ǃGôagu hâ ǃgamme hâ khoera ge ra tsâbagu. ǁNâugu tama ra ga i xawes tsîna. “Nē ǃgamme hâ khoera ge mā-am tide ǀgorasa” dis ge ǂkhanis “Ten Lessons to Transform Your Marriage” di hâsa ra mî. “ǁÎra ge ǃgomsina ra ǃhoaǂui. Tsîra ge ǃgôasib ǀkha ra ǃgâgu. Tsîra ge ǃgâi ǀgaub ǃnâ ra omkhâigu, tsî ra sîsenǁae.”

Elobmîs daoǁgaudi: ‘ǀNammi . . . ǁîb di ǃgâi-e ôabasen tama hâ.’—1 Korinteǁîn 13:4,5.

“Ti tarasa ǃgôaǃgâs ge ra ǂâibesen, ǁîsa ǀgapiǃgôa. Tsî da ǁîsa nî tsûtsû xū-e dī titesa tamas ka io ǃgammeba nî tsûtsû-e.”—Micah.

ǃGôasib ga ǃgammeb ǃnâ ǀkhai o. O i ge ǃgai sîsenǁaeba hâ tama. Tsî ge mîǁgaiǁgaigu ǂkhaba-ôab tsî ǃgôaoǃnâsib ǀgauga ra tsoatsoa. Ôaǃnâ-aon go ǀapise a mîga ǃgammeba ǀgoras xa.

“ǃGâi tama mîna ǃgamme du hâ taras ǃoagu mîs ge ǁîs di ǃgôasiba ra ǁgaiǁgai. Tsî ǁîs ūhâ ǂgomǃgâb ǃgammeb diba ra kôa.”—Brian.

AITSAMA ÔAǃNÂSEN RE

ǃGaoǃgâ re, sadu ǃhoa ǀgaub tsî tanisen ǀgaub tsîna wekheb ǀgaiba. Tsî ǁnāpaxū dîsen re:

• ‘Matikō ǃnāde ta ǃgamme u da hâ khoe-e ǁgai mîna ra mî. Tsî mati go ǃnâde ta ǁî-e ra khoa?’

• ‘Mâ ǀgaub ǃnâ ta ǃgamme ū ta hâ khoe-e ǃgôasiba ra ǁgau?’

SADU ǃGAMME HÂ KHOE-I ǀKHA ǃHOA RE

• Mâ tanisen ǀgaub tsî ǃhoa ǀgauba saro nî hui. Î ro ǃgôagu ro rase tsâ?

• Mâ tanisen ǀgaub tsî ǃhoa ǀgauba saro ǃgôagu tamase ra tsâ kai?

ǀAPEMĀDI

• ǃNona ǀgauga xoa re hîna nî hui duga ǃgôasiba ǁgaus ǃgao. Sadu ǃgamme ūhâ khoe-i tsîna nēsa go dī. Xoaro go xūna māgu re. Tsî xoasa xūna dī re, ǃgôasiba nî omkhâina ǃgamme du hâ khoe-i ǃoagu.

• Sadu ǃgamme ūhâ khoe-i di ǃgâi ǀgauga xoa mâi re, hîna a ǃgâiba du ga. Tsî ǁî-e mîba re, ǁî-e du ra ǃgôaǃgâsa.

“Ti aoba ǃgôaǃgâsiba ǁgaus ge ra ǂâibasen, ǁîba da tita ra hâ-ū ǀgaub ǁîba nî ǂkhî kaisa. ǂKhari xūn hîna ta ǁîba ra dīban tamas ka io ǃhoan ge nî ǁgau ǁîba ta ama ǃgôasiba ūba hâsa.”—Megan.

ǀAms ai i ge sado ǃgôahesa ǂhâǂhâsa tama. Xawe sadu ǃgamme hâ khoe-i ǃgôasase nî tsâs ge a ǂhâǂhâsa.

ELOBMÎS DAOǁGAUDI: “Tsî ǀnamsan ase ana . . . ǀkhomxaǂgaosib, khoexasib, ǃgamǃgamsens, tsamtsiǃnâsib tsî ǃnūǃnâxasib tsîna.”—Koloseǁîn 3:12.