10ǁÎ ǁKHĀǁKHĀǃÂS
Tae-i ǃaroma du nî ǁāǁnâ kaisen?
‘Î du ǁāǁnâhe.’—ǃNǃKH. 2:38.
34ǁÎ ǁNAETSANAS ǂHauǃnâse ǃgû re
ǃKHŌǀHAOS a
1-2. ǁĀǁnâs ǁaxasib tawa i tae-e ra ī? Tsî tae-e du ǂâis ǃnâ nî ūhâ?
ǁĀǁNÂHE ra khoena mû tsâ î du hâ? ǁÎn ǁāǁnâhen nîs aiǃâ, ǃgari dommi ǀkha 2 dîra ra ǃereamsa du ge ra mû. Mû du ge ra ǁîn omaris khoen tsî ǀhōsan tsîn kaise ra ǃgâiaǂgaosa. ǁÎn ǁgam-e xu ra ǂoaxa, khami du ge ra ǁnâu khoen ra ǁapu ǃomsa. Tsî du ge ǁîn aidi ai, kai ǂkhîba ra mû. ǁAubexa i ge duisend khoena, ǁnā mîǁguiba ra dī în māǁnâsen hâ Jehovab di ǃoaba-ao kai.
2 O sadu? ǁĀǁnâhes xa du ga ǂâi, o du ge kaise a ǀō-aisa nē eloxoresa ǃhūbaib ǃnâ. Jehovaba du ra ‘ǃoaba ǂgao’ amaga. (Psa. 14:1, 2) Nē ǁkhāǁkhāǃâs ge ǂkhamkhoen tsî kairan ǃgao xoahe hâ. Xawe sida hîna ǀnai ǁāǁnâhe hâ da tsîn ge sida mîǁguiba, ra ǀgaiǀgai ǂgao Jehovaba ǀamose ǃoabas diba. Hā re î da 3 xūna ǃhoaǃgao, tae-i ǃaroma da Jehovaba ra ǃoaba ǂgaosa.
AMAB TSÎ ǂHANU-AISIB TSÎNA ǀNAMS
ǁGâuab ge ǂgui kurina Jehovab ǀonsa ǁgaiǁgai hâ. Tsî ǁnāsa nētsēs tsîna ra dī (3-4ǁÎ xoaǀgora ra mû re)
3. Jehovab di ǃoaba-aona tae-i ǃaroma amab tsî ǂhanu-aisib tsîna a ǀnam? (Psalmdi 119:128, 163)
3 Jehovab ge ǁîb khoena ge mîba în ‘amaba ǀnam.’ (Sax. 8:19) Jesub ge ǁîb di saosabena ge mîba, în ǂhanu-aisiba ôa. (Mat. 5:6) Nēs ge ra ǂâibasen: Khoe-i nî ǀgaisa turaba ūhâsa ǂhanu, ǃgâi tsî Elob mûǁae ǃanu xūna dīs diba. Amab tsî ǂhanu-aisib tsîna du a ǀnam? ǁNāsa da ge ra ǂgom. Sadu ge ǂhumib tsî hoa ǁgai xūna ǃhui hâ. (Khomai re Psalmdi 119:128, 163 sa.) Khoe-i hîna ra ǂhumi î ge, nē ǃhūbaib ǂgaeǂgui-aob, ǁGâuaba ra ǁgae. (Jhn. 8:44; 12:31) ǁGâuab ra dī ǀgui xū-i ge, Jehova Elob ǃanu ǀonsa ǁgaiǁgaisa. Edenni ǃnâ ge hâ i mâǃoasa xub ge ǁGâuaba ǂhumi xūna sada Elob xa ra ǃhoa. ǁÎb ge khoena gere ǂâi kai ǂgao, Jehovab a ǁîǂâixa tsî ǂhanuoǃnâ ǂgaeǂgui-aosa. Hîna ǃgâiba khoena xu ra ǃkhō-oaba. (Gen. 3:1, 4, 5) ǁGâuab Jehovab xa ra ǂhûmi xūn ge khoena ǁgaise ǁîb xa ra ǂâi kai. Khoen ga ‘amaba ǀnam’ tsî ǁhûi tama ga io, ob ge ǁGâuaba ǁîna a ǂgaeǂhapu ǁkhā. În ǂhanuoǃnâ tsî eloxoresa xūna dī.—Rom. 1:25-31.
4. Jehovaba mati ge ǁgau, ǁîb a ‘amab di Elosa’? (Ai-īsiba mû re.)
4 Jehovab ge a ‘amab di Elo.’ Tsîb ge ǁnān hîna ǁîba a ǀnamna māsenxase amaba ra ǁkhāǁkhā. (Psa. 31:5) ǁNāsa dīs ǃnâ-ūb ge ǁîna hui tsî ǁGâuab di ǂhumiba xu ra ǃnoraǃnora. Jehovab tsîn ge ǁîb di ǁkhāǁkhā-aona ra ǁkhāǁkhā, în ǂhauǃnâ tsî ǂhanu-ai. Nēs ge ra hui nî, în tā ǃgôaǁnâsen xawe ǂkhîba ūhâ. (ǂKhm. 13:5, 6) ǁNāsab ge sado dība, Elobmîsa du gere ǁkhāǁkhāsen hîna? ǁKhāǁkhāsen du ge ge Jehovab ǀgaugu, hoa khoen tsî sadu ǃaromas tsîna a ǃgâisa. (Psa. 77:13) ǁNā-amaga du ge Jehovab ǂhanu-a di ra mî xūna ra dī. (Mat. 6:33) Tsî du ge amaba ra ǂanǂan ǂgao Elob xa, î du ǁgau ǁGâuab ge sada Elob Jehovab xa a mî xūn a ǂhûmisa. ǁNāsa du mati a dī ǁkhā?
5. Mati du amab tsî ǂhanu-aisib tsîna a ǂkhâǃnâ ǁkhā?
5 Sadu ra ûi ǀgaub ǃnâ-ū du ge a ǁgau ǁkhā: ‘ǁGâuab di ǂhûmiba du ūǃoa tama tsî du amaba ra ǂkhâǃnâ ǃkhaisa. Jehovab a sadu ǂgaeǂgui-aosa du ge a ǁgau ǁkhā. Tsî ǁîb ǂhanu-a di ra mî xūna du ra dī ǂgaosa.’ ǁNāsa du mati a dī ǁkhā? Jehovaba du ge ǀgores ǃnâ-ū a mîmâiba ǁkhā, ǁîba du ǀamose nî ǃoabasa. Tsî ǁnāpaxu nî ǁāǁnâ kaisen. Tae-i a ama tsî ǂhanusa ǀnams ge nî hui du mîǁgui tsî ǁāǁnâhesa.
SADU GE JESU XRISTUBA A ǀNAM
6. Psalmdi 45:4 sa mâ ǃaromadi Jesuba ǀnams dite ra mā du?
6 Tae-i ǃaroma du Jesu Xristuba a ǀnam? Psalmdi 45:4 sa khomai re. Tsî kō re ǀnî ǃgâi ǃaromadi hîna ra hōhe te. Jesub ge amab, ǃgamǃgamsenxasib tsî ǂhanu-aisib tsîna a ǀnam. Amab tsî ǂhanu-aisib tsîna du ga ǀnam o, î ge a ǁnâuǃāxa Jesu Xristub tsîna du a ǀnamsa. Jesub ge mati ǁkhoaǂgaoxase amab tsî ǂhanu-aisib tsîna gere ǁkhauba ǀgaub xa ǂai re. (Jhn. 18:37) Jesuba mati ǃgamǃgamsenxasiba ra ǂkhâǃnâ?
7. Tae-e ra mâǂoaba du Jesub di ǃgamǃgamsenxasib xa?
7 Jesub ge ǃgamǃgamsenxasiba ǁîb aiǁgaus ǃnâ-ū gere ǁgau. Aiǁgauseb ge hoa ǂkhaisiba ǁîb Îba gere mā, ǁîba ǃoas ose. (Mrk. 10:17, 18; Jhn. 5:19) Jesub di ǃgamǃgamsenxasiba mati ra tsâ kai du? ǁî-i ge ra ǂkhaǃnâ du, Elob ǀGôaba ǀnam tsî ǁîba saosa. Nēs ge amabes ǃnâ ǁnāsa ra īǁkhā kai. Jesuba tae-i ǃaroma a ǃgamǃgamsenxa? ǁÎb ǃgamǃgamsenxa ǁGûbab ǀnam tsî ra ǁgae amaga. (Psa. 18:35; Heb. 1:3) Jesub hîna ǀoasase Jehovab di ǀgauga ra ǁgaeba ǃoa du ǂgaehe tama hâ?
8. Tae-i ǃaroma da Jesuba sida Gao-aob ase a ǀnam?
8 Sada di Gao-aob Jesuba da ge a ǀnam, ǃgâi ǂgaeǂgui-aob a amaga. Jehovab ge ǁîb ǀGôaba ge ǁkhāǁkhā tsî ge ǁgaumâi îb ǂgaeǂgui. (Jes. 50:4, 5) ǁÎb ge māsenxase a ǁgau ǀnammi xa ǂâi re. (Jhn. 13:1) Jesub a sadu Gao-ao amagab ge ǀoasase sadu ǀnamma nî hō. ǁÎb ge ra ǁguiǃā ǁnān hîna ǁîba a ǀnaman. Tsîb ǁîb ǀhōsan ase ra ǂgain ge ǁîb di mîmāde ǁnâuǀnams ǃnâ-ū ǁîn ǀnamma ra ǁgau. (Jhn. 14:15; 15:14, 15) Kai aiǂhanub ge Jehovab ǀGôab ǀkha ǀhōsagusisa ūhâsa.
9. Xristeǁîn tsî Xristub di ǁāǁnâs tsîna mâǀgaub ǃnâ a ǀgui?
9 Jesub ge mā mîmādi di ǀguis ge, în ǁîb di saosabena ǁāǁnâhe. (Mat. 28:19, 20) ǁÎb ge ǁnā aiǁgausa ge ǁgauda. ǂGui ǀgaugu ǃnâs ge ǁîb di ǁāǁnâsa, ǁîb saosaben di ǁāǁnâsa xu a ǀkhara. (Boksisa mû re, “ Mâ ǀgaugu ǃnâs Jesub ǁāǁnâs tsî ǁîb saosaben ǁāǁnâs tsîna ra ǀkhara?”) Xawe î ge ǀnî ǀgaugu ǃnâ ge ǀgui ī. Jesub ge ge ǁāǁnâhe îb ǁîb ǁGûb ǂâisa dī. (Heb. 10:7) ǁĀǁnâs ǃnâ-ūn ge Xristub di saosabena ra ǁgau, Jehova Elob ain go māǁnâsensa. Nēsi î ge Jehovab ǂâisa dīsa a ǂhâǂhâsa ǁîn ûib ǃnâ, ǁîn ǂâisa dīs ose. ǁÎn ǀhonkhoeb di aiǁgausan ge ra sao.
10. Jesuba du ūba hâ ǀnamma tae-i ǃaroma nî ǂkhâǃnâ du ǁāǁnâhes ǃgao?
10 Sadu ge ra ǂgom, Jesub a Jehovab di ǀguise ǃnae-e hâ ǀGôa di. Tsî Elob ge ǁîba Gao-aose sada ǂāmai a ǁgaumâis ge kaise ra ǃgâiaǂgao kai da. Sadu a ǂanseb ge Jesuba a ǃgamǃgamsenxa tsî ǂōrisase ǁîb ǁGûba ra ǁgae. Tsî du ge go ǁkhāǁkhāsen, ǁîb ge ǂgui khoen hîna ge ǃâ hâ īna a ǂûmâsa. Tsûaǂgao hâna ǁkhaeǂgao tsî ǀaesen hân tsîna a ǂgauǂgau ǀgauba. (Mat. 14:14-21) Tsî du ge go mû, matib ǁîb ǀhaohâba ra daoǁgau ǀgauba nētsē. (Mat. 23:10) Elob Gaosib di Gao-aob aseb ge ǁîba, ǂgui buruxa xūna hānîǁaeb ǃnâ nî dī. Mati du a ǁgau ǁkhā ǁîba du a ǀnamsa? Nēsa du ge ǁîb aiǁgausa saos ǃnâ-ū a dī ǁkhā. (Jhn. 14:21) Tsî ǀgui ǀgaub hîna du ǁîb aiǁgausa a ǁgae ǁkhāb ge, Jehovab ǃoa-ai māǁnâsen tsî ǁāǁnâ kaisensa.
SADU GE JEHOVA ELOBA A ǀNAM
11. Mâ ǂhâǂhâsa xū-i ǃaroma du ra ǁāǁnâ kaisen tsî tae-i ǃaroma?
11 Mâ ǂhâǂhâsa xū-i ǃaroma du ra ǁāǁnâhe? Jesub ge Elob di kai tsî ǂhâǂhâsa mîmāsa ge ǂhaiǂhai. ǁÎb ge ge mî: “Ots ge ǃKhūb, sa Eloba nî ǀnam sa ǂgaob hoab ǀkha, sa ǀoms hoas ǀkha, sa ǂâis hoas ǀkha tsî sa ǁkhāsib hoab ǀkha.” (Mrk. 12:30) ǁNā mîde sadu Eloba a ǀnam ǀgauba ra ǁguiǃā?
Nēsi du ūhâ ǃgâi xūn ge Jehovaba xu ra hā. Tsî hānîǁaeb ǃnâ du nî ūhân tsîna (12-13ǁÎ xoaǀgora ra mû re)
12. Tae-i ǃaroma du Jehovaba a ǀnam? (Ai-īsiba mû re.)
12 Jehovaba da ge ǂgui xūn ǃaroma a ǀnam. Aiǁgause ǁkhāǁkhāsen du ge go ǁîb a ‘uîb di ǀausa’ tsîb ǁîba “mâ ǃgâi tsî dīǀoaǀoasa mās” di mā-aosa. (Psa. 36:9; Jak. 1:17) Mâ ǃgâi xūn hoan hina da nētse ūhân, hoan ge sida māxa Eloba xu ra hā.
13. Xoremariba tae-i ǃaroma a ǀō-aisa ǀkhae?
13 Xoremarib ge Jehovab ge māda ǀoasa ǀkhaeba. Tae-i ǃaroma da di a mî ǁkhā? Jehovab tsî ǁîb ǀGôab tsîn ǁaegu hâ ǀgū ǀhosagusis xa ǂâi re. Jesub ge ge mî: ‘Ti Îba ta ge tita a ǀnam’ tsî ‘ti Îb ge tita a ǀnam.’ (Jhn. 10:17; 14:31) ǁÎkhā ǀhosagusis ge ǂgui kuriga ǃkharuhase ge ǀgai. (ǂKhm. 8:22, 23, 30) Elob ge hōǃâ tsûb xa ǂâi re mā-am î ge o, ǁîb ǀGôaba ǃgoma tsâ tsî ǁōsa. Jehovab ge khoesiba a ǀnam, sadu tsîna ǃkhōǂgā hâse. Tsîb ge māsenxase ǁîb ǀGôaba ge mā ǁguibas ase, în sadu tsî nau khoen tsîna ǀamose ûiǁkhā. (Jhn. 3:16; Gal. 2:20) Nēs xa a kai ǃaroma î ge a ǀkhai Eloba ǀnamsa.
14. Mâ ǃgâi mîǁguiba du a ǁhûi ǁkhā?
14 Jehovab xa du ge ǁkhāǁkhāsen khami î ge, ǁîba du ūba hâ ǀnamma ge kai. Amase du ge nēsis tsî hānîǁaeb ǃnâs tsîna ǁîb ǃoa ra ǀgū ǂgao. Nēs ge a īǁkhā. ǁÎb ge sado ra ǂkhâǃnâ, î du ǁîb ǂgaoba ǂkhîǂkhî. (ǂKhm. 23:15, 16) ǁNāsa du ge a dī ǁkhā, mîdi ǀkhas ǀguis ose xawe dīgu ǃnâs tsîna. Sadu ûiba du ra ûi ǀgaub ge nî ǁgau, Jehovaba du amase a ǀnamsa. (1Jhn. 5:3) ǁNāb ge ǃgâi mîǁguib hîna du sadu ûib ǃnâ a ǁhûi ǁkhāba.
15. Mati du sadu ǀnamma Jehovaba ǁgau ǁkhā?
15 Mati du sadu ǀnamma Jehovaba a ǁgau ǁkhā? ǂGurose du ge ǀō-aisa māǁnâsens ǀgoresa Jehovaba ǃoa nî dī. (Psa. 40:8) Tsî du ge ǁnāpaxu ǁnā ǀgoresa ra ǂanǂan, ǁāǁnâhes ǃnâ-ū. Nē ǁkhāǁkhāǃâs tsoatsoas ǃnâ da go ǁkhāǁkhāsen khamis ge ǁāǁnâsa. ǃGâiaǂgaob tsî ǂkhîb xa ǀoahâ ǂhâǂhâsa ǃâ sadu ûib ǃnâ. ǀAsa ûiba du ge ra tsoatsoa, sadu ǃaromas ose xawe Jehovab ǃaroma. (Rom. 14:8; 1Pet. 4:1, 2) Nēb ge dī du nî kai mîǁguib ase ra mûsen. Xawe î ge nēsi ra hui du ǃgâi ûiba ūhâsa. Mâ ǀgaub ǃnâ?
16. Psalmdi 41:12 ǃoagub Jehovaba, mati ǁnān hîna ǁîba ra ǃoabana nî mādawa-am?
16 Jehovab ge kaise a māxa. ǁÎb ge ǁîba du ra mā xū-i xa ǃnāsa-e nî mā-oa du. (Mrk. 10:29, 30) ǁÎb ge ǂûǂûxa tsî ǂâibasensa ūhâ ûiba nî mā du. Nē eloxoresa ǃhūbaib ǃnâs tsîna. Tsî ǁnās ge tsoatsoas ǀguisa ī. Sadu ûib ge ǁāǁnâs tawa ra tsoatsoa tsî ǁnāpa ǀam tama hâ. Aiǃgû tsî du ge sadu ǁGûba ǀamosib kōse a ǃoaba ǁkhā. Sadu tsî sadu ǁGûb ǁaegu hâ ǀnammi ge ǀgai ǀgaras ǀguisa nî dī. Tsî du ge ǁîb khami ǀamosib kōse nî ûi ǀgara.—Khomai re Psalmdi 41:12 sa.
17. Jehovaba du tae-e a mā ǁkhā ūhâ tamab hâ-e?
17 Mâǁnâsen tsî du ga ǁāǁnâhe, o du ge aiǂhanuba ūhâ ǀō-aisa xū-e sadu ǁGûba māsa. ǁÎb ge ǃgâi xūn hîna du ūhâna sado ge mā. ǁNās ǀkha du ge ǀhommi tsî ǃhūbaib di ǀhonkhoeba xū-e a mā ǁkhā, hînab ūhâ tama hâ-e. ǁNās ge sadu ǂgomǂgomsa ǃoabasa. (Job. 1:8; 41:11; ǂKhm. 27:11) Nēb ge ǃgâi ǀgaub hîna du sadu ûiba a ûi ǁkhāba. Amase, Jehovaba du ūba hâ ǀnammi ge a ǃgâi ǃaroma ǁāǁnâhes diba.
ǂHOMISA Î DU A ǁĀǁNÂHES ǃAROMA?
18. Mâ dîde du a dîsen ǁkhā?
18 ǁNās ǀkha du mati nē dîsa nî ǃeream, ǁāǁnâhe î du nî? Sadu ǀguidu ge a ǃeream ǁkhā. Xawe î ge nî hui dîsen du ga o, ‘tae-i ǃaroma ta nî ǁāǁnâhe?’ (ǃNǃkh. 8:36) ǃNona xūn hîna da go ǃhoaǃgaon xa ǂâi re. ǂGuro du ge, amab tsî ǂhanu-aisib tsîna a ǀnam. Dîsen re: ‘Mû ǂgao î ta ra, tsēs hînan hoa khoena amaba ǃhoa tsî ǂhanu xūna nî dīsa?’ ǀGamǁîse, Jesu Xristuba du ge a ǀnam. Dîsen re: ‘Gao-aob ase ta Elob ǀGôaba ǂhâba hâ tsî ta ǁîb aiǁgausa ra sao ǂgao?’ Tsî ǃnonaǁîse, hoan ǂam-ai du ge Jehovaba a ǀnam. Dîsen re: ‘Jehovab ǂgaoba ta ra ǂkhîǂkhî ǂgao ǁîb ǀguiba ti Elob ase ǃoabas ǃnâ-ū?’ Î ti du ga ǁnā dîdi ai ǃeream o, o du tae-i ǃaroma ǁāǁnâhe tama hâ? Tae-i ǃaroma du ra ǃâu?—ǃNǃkh. 16:33.
19. ǁĀǁnâ kaisensa du tae-i ǃaroma tā nî îganǀgē? ǁGuiǃā re. (Johaneb 4:34)
19 ǁĀǁnâhesa du ga îganǀgē, o Jesub ge sîsenū aiǁgaus xa ǂâi re. (Khomai re Johaneb 4:34 sa.) Kō re Jesub ge mati ǁîb ǁGûb ǂâisa dīsa ǂû-i ǀkha a ǀgopeǀnō ǀgausa. Tae-i ǃaroma? ǂÛ-i ge sida ǃaroma a ǃgâi. Jesub ge ge ǂan-i Jehovab ra ǂgan da xūn hoan sida ǃaroma a ǃgâisa. Jehovab ge ǂgao tama hâ, tsûtsûda nî xūna da nî dīsa. Jehovab ǂâisa ǁāǁnâhe du nîsa ǃkhōǂgā hâ? Îo. (ǃNǃkh. 2:38) O du ge a ǂgomǃgâ ǁkhā, nē mîmās sadu ǃaroma a ǃgâisa. ǁKhoaxa ǂû-e ǂûsa du ga îganǀgē tama io, tae-i ǃaroma du ǁāǁnâhesa nî îganǀgēba?
20. Saora ǁkhāǁkhāǃâs ǃnâ da tae-e nî ǃhoaǃgao?
20 Tae-i ǃaroman ǀnîna ra ǃâu? ǂGuin ge ǀnîsi nē ǀgaub ǃnâ nî ǃeream, ‘ǂhomisa tama ta ge hâ.’ Amab hîna hâb ge, Jehovab ai mâǁnâsen tsî ǁǀāǁnâ kaisens ǂhâǂhâsa mîǁguib hîna du nî dība. ǂŌrisase du ge nē mîǁguib xa nî ǂâi, nēs ǁaeb tsî ǁguiǂgāsens tsîna ǂhâhâ amaga. Turaba du ga ūhâ o ǁāǁnâhesa, o du nēsi tae-e a dī ǁkhā aiǂhomisens ǃaroma? ǁNā dîs di ǃereamsa da ge, saora ǁkhāǁkhāǃâs ǃnâ nî ǃhoaǃgao.
28ǁÎ ǁNAETSANAS Jehovab ǀhōsa kai re
a Elobmîs ǁkhāǁkhāsenao-i ǃaroma î ge ǁāǁnâhesa kaise a ǂhâǂhâsa. Tae-e ǁî-e a hui ǁkhā ǁnā mîǁguiba ūs ǀkha? ǀNammi ge ǁî-e nî hui. Xawe tae-i tsî ham-e ǀnamsa? Nē ǁkhāǁkhāǃâs ǃnâ da ge ǃereamde nî hō. Tsî da sida mati nî īsa, ǁāǁnâsa Xristeǁî kai da ga o.
