Ximoiljui ni: kipia ome metstli, Heather uan Mike pejkej moixmatij. Maske amo uejkajtok, Heather kimati kejuak panotoskia miak xiuitl itstok iuaya. Se tonal san motlajkuiljuiliaj uan monojnotsaj ipan teléfono, uan maske ayamo tlamij kiijtouaj tlen kinekij moiljuisej, inijuantij ya kimatij tlake kiijtosej. Nojkia, Mike ayokmo san kineki monojnotstos iuaya Heather.

Ipan nopa ome metstli tlen panotok, Mike uan Heather san momaitskitokej uan san kemantika motsoponijtokej. Maske Heather amo kineki kichiuas seyok tlamantli, nojkia amo kineki ma kikaua Mike, pampa moiljuia san ya tlauel kipatiita uan yeka kema itstok iuaya, tlauel kuali kiyolmati. Yeka moiljuia: “Uelis amo kenijki, pampa nelia tlauel timoikneliaj”.

Tlaj ta ya uelis tinemis iuaya se akajya uan nojkia mitspanoskia kej Heather, ¿tlake tijchiuaskia?

¿Tlake panoskia tlaj timokuamajkauaskia tlen se kuauitl san pampa tijneki tipatlanis? Tlauel timokokoskia kema tiuetsis pampa tojuantij amo tiuelij tipatlanij. Nojkia kiampa panos tlaj ta tikixpanos se tlanauatili tlen toTeotsij techmakatok, kej katli ijkuilijtok ipan 1 Tesalonicenses 4:3: “Axaka tlen inmojuantij ma kichiua tlamantli ika se tlen axinamik”. Ni kiijtosneki amo timomekatisej uan amo timotekasej iuaya se akajya tlaj amo timosenkajtokej.

¿Tlake panoskia tlaj amo tijneltokaskiaj nopa tlanauatili? Biblia kiijtoua: “[Katli] kichiua tlen ueli ika tlen axinamik kitlanauia itlakayo ika nopa tlajtlakoli” (1 Cor. 6:18). ¿Tlake kiijtosneki ni?

 Kema kintlajtlanijtokej telpokamej uan ichpokamej kenijkatsa kiyolmatij pampa motektokej iuaya se akajya, miakej kiijtouaj kiyolmatij se tlen ni tlamantli:

• MOYOLKUEPAJ. Miakej telpokamej uan ichpokamej moyolkuepaj uan tlauel moyolkokouaj pampa motejkej iuaya se akajya kema ayamo mosenkajtoyaj, uan kiijtouaj tlauel kuali tlaj amo kichijtoskiaj nopa.

• AMO MOTEMACHIAJ. Kema motekaj iuaya se akajya, teipa moiljuiaj: “¿Iuaya ajkia nojkia ya motejki?”.

• MOYOLKOKOUAJ. Miakej ichpokamej kinekij itstosej iuaya se akajya katli uelis kinmokuitlauis uan amo iuaya se akajya katli san kineki motekas ininuaya. Uan miakej telpokamej amo kinekij itstosej iuaya se ichpokatl katli san motektinemi ininuaya sekinok.

• ¿Tlake techmachtia? Tlaj timotekas iuaya se akajya kema ayamo timosenkaua, tijnextiskia tlauel amo timopatiita (Rom. 1:24). Motlakayo nelia tlauel ipati. Yeka, ¡kuali xijmokuitlaui!

Ximomokuitlaui uan amo ximoteka iuaya se akajya tlaj ayamo timosenkajtok (1 Tes. 4:3). Kema timosenkauas, uelis tijchiuas nopa. Kej nopa amo mitspanos kej katli motekaj iuaya se akajya maske ayamo mosenkauaj, pampa ta amo timoyolkokos, amo timoyolkuepas yon amo timotekipachos (Prov. 7:22, 23; 1 Cor. 7:3).

• Tlaj se akajya mitsiknelia, ¿kinekiskia xijchiua se tlenijki tlen kichiuaskia ayokmo kuali xiitsto o ayokmo kuali xijyolmati?

• Tlaj se akajya kineki kuali xiitsto, ¿mitsiljuiskia xijchiua se tlamantli tlen kichiuaskia ayokmo kuali ximouika iuaya toTeotsij? (Heb. 13:4).