1-2. Angelitob aiǁgausa xu da tae-e ra ǁkhāǁkhāsen?

JEHOVAB ǀHûǀguitimî-ao ǁgûn xa du kaikai-e hâ? Nēs ga ama o, o du ge ǂâis ǃnâ nî ūhâ sadu ǁgûn a Jehovab di ǀhō ǃkhais ge ǂâibasen tama hâ sadu tsîn a Jehovab di ǀhō di. Sada ǁgûn ga nēsi Eloba ǃoaba tamas ka io ǃoaba tama i xawe da ge ǂâis ǃnâ nî ūhâ mâ i hoa-i ge Jehovab ǀkha ǀhōsagusisa nî omkhâi.

² Angelito di ǀon hâ ǃgâsab hîna di aiǁgausa ǃoa kō re. ǁÎb ge Jehovaba ra ǃoaba omaris ǃnâ ge kaikaihe. Xaweb ge ǂkharirob ge io Elob ǀgūse ge tsâ tama hâ i. ǁÎb ge ra ǂanǃgâ, “Tita ge Jehovaba gere ǃoaba ti omaris khoen nēsa gere dī amaga ǀgui.” Angelitob ge ge mîǁgui Elobmîsa ǃnāsase khomai tsî khomaib ta xūna ǂâiǃgâsa tsîb ge ǃnāsases tsîna Jehovaba ǃoa ge ǀgore tsoatsoa. ǀAmǂoasa ge tae-i? Angelitob ge ra mî, “ti ǀnamǀnamxa ǁGûb Jehovab ǀgūse hâs ǃaroma ta ge ǁîb xa aitsama nî ǁkhāǁkhāsen.” Angelitob aiǁgaus ge ǂhâǂhâsa dîdi xa ra ǂâi kai da: Jehovab ǀkha ǀhōsagus tsî Jehovaba ǂans tsîn ǁaegu i tae ǃkharagagusi-e hâ? Tsî tae-e da a dī ǁkhā Jehovaba ǂans ǃaroma?

3. Jehovaba ǂans tsî ǁîba ǃgâise ǂans tsîn ǁaegu i tae ǃkharagagusi-e hâ?

³ ǂÂi ǁkhā da ge a Jehovaba da a ǂan di ǁîb ǀonsa ǂan tsî da ga ǁîb ge dī tsî mî xūn ǀnîn tsîna a ǂan o. Xawes ge nēsa  ǂâibasen tama hâ Jehovaba da a ǂan di. Jehovaba ǂans ǃaroma da ge ǃnāsa-e nî dī. ǂGurose da ge Jehovab tsî ǁîb di ǃgâi ǀgaugu tsîn xa nî ǁkhāǁkhāsen. O da ge nî ǁnâuǃā tae-i ǃaromab Jehovaba xūna mî tsî ra dīsa. ǂAnǂui da ga o Jehovab tae-e sada xu ra ǃâubasensa o da ge ǁnāsa nî dī.

4. Elobmîs aiǁgaudi xa ǂâiǃgâsa mati nî huida?

⁴ ǀNî khoen ge Jehovab xa da ra ǁkhāǁkhāsen ǂgao ǃkhais ǃaroma xūna nî mî da tsî Jehovab khoen ǀkha da ga ǀhûǀhao tsoatsoa o ,o nî ǃâitsâ da. Xawe da ga Jehovab ai ǂgomaiǂnûi o, ob ge ǁîba xūǃnâ da tide. Nēs ǃnâ-ū da ge ǀhōsagusisa Jehovab ǀkha nî omkhâi hîna nî hâhâsa. Jehovaba da amabes ǃnâ ǃgâise a ǂan ǁkhā? Î nēsa da ge dī ǁkhā. ǀOasa kurusa ūhâ tama hâ aokha Moseb tsî Gao-aob Davib tsîkha di aiǁgaudi ge nēsa ra ǂkhâǃnâ. ǁÎkha ge dī xūna da ra ǃhoaǃgao hîna da ge sao ra ǀgam dîra nî ǃeream: Matikha Jehovab ǀkha ǂangusa ge a kuru? Tsî tae-e da ǁîkha di aiǁgausa xū a ǁkhāǁkhāsen ǁkhā?

5. Moseba tae-e dīsa ge ǁhûi?

⁵ Moseb ge Eloba ǃoabasa ge ǁhûi. 40 Kurixab ge io, ob ge Moseba ge ǁhûi Elob khoen Hebreǁîn ǀkha ǀhûǀhaosa, “Faraob ôas di ôab” ase ǂan-es xa. (Heb. 11:24) Moseb ge ǀgapi ǃharosa ūhâsa ge ǂkhā. Moseb ge Hebreǁîn hîna ge Egipteb ǃnâ ǃgā în ǀkhāba ge ǁhûi ǁîb ge ge ǂan i Faraob hîna ge ǁnā ǁaeb ǃnâ kaise ǀgaisa îb nēs xa kaise nî ǁaixasa. Nēs ge ra ǁgau Moseb ge ǀgaisa ǂgomsa ūhâ i ǃkhaisa. Moseb ge Jehovab ǃnâ ǂgomǃgâsiba ge ūhâ i. Nē ǂgomǃgâsib ge kaise ge ǂhâǂhâsa i nēs ǃaromab ge Moseba Jehovab ǀkha ǁîb ûib hoaba ǀhōsagusisa ge ūhâ i.—ǂKhm. 3:5.

6. Tae-e da Moseb aiǁgausa xu ǁkhāǁkhāsen?

⁶ Tae-e da ra ǁkhāǁkhāsen? Moseb khami da ge hoada mîǁguiba nî dīs ge: Eloba ǃoaba tsî da ǁîb khoen ǀkha nî ǀhûǀhao? Jehovaba ǃoabas ǃaroma da ge ǀnî xūna xu nî ǂgōsens ge tsî ǁnān hîna Jehovaba ǀūn ge nēs ǃnâ nî mâǃoa da. Xawe da ga Jehovab ǃnâ ǂgomǃgâ o, ob ge ǁîba huida tsî nî ǂkhâǃnâ da.

7-8. Moseba tae-e dīs ǀkha ge aiǃgû?

⁷ Moseb ge Jehovab ǀgaugu xa ǁkhāǁkhā- sens tsî ǁîb ǂâisa dīs tsîn ǀkha ge aiǃgû. Jehovab ge Moseba ǂgan o îb Israelǁaesa Egipteb di ǃgāsasisa xu doe-ū ob ge Jehovaba ge mîba nēs ǃaromab ǂhanu tama hâ di. Jehovab ge tsâbaǁhaoxasib ǀkha ge ǃeream bi hui bi ǂgao rase. (Eks. 4:10-16) Nēs xa ǂkhâǃnâ-e hâseb ge Moseba ǀgaisa haisi-amsa Faraoba sī ge mā. Moseb ge Elob ǁîb kai ǀgaiba ra sîsen-ū ǃkhaisa ge mû îb Israelǁaesa sâu xawe Faraob tsî ǁîb ǃkham-aogu tsîna ǂāxa hurib ǃnâ hîgāgā.—Eks. 14:24-28; Psa. 136:15.

⁸ Moseb ge Israelǁîna Egipteba xu a doe-ūs khaoǃgân ge Israelǁîna hoaǁae ǃgomsina ge ūhâ i. Xaweb ge Moseba gere mû matikōseb ge Jehovaba ǁîb di khoen ǀkha ǃnūǃnâxasiba ūhâ i ǃkhaisa. (Psa. 78:40-43) Moseb ge Jehovab di tsamtsîǃnâsib tsîna ge mû ǁîb ge ǂgan bi o îb tā Israelǁaesa hîgāgā.—Eks. 32:9-14.

9. Hebreǁîn 11:27 ǃnâ i ra ǁgau-e khamib Moseba matikōse ǃgâi ǀhōsagusisa Jehovab ǀkha ge ūhâ i?

⁹ Eksodus khaoǃgâb ge Moseba kaise ǀgū ǀhōsagusisa Jehovab ǀkha ge ūhâ i nēs ge ǁîb di ǀhomsi ǁGûbab ra  mû khami gere tsâ kai bi. (Khomai re Hebreǁîn 11:27.) ǁÎkha ǀhōsagusis matikōse ge ǀgū isa ǁgaus ǃaromas ge Elobmîsa ra mî: “Tsîb ge ǃKhūba aisa xu ais ǃoa Moseb ǀkha gere ǃhoa, ǀhōsa-i ǁî-i di ǀhōsa-i ǀkha ra ǃhoa khami.”—Eks. 33:11.   

10. Jehovaba ǃgâise ǂans ǃaroma da tae-e nî dī?

¹⁰ Tae-e da go ǁkhāǁkhāsen? Jehovaba ǃgâise ǂans ǃaroma da ge ǁîb ǀgaugu xa ǀgui ǁkhāǁkhāsen tide xawe ǁîb ǂâis tsîna nî dī. Jehovab di ǂâis ge nētsē “khoen hoan nî ǃgâiǃō, tsîn nî amab di ǂans tawa sīsa.” (1Tim. 2:3, 4) ǀGui ǀgaus Elob di ǂâisa da ra dīs ge nau khoena Jehovab xa ǁkhāǁkhāsa.

11. Nau khoena da Jehovab xa ra ǁkhāǁkhā hîna da mati ǁîba ǃgâise a ǂan ǁkhā?

¹¹ Nau khoena da ga Jehovab xa ǁkhāǁkhā o, o da ge sada tsîna Jehovaba ǃgâise ra ǂan. Aiǁgause da ge Jehovab di tsamtsîǃnâsiba ra mû khoen hîna ǂhanu ǂgaoga amaba ūba hâna ǃoab ra daoǁgau da hîna. (Jhn. 6:44; ǃNǃkh. 13:48) Elobmîs ǀgaiba ūhâ ǃkhaisa da ge ra mû sada Elobmîsa ra ǁkhāǁkhā khoen ga ǁîn di ǁgai ǀgauga xū ūdawasen tsî ǀkharaǀkharana ǁîn ûigu ǃnâ dī o. (Kol. 3:9, 10) Tsî da ge Elob di ǃnūǃnâxasiba ra mû ǂguinab ra sada ǂharidi ǃnâ ǁaeba mā hîna în ǁîb xa ǁkhāǁkhāsen tsî sâuhe ǁkhā.—Rom. 10:13-15.

12. Eksodus 33:13 ǃnâ i ra ǁgau-e khamib ge Moseba tae-e ǂgan tsî tae-i ǃaroma?

¹² Moseb ge Jehovab ǀkhab ge ūha i ǀhōsagusisa gere ǃgôaǃgâ. Jehovab ge Moseba ge sîsen-ū ǀgaisa sîsenga dīs ǃaroma tsî nēs ǃaromab ge Moseba Jehovaba ǃgâise ge ǂan i. Xaweb ge Moseba noxoba Jehovab huiba ge ǂgan îb ǁîba ǃgâise ǂan. (Khomai re Eksodus 33:13.) Moseb ge ge 80 kurixa i nēsab ge ǂgan o ǁîb ge ge ǂan i noxoban ǂgui xūna hâsa ǁîb ǀnamxa ǀhomsi ǁGûb xa ra ǁkhāǁkhāsen ǂgaona.

13. Mâpa ǀgui ǀgaub hîna ra ǁgauba Elob ǀkha da ūhâ ǀhōsagusisa da ra ǃgôaǃgâsa?

¹³ Tae-e da go ǁkhāǁkhāsen? Matikō gaxuse da ga Jehovaba ǃoaba xawe da ge tā ǁîb ǀkha da ūhâ ǀhōsagusisa ǁau xū-i ase nî ū. ǀGui ǀgaub hîna da Jehovaba a ǁgau ǁkhās ǁîb ǀkha da ūhâ ǀhōsagusisa da ra ǃgôaǃgâs ge hoaǁae ǁîba ǃoa ǀgoresa.

14. ǀGoresa tae-i amsi a ǂhâǂhâsa Jehovaba ǂans ǃaroma?

¹⁴ Khoe-i ǀkha du ga ǃgâi ǀhōsagusisa ūhâ ǂgao o, o du ge ǁî-i ǀkha hoaǁae nî ǃhoa. Nēs ǃaroma ǃgâi ǀhōsagusisa da ga Jehovab ǀkha ūhâ ǂgao o, o da ge hoaǁae ǁîba ǃoa nî ǀgore tsî tā nî ǃao sada ǂgaogu ǃnâ hâ xūna ǁîba mîbasa. (Efe. 6:18) Kristas hîna Turkib ǃnâ ra hâs ge ra mî: “Mâ ǁaeb hoab hîna ta Jehovaba ǃoa ra ǀgore tsî mû o matib ǁîba ti ǀgorede ra ǁnâu-amsa os ge ti ǂgomsa ra ǀgai. Jehovab ti ǀgorede ra ǃeream ǀgausa ta ra mû o, o ta ge Jehovaba ti ǁGûb tsî ǀhōsab ase ra mû.”

15. Jehovaba Gao-aob Daviba tae ǃnôa khoeb ase ge ǁguiǃā?

¹⁵ Gao-aob Davib ge ǃnae o, on ge ǁîb ǁgûn tsî ǁîb ǂnamipe ge hâ i khoen hoan tsîna Jehovaba gere ǃoaba. Xaweb ge Daviba ǁîb di ǁgûn Jehovaba gere ǃoaba ǃkhais ǃaroma ǀgui Jehovaba ge ǃoaba tama hâ i. ǁÎb ge aitsama Jehovab ǀkha ǀhōsagusisa ge omkhâi tsîb ge Jehovaba ǁîba kaise ge ǀnam i. Jehovab  ge Davib xa ra mî “ti ǂgaob ǃoa ī aob”di. (ǃNǃkh. 13:22) Daviba mati nē ǃgâi ǀhōsagusisa Jehovab ǀkha ge omkhâi?

16. Daviba tae-e Jehovab xa ge ǁkhāǁkhāsen kurusa ǃoa kōs ǃnâ-ū?

¹⁶ Davib ge Jehovab xa ǁîb kurus ǃnâ-ū ge ǁkhāǁkhāsen. Davib ge ǂkharirob ge ī o ǃnāsa ǁaeba ǃgarob ǃnâ ǁîb ǁgûb di gūna gere ǃûi. Nē ǁaeb ǃnâb ge ǀnîsi Jehovab ge kuru xūn xa gere ǂâiǃgâ. Davib ge kōkhâib gere o ǂgui ǀgamirode gere mû xaweb ge ǃnāsa-e ǀgamirodi xa gere mû. ǀGamirode ge kurub di ǀgaugu xab ge ǀgamirodi ǃnâ-ū gere ǁkhāǁkhāsen. Davib ge ge xoa: “ǀHomgu ge Elob di ǃgôaba ra ǃhoa; tsî ǃāǂuisaba, ǁîb ǃomgu di sîsenna.” (Psa. 19:1, 2) Davib ge ǁîb tsî nau khoen a kurusa ǀgaus xa gere ǂâiǃgâ o, ob ge Jehovab di gā-aisiba nēs ǃnâ gere mû. (Psa. 139:14) Davib ge Jehovab kuru hâ xūn xa gere ǂâiǃgâ o, ob ge kaise Jehovab ǃoa-ai ǂkharirose gere mûsen.—Psa. 139:6.

17. Kurus xa ǂâiǃgâsa tae-e a ǁkhāǁkhā da ǁkhā?

¹⁷ Tae-e da go ǁkhāǁkhāsen? Kurus ǃnâ ǃgâiǃgâibasensa ūhâ re. ǁAeba ū tsî Jehovab ge kuruba da îsa xūna ǃoa kō re, nē xūn ǃnâ ǃgâiǃgâibasensa ūhâ re. Tsēkorobe sadu ǂnamipe hâ xūn, hain, xamanin tsî khoen tsîn Jehovab xa ra ǁkhāǁkhā du xūn xa ǂâiǃgâ re. O du ge mâ tsēs hoasa sadu ǀnamxa ǁGûb xa xū-e a ǁkhāǁkhāsen ǁkhā. (Rom. 1:20) Tsî du ge nî mû matib sadu ǀnamma tsēs hoasa ǁîb ǃoa-ai ra ǀgai ǀgausa.

18. Psalmdi 18 ǃnâ i ra ǁgau-e khamib Daviba tae-e ge ǂanǃgâ?

¹⁸ Davib ge ge mûǂan Jehovab da hui bi ǃkhaisa. Aiǁgause Davib ge xammi tsî bērs tsîra hîna ǁîb ǁgûb gūna gere ǂû ǂgaorab gere ǃkhamǃoa o, o ge mûǂan Jehovab ǁnā ǀgaiba gere mā bisa. Goliatab ge ǃgam o, ob ge Daviba ge mûǂan Jehovab nēs ǃnâ gere daoǁgau bi ǃkhaisa. (1Sam. 17:37) Tsîb ge tauxa Gao-aob Saula xu a ǃgoebē o, ob ge Daviba ge mûǂan Jehovab ge hui bi ǃkhaisa. (Psa. 18) Davib ga ǀgapiǂâixa hâ o, ob ge ga ǂâi hâ ǁîb nē xūna aitsama ge dī di. Xaweb ge Daviba ge tsamtsiǃnâ ī tsî Jehovab huiba nēn hoan ǃnâ ge mû.—Psa. 138:6.

19. Tae-e da Davib aiǁgausa xu a ǁkhāǁkhāsen ǁkhā?

¹⁹ Tae-e da go ǁkhāǁkhāsen? Jehovab huiba ǂgans xa da ge ǃnāsa-e nî dī. Mâ ǁae tsî mâpab da huida ǃkhais tsîna da ge nî ǂanǃgâ. Tsamtsiǃnâ da ga o, o da ge nî ǁnâuǃā hoa xūna da a dīhō ǁoa ǃkhaisa tsî da ge nî mûǂan Jehovab dīhō ǁoa da a xūna dīs ǀkha ra huida ǃkhaisa. Mâ ǁaeb hoaba da ga Jehovab huiba mûǂan o, os ge ǁîb ǀkha da ūhâ ǀhōsagusisa nî ǀgai. ǃGâsab Isaki hîna Jehovaba ǂgui kuriga ge ǃoabab Fijib ǃnâ ra hâb ge nēs a ama ǃkhaisa ge mûǂan. ǁÎb ge ra mî: “Kō-oa ta ga o, o ta ge Jehovab huib hînab Elobmîsa ta ge ǁkhāǁkhāsen tsoatsoa tsî nēsis kōse ra māteba ra mû. Nēs xa ǃaroma-e hâse ta ge Jehovaba ama khoeb ase ra mû.”

20. Tae-e da Davib ge Elob ǀkha ūhâ i ǀhōsagusisa xu a ǁkhāǁkhāsen ǁkhā?

²⁰ Davib ge Jehovab ǀgauga gere ǁgae. Jehovab ge ǁîb ǀgauga da a ǁgae ǁkhā ǀgaub ǃnâ ge kuru da. (Gen. 1:26) Jehovab ǀgaugu xa da ga ǃnāsase ǁkhāǁkhāsen o, o da ge ǁîba ǃgâise a ǁgae ǁkhā. Davib ge ǁîb di ǀhomsi ǁGûba ǃgâise ge ǂan i tsî nau khoen ǀkhab gere sîsen o ǁîb ǀgauga ge ǁgae ǁkhā i. Nē aiǁgaus  xa ǂâi re. Davib ge Jehovab ǃoa-ai ge ǁore Batsebas ǀkhab ge ǁgoe tsî ǁnās khaoǃgâ ǁîs aoba ǃgam o. (2Sam. 11:1-4, 15) Xaweb ge Jehovaba Daviba ǀûbasa ge ǁhûi ǁîb tsîn nau khoena gere ǀûba amaga. Davib ge ǃgâi ǀhōsagusisa Jehovab ǀkha ūhâ i amagab ge ge Israeli di Gao kai. Tsîn ge Israelǁîna ge ǀnam bi i tsîb ge Jehovaba ǃgâi aiǁgaus ase nau Gaogu ǃoa gere sîsen-ū bi.—1Gao. 15:11; 2Gao. 14:1-3.

21. Efeseǁîn 4:24 tsî 5:1 ǃoagu i “Elob di ǁgaeǁgae-ao” kaisa tae ǀamǂoasa ūhâ?

²¹ Tae-e da go ǁkhāǁkhāsen? “Elob di ǁgaeǁgae-ao” kai da ge nî. Eloba da ga ǁgae o, o da ge nēsa xu ra ǀama tsî ǁîb xa ǃnāsana ra ǁkhāǁkhāsen. Jehovab ǀgauga da ga ǁgae o, o da ge ǁîb ǀgôa da a ǃkhaisa ra ǁgau.—Khomai re Efeseǁîn 4:24 tsî 5:1.

22-23. Jehovab xa da ra ǁkhāǁkhāsen xūna da ga ûiǂui o, o i tae-e nî ī?

²² Mû da go se da ge Jehovab xa ǁîb kurus tsî Elobmîs ǃnâ-ū a ǁkhāǁkhāsen ǁkhā. Elobmîs ge ǂgui ǂgomǂgomsa ǃoaba-aon Elob din di aiǁgaudi xa ǀoa hâ, aiǁgause Moseb tsî Davib. Jehovab ge ǁîb nî dīse ī-e ge dī. Sada ge sada ǀkhāba hā-ū tsî ǁîb xa ǁkhāǁkhāsen ǁkhā da a xūn hoana nî ǁkhāǁkhāsen.

²³ Jehovab xa da ge ǁkhāǁkhāsen ǀû tide. (Aoǁn. 3:11) Jehovab xa da matikō xūna a ǂans ge ǂhâǂhâsa tama hâ xawe ǂan da a xūn ǀkha da tae-e ra dīsa. ǁKhāǁkhāsen da ra xūna da ga ûiǂui tsî sada ǀnamǀnamxa ǁgûba ǁgae o, ob ge sada ǃoa nî ǀgū. (Jak. 4:8) ǁÎb mîs ǃnâb ge ra mîba da ǁîb ǁnān hîna ǁîb xa ra ǁkhāǁkhāsen ǂgaona ǁnāxūǃnâ tidesa.