Acul di ǀons hâ ǃās ǃnâb ge ge ǃnaehe. Guatemala di ǀons hâ ǃhūb ǃnâ. Sida ǁaes ge Ixil di ra ǂgaihe. Nē ǃhaos ge Maya ǃhaosa xu ra hā. Tita ge Spanish gowab tsî sida gowaba ra ǃhoase ge khâi. Kaikhâi ta ge o, o ge Guatemalas ǃnâ toroba 36 kuriga ge hâ i. Tsî sida ǁaes khoen ge ǂguise ge ǁō.

Tita ge haka kurixa i o. Ob ge ti ǃgâsaba bombs ǀkha gere ǀhuru. Tsîs ge ǁnā bombsa ge ǃhûi. Tita ge ǁnās xa ǃaromahe hâse ge mû ǀū. Tsî ti ǃgâsab ge ge ǁō. ǂKhamsisa xu ta ge ǂgī hân ǃkhaib ǃnâ gere hâ, Guatemalas ǃnâ. Khomaisa ta ge ge ǁkhāǁkhāsen, ǂgī khoen ǃgao hâ ǂkhinin ǃnâ-ū. Khoen hîna gere ǁkhāǁkhā ten ge ge ǂhâba tama hâ i. Î ta nau ǀgôan ǀkha ǃhoa. ǀGuri tsâsen ta ge gere. Ti masa ǃoa ta ge gere oa ǂgao. Mâ kurib hoaba ta ge ti masa gere sari. ǁÎs ge kaise ge ǀkhomxaǃnâ i tsî ge ǃgâi i. Xawe ti mas ge 10 kurixa ta ge o, o ge ǁō. ǁÎs xa ǀgui ta ǀnam-e ǃkhais ge tita ge tsûtsû.

Disiǀguiǀā kurixa ta ge o. O ta ge kai khâi ta ge ǃās ǃoa ge oa. Tsî ta ge di ǃgâsab tsî ǀaokhoen ǀkha gere hâ. ǁÎn ge tita gere kōǃgâ. Xawe i ge khoe-e di ǂgaob ǃnâ gere īn ǀkha ge hui te tama hâ i. ǀNî ǁaegu ai ta ge Elob ǃoa gere ǀgore tsî gere mî: “Tae-i ǃaromas ge ti masa ǁō? Tae-i ǃaroma ta a ǂgī?” Khoen ge gere mîba te nē xūn ge Elob di ǂâisa. Ti ge gere mî, Elob ǃgâi tamasa tsî a ǂhanuoǃnâsa. ǃGamsens ǃaroma-e ta ge ge ūhâ tama hâ i.

ǂGī ta ge i ǃaromas ge sorosise tsî ǂgaob ǃnâ gere ǂkhabu kai te. ǂKham ta ge io, o ta ge ge ǀgaiǃkhōhe ǂgui ǃnāde. Khoe-e ta ge ǁnāsa ge mîba tama hâ i. Khoen ge ǁae tide di ta ge gere ǂâi. Khoen ge tita ǀkha ge ǃhoa tama hâ i. Tsî ta ge khoe-i ǀkha ge ǃhoa tama hâ i. Kaise ta ge ge ǂkhabuǂâi hâ i. Tsî ta ge khoena ge ǂgomǃgâ tama hâ i.

ǂKham ta a hîna ra ge Jehovab di ǃoaba-aora skoli sâǁaeb ai ge sari te. ǀGui ǁgauǃnâ-aos ge kaise gere ǀkhom te. Tsî ge mî, îra nē khoera ǁkhawa sari te. ǁÎra ge ge mîba te Elobmîs ge ra mî, ǁō hân nî khâisa. Tsî ǂgī hân nî ǀgui tsē mûsa. (Jesajab 35:5; Johaneb 5:28, 29) ǁÎra gere ǁkhāǁkhā te xūn xa ta ge ge ǃgâibahe i. Xawe ta ge ge ǃgombahe i, ǁîn ǀkha ǃhoasa. Tita ge ge ǁnaeti tama hâ i, khoen ǀkha ǃhoasa. Taoxa te ge i xawe ra ge ǀûsen tamase gere sari te. Tsî Elobmîsa gere ǁkhāǁkhā te. Nē ǀgam khoera ge 10 kilona gere ǃgû, ǃhommi [ǀhomagu] nauǀkhāba xu. Tita tawa hāsa.

Ti ǃgâsab ge ge mîba te ǃamkuse ra ana khoera ge. Xawe ra ge ǃkhū tama hâ. Xawe ra ge tita xa ge ǃgâibahe i. Tsîra ge ǀkhae xūn tsîna gere mā te hā. Ama Xristeǁîn ǀguin ge ǁnāti ī xūna ra dī tita ge ge mî.

Tita ge Elobmîsa ǂgī khoen ǃgao hâ ǂkhinin ǃnâ-ū ge ǁkhāǁkhāsen. ǀNî xūna ta ge gere ǁnâuǃā. Xawe ǀnîna ta ge ge ūǃoa ǂgao tama hâ i. Aiǁgause, ta ge ge ǂgom tama hâ i. Elob ra tita tsâba ǃkhaisa. Tsî ǀnî khoen nî tita Elob xa ǁkhāǁkhāsa ta ge ge ǂgom tama hâ i. ǁNâuǃā ta ge gere Jehovab tae-i ǃaroma ǁgai xūna ra mā-amsa. Xawe tita ge ǁîba ǀnamxaǃnâ ǁGûb khami ge mû tama hâ i. *

Elobmîsa xu ta gere ǁkhāǁkhāsen xūn ge ti ǂâi ǀgauba ge dawa. Aiǁgause, ta ge ge ǁkhāǁkhāsen Elob ǃgomma ra tsâ khoena ra kōǃgâsa. ǁÎb ǃoaba-aon ge ǁgaise gere hâ ūhe o. Ob ge Eloba sao ra-e ge mî: “Tita ge go mû ti ǁaes Egipteb ǃnâ hâs di ǁgâiǀāba, tsî ta ge ǁîn di ǃausa go ǁnâu.” (Eksodus 3:7) Jehovab di ǃgâi ǀgaugu ge ge dī, î ta ti ûiba māǁnâ. 1998ǁÎ kuri ta ge ge ǁāǁnâhe, Jehovab di ǃoab-aon di ǀgui-i ase.

ǁĀǁnâhe toahe ta ge o, o ta ge ǂgī khoen skoli Escuintla ǃās ǀgūse ge ǂgâ. ǀGui ǀhaohâb ǃûi-aob ge ge ǁnâu ǃgomse ta ra ǀhaodi ǃoa īsa. Sida ǀgūse ge hâ i, ǀhoahâb ge ǃhommi nauǀkhāb ai ge hâ i. Tita gere sari ǃgâsara ge ǁnā ǃhomma hoaǁae gere sîsenū. Xawe ǁnāsa dīs ge tita ge ǃgomba i. Escuintlas ǃnâ hâ omaris tawa ta ge ge sī hâ. Nē ǀhaohâb ǃûi-aob ge ǁnāsa ge aiǂhomiba te. Î ta ǀhaode hâǃnâ ǁkhā. Nē omaris ǁanin ge nētsēs kōse ra kōǃgâ te.

ǂGui aiǁgaudi xa ta ge a ǃhoa ǁkhā. Matin ge ǀhaohâb ǃgâsana ǀnamma ǁgau te ǀgausa. Nē xūn ge ra ǁgau te, Jehovab ǃoaba-ao ta asa. Tsî ta ge a ama Xristeǁî.—Johaneb 13:34, 35.

Xū tama i khami ta ge tsâ tama hâ. Tsî nēsi ǃâubasensa ūhâ. Ti ûib ge ǂâibasense ūhâ. Jehovab di ǃoaba-ao-i ase ta ge nau khoena amaba ǁkhaǁkhās ai ti ǂâisa ra ǂnûi. Ti ǃhorasib ais ose. Nēsi ta ge a ǀhaohâb ǃûi-ao. Tsî ǃhoadi tsîna ta ge ra mā ǀhaohâb tawa. ǀKharib kai ǀhaodi tawas tsîna ta ge ǃhoade ra mā.

2010ǁÎ kuri ta ge ǀhaohâb hui-aogu skoli tawa ge hâ i, El Salvadori ǃnâ. ǁNā skoli ge ge hui te, î ta ǀhaohâb ǃnâ ta ūhâ ǃereamde ǃgâise kōǃgâ. ǁNā ǁkhâǁkhās ge ge hui te, î ta khoe-i khami tsâ. Tsî Jehovab ge mâ khoe-i hoa-e a sîsenū ǁkhā.

Jesub ge ge mî: “Mās ge ūs ǃgâ-ai a ǃgâi.” (ǃNaeǃkhaidi 20:35) Nētsē ta ge amabes ǃnâ a mî ǁkhā ǂkhî ta asa. Tsî nēsi ta ge khoena a hui ǁkhā.