KEMA itstoya ipan tepetl Olivos, kampa kuajkualtsi nesiyaya Jerusalén uan teokali, nauij apóstoles kitlajtlanijkej Jesús kema itstoya iselti ma kinixtomili tlen kiijtojtoya. Pampa kinoniljuijtoya nopa teokali kitlamisosoloskiaj, uan achtouia kiniljuijtoya tlen kema tlamiskia nochi tlen mochijtok ipan Tlaltipaktli (Mateo 13:40, 49). Yeka kitlajtlanijkej: “Xitechiljui tlachke tlaneskayotl onkas kema timokuepas uan nechkatitos para tlamis ni tonali” (Mateo 24:3).

Kema kinnankilik, kuali kiniljuik tlake panoskia kema nechka kisosoloskiaj Jerusalén uan teokali. Nopa tlen kiijtok mochiuaskia san se kentsi, pampa teipa moaxitiskia ipan nochi Tlaltipaktli. Inijuantij kimatiskiaj kema sampa itstoskia Jesús, tlaj kuali kitlachilijtosej tlen kinextiskia: miak tlamantli katli panoskia san sejko. Ni nesiskia kema Mesías iTlanauatijkayo tekichijtos uan Jehová ya kitekitlalijtos Jesús kej Tlanauatijketl, no kinextiskia ni tlanauatijkayotl nechka kitlamiltis tlen amo kuali uan kichiuaskia sampa ma onka tlayolseuilistli ipan nochi Tlaltipaktli. Nochi tlen Jesús kiijtok panoskia, kuali kinextiskiaj moaxitiskia kema kitsontlamiltiskiaj tlen nama onka ipan Tlaltipaktli —religiones, política uan kej monejnemiltiaj maseualmej— uan no kinextia kenijki peuaskia se yankuik Tlaltipaktli.

Jesús kiijtok, kema peuaskia tlanauatis ne iluikak, ipan nochi Tlaltipaktli onkaskia uejueyi tlauilankayotl, mayantli, kokolistli uan moliniskia tlali. Ayokmo kitlepanitaskiaj tlanauatili. Nojkia, katli melauak itokilijkauaj kimoyauaskiaj nopa kuali tlajtoli tlen toTeotsij iTlanauatijkayo. Kema motlamiaxitiskia tlen Jesús kiijtok panoskia, onkaskia “se ueyi tlaijiyouilistli”, tlen amo kema tlauel tetlaijiyouiltijtok. (Mateo 24:21).

¿Kenijkatsa kimatiskiaj Cristo itokilijkauaj kema monechkauiskia ueyi tlaijiyouilistli? Jesús kiniljuik itokilijkauaj: “Xijmachilikaj tlen nimechiljuia [...]. Kema moseliltia se higuerakuauitl” (Mateo 24:32). Kema se higokuauitl peua chamani, kiijtosneki nechka tlauel tlatotonias. Nojkia, kema san sejko panoskia nochi nopa tlamantli tlen Jesús kiijtok, momatiskia nechka tlamiskia tlen amo kuali. No kiijtok san iTata kimati tlake tonali uan tlake hora peuaskia ueyi tlaijiyouilistli. Yeka, tetlajtolmakak: “Xitlachixtokaj kuali [...] pampa axinkimatij kema asis nopa tonal” (Marcos 13:33).

(Mokixtijtok ipan Mateo capítulo 24 uan 25, Marcos capítulo 13 uan Lucas capítulo 21.)