“Nimoskaltik ipan se pilaltepetsi tlen mokaua ika norte” kiijtoua Dauda, katli eua altepetl Sierra Leona. “Kema nieliyaya nisiuapil, nouikaljuaj mokualanijkej ininuaya sekinok pampa kinekiyayaj mokuilisej se tlali. Nochi kiijtouayayaj nopa tlali eliyaya ininaxka. Yeka kinotskej se tetlajchiuijketl ma kinpaleui. Nopa tetlajchiuijketl kiitskiltik se tlakatl se teskatl uan kiixtsajki ika se yoyomitl chipauak. Teipa, nopa tlakatl pejki uiuipika uan mitonia. Kitlachilik nopa teskatl uan kiijtok: ‘¡Nikita se ueuentsi monechkauijtiuala! Moyoyontijtok chipauak, uejkapantik, ya ueyi, itsonkal chipauak uan kuitlapanuijkoltik’.

¡Kiampa eliyaya noueyitata! Nopa tlakatl tlauel majmauiyaya, uan chikauak kiijtok: ‘¡Tlaj amo innechneltokaj, xiualakaj xijtlachilikij ipan ni teskatl!’. ¡Amo aka kinechkauik! Uajka nopa tetlajchiuijketl kinejki kiyoltlalis nopa tlakatl, yeka kiatsejtseljuik ika se xiuiatl tlen kiuikayaya ipan se ayojtli.

Ika nopa tlakatl tlen kiitskitoya nopa teskatl, ‘noueyitata’ kiijtok nopa tlali eliyaya ininaxka nochampoyouaj. Kiiljuik noueyinana ma tlatojtoka nopaya uan amo ma motekipacho. Nopa sekinok maseualmej ayokmo tleno kiijtojkej. Kiampa mosenkajki nopa kuesoli”.

Miakej kiampa momajtokej kichiuaj ipan África occidental. Nopaya uan kampa ueli ipan Tlaltipaktli, tlauel miakej maseualmej moiljuiaj katli miktokej yauij kampa itstokej tonaltsitsij, uan nopaya kinualtlachiliaj maseualmej katli itstokej ipan Tlaltipaktli uan uelij kinpaleuiaj o kinchiuiliaj tlen amo kuali. ¿Nelia melauak tlen kineltokaj? ¿Nelnelia nojua itstokej katli ya mijkej? Tlaj amo nelia, ¿ajkia inijuantij elij katli monextiaj? Tlauel techpaleuis tlaj tijmatisej kej monankilia ni tlajtlanili. Kiampa uelis timomanauisej o amo.