoga taena nî dī î gu ǀhaohâba xu ūǂûihe hâ khoe-e hui?

⁶ Khoe-i ga ǀhaohâba xu ūǂûihe, o gu ǀhaohâb ǃûi-aoga ǁî-e ra hui ǀû î-i Jehovaba ǃoa oaǀkhī? Tātsēs tsîna. ǀHaohâb ǃûi-aogu ga ǁore-ao-e mîba o ǁî-i ǀhaohâba xu nî ūǂûihesa, o gu ge ǁî-i tsîna ra mîba tae-e ī nî dīsa î-i ǁkhapa ǀhaohâba ǃoa oaǀkhī. ǀHaohâb ǃûi-aogu ge ǁnās xa ǃnāsa-e ra dī. ǃNāsa mâsigu ǃnâ gu ge ǀhaohâb ǃûi-aoga ǁî-e ra mîba ǁkhapa gu ǁî-i ǀkha ǁaerob khaoǃgâ nî ǀhaosa î gu mû ǁkhā ǁî-i go ǃhobasensa. ǁOre-ao-i ga māsenxase ǁaerob khaoǃgâ ǀhaohâb ǃûi-aogu ǀkha ǀhao, o gu ge ǁî-e ra ǂkhâǃnâ î-i ǃhobasen tsî oaǀkhī. ǁNā ǁaeb ai i ga ǁî-e noxopa ǃhobasen tama ī, o gu ge  ǀhaohâb ǃûi-aoga ǁî-i ǀkha ǁkhapa ǀhaosa nî mîǁgui, î gu ǁî-e ǂkhâǃnâ ǃhobasen tsî oaǀkhīsa.

7. ǁOre-ao-i ga ǀhaohâba xu ūǂûihe, o gu ǀhaohâb ǃûi-aoga mati Jehovab ǀkhomxasiba ǁgae ǁkhā? (Jeremiab 3:12)

⁷ ǀHaohâb ǃûi-aogu ge Jehovaba ǁgae tsî ǁnā-i ǀhaohâba xu ūǂûihe hâ-i ǃoagu ǀkhomxasiba ra ǁgau. Aiǁgause Jehovab ge ge ǃâu tama hâ is Israelǁaesa ǃhobasen ǁînab nî huis aiǃâ. ǁÎb ge kēbo-aona ǁîna ǃoa gere sî ǃhobasenan nîs aiǃâ. Nē ǂkhanib di 2ǁî ǁkhāǁkhāǃâs ge ra ǁguiǃā, matib ge Jehovaba kēbo-aob Hoseaba mîbasa îb ǁîb kaikhoesa ǀûba tsî ǁîsa ū-oa tsū ǁorebas ge dī xawe. Nēs ǃnâ-ūb ge Jehovaba ǁîb khoena ra ǁkhāǁkhā ǁîb a ǀkhomxaǃnâsa. (Hos. 3:1; Mal. 3:7) ǁNās ǁkhās khami gu ge ǀhaohâb ǃûi-aoga Jehovaba ǁgaes ǃnâ-ū ra ǂhâba, î-i ǁore-ao-e ǀhaohâba ǃoa oaǀkhī tsî gu ge ǁî-e ra supusupuba ǁnāsa dīsa.—Khomai re Jeremiab 3:12 sa.

8. Tae-e da kā hâ ǀgôab ǂkhōs Jesub ge mîsa xu Jehovab ǀkhomxasib xa ra ǁkhāǁkhāsen? (Lukab 15:7)

⁸ Jesub ge kā hâ ǀgôab xa a ǃhoa ǂkhōs xa ǂâi-ao re. ǁNāpab ge ra ǁgau tae-eb ge ǁgûba a dīsa ǀgôab ge oaǀkhī o. ǁGûb ge ǀgôabab ge mû, o “ǃkhoeǃoa bi, ǁnam bi tsî ge ǁoa bi.” (Luk. 15:20) ǁGûb ge ge ǃâu tama hâ îb ǀgôaba ǀûbaba ǂgan. Xaweb ge ǁgûba ǀgôaba ǃoa ge ǃkhoe, ǁîbab a ǀnam amaga. Jehovab tsîn ge ǁnāti ra tsâ ǁnān ǁîba ra ǃoaba ǀûn xa. ǀHaohâb ǃûi-aogu ge ǁkhā xū-e ra dī Jehovaba ǁgaes ǃnâ-ū. ǁÎgu ge ra ǂhâba în kā hâ gūna ‘oaǀkhī.’ (Luk. 15:​22-24, 32) ǁOre-ao-i ga oaǀkhī ob ge Jehovab, Jesub, ǀhomǃgān tsî hoa ǀhaohâb tsîna ra ǃgâiaǂgao.—Khomai re Lukab 15:7 sa.

9. Jehovaba ǁore-aon tae-e nî dīsa ra ǂhâba?

⁹ ǁKhāǁkhāsen da ge go Jehovab, ǃhobasen tama hân ǀhaohâb ǃnâ nî hâsa ǂgao tamasa. Xaweb ge ǃhobasen tama hâna ra hui ǂgao, ǁîb ge ra ǂhâba în oaǀkhī. ǃGaoǃgâ re matib Jehovaba ǃhobasen ra ǁore-aon xa ra tsâsa. Hoseab 14:4 ge ra mî: “ǁÎn di ǂhanuoǃnâsiga ta ge nî ǂuruǂuru, ti ǂgaob hoab ǀkha ta ge ǁîna māsenxase nî ǀnam; ti ǁaixasib ge ǁîna xu bē amaga.” Jehovab mati nēs xa ra tsâsa gu ǀhaohâb ǃûi-aoga a ǂan, amaga gu ge khoe-i ǃhobasens ǁgauǁgaude ra ǃgaoǃgâ. Nē mîdi ge ǁnān hîna ge Jehovaba a ǃoaba ǀûna ǂgomǃgâsiba a mā ǁkhā ǁîb xan a ǀnamhesa. Tsîb amase ǂhâba hâsa în oaǀkhī.

10-11. ǀHaohâb ǃûi-aoga mati ǂgui kuriga ǀhaohâba xu ūǂûihe hâna hui ǁkhā?

¹⁰ ǀHaohâb ǃûi-aoga mati ǂgui kuriga ǃkharu hâse ǀhaohâba xu ūǂûihena a hui ǁkhā? ǁÎn ge ǀhaohâba xun ge ūǂûibahe ǁorena ǀnîsi ǀnai ge dī ǀû. ǀNî mâsigu ǃnân ge ǁîna ǂâi-oa tama tae-i ǃaroman ge ǀhaohâba xu a ūǂûihesa. Matikō gaxuse i ga khoe-e ǀhaohâba xu ūǂûihe xawe gu ge ǀhaohâb ǃûi-aoga ǁnā khoe-e ôaǂui tsî ra sari. Nē khoena gu ga sari o gu ge ǀhaohâb ǃûi-aoga ǁîn ǀkha ǀgore tsî ǁîna ra ǂkhâǃnâ, în ǀhaohâba ǃoa oaǀkhī. Khoe-i ga ǂgui kuriga ǀhaohâba xu hâ bē o i ge gagasise a ǂkhabusa. Xawe i ga ǁî-e mî o, ǀhaohâba ǃoa i ra oaǀkhī ǂgaosa, o gu ge ǀhaohâb ǃûi-aoga ǁî-e Elobmîs ǁkhāǁkhāsa nî mā ǃgâsa-e nî ǁgaumâi. Nēs ge ǁî-i nî ǁgaumâi-oahes aiǃâ a dīhe ǁkhā. Hoa mâsigu ǃnâ gu ge ǀhaohâb ǃûi-aoga ǁîna Elobmîs ǁkhāǁkhāsa nî mā ǃgâsa-e nî ǁgaumâi.

¹¹ ǀHaohâb ǃûi-aogu ge dītsâ tsî Jehovab  khoena ūba hâ ǀnamma nî ǁgae. ǁNā-amaga gu ge ǃûi-aoga ǁnān hîna ge Jehovaba a ǃoaba ǀûna ôa tsî nî ǂkhâǃnâ în Jehovaba ǃoa oaǀkhī. ǁOre-ao-i ga ǁî-i tanisens tsî ǂâiǀgaub ǃnâ a ǁgau ǁî-i go ǃhobasensa, o i ge ǁî-e ǁkhapa ǀhaohâb ǃnâ ǁgaumâi-oahe ǁkhā.—2Kor. 2:​6-8.

12. (a) Mâ mâsigu ǃnâ gu ǀhaohâb ǃûi-aoga kaise ǂōrisase nî ǃgaoǃgâ? (b) Tae-i ǃaroma da tā nî ǂâi Jehovab ǀnî ǁore-aona ǀûba tidesa? (ǀGamirosa mû re.)

¹² ǀNî mâsigu ǃnâ gu ge ǀhaohâb ǃûi-aoga ǂōrisase nî kō khoe-e gu nî ǁgaumâi-oas aiǃâ. Aiǁgause khoe-i ga ǀgôa-e ǀgaiǃkhō tsî a ǁore tamas ka io i ga ǁî-e  ǁnāǁgôa o. Tamas ka io ǁî-i ǃgammeba ǂhanuoǃnâ ǀgaub ǃnâ khôa, o gu ge ǀhaohâb ǃûi-aoga ǃgâise nî kō ǁî-i ama ǃhobasen hâsa. (Mal. 2:14; 2Tim. 3:6) ǁÎgu ge ǃgâsana nî ǁkhauba. Xawe da ge nî mûǂan Jehovab ǃhobasen hâ ǁore-aona nî ūǃoasa. ǀHaohâb ǃûi-aogu ge ra ǂan ǂgao ǁî-i hîna ge nau-e a tsûtsû i ǃhobasen hâsa. Xawe gu ge tā nî ǂâi ǁnāti ī tsūdī-ao-i Jehovab xa ǀûbahe tidesa. c—1Pet. 2:10.

ǀHAOHÂB A DĪ ǁKHĀ I

13. Mâ ǃkharagagusiba hâ ǀhaohâba xu ǁgau-oahe hâ khoe-i tsî ūǂûihe hâ khoe-e da ra hâ-ū ǀgaub ǁaegu?

¹³ ǃKharugo ǁkhāǁkhāǃâs ǃnâ da go ǁkhāǁkhāsen khami da ge khoe-i ga ǁgau-oahe o, ǀnî ǁaega ǂanǂansa ra dīhe. Nēti ī khoe-i ǀkha da ge a hâ ǀhao ǁkhā. ǁÎ-i go ǁgai ǂâiǀgaub tsî tanisen ǀgaub tsîna ǁnāxū amaga. (1Tim. 5:20) ǁÎ-i ge noxopa ǀhaohâb di ǃâ. ǁÎ-i tsîn ge ǃgâsan ǀkha hâ ǀhaosa xu ra hā ǂkhâǃnâsa ǂhâ hâ. (Heb. 10:​24, 25) Xawe nē mâsib ge ǁnā-i ǀhaohâba xu ūǂûihe hâ i ǀkha a ǀgara. ǁÎ-i ǀkha da ge ‘habagu tsî ǁkhāti ǂû’ ǀhaos tsîna dī tide.—1Kor. 5:11.

14. Xristeǁî-e mati ǃgâiǂâisa nî sîsenū ǀhaohâba xu ūǂûihe hâ khoe-i ǃoagu? (Ai-īsiba mû re.)

¹⁴ 1 Korinteǁîn 5:11 sa ra ǂâibasen khoe-i ǀhaohâba xu ūǂûihe hâ-e da ǀhaode ǃoa ǁkhau tide tamas ka io da ǁî-e tawede tidesa? Hî-î. Ama as ge ǁî-i ǀkha da hâ ǀhao tidesa. Xristeǁî-i ge ǃgâiǂâisa nî sîsenū, ǁî-i ga ǀhaohâba xū ūǂûihe hâ omaris ǁani-i tamas ka io ǀgū ǀhōsa-e ǁkhau o. ǁNā khoe-i ga ǀhaode hâ ǃnâ, o da ǁî-i ǃoagu mati nî tanisen? ǂGuro da ge ǁîna go tawede tama hâ i. Xawe mâ Xristeǁî-i hoa-i ge ǁî-i di ǃgâiǂâisa nî sîsenū nē mâsib ǃnâ. ǀNîn ge ǀnîsi a tsâ ǁkhā khoe-e tawede tamas ka io ǀhaos tawa ǁî-e ǁkhoreǁharesa. Xawe da ge ǁîn ǀkha ǂanapega gaxu ǁgamǀhaode tā nî ūhâ tsî ǁîna tā nî sari.

15. 2 Johaneb 9-11 sa mâǃnôa ǁore-aon xa ra ǃhoa? (Boksis “ Johaneb tsî Paulub tsîkha ǁkhā ǁoreba gere ǃhoaǃgao?” ti hâsa mû re.)

¹⁵ Elobmîs ge ra mî, î da tā ǀnî ǁore-aona  tawede. ǁNāti ī khoe-e da ga tawede, o da ge ǁî-i di eloxoresa dīgu ǃnâ ra ǃâ. (Khomai re 2 Johaneb 9-11 sa.) Nē xoas ge ǁnāǁgôa-ao-i tsî ǁnān hîna nauna ǁgai xūna dīs ǃnâ ra ǂgaeǂhapuna ǃoa ra ǁnaeǁgau. (J.ǂHa. 2:20) ǁNā-amaga i ga khoe-e ǁnāǁgôa-ao-i ǁkhāǁkhāde ǂkhâǃnâ tsî ǀnî ǁgai ǁorena dī, o gu ge ǀhaohâb ǃûi-aoga ǁî-e sari tide. Ama as ge ǁnā khoe-i a ǃhobasen ǁkhāsa. ǁNās nî īs kōse da ge nēti ī khoe-e tawede tsî ǀhaode ǃoa ǁkhau tide.

JEHOVAB ǀKHOMXAǂGAOSIBA ǁGAE

16-17. (a) Jehovaba ǁore-aon tae-e nî dīsa ra ǂhâba? (Esegieli 18:32) (b) ǁOre-ao-e gu ga hui o gu ǀhaohâb ǃûi-aoga mati Jehovab ǀkha ǀguiba a sîsenǀhao ǁkhā?

¹⁶ Tae-e da go nē ǂkhanib māǂuis ǃnâ ǁkhāǁkhāsen? Jehovab ge ǂhâba tama hâ î-i khoe-e dīkakahe. (Khomai re Esegieli 18:32 sa.) ǁÎb ge ra ǂhâba în ǁîna ǁîb ǀkha ǂkhîbagu. (2Kor. 5:20) ǁNā-amagab ge Jehovaba ǃkharu ge ǁaeb ǃnâ ǁîb khoena gere ǀkhoma în ǃhobasen tsî ǁîba ǃoa oasī. ǀHaohâb ǃûi-aogu ge ǀguiba Jehovab ǀkha ra sîsenǀhao î gu ǁore-aona hui în ǃhobasen.—Rom. 2:4; 1Kor. 3:9.

¹⁷ ǁOre-aon ga ǃhobasen, o i ge ǀhommi ǃnâ kai ǃgâiaǂgaoba ra hâ. Sida ǀhomsi ǁGûb Jehovab ge kaise ra ǃgâiaǂgao, ǃnās hoasa i ga ǀgui kā hâ gū-e ǀhaohâba ǃoa a oaǀkhī o. Jehovaba da ūba hâ ǀnammi ge ra kai, ǁîb ǀkhomxaǂgaosib tsî anu tama da hâ ǃgâisib tsîn xa da ga ǂâiǃgâ o.—Luk. 1:78.